ମାଥିଉ ଲିଖିତ ଯୀଶୁ ଖ୍ରୀଷ୍ଟଙ୍କ ସୁସମାଚାର
ମାଥିଉ ଅଲାକାଦ୍ ୟୀଶୁ ଖ୍ରୀଷ୍ଟ୍ଆଃ ସୁକୁକାଜି
ପାରିଚାଏ
ୟୀଶୁ ଖ୍ରୀଷ୍ଟ୍ଆଃ ଜୀଦାନ୍କେ ଉଦୁବେତାନ୍ ନାୱା ନିୟାମ୍ରାଃ ଉପୁନିୟା*ଚାଇର୍ ପୁଥିକଏତେ ମାଥିଉ ଅଲାକାଦ୍ ସୁକୁକାଜି ହବାଅଃତାନା ମିଆଁଦ୍ । ଏନ୍ ସବେନ୍ ପୁଥିକକେ ୟୀଶୁ ଖ୍ରୀଷ୍ଟ୍ଆଃ “ସୁକୁକାଜି” କାଜିୟଃତାନା । ୟୀଶୁଆଃ ଗନଏଃ ତାୟମ୍ତେ ଏନ୍ ସୁକୁକାଜିକେ ମାଥିଉ, ମାର୍କ, ଲୁକ, ଆଡଃ ଯୋହାନ୍ ତିକୁ ଅଲାକାଦାଃକ । ମାଥିଉ ଅଲାକାଦ୍ ସୁକୁକାଜିରାଃ ଅନଲ୍ ଦିପିଲି କା ସାରିୟଃରେୟ, ବାଇବାଲ୍ ପାଣ୍ଡିତ୍କ କାଜିୟାଃକ ଯେ, ନେଆଁଁ ଖ୍ରୀଷ୍ଟ୍ଆଃ ଜାନାମ୍ ତାୟମ୍ ୬୦ କରେ ଅଲାକାନ୍ ତାଇକେନା । ନେଆଁଁରାଃ ଅନଲ୍ ଠାୟାଦ୍ କା ସାରିୟଃତାନ୍ରେୟ, ଚିମିନ୍କ ପାଲେଷ୍ଟାଇନ୍ ଦିଶୁମ୍ରାଃ ଯୀରୁଶାଲେମ୍ ନାଗାର୍ରେ ଅଲାକାନା ମେନ୍ତେକ ବିଶ୍ୱାସାଃ ।
ନେ ପୁଥିରାଃ ଅନଲ୍ନିଃ ମାଥିଉ ତାନିଃ, ୟୀଶୁ ଇନିଃକେ ଆୟାଃ ଚେଲା ବାଇୟଃ ନାଙ୍ଗ୍ କେଡ଼ା ସିଦାରେ ଇନିଃ ମାଲ୍ହାରମ୍ ତାଇକେନାଏ । ଇନିଃ ଲେବୀ ମେନ୍ତେୟ ସାରିୟଃ ତାଇକେନାଏ । ମାଥିଉ ଗେଲ୍ବାର୍†ବାରାଝାନ୍ ପ୍ରେରିତ୍କଏତେ ମିହୁଡ଼୍ ତାଇକେନାଏ ଆଡଃ ଇନିଃ ବିଶେଷ୍କେଦ୍ତେ ଯିହୁଦୀ ହଡ଼କଆଃ ନାଗେନ୍ତେ ନେ ସୁକୁକାଜି ଅଲାକାଦାଏ । ଅକ୍ନାଃଚି ଆୟାଃ ଅନଲ୍ରେ ମାରି ନିୟାମ୍ ଧାରାମ୍ପୁଥିରାଃ ଆପିହିସିଠୁ ବାଚାନ୍, ନେ ମାଥିଉ ପୁଥିରେ ଉଦୁବଃତାନା । ୟୀଶୁ ଖ୍ରୀଷ୍ଟ୍ ଚାଏ ମାସି ପାର୍ମେଶ୍ୱାର୍ଆଃ ସାଲାକାନ୍ ବାଞ୍ଚାଅନିଃ ଆଡଃ ରାଜା ତାନିଃ । ଅକଏୟାଃ ହିନିଜୁଃ ବିଷାଏରେ ମାରି ନିୟାମ୍ରାଃ ଧାରାମ୍ପୁଥିରେ ଆୟାର୍କାଜି‡ସିଦାରେ ହବାଃଅତେୟାଃ କାଜିକାନ୍ ତାଇକେନା, ଏନା ମାଥିଉ ପୁରାଃତେ ଉଦୁବ୍ ନାଙ୍ଗ୍ ସାନାଙ୍ଗ୍ ତାଇକେନାଏ । ଯିହୁଦୀକ ମାସିକେ ଆକଆଃ ରାଇଜ୍ରାଃ ରାଜା ହବାଅଃଆଏ ମେନ୍ତେ ଆସ୍ରାକାଦ୍ ତାଇକେନାକ । ମାଥିଉ, ପାର୍ମେଶ୍ୱାର୍ଆଃ ରାଇଜ୍କେ, ଆତ୍ମିକ୍ରେୟାଃ ରାଇଜ୍ ତାନାଃ, ଅତେଦିଶୁମ୍ରାଃ ରାଇଜ୍ ନାହାଁଲାଃ ମେନ୍ତେ କାଜିକାଦା । ମାଥିଉ ଆୟାଃ ଅନଲ୍ରେ ପାର୍ମେଶ୍ୱାର୍ଆଃ ରାଇଜ୍ ବିଷାଏରେ ପୁରାଃତେ ଉଦୁବ୍ ନାଙ୍ଗ୍ ସାନାଙ୍ଗ୍କାଦାଏ ।
ମାଥିଉ ଅଲାକାଦ୍ ସୁକୁକାଜି ନାୱା ନିୟାମ୍ରାଃ ପାହିଲା ପୁଥି ନାଗେନ୍ତେ ପୁରାଃ ବୁଗିନ୍ ତାନାଃ, ଚିୟାଃଚି ମାରି ନିୟାମ୍ରାଃ ବାଚାନ୍କ ପୁରାଃତେ ଉଦ୍ବାକାନା । ନେ ପୁଥି, ମାରି ଆଡଃ ନାୱା ନିୟାମ୍ ବାରାନାଃକେ ମେସାଃଏ । ବାଇବାଲ୍ ପାଣ୍ଡିତ୍କହଁ କାଜିୟାଃକ, ମାଥିଉ ଆୟାଃ ଅନଲ୍ରେ ମୁଶା ନାବୀରାଃ ଆନ୍ଚୁ ଲେକା ସେସେନ୍ ନାଙ୍ଗ୍ ସାନାଙ୍ଗ୍କାଦାଏ, ଅକ୍ନାଃଚି ମାରି ନିୟାମ୍ରାଃ ପାହିଲା ମଣେୟାଁ§ପାଞ୍ଚ୍ଠୁ ପୁଥି ତାନାଃ । ୟୀଶୁଆଃ ବୁରୁ ଚେତାନ୍ରେୟାଃ ଇନିତୁ ୫–୭ ଆଧ୍ୟାୟକେ ପାର୍ମେଶ୍ୱାର୍, ମୁଶା ନାବୀକେ ଏମାକାଇ ଆନ୍ଚୁଲଃ ହଗି ଜକାଃଏ ୨ କିଲିକଆଃ ୧୯:୩–୨୩:୨୧ ।
ପୁଥି ଭିତାର୍ରେ ତାଇକାନ୍ କାଜି
୧. ୟୀଶୁ ଖ୍ରୀଷ୍ଟ୍ଆଃ ଜାନାମ୍ ଆଡଃ ସେୱାକାମିରାଃ ଏନେଟେଦ୍ । ୧–୪
୨. ୟୀଶୁ ଖ୍ରୀଷ୍ଟ୍ଆଃ ସେୱାକାମି ଆଡଃ ଇନିତୁ । ୫–୨୫
୩. ୟୀଶୁ ଖ୍ରୀଷ୍ଟ୍ଆଃ ଗନଏଃ ଆଡଃ ଜୀଉବିନିରିଦ୍ । ୨୬–୨୮
୧
ୟୀଶୁ ଖ୍ରୀଷ୍ଟ୍ଆଃ କିଲି
(ଲୁକ ୩:୨୩-୩୮)
୧ ନେଆଁଁ ହବାଅଃତାନା ୟୀଶୁ ଖ୍ରୀଷ୍ଟ୍ଆଃ ପୁର୍ଖା ଆପୁକଆଃ ନୁତୁମ୍କ ଅଲାକାନ୍ ପୁଥି, ୟୀଶୁ ଖ୍ରୀଷ୍ଟ୍, ଦାଉଦ୍ଆଃ କିଲିରେନ୍ ଆଡଃ ଦାଉଦ୍, ଆବ୍ରାହାମ୍ଆଃ କିଲିରେନ୍ ତାଇକେନାଏ ।
୨ ଆବ୍ରାହାମ୍ଆଃ ହନ୍ ଇସାକ୍, ଇସାକ୍ଆଃ ହନ୍ ଯାକୁବ୍, ଯାକୁବ୍ଆଃ ହନ୍ ଯିହୁଦା ଆଡଃ ଆୟାଃ ହାଗାକ ତାଇକେନା, ୩ ଯିହୁଦାରାଃ ହନ୍ ପେରସ୍ ଆଡଃ ସେରହ, ଇନ୍କିନାଃ ଏଙ୍ଗାତେ ତାମର୍ ତାଇକେନାଏ, ପେରସ୍ରାଃ ହନ୍ ହେସ୍ରୋନ୍, ହେସ୍ରୋନ୍ରାଃ ହନ୍ ଅରାମ୍, ୪ ଅରାମ୍ରାଃ ହନ୍ ଅମ୍ମୀନାଦବ୍, ଅମ୍ମୀନାଦବ୍ରାଃ ହନ୍ ନହଶୋନ୍, ନହଶୋନ୍ରାଃ ହନ୍ ସାଲ୍ମନ୍, ୫ ସାଲ୍ମନ୍ରାଃ ହନ୍ ବୋୟାଜ୍, ବୋୟାଜ୍ରାଃ ଏଙ୍ଗାତେୟାଃ ନୁତୁମ୍ ରାହାବ୍, ବୋୟାଜ୍ରାଃ ହନ୍ ଓବେଦ୍, ଓବେଦ୍ରାଃ ଏଙ୍ଗାତେ ରୁତ୍, ଓବେଦ୍ରାଃ ହନ୍ ଯିଶି, ୬ ଯିଶିରାଃ ହନ୍ ରାଜା ଦାଉଦ୍, ରାଜା ଦାଉଦାଃ ହନ୍ ସୁଲିମାନ୍, ସୁଲିମାନ୍ରାଃ ଏଙ୍ଗାତେ ସିଦାହେତେ ଉରିୟରାଃ କୁଡ଼ି ତାଇନ୍କେନା,
୭ ସୁଲିମାନ୍ରାଃ ହନ୍ ରିହବିୟାମ୍, ରିହବିୟାମ୍ରାଃ ହନ୍ ଅବିୟ, ଅବିୟରାଃ ହନ୍ ଆସା, ୮ ଆସାରାଃ ହନ୍ ଯିହୋଶାଫତ୍, ଯିହୋଶାଫତ୍ରାଃ ହନ୍ ଯୋରାମ୍, ଯୋରାମ୍ରାଃ ହନ୍ ଉଜ୍ଜିୟ, ୯ ଉଜ୍ଜିୟରାଃ ହନ୍ ଯୋଥାମ୍, ଯୋଥାମ୍ରାଃ ହନ୍ ଆହାସ୍, ଆହାସ୍ରାଃ ହନ୍ ହିଜକିୟ, ୧୦ ହିଜକିୟରାଃ ହନ୍ ମନଶି, ମନଶିରାଃ ହନ୍ ଆମୋନ୍, ଆମୋନ୍ରାଃ ହନ୍ ଯୋଶିୟ, ୧୧ ଯୋଶିୟରାଃ ହନ୍ ଯିକନିୟ ଆଡଃ ଆୟାଃ ହାଗାକ ତାଇକେନା, ନେଆଁଁ ଇସ୍ରାଏଲ୍ ହଡ଼କକେ କିରିଙ୍ଗ୍ ଦାସିକେଦ୍ତେ ବାବିଲୋନ୍ତେ ଇଦିକୁତାଇକେନ୍ ଦିପିଲିରାଃ କାଜିତାନାଃ ।
୧୨ ବାବିଲୋନ୍ତେ ତଲ୍ଇଦି ତାୟମ୍ତେ ଯିକନିୟ ଶଲ୍ଟିୟେଲ୍କେ ଜାନାମ୍କିୟା, ଶଲ୍ଟିୟେଲ୍ରାଃ ହନ୍ ଜିରୁବାବେଲ୍, ୧୩ ଜିରୁବାବେଲ୍ରାଃ ହନ୍ ଅବିହୁଦ୍, ଅବିହୁଦ୍ରାଃ ହନ୍ ଏଲିୟାକିମ୍, ଏଲିୟାକିମ୍ରାଃ ହନ୍ ଆଜୋର୍, ୧୪ ଆଜୋର୍ରାଃ ହନ୍ ସାଦୋକ୍, ସାଦୋକ୍ରାଃ ହନ୍ ଆଖିମ୍, ଆଖିମ୍ରାଃ ହନ୍ ଏଲିହୁଦ୍, ୧୫ ଏଲିହୁଦ୍ରାଃ ହନ୍ ଏଲିୟାଜାର୍, ଏଲିୟାଜାର୍ରାଃ ହନ୍ ମାତ୍ତାନ୍, ମାତ୍ତାନ୍ରାଃ ହନ୍ ଯାକୁବ୍, ୧୬ ଯାକୁବ୍ରାଃ ହନ୍ ଯୋଷେଫ୍, ଇନିଃ ମାରିୟାମ୍ରାଃ କଡ଼ାତେ ତାଇକେନା, ଏନ୍ ମାରିୟାମ୍ ୟୀଶୁକେ ଜାନାମ୍କିୟା, ଇନିଃକେ ମାସି ମେନ୍ତେ କାଜିୟାଃକ ।
୧୭ ନେ ଲେକାତେ ଆବ୍ରାହାମ୍ଏତେ ଦାଉଦ୍ ଜାକେଦ୍ ଗେଲ୍ଉପୁନ୍*ଚାଉଦା ପିଢ଼ି, ଆଡଃ ଦାଉଦ୍ଏତେ ବାବିଲୋନ୍ତେ ତଲ୍ଇଦିକାଦ୍କ ଜାକେଦ୍ ଗେଲ୍ଉପୁନ୍ ପିଢ଼ି, ଆଡଃ ବାବିଲୋନ୍ତେ ଇଦିକାଦ୍କ ଦିପିଲିଏତେ ମାସି ଜାକେଦ୍ ଗେଲ୍ଉପୁନ୍ ପିଢ଼ିକ ତାଇକେନା ।
ୟୀଶୁ ଖ୍ରୀଷ୍ଟ୍ଆଃ ଜାନାମ୍
(ଲୁକ ୨:୧-୭)
୧୮ ✡ଲୁକ ୧:୨୭.ୟୀଶୁ ଖ୍ରୀଷ୍ଟ୍ ନେ ଲେକାଏ ଜାନାମ୍ଲେନା । ଇନିୟାଃ ଏଙ୍ଗାତେ ମାରିୟାମ୍କେ ଯୋଷେଫ୍ ନାଙ୍ଗ୍ ଆସିଆକାନ୍ ତାଇକେନା । ମେନ୍ଦ ଇନିଃଲଃ ଆଣ୍ଦିୟାନ୍ ସିଦାରେ ଇନିଃ ପାବିତାର୍ ଆତ୍ମାତେ ଆବ୍ରାଅୟାନା ଆଡଃ ହାମ୍ବାଲ୍ରୋୱା କାନାଏ ମେନ୍ତେ ଆଟ୍କାର୍ୟାନା । ୧୯ ଇନିୟାଃ କଡ଼ା ଯୋଷେଫ୍ ମିଆଁଦ୍ ଧାର୍ମାନ୍ ହଡ଼ ତାଇକେନାଏ, ଏନାତେ ମାରିୟାମ୍ ବାଦ୍ନାମଃକାଏ ମେନ୍ତେ ଇନିଃ କାଏ ସାନାଙ୍ଗ୍କେଦା, ଏନାମେନ୍ତେ ଇନିଃକେ କା ଆଣ୍ଦିୟଃ ନାଙ୍ଗ୍ ଉଡ଼ୁଃକେଦାଏ । ୨୦ ମେନ୍ଦ ଇନିଃ ନେଆଁଁ ଉଡ଼ୁଃତାନ୍ ତାଇକେନ୍ରେ ପ୍ରାଭୁଆଃ ମିଆଁଦ୍ ଦୁଁତ୍ କୁମୁରେ ଉଦୁବେନ୍ୟାନା ଆଡଃ କାଜିକିୟାଏ, “ହେ ଦାଉଦ୍ଆଃ ହନ୍ ଯୋଷେଫ୍, ଆମାଃ କୁଡ଼ି ଲେକା ମାରିୟାମ୍କେ ଅଡ଼ାଃତେ ଇଦିନାଙ୍ଗ୍ ଆଲମ୍ ବରଏୟା, ଚିୟାଃଚି ଇନିୟାଃ ହାମ୍ବାଲ୍ରୋୱା ପାବିତାର୍ ଆତ୍ମାତେ ହବାକାନା । ୨୧ ✡ଲୁକ ୧:୩୧.†ଲୁକ ୧:୩୧ଇନିଃ ମିଆଁଦ୍ କଡ଼ାହନ୍ ଜାନାମିଁୟାଏ, ଆଡଃ ଆମ୍ ଇନିଃକେ ୟୀଶୁ ମେନ୍ତେମ୍ ନୁତୁମିଁୟା, ଚିୟାଃଚି ଇନିଃଦ ଆୟାଃ ହଡ଼କକେ ଆକଆଃ ପାପ୍ହେତେ ବାଞ୍ଚାଅକଆ ।”
୨୨ ନାବୀକଆଃ ହରାତେ ପ୍ରାଭୁ କାଜିକାଦ୍ ନେ କାଜି ପୁରାଅଃ ନାଗେନ୍ତେ ନେ ସବେନାଃ ହବାକାନା, ୨୩ “ମିଆଁଦ୍ ଡିଣ୍ଡାକୁଡ଼ି ହାମ୍ବାଲ୍ରୋୱା ହବାଅଃଆଏ ଆଡଃ କଡ଼ାହନ୍ ଜାନାମିଁୟାଏ, ଆଡଃ ହଡ଼କ ଇନିଃକେ ଇମ୍ମାନୁୟେଲ୍” ମେନ୍ତେକ ନୁତୁମିଁୟା, ଏନାରେୟାଃ ମୁଣ୍ଡିଦ, “ପାର୍ମେଶ୍ୱାର୍ ଆବୁଲଃରିୟା ।”
୨୪ ଏନ୍ତେ ଯୋଷେଫ୍ ଦୁଡ଼ୁମ୍ଏତେ ବିରିଦ୍କେଦ୍ତେ, ପ୍ରାଭୁଆଃ ଦୁଁତ୍ ଆଚୁକାଇ ଲେକା ଆୟାଃ କୁଡ଼ି ମାରିୟାମ୍କେ ଅଡ଼ାଃତେ ଇଦିକିୟା । ୨୫ ✡ଲୁକ ୨:୨୧.ମେନ୍ଦ ଇନିଃ ମୁତ୍କୁଲ୍ କଡ଼ାହନ୍ ଆଉରି ଜାନାମିଁ ଜାକେଦ୍ ଯୋଷେଫ୍ ଇନିଃକେ କାଏ ଜୁଟିଦ୍କିୟା । ଆଡଃ ଯୋଷେଫ୍ ଏନ୍ ହନ୍କେ ୟୀଶୁ ମେନ୍ତେ ନୁତୁମ୍କିଆ ।