Kwap a tu melnum yangkipm kuinen a Jisas ak
Kwap a tu melnum yangkipm kuinen a Jisas ak atn kai Jerusalem
1
(1.1-8.3)
Jisas yipon yangkipm ekg akal kwa Maur Wor alkilen nar
Melnum wor Tiopilus kupm ukweitn wor. Kupm pike ro wurkapm pa ak la naseitn ekg kwap kweiur kweiur wrongwailet a pike Jisas kil ak ekg kaling plan ro tukgunakg lngkep a tu wrong kinkpman ak hep ai kulngkul ngko wang a Maur Wailen wiyel ye kaino kwa ase. Kulngkul ngko wang a kil mo wa wreitn yatom kil paln kai tu melnum yangkipm kuinen alkilen a kil akrkahan pa om Maur Wor aklinjel yatom kil ukwen kwap a yangkipmek wrongwailet pa plaln pa, Maur Wailen wiyel ye kaino kwa kaino ha wor alkilen ase. Ak wang a kil arpm knokg ti pa kil ye kalkut wailet yatom kil mo, om kil wa wreitn plan kil alkil ti ngko wurknong, yatom tu ariel tolpa kil apm wreitn ase. Ake melnum ur akwonalmpen wailet tolpa kil ake wa wreitn pa. Tu ariel kil paln wli pa wli pa nti wailet, wa kil laron yangkipm wor ekg Kingdom a Maur Wailen, tolpa kai wang kmel wekg (40). Wang ur pa kil paln nti tu melnum yangkipm kuinen alkilen pa kai ark wrij, yatom kil la karkurnten la nasen la tolpa, “Ampur kipm nuhurn Jerusalem pa pen. Kipm irk nungkwangen kwei ur a pike Yan alkupmen yipon yangkipm ekg akal ukwepm, tol pike a kupm la nasepm pa. Jon kil pike kalukepm ak hu tolti, pake wang yampingken ekg Yan a kupm hi kalukepm ak Maur Wor alkilen.”
Ak wang ur pa kil paln kai tu melnum yangkipm kuinen alkilen a tu kul ark wrij pa, yatom tu ropontel la tolpa, “Wailen, wang a kitn la pa apm tike aki, ekg kitn akal wreitn atn tukgunakgen ikghlen mento Israel pa, tol a pike tu melnum tukgunakgen alpmenen ikghlento pa?” Ari Jisas la nasen la tolpa, “Pa ake kwei ur a kipm ti ekg al kipm atning ari pa, kalpm, pa kweiur kweiur a Yan alkupmen a kil alkil ai alm wang alkil ai, wa kil alkil lak hi paln pa, hi paln. Pake hi Maur Wor nar wiyepm pa kipm hi wi titnongket yatom kipm hi laron nang akupm atn ha wail Jerusalem ti wa hor ha knokg Jutia ti wa hor kai ha knokg Samaria a wa ye tolpa hor pa kai knokg wrongwailet.”
Maur Wailen wi Jisas ye kaino ha wor
Kil la nasen yangkipmek pa plaln pa, Maur Wailen wiyel ye kaino kwa, wa tu melnum yangkipm kuinen alkilen pa atn ikghnentel tolpa atn, kil kaino kaino tolpa kai eln kahor ham kahor weipmunu wonen ai tolti om ake tu ntie ekg ariel. 10 Tu atn ikghnentel kaino ktnong tolpa atn kaingkai, tu wreitn paitn ekg ari melnum wekg ur pa paln atn yampingken tu ti. Tuwekg pa nowe hapm tungkoren muinmainet pa. 11 Wa tuwekg roponten la tolpa, “Kipm melnum a Kalili, ntekg tolhai ti kipm al wa atn ti ikghnen titnongket kaino ktnong pa? Pa apm Jisas kil alkil pa, melnum a wet Maur Wailen wiyel ye kaino ktnong pa, apm kil hi wa nar tol a wet kipm ariel a kil kaino pake.”
Tu akrkahan melnum ur akal wi wrik a Jutas
12 Wrik a tu melnum yangkipm kuinen a Jisas atne pa pati pa tu kwe la tolpa tipmning Olip. Tu atn ari Jisas kil kaino ktnong plaln pa, tu ha pa wa nar kul kai ha wail Jerusalem a ark yampingken tol tu ntie ekg ngkom ak wang a tu arpm ekg yapm pa.*1.12 Ak wang a tu arpm ekg yapm pa, yangkipm titnongket a tu pa la tolpa, tu ake al ngkom kai ya watinet ak wang ripa, tu ngkom tol kilomita tiel tolti yatom wa kul, yatom aken tita kilomita wrij. 13 Tu kai paln kai Jerusalem pa, tu kai kaino wan wlop ur a hel kaino kwa, pa wrik a tu arke arke. Nang a tu melnum pa pati kil: Pita, Jon, Jems, Antru, Pilip, Tomas, Partolomyu, Matyu, wa Jems, warim kpman a Alpius, wa Saimon, melnum ur a tu Selot 1.13 Tu Selot pa pati, tu hret ekg tu Rom ikghlen tu Israel pa, tu akal tol wa eln melnum ur alntuen a tu alntu Juta ti atn hep ikghlenten., wa Jutas, warim kpman a Jems. 14 Tu kulkai kahor kor tita ark wrij namponen tu kin tiur, wa man a Jisas, wa namponen tu wasokwasok a Jisas. Tu apm ye nikgwalpm wrij tolpa ark pake ekg ropon Maur Wailen aklei wang.
15 Tu ark tolpa kai, wang ur pa tu alntu melnum yangkipm kuinen a Jisas namponen tu wrongwailet paitn tu kul kor tita ark wrij. Tu wrong pa paln tol kmel wampomit wampomwrij (120). Yatom Pita kil wreitn atn la nasen la tolpa, 16 “Kipm melnum worwor alkupmen, kipm itning, kuina ur a pike paln kai Jutas, melnum a pike uk ya ekg tu arkul Jisas pa om erel, pa apm paln komkiti tol ek a Maur Wor a Maur Wailen la hep ak ai wli ek a Teipit yatom kil ro hel kai wurkapm a nangnang alkilen pa. 17 Jutas pa apm pike melnum yangkipm kuinen ur alpmenen a kil ak kwap wrij tol a men ak tike, laron yangkipm a Maur Wailen ekg aklin tu wrong kinkpman.
18 Marpm a Jutas ak armpen knokg pa, kil wi hor ya paitn, tolpa yatom kil ngko eln kai knokg ti yatom ipma a kil pa pus wa nikg a kil pa sruij hor ha knokg. 19 Ti tu wrongwailet a ark kai Jerusalem pa tu atning ari pa, yatom tu alil nangkel knokg pa ak ek hawen alntuen pa la tolpa Akeltama, yiprokgen a wrik nang kil pa pati, 'Knokg a walmpopm hawe.'”
20 Wa Pita kil wa la tolpa, “Ti yangkipm kil a ro hel kai wurkapm a Nangnang a Teipit pa la tolpa, 'Ti knokg a kil pa al atn kalpmel, wa ampur melnum ur arpme, kalpm.'*1.20 Buk Song 69.25 Ti wa ro yat la tolpa, 'Al melnum manet ur wi wrik a kwap a kil.'”* 1.20 Buk Song 109.8
21-22 “Tolpa ti al mento akrkahan melnum ur a pike ntio atn aklei wang ak wang a Jisas kil ntio atn a arpm, ak wang a pike Jon kil kaluk Jisas, hakai ai kulngkul ngko wang a Maur Wailen Yan alkil wiyel ye kaino ktnong. Tolpa ti al mento akrkahan melnum ur a pike ikg a nungkulkg ntio atn pa kul ntio atn ekg al men nasi tu wrong kinkpman pa ekg Jisas a pike mo pa apm wa wreitn ase.”
23 Pita la tolpa plaln pa tu akrkahan melnum wekg, ur pa Josep a tu kwe tolpa Parsapas, wa nang wompel akil pa Jastus, wa ur pa Matias. 24 Yatom tu ropon Maur Wailen pa la tolpa, “Wailen, kitn alkitn pa ari nikgwalpm a men melnum wrongwailet ti. Al kitn planto wrij ur a tuwekg ti a kitn akal akrkahan 25 ekg wi wrik a Jutas pa paln melnum yangkipm kuinen alkitnen. Ti kwap pa pike Jutas ntio ak pa, yatom kil nuhurn atn pa, wa kil mo om kil kai wrik ur alkil a tu melnum paitn a tolpa kai arpme pake.” 26 Yatom tu kpor ker wekg ur, warkip ur watin ur ekg akal mla ur nalu watin pa, kil pa wa wi wrik a Jutas pa, yatom apm Matias pa nalu watin pake, yatom apm kil pa wi wrik a Jutas kai akntie tu melnum yangkipm kuinen wampwam yikakwomwrij a Jisas pake. 1.26 Tu Juta akal ropon Maur Wailen ekg kil akal akrkahan melnum mla ur a kai ak kwap hor pa hor pa, pa tu ro nang a melnum hel weij pa plaln pa, tu klaijen klaijen yatom eln wrij ur pa ngko ekg al tu ari tolpa lak nang a mla ur hele pa, pa apm kil pake.

*1:12 1.12 Ak wang a tu arpm ekg yapm pa, yangkipm titnongket a tu pa la tolpa, tu ake al ngkom kai ya watinet ak wang ripa, tu ngkom tol kilomita tiel tolti yatom wa kul, yatom aken tita kilomita wrij.

1:13 1.13 Tu Selot pa pati, tu hret ekg tu Rom ikghlen tu Israel pa, tu akal tol wa eln melnum ur alntuen a tu alntu Juta ti atn hep ikghlenten.

1:20 *1.20 Buk Song 69.25

*1:20 1.20 Buk Song 109.8

1:26 1.26 Tu Juta akal ropon Maur Wailen ekg kil akal akrkahan melnum mla ur a kai ak kwap hor pa hor pa, pa tu ro nang a melnum hel weij pa plaln pa, tu klaijen klaijen yatom eln wrij ur pa ngko ekg al tu ari tolpa lak nang a mla ur hele pa, pa apm kil pake.