Tup Hibru
1
Jisas Krais kin Talah tikin Got
1 Somoho somohonme pe, yaŋah wula wula ŋaiye Got nangange wusyep nate gahme lenge profet pe, ni wula wula lenge profet yanange wusyep uku yal lenge mwankaꞌ poi. 2 Kom tukwini ŋup yuwo leꞌe pe, Got ŋanange wusyep natme Talah kin ti, wusyep uku natme poi. Got topoꞌe Talah esep kin ilyeh uku tinge hindi yende kekep, topoꞌe ŋaiꞌe ŋaiꞌe lalme leꞌe. Topoꞌe kin ilyeh uku ŋaiye Got si nalaŋatme kin ŋaiye ka ambaꞌe ŋaiꞌe ŋaiꞌe lalme. 3 Pe Talah uku ki pasam poi yirise embere tikin Got ŋaiye ki naŋarꞌe nate gahme poi. Pe ki ŋahilyeh taꞌe kitikin Got. Wusyep kin pe, ki bongol sekete, topoꞌe wusyep uku pe, ki ŋende ŋaiꞌe ŋaiꞌe lalme ki sai bongol. Kin si ŋende wah kin miꞌe ŋaiye nongohe hwap lenge miyeꞌ tuweinge ŋaiye yende pe, tinge tahar yarp bwore miꞌ supule. Krais, kin narp nanah syep non tikin Got ŋaiye narp kiŋ, miyeꞌ ondoh nanah hlaꞌ. 4 Luku ki pasam poi nange Talah tikin Got pe, kin Lahmborenge supule nengelyembe lenge walip hlaꞌ. Topoꞌe naŋ ŋaiye Got naŋaꞌe kin pe, ki ŋembere sekete taharꞌe naŋ lenge walip hlaꞌ.
Talah tikin Got ki nengelyembe lenge walip hlaꞌ
5 2Sam 7.14, 1Sto 17.13, Sng 2.7Somohon Got ŋaname Talah kin na,
Nin Talah ŋam. Tukwini ŋam marp Yai nin.
Topoꞌe Got plihe ŋanange na,
Ŋam ma murp Yai kin. Pe kin ka orp Talah ŋam.
Wusyep uku pe, Got ŋanange nalme Jisas, o yukur kin ŋanange me walip hlaꞌ ende, pakai. 6 Lo 32.43Kom ŋupe ŋaiye Got nember Talah ondohe kin uku nate gah kekep pe, kin ŋanange na,
Lenge walip hlaꞌ lalme ka yisarꞌe ŋimbep, topoꞌe yirisukwarme kin.
7 Sng 104.4Kom Got ŋaname lenge walip hlaꞌ na,
Kin ŋende lenge walip hlaꞌ kin taꞌe yohe,
topoꞌe lenge miyeꞌ wah kin uku pe, tinge taꞌe nih ilim.
8 Sng 45.6-7Kut Got ŋaname Talah kitikin na,
Got, nin na orp kiŋ nye nyermbe. Nin miyeꞌ bwarme.
Ŋaiꞌe ŋaiꞌe ŋaiye nin ŋende ŋaiye bepteme lenge miyeꞌ tuweinge nitei,
ki bwore bwarme.
9 Nin ŋende nihararme yaŋah bwore bwarme,
kut ni garnge yaŋah ŋaiye pupwa.
Taꞌe luku pe, Got ŋaiye Got nitei si nuruꞌe pinip winyeꞌ nanah nin pe,
kin nalaŋatme nin taꞌe miyeꞌ ŋaiye nambaꞌe naŋ embere.
Pe luku kin ŋende nin hriphrip supule nengelyembe lenge mitiŋ lalme.
10 Sng 102.25-27Got plihe ŋaname Talah kin na,
Nin Lahmborenge ŋaiye ŋendeheiyeh ni ŋende kekep pe, ki sai bongol.
Topoꞌe ŋaiye syep nitei pe, ni ŋende ŋaitem,
topoꞌe ŋaiꞌe ŋaiꞌe lalme ŋaiye sai nanah ŋaitem.
11 Ŋaitem topoꞌe kekep ŋaiye ni ŋende luku pe,
ka pupwa yehe pe, ka miꞌe, kut nin na orp nye nyermbe.
Tinge ka jinir tuꞌe ŋaiyuwat ŋaiye si telei muririꞌ.
12 Na epelyeꞌe tinge hindi hoime tuꞌe ŋaiye tinge yepelyeꞌe ŋaiyuwat.
Tinge ka gerŋen tuꞌe hihyilih telei ŋaiye si pupwa yehe.
Kut nin pe, na orp ŋahilyeh.
Nin yukur ŋaimune ka plihe bunjenge nin, pakai.
Topoꞌe nin na orp nye nyermbe.
13 Sng 110.1Got ŋaname Talah kin na,
Nin na orp syep non ŋam el tutume ŋaiye ma member
lenge wachaih nin ka yurp tuwihme ŋihip nin.
Wusyep uku yukur Got ŋaname lenge walip hlaꞌ ende, pakai.
14 Lenge walip hlaꞌ tinge yipihinge pe, tinge yende wah tikin Got. Pe Got nember lenge nal ŋaiye ka yende wah yungwis lenge miyeꞌ tuweinge ŋaiye kin de ka ambaꞌ lenge no, ka yurp topoꞌme Got.