ହିବ୍ରୁମାନଙ୍କୁ ଲିଖିତ ପତ୍ର
ଏବ୍ରୀ ହଡ଼କତାଃତେ ଅଲାକାନ୍ ଚିଟାଉ
ପାରିଚାଏ
ଏବ୍ରୀ ଚିଟାଉ ମିଆଁଦ୍ ଜୀଉରେ ରାସ୍କା ଏମଃ ଚିଟାଉ ତାନାଃ । ମାରି ନିୟାମ୍ରେୟାଃ ଆୟାର୍କାଜି ସବେନାଃ ପୁରାକାନ୍ ବିଷାଏ ନେ ଚିଟାଉରେ ନାମଃଆ । ନେଆଁ ମିଆଁଦ୍ ଇତୁ ଏମଃ ଲେକାନାଃ ତାନାଃ । ନେ ଚିଟାଉରେ ୬୦ ଏତେ ଆଦ୍କା ମାରି ନିୟାମ୍ରାଃ ଅନଲ୍ତେୟାଃ ମେନାଃ । ୟୀଶୁ ଖ୍ରୀଷ୍ଟ୍ ଚିଲ୍କା ଆୟାର୍କାଜି ଆଡଃ ଯିହୁଦୀ ଯାଜାକ୍କଆଃ କାମି ପୁରାକେଦାଏ, ଏନା ନେ ଚିଟାଉରେ ନାମଃଆ । ଏନା ନାଗେନ୍ତେ ନେଆଁ ଯିହୁଦୀ ଖ୍ରୀଷ୍ଟିୟାନ୍କକେ ଜୀଉରେ ରାସ୍କା ଏମଃ ଚିଟାଉ ତାନାଃ । ଏବ୍ରୀ ଚିଟାଉରେ ନେଲଃଆ ଯେ, ୟୀଶୁ ଚିଲ୍କା ଆନ୍ଚୁକେ ଚାବାକେଦା, ଅକ୍ନାଃ ହରାତେ ଯାଜାକ୍କେ ଆଡଃମିସା ଚିଉଲାହ ଦାଣେଁ ରାକାବ୍ କା ଲାଗାତିୟଁଃଆ । ୟୀଶୁ ଖ୍ରୀଷ୍ଟ୍ ହବାଅଃତାନାଏ ସବେନ୍ ପାପ୍ରେୟାଃ ଦାଣେଁ ରାକାବ୍, ନେଆଁ ମିସାତରା ସବେନ୍ ହୁଲାଙ୍ଗ୍ ନାଗେନ୍ତେ ତାନାଃ । ନାହାଁଃ ପାତିୟାର୍ତାନ୍ ଖ୍ରୀଷ୍ଟିୟାନ୍କ ନାଗେନ୍ତେ ଏବ୍ରୀ ଚିଟାଉରେ ଜୀଉରେ ରାସ୍କା ନେଲଃଆ । ଖ୍ରୀଷ୍ଟ୍ ଏସ୍କାର୍ ଆବୁକେ ପାର୍ମେଶ୍ୱାର୍ତାଃରେ ଆସ୍ରା ଦହ ନାଗେନ୍ତେ ରିକା ଦାଡ଼ିୟାବୁଆ, ଆଡଃ ଆୟାଃତାଃରେ ଆସ୍ରା ଦହତାନ୍ଲଃ ଅତଙ୍ଗ୍କେଦ୍ତେ ସେନ୍ ଦାଡ଼ିୟାବୁ ୧୨:୨ ।
ଏବ୍ରୀ ଚିଟାଉ ଅକଏ ଅଲାକାଦାଏ ଏନା କା ସାରିୟଃତାନା, ମେନ୍ଦ ପାଣ୍ଡିତ୍କ କାଜିୟାଃକ, ହବାସାକାଅଆଃ ପ୍ରେରିତ୍ ପାଉଲୁସ୍, ଲୁକ୍, ଚାଏ ବର୍ଣ୍ଣବାସ୍ । ନେଆଁରେୟାଃ ଅନଲ୍ରେୟାଃ ଦିପିଲି ହଗି କା ସାରିୟଃତାନା, ମେନ୍ଦ ପୁରାଃ ହଡ଼କ ବିଶ୍ୱାସାଃକ, ନେଆଁ ୟୀଶୁ ଖ୍ରୀଷ୍ଟ୍ଆଃ ଜାନାମ୍ ତାୟମ୍ତେ ୭୦ କରେ ଅଲାକାନା । ଯୀରୁଶାଲେମ୍ ମାନ୍ଦିର୍ ୭୦ କରେ ଜିୟନ୍ୟାନା, ମେନ୍ଦ ନେ ଚିଟାଉରେନ୍ ଅନଲ୍ନିଃ ନେଆଁ କା ଜିୟନ୍କାନ୍ ଲେକା କାଜିୟାଃଏ । ଏବ୍ରୀ ଚିଟାଉ ହବାସାକାଅଆଃ ରୋମ୍ ନାଗାର୍ରେ ଅଲାକାନ୍ ତାଇକେନା ୧୩:୨୪, ଆଡଃ ଏଟାଃ ଏଟାଃ କାଲିସିୟାରେ ହାଟିଙ୍ଗ୍କାନ୍ ତାଇକେନା ।
ପୁଥି ଭିତାର୍ରେ ଅଲାକାନ୍ କାଜି
୧. ୟୀଶୁ ଖ୍ରୀଷ୍ଟ୍ ନାବୀ ଆଡଃ ଦୁଁତ୍କତାଃଏତେ ହଗି ମାରାଙ୍ଗ୍ ତାନିଃ । ୧:୧–୪:୧୩
୨. ୟୀଶୁ ଖ୍ରୀଷ୍ଟ୍ ମାରାଙ୍ଗ୍ ଯାଜାକ୍ ତାନିଃ । ୪:୧୪–୭:୨୮
୩. ୟୀଶୁଆଃ ସେୱା କାମି ମାରାଙ୍ଗ୍ ତାନାଃ । ୮:୧–୧୦:୩୧
୪. ୟୀଶୁଗି ସବେନାଃଏତେ ମାରାଙ୍ଗ୍ ତାନିଃ । ୧୦:୩୨–୧୩:୧୭
୫. ଜୀଉରେ ରାସ୍କାନ୍ କାଜି ଏମଃ ଆଡଃ ଟୁଣ୍ଡୁ ଜହାର୍ । ୧୩:୧୮-୨୫
୧
ପାର୍ମେଶ୍ୱାର୍ ହନ୍ ହରାତେ ପାର୍ମେଶ୍ୱାର୍ଆଃ ଏମାକାନ୍ ବାଚାନ୍
୧ ସିଦା ଦିପିଲିରେ ପାର୍ମେଶ୍ୱାର୍ ଚିମିନ୍ ମାହାଁ ଆଡଃ ସବେନ୍ ଲେକାତେ ନାବୀକଆଃ ହରାତେ ଆବୁଆଃ ପୁର୍ଖା ହାଡ଼ାମ୍କକେ କାଜିକାଦ୍କଆ ୨ ମେନ୍ଦ ନେ ଟୁଣ୍ଡୁ ଦିପିଲିରେ ପାର୍ମେଶ୍ୱାର୍ ଆୟାଃ ହନ୍ତେକଡ଼ା ହରାତେ ଆବୁକେ କାଜିକାଦ୍ବୁଆ । ଏନ୍ ହନ୍ତେକଡ଼ା ହରାତେଗି ପାର୍ମେଶ୍ୱାର୍ ଅତେଦିଶୁମ୍କେ ବାଇକେଦା, ଏନ୍ତେ ଟୁଣ୍ଡୁରେ ସବେନାଃରେୟାଃ ଆକ୍ତେୟାର୍ ହବାଅଃ ନାଗେନ୍ତେ ଇନିଃ ହନ୍ତେକଡ଼ାକେ ସାଲାକିୟା । ୩ ହନ୍ତେକଡ଼ାତାଃରେ ପାର୍ମେଶ୍ୱାର୍ଆଃ ମାନାରାଙ୍ଗ୍ରେୟାଃ ଜୁନୁଲ୍ ଝାଲ୍ସାଃଅ ତାନା ଆଡଃ ପୁରା ପାର୍ମେଶ୍ୱାର୍ଆଃ ଲେକାଗି ଆୟାଃ ସଭାବ୍ ମେନାଃ । ଇନିଃ ଆୟାଃ କାଜିରେୟାଃ ପେଡ଼େଃତେ ଗଟା ଅତେଦିଶୁମ୍କେ ଆକ୍ତେୟାର୍ରେ ତାନା । ଇନିଃ ସବେନ୍ ମାନୱାକଆଃ ପାପ୍କ ଛାମାକେଦ୍ତେ, ସିର୍ମାରେ ସାଲାଙ୍ଗିଉତାର୍ ପେଡ଼େୟାନ୍ ପାର୍ମେଶ୍ୱାର୍ଆଃ ଜମ୍ସାଃରେ ଦୁବାକାନା ।
ପାର୍ମେଶ୍ୱାର୍ଆଃ ହନ୍ ମାରାଙ୍ଗ୍ ତାନିଃ
୪ ଇନିଃ ସିର୍ମାରେନ୍ ଦୁଁତ୍କଏତେ ଜେ'ଲେକା ମାରାଙ୍ଗ୍, ଏନ୍ଲେକାଗି ଆୟାଃ ନୁତୁମ୍ହଗି ଇନ୍କୁଆଃ ନୁତୁମ୍ଏତେ ପୁରାଃ ମାରାଙ୍ଗ୍ଆଁ,
୫ ଚିୟାଃଚି ଚିଉଲାହଗି ପାର୍ମେଶ୍ୱାର୍ ଦୁଁତ୍କକେ କାଏ କାଜି :
“ଆପେ ଆଇଁୟାଃ ହନ୍,
ତିସିଙ୍ଗ୍ତାଃଏତେ ଆଇଙ୍ଗ୍ ଆପେୟାଃ ଆପୁ ତାନିଙ୍ଗ୍,” ପାର୍ମେଶ୍ୱାର୍ ଆଡଃଗି କାଜିକେଦା,
“ଆଇଙ୍ଗ୍ ଇନିୟାଃ ଆପୁ ତାନିଙ୍ଗ୍
ଆଡଃ ଇନିଃ ଆଇଁୟାଃ ହନ୍ ତାନିଃ ।”
୬ ମେନ୍ଦ ପାର୍ମେଶ୍ୱାର୍ ଆୟାଃ ମୁତ୍କୁଲ୍ ହନ୍କେ ନେ ଅତେଦିଶୁମ୍ତେ କୁଲ୍କିୟା ଇମ୍ତା ନେ'ଲେକାଏ କାଜିକାଦ୍ ତାଇକେନା,
“ପାର୍ମେଶ୍ୱାର୍ଆଃ ସବେନ୍ ଦୁଁତ୍କ ଇନିଃକେକ ଜହାର୍ରିୟା ।” ୭ ମେନ୍ଦ ସିର୍ମାରେନ୍ ଦୁଁତ୍କଆଃ ବିଷାଏରେ ପାର୍ମେଶ୍ୱାର୍ ନେ କାଜି କାଜିକାଦା;
“ପାର୍ମେଶ୍ୱାର୍ ଆୟାଃ ଦୁଁତ୍କକେ ଆତ୍ମା ଲେକା
ଆଡଃ ଆଇଃକ୍କେ ସେୱାତାନ୍ ଦାସିକକେ ଜୁଲ୍ତାନ୍ ସେଙ୍ଗେଲ୍ ଲେକାଏ ବାଇୟାକାଦ୍କଆ ।”
୮ ଆୟାଃ ହନ୍ତେକଡ଼ାରାଃ ବିଷାଏରେ କାଜିକେଦା,
“ହେ ପାର୍ମେଶ୍ୱାର୍, ଆମାଃ ରାଜ୍ଗାଦି ଜାନାଅ ଜାନାଅ ମେନାଃ !
ଆମ୍ ନ୍ୟାୟ ବିଚାର୍ତେ ଆମାଃ ହଡ଼କକେମ୍ ଚାଲାଅକ ତାନା । ୯ ଆମ୍ ଧାର୍ମାନ୍କେ ଦୁଲାଡ଼ାଃମେ ଆଡଃ ଏତ୍କାନାଃକେ ହିଲାଙ୍ଗ୍ଆଁଃମେ । ଏନାମେନ୍ତେ ପାର୍ମେଶ୍ୱାର୍, ଆମାଃ ପାର୍ମେଶ୍ୱାର୍ ଆମ୍କେ ଆମାଃ ଗାତିକଏତେ ଆଦ୍କା ପୁରାଃଗି ରାସ୍କାଅଃ ଲେକା, ଆମ୍କେ ସୁନୁମ୍ତେ ଆଭିଷେକ୍*ବହଃରେ ସୁନୁମ୍ ଦୁଲ୍କେଦ୍ତେ ସାଲା କାଦ୍ମେୟାଁ ।”
୧୦ ଇନିଃ ଆଡଃଗି କାଜିକାଦ୍ମେୟା,
“ହେ ପ୍ରାଭୁ, ଆମ୍ ଏନେଟେଦ୍ରେ ଅତେରେୟାଃ ନିହିଁଗାଡାମ୍ ବାଇକେଦା
ଆଡଃ ଆମାଃ ତିଃଇତେଗି ସିର୍ମାମ୍ ବାଇକେଦା ।
୧୧ ଏନା ସବେନାଃ ମୁସିଙ୍ଗ୍ ହୁଲାଙ୍ଗ୍ ଜିୟନଃଆ । ମେନ୍ଦ ଆମ୍ ଜାନାଅଗିମ୍ ତାଇନା,
ଆଡଃ ଏନା ସବେନ୍ ମାରି ଲିଜାଃ ଲେକା ଜିୟନଃଆ ।
୧୨ ଲିଜାଃ କୁଡ଼ାତାନ୍ ଲେକା ଆମ୍ ଏନ୍ ସବେନାଃକେମ୍ ସତଃଏୟା
ଆଡଃ ଲିଜାଃ ବାଦ୍ଲାଅତାନ୍ ଲେକାଗିମ୍ ବାଦ୍ଲାଅଏୟା ।
ମେନ୍ଦ ଆମ୍ ଚିଉଲାଅ କାମ୍ ବାଦ୍ଲାଅଃଆ
ଆଡଃ ଆମାଃ ଜୀୱାନ୍ ଚିଉଲାଅ କା ଟୁଣ୍ଡୁଃଆ ।”
୧୩ “ଆଇଙ୍ଗ୍ ଆମାଃ ବାଇରିକକେ ପୁରା ଆଉରିଙ୍ଗ୍ ହାରାଅକ ଜାକେଦ୍ ଆମ୍ ଆଇଁୟାଃ ଜମ୍ସାଃରେ ଦୁବାକାନ୍ମେ” ମେନ୍ତେ ପାର୍ମେଶ୍ୱାର୍ ଆୟାଃ ଦୁଁତ୍କଏତେ ଜେତାଏକେ ଚିଉଲାଅ କାଏ କାଜିକାଦ୍କଆ ।
୧୪ ତାବ୍ଦ, ସିର୍ମାରେନ୍ ଦୁଁତ୍କ ଅକଏତାନ୍କ ? ଇନ୍କୁ ହବାଅଃତାନାକ ପାର୍ମେଶ୍ୱାର୍କେ ସେୱାତାନ୍ ଆତ୍ମାକ ଆଡଃ ଜୀଉବାଞ୍ଚାଅ ନାମାକାଦ୍ ହଡ଼କକେ ଦେଙ୍ଗା ନାଗେନ୍ତେ ପାର୍ମେଶ୍ୱାର୍ତେ କୁଲାକାନ୍ ଆତ୍ମାକ ।
*୧:୯ ବହଃରେ ସୁନୁମ୍ ଦୁଲ୍କେଦ୍ତେ ସାଲା