ଯୋହନଙ୍କ ଲିଖିତ ପ୍ରଥମ ପତ୍ର
ଯୋହାନ୍ ଅଲାକାଦ୍ ପାହିଲା ଚିଟାଉ
ପାରିଚାଏ
ଯୋହାନ୍ଆଃ ପାହିଲା ଚିଟାଉ ୟୀଶୁ ଖ୍ରୀଷ୍ଟ୍ଆଃ ଜାନାମ୍ ତାୟମ୍ତେ ୫୦ – ୧୦୦ କରେ ପ୍ରେରିତ୍ ଯୋହାନ୍ଆଃ ହରାତେ ଅଲାକାନା । ଯୋହାନ୍ ଆଇଃକ୍କେ ଅନଲ୍ନିଃ ଲେକା ପାରିଚାଏ କାଏ ଏମ୍, ମେନ୍ଦ ପାହିଲା ଆଧ୍ୟାୟରେ ଇନିଃ ୟୀଶୁ ଖ୍ରୀଷ୍ଟ୍ଆଃ ଜୀଦାନ୍ ଆଡଃ ଜୀଉବିନିରିଦ୍କେ ମେଦ୍ତେ ନେଲାକାଦ୍ନିଃ ତାନିଃ ମେନ୍ତେ ସାରିୟଃତାନା ୧:୧-୩ । ପାହିଲା ଯୋହାନ୍ରେୟାଃ ଅନଲ୍ ତାରିକା, ଯୋହାନ୍ ଅଲାକାଦ୍ ସୁକୁକାଜିରେୟାଃ ଅନଲ୍ ତାରିକାଲଃ ମିଦ୍ଜକା ଲେକାଗି ନେଲଃଆ । ନେଆଁ ବିଶ୍ୱାସଃ ତାନା ଯେ, ଇନିଃ ଏଫିସୁସ୍ରେ ତାଇକେନା ଇମ୍ତା ଯୋହାନ୍ ଅଲାକାଦ୍ ସୁକୁକାଜି ଆଡଃ ଯୋହାନ୍ଆଃ ଆପିୟା ଚିଟାଉ ଅଲାକାଦାଏ, ଏନା ହବାଅଃତାନା, ୧ ଯୋହାନ୍, ୨ ଯୋହାନ୍, ୩ ଯୋହାନ୍ ।
ସେଣାଁନ୍କ ମେନ୍ତେ କାଜିୟଃତାନ୍ ଝୁଣ୍ଡ୍ରେନ୍ ହଡ଼କ ହରାତେ କାଲିସିୟା ସାଙ୍କାଟ୍ରେ ତାଇନଃ ତାଇକେନ୍ ଦିପିଲିରେ ଯୋହାନ୍ ସବେନ୍ ଖ୍ରୀଷ୍ଟିୟାନ୍ ହଡ଼କକେ ନେ ଚିଟାଉ ଅଲାକାଦ୍କ ତାଇକେନାଏ । ଇନ୍କୁ ବିଶ୍ୱାସାଃକ ଯେ, ୟୀଶୁ ସାର୍ତିଗି ପୁରା ପାର୍ମେଶ୍ୱାର୍ ତାନିଃ, ମେନ୍ଦ ଅତେଦିଶୁମ୍ରେ ତାଇକେନ୍ ଦିପିଲିରେ ଇନିଃ ମାୟୋମ୍, ମାସ୍ ହଡ଼୍ମରେନ୍ ସାର୍ତି ମାନୱା ହଡ଼ ନାହାଁଲିଃ । ଯୋହାନ୍ ୟୀଶୁ ଖ୍ରୀଷ୍ଟ୍କେ ମେଦ୍ତେ ନେଲାକାଇନିଃ ତାନିଃ ଆଡଃ ଆୟାଃ ତିଃଇ ୟୀଶୁକେ ଜୁଟିଦ୍କାଇ ହରାତେ, ଇନିଃ ନେଆଁ ଅଲାକାଦାଏ ୧:୧-୩ । ଯୋହାନ୍ ଆୟାଃ ରାସ୍କାକେ ପୁରାଏତେୟାଃଗି ନେ ଚିଟାଉ ଅନଲ୍ରେୟାଃ ଉଦ୍ଦେଶ୍ ତାନାଃ ୧ ଯୋହାନ୍ ୧:୪, ଆଡଃ ବିଶ୍ୱାସୀକକେ ପାପ୍ କାମିହେତେ ହକାକ ନାଗେନ୍ତେ, ୧ ଯୋହାନ୍ ୨:୧ ଆଡଃ ହସଡ଼ ଇନିତୁହେତେ ବିଶ୍ୱାସୀକକେ ବାଞ୍ଚାଅକ ନାଗେନ୍ତେ ୧ ଯୋହାନ୍ ୨:୨୬ ଆଡଃ ଏନ୍ ବିଶ୍ୱାସୀକ ବାଞ୍ଚାଅକାନାକ ଏନା ସାର୍ତି ତାନାଃ ମେନ୍ତେ କାଜିକନାଙ୍ଗ୍ ୫:୧୩ ।
ପୁଥି ଭିତାର୍ରେ ତାଇକାନ୍ କାଜି
୧. ଯୋହାନ୍ ଆୟାଃ ଚିଟାଉରେ ପାରିଚାଏ ଉଦୁବ୍କେଦ୍ତେ ଅନଲ୍ରାଃ ଉଦ୍ଦେଶ୍ ଅଲାକାଦାଏ । ୧:୧-୪
୨. ପାର୍ମେଶ୍ୱାର୍ ମାର୍ସାଲ୍ ତାନିଃ ଏନା କାଜିକେଦ୍ତେ ୟୀଶୁଆଃ ଲେକା ଜୀଦାନ୍ ବିତାଅ ନାଗେନ୍ତେ କାଜିୟାଃ । ୧:୫–୩:୧୦
୩. ମିହୁଡ଼୍ ଆଡଃମିହୁଡ଼୍କେ ଦୁଲାଡ଼୍ ବିଷାଏରେ ଆବୁକେ ପାହାମ୍ଇଚିବୁ ତାନା । ୩:୧୧–୫:୧୨
୪. ଯୋହାନ୍ ଆୟାଃ ଅନଲ୍ ଅଲ୍ ଚାବାକେଦାଏ । ୫:୧୩-୨୧
୧
ଜୀନିଦ୍ରାଃ ବାଚାନ୍
୧ ✡ଯୋହାନ୍ ୧:୧.ଆଲେ ଅତେଦିଶୁମ୍ରାଃ ଏନେଟେଦ୍ ସିଦାରେ ତାଇକାନ୍ ଏନ୍ ଜୀଦାନ୍ ବାଚାନ୍ ବିଷାଏରେ ଉଦୁବ୍ତାନା, ଅକ୍ନାଃକେଚି, ଆଲେ ଆୟୁମାକାଦା, ନେଲାକାଦା, ନେଲ୍ବାଇକାଦା, ଆଡଃ ତିଃଇତେଲେ ଜୁଟିଦାକାଦା । ୨ ✡ଯୋହାନ୍ ୧:୧୪.ଏନ୍ ଜୀଦାନ୍ ବାଚାନ୍ ଉଦୁବେନ୍ୟାନା, ଆଡଃ ଆଲେ ଏନା ନେଲ୍କେଦ୍ତେ ଗାୱା ଏମ୍ତାନ୍ଲଃ କାଜିତାନାଲେ, ଅକନ୍ ଜାନାଅ ଜୀଦାନ୍ ଆପୁ ପାର୍ମେଶ୍ୱାର୍ଲଃ ତାଇକେନା ଆଡଃ ଆଲେତାଃରେ ଉଦୁବେନ୍ୟାନା, ଏନ୍ ବିଷାଏରେ ଆପେକେଲେ ଉଦୁବ୍ତାନା । ୩ ଆଲେ ଅକ୍ନାଃ ନେଲାକାଦ୍ତେୟାଃ ଆଡଃ ଆୟୁମାକାଦ୍ତେୟାଃ ଆପେକେୟ ଉଦୁବ୍ପେତାନାଲେ, ଜେ'ଲେକାଚି ଆପେୟ ଆଲେୟାଃ ମେନେସାରେ ମେସାଦାଡ଼ିୟଃଆପେ, ଆଡଃ ଆଲେୟାଃ ମେନେସା ଆପୁ ପାର୍ମେଶ୍ୱାର୍ ଆଡଃ ଆୟାଃ ହନ୍ ୟୀଶୁ ଖ୍ରୀଷ୍ଟ୍ଲଃ ମେନାଃ । ୪ ଆବୁଆଃ ସୁକୁରାସ୍କା ପୁରାଅଃକା ମେନ୍ତେ ଆଲେ ନେ ସବେନାଃ ଅଲେତାନାଲେ ।
ପାର୍ମେଶ୍ୱାର୍ ମାର୍ସାଲ୍ ତାନିଃ
୫ ଆଲେ ପାର୍ମେଶ୍ୱାର୍ଆଃ ହନ୍ତାଃଏତେ ଆୟୁମାକାଦ୍ କାଜିକେ ଆପେକେ ଉଦୁବ୍ପେତାନାଲେ, ଏନା ନେଆଁଁ ତାନାଃ, ପାର୍ମେଶ୍ୱାର୍ ମାର୍ସାଲ୍ ତାନିଃ ଆଡଃ ଇନିଃରେ ଜେତାନ୍ ନୁବାଃ ବାନଆଃ । ୬ ଇନିଃଲଃ ଆବୁଆଃ ମେନେସା ମେନାଃ ମେନ୍ତେ କାଜିକେଦ୍ତେ ନୁବାଃରେବୁ ତାଇନଃତାନ୍ ରେଦ ଆବୁ ହସଡ଼ ତାନ୍ବୁ, ଆଡଃ ଆବୁଆଃ ଜାଗାର୍ରେ ଆଡଃ କାମିରେ ସାନାର୍ତି ବାନଆଃ । ୭ ମେନ୍ଦ ପାର୍ମେଶ୍ୱାର୍ ମାସ୍କାଲ୍ରେ ମେନାଇ ଲେକା ଆବୁହ ମାସ୍କାଲ୍ରେ ମେନାବୁରେଦ ଆବୁଆଃ ମେନେସା ମିହୁଡ଼୍ ଆଡଃମିହୁଡ଼୍ଲଃ ମେନାଃ ଆଡଃ ଇନିୟାଃ ହନ୍ ୟୀଶୁ ଖ୍ରୀଷ୍ଟ୍ଆଃ ମାୟୋମ୍ ସବେନ୍ ପାପ୍ହେତେ ଆବୁକେ ଫାର୍ଚିବୁଆ ।
୮ ଆବୁରେ ପାପ୍ ବାନଆଃ ମେନ୍ତେବୁ କାଜିରେଦ, ଆବୁ ଆବୁଗି ବେଦାନ୍ତାନାବୁ, ଆଡଃ ଆବୁତାଃରେ ସାର୍ତି ବାନଆଃ । ୯ ମେନ୍ଦ ପାର୍ମେଶ୍ୱାର୍ତାଃରେ ଆବୁ ପାପ୍କାଦାବୁ ମେନ୍ତେ ମାନାତିଙ୍ଗ୍ଲେରେ, ଇନିଃ ଆବୁଆଃ ପାପ୍କ ଛାମା ଏମ୍ ନାଗେନ୍ତେ ଆଡଃ ସବେନ୍ ଏତ୍କାନ୍ଆଃଏତେ ଫାର୍ଚିବୁ ନାଗେନ୍ତେ ପାତିୟାର୍ରଃ ଲେକାନ୍ନିଃ ତାନିଃ ଆଡଃ ଠାଉକାନ୍ତେୟାଃଗି ରିକାଏୟା । ୧୦ ଆବୁ କାବୁ ପାପ୍କାଦା ମେନେରେଦ, ଆବୁ ପାର୍ମେଶ୍ୱାର୍କେ ହସଡ଼ନିଃ ମେନ୍ତେବୁ ମେତାଇତାନା, ଆଡଃ ଇନିୟାଃ କାଜି ଆବୁରେ ବାନଆଃ ।