1 Rijieeori banate Cana Coaunera ere jianeein ratiriin casaje que acaauru relaain, acaauru coritaa osaaonaaurune esenetaain tonoraa cuurureein tabaauru. 2 Nitohaneeinte necoejenaa charaauru casaje cachaauru ere tonoraa cuurureein, niritiinte be rauhijiriin Cana Coaunera Suujue. 3 Nitohaneeite ene ranaa jeriha cachane caohatiha cuurureein. Chaentechu nelanajanaa jeriha ene ne caohatiha cuurureein. Chaentechu joaenreein lenone que lenoniha cachane caohatiha cuurureein. Raotojoeein coroajeein Cana Coaunera bajaain que neleeonijiaain niha Cana Coaunera Ere coitucuhin esenetaaurera cachaaurune coina, itolere lenone coaaunaain niha Cana Coaunera natiinte, que neleeonijiaain niha cachane caohatiha cuurureein.

4 Itolere Cana Coauneraacha coaaunanohinte caohachae. Nii jaun nainihei chaque irihacane. Nitohanihana jaunte, coroajeein Cana Coaunera bajaain joaaereein raacachene caohachae. 5 Nitohaneein biha Cana Coaunera Erena jaunte caohachae. Chaenchu lenonichaachene ajiniha bajaacachenete caohachae.

6 Caa caitoonjoan que cana nejeraauru- Cana Coaunera cachaauru relaainete, esinaaen rauhijiriin Jesocurisito letono esineneein niha curiquiin. Charijieein teeinti, lenonihane baiha raotojoeein nelararajiae cacha. Nii rijijieeinte Cana Coaunera ere coitucuhine laraajiin niha curiquiin, nii caohati nerelana najaan coitucuhin tonoraaine. 7 Aihana jaun, casaje tonoraelanaala Cana Coauneraacha jerenohincha ichajeeincha neeu.

8 Najaicharoaa cana jaberocone coinate nelate cojoanoonetojoeein necoatijiaacane. Nii amuritoheriinte nelate itolere que rauhijiriin Cana Coaunera Ere tonoraacachene. 9 Esinaaena aitoon, aihane jaun esenetaaichenete ne. 10 Acaihanejein Cana Coaunera esenetaacachena jaunte cana batohin, cana necoeje chanuuruhane niha natiin, neeunaain mainajeein amihanihacache.

Satiin cachate coroatajane Cana Coaunera. Jana esinaen rauhijiriin esenetaauruhanete, nii esenetaaurera coroatajaniha cureein, leeochaauru coroatajanihane amuritoheriin. 11 Caritiin suujuatenajaain relanajaau. 12 Enamanaa neeina jaun, ii batohin, ii necoeje chanuuruhane niha natiin, coa tonoraa. Aihana jaun, atiin caohacha ichaain neeute, ii coaraain ichejijieein caohachaain neeuruhine Cana Coaunera esenetaaurera. Caohatiin ereerejeein, caohatiin ii ichao que ichaohin, Cana Coaunera, leeochaauru, naaonjoaainunri belaain, Cana Coaunera Ere esenetaain, ishuujua coaraain, naaonjoaain neeu atiin.

13 Turuhanune reeintiaain, ita taojiaa cachaaurune jana Cana Coaunera Ere coaraain itolere bana ereretaau. Chaenchu Cana Coaunera coreniha cana nejeraauru suujuateein relanajaau. 14 Jiaonriha ichei Cana Coauneraacha tei amihanenaa jianeeine. Acaauru letoaa Cana Coaunera Suujuene jaunte, ichouturi ichoae biji teein, ii cocoainaaunre Cana Coaunera coitucuurera ichauhenaauru, nii niicha tei amihanenaa nainaaine coina. Aihana jaun, coa jianiha.

15 Atiin itolere bana ii amihaneeon chaaechajeein neeute, taeneein naurutanaurutaain cuujiha ii amihaneeonne coaracurumiin satiin cachaauru.

16 Aonaau. Caohatiin ishuujua coaraain necohalajiin neein rauhijiriin cachaauru relaau laraajiin. Nitohaneein ichaainete, nichoteein jianacoo nerequiin ii ere aohanraauru aina.