1 Tu melnum wail wail antokg yangkipm nampokgen Sisas pa plalng pa, wa tu kimeket ak wail anel awiyel a pa wa aye kai eng Pailat, 2 atom anel lakati naki Pailat pa kolpa la, “Men ari melnum ti pa kil wa alok tu wrong kin kipman amenen ti kai or ya paipm, a wa kil wa angkengko la ake mpa men ngkli marpm kai eng melnum tukgunakg a kipm Rom pa, wa kil ngkat nang a kil alkil ti la kil ti Krais, melnum tukgunakg a Maur Wailen ukwa nar la ikuwi tu wrong kin kipman.” 3 Atom Pailat pa asentel la, “Ti kitn pa melnum tukgunakg a tu Suta pake?” Ari wa Sisas akalmpe la, “Am kitn alkitn pa la kolpake.” 4 Atom wa Pailat pa lanaki tu melnum ipma krakgen tukgunakgen a Maur Wailen pa, wa tu wrongkwail a itna pa la, “Melnum ti ake kupm ari la kil antokg paipm ur eng mpa kupm la tu ilmpel imo pa.” 5 Ari wa tu wa la titnongket paipm la, “Kil pikekg ak kwap kaling plan tu wrong kin kipman itna yela Sutia ti. Pikekg kil ngkaten itna kaino Kalili ai atom am wa aye nar ti kul no tike. Kolpa atom kil arongke nikgwalpm a tu wrong kin a kipman pa rka kai pa kai pa.”

6 Pailat kil atning a tu melnum wail wail la kolpa atom kil asen la, “Kil ti melnum a anong kanokg a Kalili?” 7 23:7 Luk 3:1Tu akalmpe la, “Ei, kil melnum a Kalili pake.” Atom Pailat tilp tu ayewel kai eng Erot eng ntei, Erot pa kil itna melnum wailen a ikgalen anong kanokg a Kalili pake. Pake ak wang pa, Erot am rpma Serusalem pa yat pake.

8 Tu ayewel kai palng pa, Erot ari Sisas kolpa kil atopen paipm, eng ntei, kil pikekg atning a tu la Sisas pa, atom kil pikekg lantwang wang watinet la kil la kol a riwel. Wa kil akwonalmpen la kol a ri Sisas ntokg kwei ur titnongket kol a pikekg kil antokg atom tu wrong kinkipman ari atom tu wrekg paipm pa, eng kol a kil ri. 9 Atom Erot kil akasen Sisas oklala watipmen, ari ake kil akalmpe oklala ur. 10 Ari tu melnum ipma krakgen tukgunakgen pa nampokgen tu melnum a aroaro wonel tu yangkipm a Moses pa a antiwel itna pa anel arkiwel titnongket la, kil melnum a antokg paipmpaipm. 11 Atom Erot nampokgen tu melnum alkil a almpwrong pa, anel ari elukgen la paipmelel, a ak nokgelel. Atom tu awi apm ariwor ur pa nowewel plalng pipa, anel ukwawel yaper kai eng Pailat. 12 Ak wang ketn pa, Erot ekg Pailat a pikekg wrongmanto eng tita pa, wa ekg kai wangkir a yapon or wris.

13 Atom Pailat kil akwe tu melnum ipma krakgen tukgunakgen, a tu melnum wailen wailen a ikgalen men Suta pa nampokgen tu wrong kin kipman pa anel wli. 14 Atom kil lanaken la, “Wet kipm ayewel wli ep pa, kipm arkiwel la kil arongke nikgwalpm a tu wrong kin kipman pa kai atn palpa. Pake kipm alkipm wet atning pa, kupm ariwel a kupm atning yangkipm akilen pa, ari ake kupm ari kil antokg paipm ur, kol a kipm arkiwel pa. 15 Wa Erot pa ake wa ari la kil antokg paipm ur kolpa, atom wa kil ukwawel yaper kul eng mentepm ti. Ti melnum ti ake antokg paipm ur, eng mpa mentepm ilmpel imo pa. 16 Ti mpa kupm la tu orel plalng pa, kupm ungkwantel kil kai.” 17 Akangklei wring wris wris a tu antokg okipma wail al al kol ri ti pa, Pailat kil mpa ngketen melnum wris ur a rpma wan tipmining pa kul or kai en.

18 Ari tu wrongkwail kin kipman a itna pa anel la wlipa wlipa yikakatnen la, “Or kil pa imo o! A ngketen Parapas pa kul or kai en!” 19 Kol Parapas pa pikekg anti tu melnum tiur wrekg itna anong wail ti la tulpulng ungkwan tu melnum wailen wailen a Rom a ikgalenten ti kai tukulelkg, atom alm melnum ur amo, atom tu awiyel aye kai rpma wan tipmining. 20 Pake Pailat pa wasrongen la mpa wangketen Sisas pa or en, atom wa kil lanaki tu wrong kin kipman pa anti ur. 21 Ari wa tu la yikakatnen la, “Iyewel kai kurkurngkel rki yo okgmangki pawo!” 22 Wet Pailat asenten anti wekg ise, ari wa kil wa asenten anti ur la, “Pikekg kil antokg kuina paipm? Ake kupm ari kil pa antokg paipm ur eng mpa orel imo pa! Ti mpa kupm la tu orel plalng pa, kupm ungkwantel kil kai.” 23 Ari tu itna pa itna pa la plalplal mainmain la, kurkurng Sisas pake, atom ampri okel Pailat pa. 24 Kil atning a tu wrongkwail tu la titnongket kolpa atom, kil awi wor la mpa tu kurkurng Sisas rki yo okgmangki. 25 Atom kil angketen melnum a tu wasrongen a pikekg wrekg la tulpulng ungkwan tu wailen wailen a Rom a ikgalenten pa antokg melkget alm tita atom kil alm melnum ur amo pa, atom tu ayewel kawor rpma wan tipmining pa kul or kai en, a kil elng Sisas pa kai wam a tu melnum a almpwrong pa la tu ntokg kitila ik wasrongen alntu pa.

26 Atom tu melnum a almpwrong pa tu awi Sisas pa kolti, tu aye kai. Tu angkom kai pa, tu ansil melnum ur pa, nang alkilen pa Saimon, kil melnum kai anong Sairini. Kil angkai wring pa kul la kai kawor Serusalem pa ari tu angkengkel kolti, tu alkel yo okgmangki a Sisas pa la kil rki iye kutnun Sisas pa ntiwen iye kai.

27 Tu wrong watipmen paipm pa tu katnun Sisas, nampokgen tu kin tiur pa, akg atop ak ok namputen areinsel. 28 Ari Sisas plelng lanaken la, “Kipm kin a Serusalem pa! Ampur kipm akg arein kupm ti pa, kipm akg rein kipm alkipm ti numpokgen tu warim alkipmen pawo! 29 23:29 Luk 21:23Ik wang ur pa ipma wakget a Maur Wailen ikga palng, atom tu ikga la kolpa la, 'Tu kin a kimpong, a tu kin mamingkisen, a tu kin a ake uk ma warim pa, ik wang pa tu pa ikga worenen ketnketn pake, ti tu pa tu itopen o!' 30 23:30 Osea 10:8; Amp 6:16Ik wang pa, tu wrongkwail ikga la tipmining ti la, 'Tipor nar ik auro!' A la wrik nangen ti la, 'Ik lampo!' 31 Yo maing kil pa tu antokg kolpake, a yo nungkwor pa ikga tu ntokg paipm wrisen ai. Kol melnum a ake antokg paipm ur pa tu antokg kolkilke, a kipm melnum a antokg paipmpaipm pa ikga tu ntokgtepm paipm wrisen ai or kai ai.”

32 Atom melnum trangkowet wekg ur pa wuten tu melnum a almpwrong pa ayewen aye kul la kurkurngken imo numpokgen Sisas pa. 33 Atom tu wli palng kul wrik a tu namput la Melnum Tukgunakg Timpal pa, tu karkurng Sisas rka yo okgmangki nampokgen melnum trangkowet wekg pa, ur rka wam wi pa, wa ur rka wam wangkokg. 34 23:34 Nang 22:18Atom Sisas kil la, “Yaiyai! Kitn ungkwan paipmpaipm a tu ti, eng ntei, tu ake ariwe kuina ur a tu antokg ti.” Atom tu klasinen wes pa awi awi ari eng mpreing apm akilen pa.

35 23:35 Nang 22:7-8Atom tu wrong kin kipman pa anel itna ikatnen kolpa itna, tu melnum wailen wailen pa anel akgnokgel Sisas pa la, “Kil pikekg angklin tu tiur ai. Ti kol kil melnum a pikekg Maur Wailen takweiyel aklale la kil ikuwi tu wrong kin kipman pa, ti kil ngklin kil alkil tiwo!” 36 23:36 Nang 69:21Wa tu melnum a almpwrong pa wa anel ak nokgelel, anel kulno kolti alkel u titno kinipis pa la kil il, 37 atom anel la kolpa la, “Kol kitn melnum tukgunakg a tu wrong kin kipman a Suta ti pa, kitn ngklin kitn alkitn tiwo!” 38 Ela kaino yo tukgunakgen pa tu nira kolpa la la, “Kil melnum tukgunakg a tu Suta.”*23:38 Ari kil yangkipm yiprokgen a tu karkurng Sisas amo rka yo okgmangki, pa tu nira ak ok anongen wraur: Krik, Latin, Ipru.

39 Wa melnum trangkowet ur a rka kai yamping wompel a Sisas pa kil wa ak nokgelel la, “Ti kitn ti, kitn la kitn melnum a pikekg Maur Wailen kil ukwaweitn nar ti, kol a kitn ngklin kitn alkitn ti ri, wa kol a kitn ngklin mentekg ti yat!” 40 Ari wa ur a rka yamping wompel pa akle ur a wuten la rka kai yamping wompel pa la, “Ti kitn ti ake ngkarken Maur Wailen ti? Ti mentekg am arki kalkuten wris kol kil pake. 41 Kol mentekg ti pa pikekg antokg paipmpaipm atom tu karkurngko pake, pake kil pa pikekg ake antokg paipmpaipm ur.” 42 Atom kil lanaki Sisas pa la, “Sisas, ik wang a ikga kitn palng wailen ikglen kweikwei wrongkwail pa, kitn ikwonilmpentopm!” 43 Ari wa Sisas lanakel la, “Kupm lanakeitn aklale wrisen la, amti kitn mpa nti kupm rpmi kaino anong wor tike.”

44 Atom ak takgni no pirng pa, elng kul kai mining karng kolti akaur kanokg ti yela, itna a, a, tukoryauk pa angkli om pa, mining pa kai plalng om, 45 23:45 Ipr 6:19-20; 10:19-20elng kul kai mining pa atnen takgni ake el, a apm kaki wail a tu alekg rka akangketen yalming a Maur Wailen pa rakol wompwekg.

46 Atom Sisas kil kirkar akg yikakatnen ak ok namputen yan alkil pa la, “Yaiyai, uwi maur amen wor akupmen pawo!” Kil la kolpa, a kil amo.

47 Melnum itna ep a tu melnum a almpwrong kamel wampwomis pa kil ari kweikwei a palng kolpa atom kil ngkat nang a Maur Wailen pa la, “Aklale wrisen, kil pa ake melnum ur a antokg paipm ur!”

48 Tu wrongkwail a wli rka pa tu ari kweikwei a palng kolpa pa, tu arein paipm kolti, wam yapo nol kolti yaper kaingkai wan anong alntu ai.

49 Tu yiprokgen, a tu melnum wor a Sisas pa, wa tu kin a katnuntel angkaino Kalili ai nar pa, anel itna watinet ketn ketn atom ari kweikwei a palng pa.

50-51 Melnum ur pa, tu namput la Sosep, melnum ur kai anong Arimatea. Kil anong ur a ela anong kanokg a Sutia, pa melnum ute wor a rpma nungkwangen la ri Maur Wailen itni wailen ikglen kweikwei wrongkwail. Kil pa am wa mring man wail ur a mapming a rpma atning atning yangkipm pa yat pake, pake kil ake pikekg ipma wris nampokgen tu kwapwris alkil a tu rpma yapon yangkipm a ak nikgwalpm kolpa eng Sisas pa. 52 Atom kil kai kawor ari Pailat pa, eng la uwi palk a Sisas pa iye kai lil. 53 Atom Pailat awi wor pa, kil kul or kai nalu palk pa kolti, aye nar ak apm tangkoren pa yapo plalng pipa, kil ngkat aye kai alil ermpa kawor mlamin wunen ur a pikekg tu u pa, a ake pikekg tu alil melnum ur armpe pa. 54 Atom wang pa wang a tu numprampen kweikwei eng rpma eng awi yapm, pa kol weti kai elngen nungkurikg ari kamel lukg wekg pa, a ngkiten i pa kai ikgkil wang misen pa, pa wang wail a tu rpma eng yapm pake.

55 Tu kin tiur a pikekg anti Sisas angkaino Kalili ai nar pa anel katnun Sosep pa atom, tu ari mlamin pa, wa palk a Sisas a kil alil pa. 56 23:56 Taku 20:10; Yang 5:14Kolti, tu yaper kai numprampen u yiwa wa kweikwei yaprekget yaprekget pa eng la ikinel palk akilen pa. Atom ak wang wail pa tu rpma eng yapm kol a yangkipm titnongket pa la pa.