1 Jataenna inara coaraa unaa jeretohacaanu niqui, nena nainenerichaanuhin. Nii jaunna cau Atenau nerichaanuhin. 2 Acaihanejein cana nejera Timoteeochana letoarichaanuhin inara coaraa uhane coina. Acate Cana Coaunera letononeein canacaanu coroatajane, Cana Coaunera Ere benaa que. Nii jaunte inara coaraa ureein, inara suujua lararajiaain nihane, nii aina nelararajiaain, inara suujua nunaain neeichene coina, 3 nabana chatohaneein nejelau suujua cuaain niha chuneine coataa. Inarate raotojoeein niriinanai coitucuhiche. Saain nitohaneein necairichanaa coaraain nihacache nete ne. 4 Nii inara aina nihacaanune bana, inara rai aitocoaanulune tocohaneeinte nelu cana suujua reroecaeraauru. Nitohaneeinte situelu, nii coitucuhichene tocohaneein. 5 Nitohaniha jaunna inara coaarateeunlu. “Esinaete chuhisi rauhijiriin Cana Coaunera Calaohi Jesocurisito ere esenetaain tonoraain neeure,” naain nitohaneein coitucuhanune jerena caaunna inara coaarateeunlu. “Baaso que sarunajaain niha Moconajaerane, baaso chaain neeuruhane inacojoeein inachujian acaauru rai Cana Coaunera Ere benaa que amihanihacaanulu,” naanune jaunne, inara coaarateeunlu, nitohaneein coitucuhanune coina.

6 Nii jaunna nitohaneein esinae rauhijiriin Cana Coaunera Ere esentaain, tonoraain ita belaain, raotojoeein neeichene coitucuun, inara caje turuhin biha Timoteeo canacaanu raina jaun. Chaen techu canacaanu belaain canacaanu coacuhin, canacaanu coaana jeretohichene be. Inara coaana jeretohacaanune rijitojoeein canacaanu coaana jeretohichene be canacaanu rai.

7 Nii jaunna necairichaacaanu natiin, raotojoeein nii que nelararajiaain atiin rachoojoeein nihacaanu. 8 Nitohaneein rauhijiriin Cana Curuaanaa ere tonoraain neeichene jaunna, cha que tonajelanaala nihacaanu. 9 Nii jaunna inara coreniha, “Nariha jataen,” naacaanu, Cana Coaunera notaracae. 10 Nii jaunna janotiin netojoeein Cana Coaunera bajaain nihacaanu, canacaanu coroatajanihane inara rene turuhin inara rai beebejihacaanune, jataain jelai amuritoheriin esenetaain queecha jaaequiin neeichene coina.

11 Aihana jaunna canacaanu coroatajaniha Cana Inaca Cana Coaunera, Cana Curuaanaa Jesocurisito naaonjoaine jerichaanu inara coaraa uhacaanune coina. 12 Inara coroatajaneeine Cana Curuaanaate jelai amuritoheriin esenetaain, tonoraain neein ita belaain, cachaauru belaain, naaonjoaain neeiche inara belaichaaunne rijitojoeein. 13 Aihute nitohaneein rauhijiriin inara suujua coaraain ichaohichene jana inara eruhine Cana Coaunera Calaohi Jesocurisito, raineein nenacaauru aina turuha uhane bana.