1 Ti mpa mentepm la kolai Apraam yoampei a men Suta ti palng wliwe pa? Itna kolai atom Maur Wailen ari kil pa la kil ute wor pa? 2 Aklale, kol Apraam kil itn a rpmi ikwap ute wor pa, atom kol a Maur Wailen kil yikak itni atn a rpma a kwap a kil ak pa atom ari la kil melnum ute wor, pati Apraam kol a ngkit nang alkilen pa. Pake itna wulmpa a Maur Wailen pa kil ake antiwe mpa ngkit nang alkilen pa la kil melnum ute wor pa, kalpis. 3 4:3 Ngkat 15:6; Kal 3:6Ti wrkapm a Maur Wailen pa la kolai? Pa la kolkil la, “Apraam pa kil ukipma yangkipm a Maur Wailen la pa itna titnongket, atom Maur Wailen kil awi ker a kil akawiye paipmpaipm a Apraam pa angkli atom kil ari la kil ute wor.” 4 Kol melnum ur akwap a melnum manet ur atom awi marpm akalmpe kwap a kil ak pa. Melnum a kil akentel kwap pa ake kil areinsel atom alkel marpm pa kalpmilel pa, kalpis, kil akentel kwap pa atom kil alkel marpm pa. 5 Pake melnum a ukipma kolti, kil ake akwonalmpen la kil mpa ikwap wor eng mpa Maur Wailen riwel la kil ute wor pa, kolpa kalpis. Kil ukipma Maur Wailen alkil a ari tu melnum a antokg paipmpaipm pa la tu ute wor. Kolpa atom Maur Wailen yikak itna a kil ukipma kil pa atom kil ariwel la kil ute wor. 6 Maur Wailen ake yikak itna kwap wor a melnum pa ak atom ariwel la kil ute wor pa, kalpis, kil yikak itna a kil ukipma kil ti kolti. Pa kai irir kolen pikekg ep ak ai Tepit kil la atopen wor a tu melnum a ukipma kolpa. Tepit pikekg la kolkil la, 7 4:7 Nang 32:1-2”Tu melnum a Maur Wailen kil ungkwan paipmpaipm atuwen plalng ise, pa tu pa wor pake, tu itopen o! Ei! Maur Wailen kil ake wa akwonalmpen paipmpaipm a tu pa itna, kalpis. Kil am woniketen ise. 8 Melnum a Maur Wailen kil awi ker a kil pikekg akawiye paipmpaipm a kil antokg pa angkli atom kil ari melnum pa la kil ute wor pa, kil pa wor pake, kil itopen o!” Yangkipm a pikekg Tepit la pa am kai itna kolpake.

9 4:9 Ngkat 15:6Melnum a Maur Wailen kil awi ker a kil akawiye paipmpaipm a melnum pa antokg pa angkli pa, kil pa wor pake, kil itopen o! Ti pa la men Suta a tu wangketo num katila yangkipm titnongket pa kolti antiwe atopen? A kipm a ake tu wangketepm num kol kla a Maur Wailen anel ak amprin men Suta ti pa, kipm kolpa pa ake mpa kipm itopen? Pati nira ela wrkapm a Maur Wailen pa akalmpe kolkil la, “Maur Wailen kil ari Apraam kil ukipma kil pa kolpa atom kil awi ker a kil akawiye paipmpaipm a Apraam antokg pa angkli a kil ariwel la kil ute wor.” 10 Pikekg Maur Wailen ari Apraam pa la kil ute wor pa ak wang na? Pikekg tu wangketel num pa ep plalng pa, wa Maur Wailen ariwel la kil ute wor pa katnukg? Aki pikekg Maur Wailen ariwel la kil ute wor pa ep plalng pa, a tu wa wangket num pa katnukg? Pikekg Maur Wailen ariwel la kil ute wor pa ep pake. 11 4:11 Ngkat 17:10-11Kil ukipma Maur Wailen pa ep atom Maur Wailen ariwel la kil ute wor. Ak wang pa ake tu angketel num pa, apa. Kolpa itna a a, Maur Wailen lanakel atom tu wangketel num pa. Pa kla a Maur Wailen ak plan ak titnongketel la kil ari Apraam pa la kil ute wor atnen a kil ukipma kil. Apraam kil ake tu wangketel num pa, a pa, pake kil ukipma Maur Wailen, pa atom kil pa palng yan yiprokgen a kipm melnum wrongkwail a ake tu angketepm num kol kla a Maur Wailen ak amprin men Suta ti. Pake kipm ukipma Maur Wailen pa, atom Maur Wailen kil wa ariwepm la kipm pa wa kipm ute wor. 12 A wa kolpa yat pake, kil wa palng yan yiprokgen a men melnum a tu wangketo num pa yat. Ake lala tu wangketo num pa wris pa, kolpa kalpis. Pa la men wa ukipma Maur Wailen. Apraam kil ake tu wangketel num pa, a pa, pake kil ukipma Maur Wailen. Wa kol men ukipma Maur Wailen kutnun nepm yikak a Apraam a pikekg ukipma Maur Wailen pa, pa kil wa palng yan yiprokgen amen ti yat.

13 4:13 Ngkat 17:4-6; 22:17-18; Kal 3:29Maur Wailen pikekg yapon yangkipm nampokgen Apraam a tu a kil angket ale angkai pa kulngkul kul pa la, kil ikga lken kanokg a kweikwei wrongkwail ti. Kil ake yapon yangkipm pa nampokgen Apraam atnen a Apraam atning katnun yangkipm titnongket ur a pikekg kil uk tu a men pa ariworwor, kalpis. Kil yapon yangkipm nampokgentel pati atnen a kil ukipma kil ti atom kil ariwel la kil pa melnum ute wor.*4:13 Mentepm ake ariwe worwor yiprokgen a yangkipm a Maur Wailen la kil la uk kanokg a kweikwei wrongkwail ti Apraam a tu a kil angket ale angkai pa kulngkul kul ti pa. Maur Wailen la ikga lken anong kanokg Kenan pa, aki kil ikga la ntokgten palng kol mrer wail a arpmen ya yiprokgen a kweikwei wor wor wailet a Maur Wor pa eng wrongkwail kin a kipman a rpma kanokg ti. Aki kil la tu a rpma yela kanokg ti pa la tu ikga ukipma kutnun yangkipm a Maur Wailen kolen Apraam pa, atom tu ikga nti Krais itni wailen ikglen kanokg a kweikwei wrongkwail ti. 14 4:14 Kal 3:18Kol pikekg Maur Wailen yipon yangkipm nimpokgen tu melnum a katnun yangkipm titnongket akilen pa ariworwor pa, la ikga kil uk kweikwei wor wor akilen pa tu pa, ti mpa wa mentepm ti wa ukipma Maur Wailen pa kalpmilel kolti eng kuina wai? Kolpa pati yangkipm a pikekg Maur Wailen anti Apraam yapon pa wa kai kalpis kolti. 15 4:15 Rom 3:20; 5:13Kol Maur Wailen pikekg ake lko yangkipm titnongket ur pa pipa, mentepm kol ake kipor. Pake kil pikekg alko yangkipm titnongket, pake mentepm ake katnun pa yek kimeket, kolpa atom ak antokg Maur Wailen ipma wakget eng mentepm ti.

16 4:16 Kal 3:7Kolpa ti ipma wor a Maur Wailen plan ak angklinso pa ak titnongketel yangkipm a pikekg kil yapon nampikgen Apraam pa la tu wapyipmiri a walyipmiri a Apraam pa yat la tu ikgam uwi kweikwei a pikekg kil yapon yangkipm la lken pa. Kweikwei a kil yapon yangkipm pa ake a tu men Suta a pikekg awi yangkipm titnongket a pikekg kil alko pa wris. Kweikwei a kil yapon yangkipm pa a kipm melnum wrongkwail mlaur a ukipma kolen pikekg Apraam ukipma pa. Kolpa atom Apraam pa kil yan yiprokgen a mentekg yatenen atnen a mentekg ukipma pake. 17 4:17 Ngkat 17:5Pa kai irir kolen yangkipm yiprokgen a nira ela wrkapm a Maur Wailen pa la Maur Wailen lanaki Apraam pa kolkil la, “Kupm takweiyeitn la ikga tu wrong kin a kipman mapming wailet yela anong kanokg wrongkwail numputeitn la kitn yan atuwen.” Mentepm wrongkwail a ukipma Maur Wailen kolen Apraam pa, itna wulmpa a Maur Wailen pa Apraam pa kolen yan amentepmen. Kil ukipma Maur Wailen, kil Maur Wailen a la tu melnum a amo wa wrekg rpma, a wa kil Maur Wailen a la kweikwei a ake pikekg palng ep pa wa palng itna.

18 4:18 Ngkat 15:5Apraam ari kil alkil la kil ake antiwe angket warim ur kol a Maur Wailen yapon yangkipm pa, ari Apraam kil ukipma rpma nungkwangen ariwe la pa ikgam palng kolpake, kolpa atom kil palng yan a wrong kin a kipman mapming wrongkwail kai yela kanokg ti. Katila kolen Maur Wailen pikekg yapon yangkipm lanakel kolpa la, “Tu warim watnom walwalpopm walyaru a wapyipmiri a walyipmiri akitnen pa ikga palng umpen wailet paipm ai.” 19 4:19 Ngkat 17:17Apraam ari num alkil pa ari kil am wror paipm tike, wreren wring kamel wampwomis ise, akentiwe mpa kil ngket warim pa, kalpis. Wa kil ari kin alkil Sara pa ari am mayen ise, akentiwe mpa kil iye warim pa, mampleng a warim arpme pa am mis ise. Ari ake kil elngen a kil ukipma pa, kil wa ukipma itna titnongket kolpa itna. 20 Nikgwalpm a kil pa ake rka wekg wekg, a ake kil elngen a kil ukipma yangkipm a pikekg Maur Wailen kil yapon nampikgentel pa, kalpis. Kil ukipma itna titnongket kolpa itna wa kil ngkat nang a Maur Wailen. 21 Nikgwalpm a kil pa ake akwonalmpen watipmen, kalpis, nikgwalpm a kil pa rka titnongket kolti ariwe, la kweikwei a pikekg Maur Wailen yapon yangkipm la ikga palng pa, pa kil antiwe titnongket a ikga ntokg kweikwei pa palng kolpake. 22 4:22 Ngkat 15:6Kol wrkapm pa la kolkil la, “Apraam kil ukipma yangkipm a pikekg Maur Wailen yapon pa itna titnongket kolpa kai, atom Maur Wailen kil ariwel la kil melnum ute wor.”

23 Yangkipm a la Maur Wailen ari kil pa la kil melnum ute wor pa, pa ake nira ak la Apraam wris pa, kalpis. 24 Yangkipm pa nira ela eng akangklin mentepm ti yat. Maur Wailen mpa wa ri mentepm ti la mentepm melnum ute wor. Eng ntei, mentepm ukipma Maur Wailen, kil a pikekg la Sisas Wailen a mentepmen a pikekg amo pa wa wrekg rpma. 25 4:25 Aisaia 53:4-5Pikekg Maur Wailen kil uk Sisas kai wam a tu wrong manto almpel atom kil amo eng ak armpen paipmpaipm amentepmen ti. Kil wa la Sisas kil wrekg rpma ak antokg kil ari mentepm ti la mentepm ute wor itna wulmpa akilen.