ଯାକୁବଙ୍କ ଲିଖିତ ପତ୍ର
ଯାକୁବ୍ ଅଲାକାଦ୍ ଚିଟାଉ
ପାରିଚାଏ
ଯାକୁବ୍ ପୁଥି ଯାକୁବ୍ ନୁତୁମ୍ତେ ସାରିୟଃତାନ୍ ମିଆଁଦ୍ ହଡ଼ ଅଲାକାଦାଏ । ହବାସାକାଅଆଃ ନେ ଯାକୁବ୍ ୟୀଶୁ ଖ୍ରୀଷ୍ଟ୍ଆଃ ହାଗାତେ ତାଇକେନା, ଅକଏଚି ଏନେଟେଦ୍ କାଲିସିୟାରେନ୍ ମିଆଁଦ୍ ଆଗୁଆଇ ଆଡଃ ଯୀରୁଶାଲେମ୍ ପାଞ୍ଚେଟ୍ରେନ୍ ହଡ଼ ତାଇକେନାଏ ପ୍ରେରିତ୍ ୧୫:୧୩ । ପ୍ରେରିତ୍ ପାଉଲୁସ୍ହଗି ଯାକୁବ୍କେ କାଲିସିୟାରେନ୍ ଖୁଣ୍ଟୁ ମେନ୍ତେ କାଜିୟା ଗାଲାତିୟ ୨:୯ ।
ଯାକୁବ୍ ପୁଥି ୟୀଶୁ ଖ୍ରୀଷ୍ଟ୍ଆଃ ଜାନାମ୍ରେୟାଃ ୫୦ ବାରାଷ୍ ତାୟମ୍ତେ ଅଲାକାନା ମେନ୍ତେ ବାଇବାଲ୍ ପାଣ୍ଡିତ୍କ ବିଶ୍ୱାସ୍ ରିକାଃକ । ଯାକୁବ୍ ଯୀରୁଶାଲେମ୍ରେନ୍ ଆଗୁଆଇ ତାଇକେନାଏ, ଏନାତେ ହବାସାକାଅଆଃ ଇନିଃ ଏନ୍ତାଃରେ ତାଇନ୍ତାନ୍ ଇମ୍ତା ଇନିଃ ନେ ପୁଥି ଅଲାକାଦ୍ ତାଇକେନାଏ ।
ଯାକୁବ୍ ଅତେଦିଶୁମ୍ରେ ଛିତିବିତିକାନ୍ ଗେଲ୍ବାର୍ କିଲିକଆଃ ବିଷାଏରେ ଆୟାଃ ପୁଥିରେ ଉଦୁବାକାଦା ଯାକୁବ ୧:୧ । ଯାକୁବ୍ ପୁଥିରେୟାଃ ଇନିତୁ ସବେନ୍ ଖ୍ରୀଷ୍ଟିୟାନ୍କଆଃ ନାଗେନ୍ତେ ଲାଗାତିଙ୍ଗ୍ ତାନା । ମେନ୍ଦ “ଗେଲ୍ବାର୍ କିଲିକ” ମେନ୍ତେ କାଜିକାନ୍ କାଜି, ହବାସାକାଅଆଃ ଯାକୁବ୍ ଯିହୁଦୀ ଖ୍ରୀଷ୍ଟିୟାନ୍କକେ ଅଲାକାଦ୍କଆ । ଚିଆଃଚି ନେ ପୁଥି ପୁରାଃ ପାଢ଼ାଅଃତାନ୍ ହଡ଼କତାଃତେ ସେଟେରେ ନାଗେନ୍ତେ ତାଇକେନା, ନେଆଁରେ ପୁରାଃ ବିଷାଏକ ଅଲାକାନା । ଯାକୁବ୍ ବିଶ୍ୱାସ୍ ଆଡଃ କାମିରେୟାଃ ଚେତାନ୍ରେ କାଜିକାଦା ଯେ, ସାର୍ତି ବିଶ୍ୱାସ୍ କାମିରେ ଉଦୁବଃଆ ୨:୧୭ । ଇନିଃ କିସାଁଣ୍ ହଡ଼କକେ ଏସ୍କାର୍ ମାଇନ୍ ଏମାକ ବିଷାଏରେ ଚେତାଅ କାଜି କାଜିକାଦା ୨:୧-୪ । ଆଡଃ ଆବୁକେ ଉଦୁବ୍ବୁ ତାନା ଯେ, ଆବୁ ଜାଗାର୍ତାନ୍ ବିଷାଏରେ ଚିର୍ଗାଲ୍କାନ୍ବୁ ତାଇନା ୩:୧-୧୨ ।
ପୁଥି ଭିତାର୍ରେ ଅଲାକାନ୍ କାଜି
୧. ଯାକୁବ୍ ଆୟାଃ ପାଢ଼ାଅତାନ୍କକେ ଜହାର୍ ମେନ୍ତେ କାଜିକତାନାଏ । ୧:୧
୨. ଇନିଃ ଖ୍ରୀଷ୍ଟିୟାନ୍କକେ ଦୁକୁ ଇମ୍ତା ଧିରାଜ୍ ସାବ୍କେଦ୍ତେ ତାଇନ୍ ନାଗେନ୍ତେ ଜୀଉରେ କେଟେଦ୍ ଏମାକତାନାଏ । ୧:୨-୨୭
୩. କାମି ହରାତେ ଚିଲ୍କା ବିଶ୍ୱାସ୍କେ ଉଦୁବ୍ ଲାଗାତିଙ୍ଗ୍ୟାଁଃ ଏନ୍ ବିଷାଏରେ କାଜିକାଦା । ୨:୧-୨୬
୪. ବାଚାନ୍ ଚିଲ୍କା ପେଡ଼େୟାନ୍ ହବାଅଃଆ ଏନା ଇନିଃ କାଜିକାଦାଏ । ୩:୧-୧୨
୫. ଯାକୁବ୍ ଅତେଦିଶୁମ୍ରେୟାଃ ସେଣାଁ ପାର୍ମେଶ୍ୱାର୍ଆଃ ସେଣାଁ ଲେକା ନାହାଁଲାଃ ମେନ୍ତେ କାଜିକାଦା । ୩:୧୩–୪:୧୦
୬. ପାଢ଼ାଅତାନ୍ ହଡ଼କକେ ଆପାନ୍କେ ମାରାଙ୍ଗ୍ ମେନ୍ତେ ଆଲପେ କାଜିନ୍ ମେନ୍ତେ ଚେତାଅକ ତାନା । ୪:୧୧–୫:୬
୭. ଟୁଣ୍ଡୁରେ ଯାକୁବ୍ ଚିମିନ୍ ହୁପ୍ଡିଙ୍ଗ୍ ଇନିତୁକ ଏମ୍କେଦ୍ତେ ଆୟାଃ ଅନଲ୍ ଚାବାକେଦାଏ । ୫:୭-୨୦
୧
ଜହାର୍
୧ ✡ମାଥିଉ ୧୩:୫୫; ମାର୍କ ୬:୩; ପ୍ରେରିତ୍ ୧୫:୧୩; ଗାଲାତିୟ ୧:୧୯.ଆଇଙ୍ଗ୍ ଯାକୁବ୍ ପାର୍ମେଶ୍ୱାର୍ଆଃ ଆଡଃ ପ୍ରାଭୁ ୟୀଶୁ ଖ୍ରୀଷ୍ଟ୍ଆଃ ଦାସି ତାନିଙ୍ଗ୍, ଗଟା ଅତେଦିଶୁମ୍ରେ ଛିତିବିତିକାନ୍ ପାର୍ମେଶ୍ୱାର୍ଆଃ ହଡ଼କକେ ଜହାର୍ କାଜିତାନ୍ଲଃ ନେ ଚିଟାଉ ଅଲେତାନାଇଙ୍ଗ୍ ।
ବିଶ୍ୱାସ୍ ଆଡଃ ସେଣାଁଁ
୨ ହେ ଆଇଁୟାଃ ହାଗା ମିଶିକ, ଜୀଦାନ୍ରେୟାଃ ସେସେନ୍ ହରାରେ ଚିମିନ୍ ରାକାମ୍ରେୟାଃ ବିନିଡ଼ାଅ ହିଜୁଃରେଦ, ଏନାକେ ରାସ୍କାରେୟାଃ ବିଷାଏ ତାନାଃ ମେନ୍ତେ ଆଟ୍କାରେପେ । ୩ ଚିୟାଃଚି ଆପେ ସାରିତାନାପେ, ନେ'ଲେକାନ୍ ବିନିଡ଼ାଅ ହିଜୁଃତାନ୍ ଇମ୍ତା ବିଶ୍ୱାସ୍ରେ କେଟେଦ୍ ତାଇନଃରେ, ଆପେୟାଃ ସାହାତିଙ୍ଗ୍ରେୟାଃ ପେଡ଼େଃ ହାରାଇଦିୟଃଆ । ୪ ଆପେ ଟୁଣ୍ଡୁ ଜାକେଦ୍ ସାହାତିଙ୍ଗ୍କେଦ୍ତେପେ ତାଇନଃରେଦ, ଜେତାନ୍ ବିଷାଏରେ କା ଜାଞ୍ଜିକେଦ୍ତେ ପକ୍ତା ଆଡଃ ପୁରାକେଦ୍ତେପେ ତାଇନାଃ । ୫ ମେନ୍ଦ ଆପେକଏତେ ଜେତାଏ ସେଣାଁଁରେ ଜାଞ୍ଜିକାନ୍ରେଦ, ଇନିଃ ପାର୍ମେଶ୍ୱାର୍ତାଃରେ ବିନ୍ତିକା, ଏନାରେ ପାର୍ମେଶ୍ୱାର୍ ଇନିଃକେ ସେଣାଁଏ ଏମାଇୟା, ଚିୟାଃଚି ପାର୍ମେଶ୍ୱାର୍ଦ ବେଗାର୍ ହିଚ୍କିଚାଅକେଦ୍ତେ ଆଡଃ ଲେବେଃ ମନ୍ତେ ସବେନ୍କକେ ଏମାଃଏ । ୬ ମେନ୍ଦ ଆପେ ବିନ୍ତି ଇମ୍ତା, ବେଗାର୍ ଆଡ଼ାଃଉଡ଼ୁଃକେଦ୍ତେ ବିଶ୍ୱାସ୍ତାନ୍ଲଃ ବିନ୍ତିପେ । ଆଡ଼ାଃଉଡ଼ୁଃତେ ବିନ୍ତିତାନ୍ନିଃ, ହୟତେ କା ଥାବର୍ଅଃ ଦରେୟାରେୟାଃ ଆଲ୍ପୁଙ୍ଗ୍ ଲେକାଃଏ । ୭ ଏନ୍ଲେକାନ୍ ହଡ଼ଦ, ପ୍ରାଭୁତାଃଏତେ ଜେତ୍ନାଃ ନାମେୟାଃଏ ମେନ୍ତେ ଆଲକାଏ ଉଡ଼ୁଗେକା, ୮ ଚିୟାଃଚି ଇନିଃଦ ବାରିଆ ମନ୍ରେନ୍ ହଡ଼ତାନିଃ, ଏନାତେ ଇନିଃ ଆୟାଃ ଉହାଟ୍କାଦ୍ତେୟାଃ କାଏ ରିକା ଦାଡ଼ିୟା ।
କିସାଁଣ୍ ଆଡଃ ଗାରିବ୍
୯ ଗାରିବ୍ ଖ୍ରୀଷ୍ଟ୍ ବିଶ୍ୱାସୀ ହାଗାକକେ ପାର୍ମେଶ୍ୱାର୍ ଇନ୍କୁଆଃ ଜୀଦାନ୍ରେ ହାରାଇଦିକ ଇମ୍ତା ଇନ୍କୁ ରାସ୍କାଅଃକାକ, ୧୦ ଆଡଃ କିସାଁଣ୍ ଖ୍ରୀଷ୍ଟ୍ ବିଶ୍ୱାସୀକକେ ପାର୍ମେଶ୍ୱାର୍ ଲାତାର୍ରେ ଉୟୁଃକ ଇମ୍ତା ଇନ୍କୁ ରାସ୍କାଅଃକାକ । ଚିଆଃଚି ଇନ୍କୁଆଃ କିସାଁଣଃତେୟାଃ ତାସାଦ୍ ବାହା ଲେକା ନୁର୍କେନଃଆ । ୧୧ ସିଙ୍ଗି ରାଁପ୍ରେୟାଃ ଲଲ ହୟତେ ତାସାଦ୍ ରହଡ଼୍କଆଃ, ଆଡଃ ଏନାରେୟାଃ ବାହା ନୁର୍କଆଃ ଏନ୍ତେ ଏନାରେୟାଃ ସୁଗାଡ଼ାନ୍ତେୟାଃ ଜିୟନ୍କଆଃ । ଏନ୍ଲେକାଗି, କିସାଁଣ୍ ହଡ଼ହଁ ଆୟାଃ ସବେନ୍ କାଜିକାମିରେୟାଃ ଭିଡ଼୍ରେ ମୁସିଙ୍ଗ୍ ହୁଲାଙ୍ଗ୍ ଜିୟନଃଆଏ ।
ବିନିଡ଼ାଅ ଆଡଃ ଲାଲାଚ୍
୧୨ ବିନିଡ଼ାଅରେ ସାହାତିଙ୍ଗ୍ତାନ୍ ହଡ଼କ ସୁକୁତାନ୍ଗିୟାକ, ଚିୟାଃଚି ନେ ଲେକାନ୍ ବିନିଡ଼ାଅରେ ଜିତାଅଃରେଦ, ପାର୍ମେଶ୍ୱାର୍ ଅକ ଜୀଦାନ୍ ଏମ୍ ନାଗେନ୍ତେ ଆଇଃକ୍କେ ଦୁଲାଡ଼ିତାନ୍ ହଡ଼କକେ ବାନାର୍ସା ଏମାକାଦ୍କଆଏ, ଇନ୍କୁ ଏନାକେ ମୁକୁଟ୍ ଲେକାକ ନାମେୟାଃ । ୧୩ ଜେତା ହଡ଼ ବିଡ଼ାଅରେ ଉୟୁଗଃରେ, “ଆଇଁୟାଃ ନେ ବିଡ଼ାଅ ପାର୍ମେଶ୍ୱାର୍ ସାଃଏତେ ହିଜୁଆକାନା” ମେନ୍ତେ ଆଲକାଏ କାଜିକା, ଚିୟାଃଚି ପାର୍ମେଶ୍ୱାର୍ ଏତ୍କାନାଃତେ କାଏ ବିଡ଼ାଅ ଦାଡ଼ିୟଃଆଃ, ଆଡଃ ଇନିଃ ଜେତାଏକେ କାଏ ବିଡ଼ାଅକଆ । ୧୪ ମେନ୍ଦ ଜେତା ହଡ଼ ଆୟାଃ ଏତ୍କାନ୍ ସାନାଙ୍ଗ୍ରେ ତାଇନ୍କେଦ୍ତେ ବିଡ଼ାଅରେ ଉୟୁଗଃଆ । ୧୫ ଏତ୍କାନ୍ ସାନାଙ୍ଗ୍ରେୟାଃ ହାମ୍ବାଲ୍ରୋୱାଏତେ ପାପ୍ ସିର୍ଜାଅଃଆ ଆଡଃ ଏନ୍ ପାପ୍ ପୁରା ହାରାଇଦିକେନଃରେ ଗନଏଃ ହବାଅଃଆ ।
୧୬ ହେ ଦୁଲାଡ଼୍ ହାଗା ମିଶିକ, ଆଲପେ ବେଦାଅଃଆ । ୧୭ ସବେନ୍ ବୁଗିନ୍ ବାର୍ଦାନ୍ ଆଡଃ ସବେନାଃଏତେ ପୁରାଃ ବୁଗିନ୍ ଦାନ୍ ସିର୍ମାରେନ୍ ଆପୁ ପାର୍ମେଶ୍ୱାର୍ତାଃଏତେଗି ହିଜୁଃଆ । ଇନିଃ ସିର୍ମାରେ ମାର୍ସାଲେତାନ୍ ସିଙ୍ଗି, ଚାଣ୍ଡୁଃ, ଇପିଲ୍କକେ ବାବାଇନିଃ ତାନିଃ । ଇନିଃ ଉମ୍ବୁଲ୍ ଲେକା ବାଦ୍ଲାଅଃନିଃ ନାହାଁଲିଃ । ୧୮ ଗଟା ଅତେଦିଶୁମ୍ରେ ଆଇଃକ୍ ବାଇୟାକାଦ୍ ଜାଁତୁକଆଃ ଥାଲାରେ ଆବୁ ଜେ'ଲେକା ପାହିଲା ଠାୟାଦ୍ରେବୁ ତାଇନା, ଏନାମେନ୍ତେ ଇନିଃ ଆୟାଃ ଇଛାସାନାଙ୍ଗ୍ରେ ସାର୍ତି କାଜିତେ ଆବୁକେ ବାଇୟାକାଦ୍ବୁଆ ।
ଆୟୁମ୍ ଆଡଃ କାମିରିକା
୧୯ ଆଇଁୟାଃ ଦୁଲାଡ଼୍ ହାଗା ମିଶିକ, ନେଆଁ ପାହାମେପେ, ଆପେ ସବେନ୍କ ଆୟୁମ୍ ନାଗେନ୍ତେ ଏୟନାକାନ୍ପେ, ମେନ୍ଦ ସୁଆଏତେ ଜାଗାର୍ ନାଙ୍ଗ୍ ଆଡଃ ସୁଆଏତେ ଖିସ୍ଅଃ ନାଗେନ୍ତେ ହବାଅଃପେ । ୨୦ ଚିୟାଃଚି ହଡ଼ଆଃ ଖିସ୍ ହରାତେ ପାର୍ମେଶ୍ୱାର୍ଆଃ ଇଛା ଧାର୍ମାନ୍ କାଏ ରିକାଦାଡ଼ିୟା । ୨୧ ଏନାମେନ୍ତେ ସବେନ୍ ଲେକାନ୍ ଏତ୍କାନ୍ ଗିନିକାନ୍ତେୟାଃକ ଆଡଃ ଏତ୍କାନ୍ ଚାଇଲ୍ ଚାଲାନ୍ କାମିକ ବାଗିପେ । ଆପାନ୍କେ ପାର୍ମେଶ୍ୱାର୍ତାଃରେ ଜିମାକେଦ୍ତେ, ଆପେୟାଃ ମନ୍ସୁରୁଦ୍ରେ ଇନିଃ ଅକ ବାଚାନ୍ ହେରାକାଦାଏ, ଏନାକେ ତେଲାଏପେ । ଏନା ଆପେକେ ବାଞ୍ଚାଅ ଦାଡ଼ିୟାପେୟା ।
୨୨ ଆପେ ଆପାନ୍କେ ଆଲପେ ବେଦାନାଃ । ଇନିୟାଃ ବାଚାନ୍ ଏସ୍କାର୍ ଆୟୁମ୍ଲେରେ କା ହବାଅଃଆ ମେନ୍ଦ ଏନ୍ ବାଚାନ୍ ଲେକାତେ କାମି ରିକା ଲାଗାତିଙ୍ଗ୍ୟାଁଃ । ୨୩ ଅକ ହଡ଼ ପାର୍ମେଶ୍ୱାର୍ଆଃ କାଜି ଏସ୍କାର୍ ଆୟୁମାଃଏ, ଚାଏ ଆୟୁମ୍କେଦ୍ତେ କାଏ କାମିୟାଃ, ଇନିଃ ଆଏନାରେ ଆୟାଃ ମେଦ୍ମୁହାଁଡ଼୍ ନେଲେତାନ୍ ହଡ଼ ଲେକାଃଏ । ୨୪ ଇନିଃଦ ବୁଗିଲେକା ଆୟାଃ ମେଦ୍ମୁହାଁଡ଼୍କେ ଆଏନାରେ ନେଲେନା, ମେନ୍ଦ ଇନିଃ ଏନ୍ତାଃଏତେ ଅଡଙ୍ଗ୍ୟାନ୍ତେ ଆୟାଃ ଆପ୍ନାଃ ମେଦ୍ମୁହାଁଡ଼୍କେ ଇମ୍ତାଗି ରିଡ଼ିଙ୍ଗ୍ତାଃ । ୨୫ ମେନ୍ଦ ହଡ଼ରାଃ ଜୀଉବାଞ୍ଚାଅ ନାଗେନ୍ତେ ମିଆଁଦ୍ ପୁରା ପକ୍ତାକାନ୍ ଆନ୍ଚୁ ମେନାଃ । ଜେତାଏ ଏନା ଆୟୁମ୍କେଦ୍ତେ କାଏ ରିଡ଼ିଙ୍ଗ୍ୟେଁଆ ଆଡଃ ଆୟାଃ ନାଗେନ୍ତେ ପୁରା ମନ୍ସୁରୁଦ୍ରେ ମିଦ୍ମନ୍ତେ ଏନାକେ ମାନାତିୟେଁରେଦ, ପାର୍ମେଶ୍ୱାର୍ ଇନିୟାଃ ସବେନ୍ କାମିରେ ଆଶିଷ୍ ଏମାଇୟାଃ ।
୨୬ ଜେତାଏ ଚିନାଃ ଆପାନ୍କେ ଧାର୍ମାନ୍ ମେନ୍ତେ ଆଟ୍କାରେନ୍ ତାନା ? ଇନିଃ ଆୟାଃ ଆଲାଙ୍ଗ୍କେ ଥାବର୍ରେ କାଏ ଦହ ଦାଡ଼ିତାନ୍ରେଦ, ଇନିୟାଃ ଧାରାମ୍ କାମିକ ସବେନାଃ ସାମାତାନାଃ ଆଡଃ ଇନିଃ ଆପ୍ନାଃ ମନ୍କେ ବେଦାତାନା । ୨୭ ଟୁଆର୍ ହନ୍କଆଃ ଆଡଃ ରାଣ୍ଡିକଆଃ ନାରାଦୁରା ଇମ୍ତାଙ୍ଗ୍ ଯାତ୍ନାଅ ଇଦିକେଦ୍ତେ, ଅତେଦିଶୁମ୍ରେୟାଃ ଏତ୍କାନାଃଏତେ ଆପାନ୍କେ ବେଗାର୍ ଦାଗିକେଦ୍ତେ ଦହତେୟାଃଗି, ଆବୁଆଃ ଆପୁ ପାର୍ମେଶ୍ୱାର୍ଆଃ ଆୟାର୍ରେ ପୁରାଃ ଫାର୍ଚିୟାନ୍ ଆଡଃ ସୁଗାଡ଼ାନ୍ ଧାର୍ମାନ୍ କାମି ତାନାଃ ।
✡୧:୧ ମାଥିଉ ୧୩:୫୫; ମାର୍କ ୬:୩; ପ୍ରେରିତ୍ ୧୫:୧୩; ଗାଲାତିୟ ୧:୧୯.