9
Lenge miyeꞌ tuweinge ŋaiye Got si nalaŋatme
1 Ŋam yukur homboꞌe. Detale, ŋam miyeꞌ tikin Krais pe, ŋam manange wusyep bwore mise. Yohe Yirise pwale ŋoihmbwaip bwore, topoꞌe ŋam sisyeme nange wusyep ŋaiye ŋam manange ki bwore mise. 2 Ŋoihmbwaip ŋam ki ginir supulme yip Juta, topoꞌe ŋam masande syohe embere sekete nato ŋoihmbwaip ŋam me yip Juta ŋaiye lenge bamtihei ŋam. 3 Ŋam masande ŋaiye Got ka ungwisme lenge toꞌ tatai ŋam lenge Juta. Ŋam masande ŋaiye Got ka ikil mande lenge Juta miyeꞌ tuweinge unuh me ŋam pe, kin ka ongohe ŋam el wohme Krais, ŋaiye yaŋah uku ka ungwisme lenge toꞌ tatai ŋam pe, ka yambaꞌe luh ŋam yil moihlaꞌ. 4 Kis 4.22Lenge miyeꞌ tuweinge luku Got si nalaŋatme tinge. Kin ŋende tinge yarp taꞌe talah kitikin pe, tinge lalme yarp ya yoto yirise bongol kitikin uku. Kin nupwaiꞌe kontrak ŋotop tinge, topoꞌe kin nangang lenge wusyep erŋeme. Kin nasamb lenge yaŋah ŋaiye ka yirisukwarme yahraꞌe naŋ kin, topoꞌe tinge yambaꞌe wusyep tupwaiꞌ me ŋaiꞌe ŋaiꞌe ŋaiye ka angang lenge. 5 Lenge loumwah ŋendehei tinge pe, diꞌ naŋ tinge tahar ŋembere. Topoꞌe bamtihei ilyeh lenge Juta luku pe, Krais kin nat taꞌe miyeꞌ kekep, topoꞌe kin Got pe, kin bepeteme ŋaiꞌe ŋaiꞌe lalme. Taꞌe luku pe, nye nyermbe lenge miyeꞌ tuweinge lalme ka yirisukwarme kin. Mise!
Pol ŋanange wusyep me ŋaimune ŋaiye Got ŋende lenge Israel
6 Ŋam yukur manange nange wusyep tupwaiꞌ ŋaiye Got nupwaiꞌe pe, ki nal luh pakaiye, pakai. Lenge miyeꞌ tuweinge lalme ŋaiye bamtihei Israel pe, tinge lalme yukur Got nalaŋatme tinge kitikin. 7 Stt 21.12Lenge ŋambaih talah tikin Abraham lalme ŋaiye yate jande wim tikin Abraham pe, tinge luku yukur talah tikin Abraham, pakai. Somohon Got ŋaname Abraham na, “Lenge ŋambaih talah Aisak pe, tinge ka yurp tuꞌe talah nin.” 8 Taꞌe luku pe, lenge talah ŋaiye lenge miyeꞌ tuweinge yate yarp ilyeh ŋaiye yaraꞌ lenge pe, tinge luku yukur talah tikin Got, pakai. Kut lenge talah ŋaiye tinge yaraꞌ lenge jande wusyep ŋaiye Got nupwaiꞌe pe, tinge luku talah tikin Abraham bwore mise. 9 Stt 18.10Leꞌe wusyep tupwaiꞌ tikin Got ŋaiye kin ŋanange taꞌe leꞌe, “Ŋup ilyeh eꞌe ŋaiye ŋam malaŋatme pe, ka ŋahilyeh el wahtaip ilyeh ŋaiye ma mut pe, Sara ta waraꞌe talah miyeꞌ ende.”
10 Pe wusyep tupwaiꞌ tikin Got yukur miꞌe, pakai. Rebeka ti waraꞌe lahmiyeꞌ hoi. Yai tinge hindi Aisak. Kin loumwah poi. 11 Stt 25.23Kom teter ŋaiye Rebeka yukur waraꞌ lenge lahmiyeꞌ hoi uku, topoꞌe teter yukur tinge hindi yende ŋaimune ŋaiye ki bwore lakai pupwa pe, ti si wambaꞌe wusyep tupwaiꞌ uku watme Got yer. Got kin nalaŋatme miyeꞌ gande ŋoihmbwaip topoꞌe ŋasande kitikin. 12 Got ŋaname ti na,
Talah ondohe ka orp miyeꞌ wah tikin talah ŋaiye na araꞌe ot gunde.
Kin ŋaname wusyep uku miꞌe pe, ti waraꞌe tinge hindi. Wusyep uku pasam poi ŋaiye Got nalaŋatme miyeꞌ gande ŋasande kitikin. Yukur ki gande yaŋah me wah ŋaiye poi mende bwore lakai pupwa. 13 Mal 1.2-3Wusyep tikin Got ŋaiye sai nato tup ŋanange na,
Ŋam mende nihararme Jekop, kut ŋam gwarnge Iso.
14 Ya mininge tuꞌe la? Got kin pupwa ŋaiye ŋende ŋai taꞌe luku lakai? Pakai. 15 Kis 33.19Kin ŋaname Moses na,
Ŋaiye ma ŋoih miꞌmiꞌ me lahmende pe, luku ŋasande ŋam tanam.
Topoꞌe ŋaiye ma ŋoihginirme lahmende pe, se ma ŋoihginirme kin.
16 Taꞌe luku pe, ŋupe ŋaiye Got nalaŋatme miyeꞌ, luku yukur nat ŋasande miyeꞌ, topoꞌe wah nihe ŋaiye kin ŋende, pakai. Kut Got se ka asambe ŋoih miꞌmiꞌ kin elme lahmende ŋaiye kin nalaŋatme. 17 Kis 9.16Wusyep tikin Got ŋaiye sai nato tup ŋanange ŋaiye Got ŋaname Fero, miyeꞌ ondoh Isip na,
Ŋam si malaŋatme nin ŋaiye na orp miyeꞌ ondoh,
topoꞌe ma yasamb bongol ŋam Got mil me nin
ŋaiye lenge miyeꞌ tuweinge lalme ka yetekeꞌe no,
ka yininge naŋ embere ŋam yil kekep lalme.
18 Taꞌe luku pe, Got se ka ŋoih miꞌmiꞌ me lahmende ŋaiye ki ŋasande. Topoꞌe ŋaiye kin de ka upwaiꞌe ŋoihmbwaip miyeꞌ ende no, ka susukut pe, se ka ende gunde ŋasande kitikin.
19 Taꞌe luku pe, ŋende yip se ka ini ŋam tuꞌe leꞌe, “Ŋaiye ka tuꞌe liki pe, detaꞌe lai ŋaiye Got ka ini lenge miyeꞌ nange tinge yende pupwa? Lahmende tatame ŋaiye ka engelyembe ŋasande tikin Got no, ka gunde ŋasande kitikin?” 20 Ais 29.16, 45.9Kom nin miyeꞌ iki, nin lahmende tatame ŋaiye na se ininge wusyep elme Got tuwaꞌe ŋaimune ŋaiye ki ŋende me nin? Marp kekep yukur ka se plihe inime miyeꞌ ŋaiye ŋere kin na, “Detaꞌe lai ti ni ŋende ŋam taꞌe leꞌe?” 21 Miꞌe pe, miyeꞌ ŋaiye ŋende marp se ka ambaꞌe kekep syeꞌ pe, se ka ere marp gunde ŋasande kitikin. Ka ere marp kekep hoi. Marp kekep ŋoinde ŋaiye ki bwore miꞌ supule pe, ka inir keteme ŋaiye ka yende wenersep embere embere pe, ka yambaꞌe yenge tus. Kut marp kekep ŋoinde pe, ka yenge yende ŋaiꞌe ŋaiꞌe tetehei ŋaiye sikirp pupwa. 22 Topoꞌe ki ŋahilyeh nalme ŋaimune ŋaiye Got ka ende. Kin de ka ember ŋoihmbwaip nihe kin ote tus halhale ŋaiye lenge mitiŋ lalme ka yetekeꞌe bongol embere kin. Got de ka asamb lenge miyeꞌ tuweinge pupwa ŋoihmbwaip nihe kin elme hwap tinge. Pe kin tatame ŋaiye ka ende yumbune lenge. Bwore mise, tinge pupwa supule ŋaiye ka ende yumbune tinge, kom kin syumbe narp ŋumwaiye neseperhme tinge. 23 Taꞌe luku pe, kin ŋasande lenge miyeꞌ tuweinge ŋaiye ka uruꞌe yirise embere topoꞌe bongol kin, topoꞌe kin si nalaŋatme tinge ŋaiye ka yambaꞌe ŋoihginir kin. Kin ŋende miꞌmiꞌ me tinge ŋaiye mindemboi ka angange lenge yarp bwore bwore nato moi yirise kin. 24 Poi lenge mitiŋ ŋaiye kin si nalaŋatme. Kin yukur nalaŋatme lenge Juta ŋilyehme, pakai. Kom lenge haiten topoꞌe.
25 Hos 2.23Leꞌe wusyep tikin Got ŋaiye profet Hosea nainge,
Lenge miyeꞌ tuweinge ŋaiye somohon ŋam yukur gwal lenge
taꞌe ŋaiye tinge miyeꞌ tuweinge ŋam pe,
tukwini ma gwil lenge nange tinge bamtihei ŋam.
Topoꞌe ma mende nihararme mitiŋ
ŋaiye yukur somohon ŋam mende nihararme tinge.
26 Hos 1.10Topoꞌe somohon Got ŋana lenge na,
Yip yukur lenge miyeꞌ tuweinge ŋam iki.
Kom tukwini tinge yanange ŋaiye yip talah tikin Got
ŋaiye yarp nye nyermbe.
27 Ais 10.22-23O Aisaia ŋoiheryembe lenge Israel pe, kin ŋanange nalaŋatme wusyep taꞌe leꞌe,
Ŋaiye lenge miyeꞌ tuweinge Israel ka wula wula sekete tuꞌe sahmolon
ŋaiye ŋanar ŋoloh sah pe, Lahmborenge se ka ambaꞌe ŋilyeh hoi tinge.
28 Lahmborenge si ŋende wusyep kot me miyeꞌ tuweinge lalme
ŋaiye yarp kekep pe, se ka ende yumbune tinge hihwaiye.
29 Ais 1.9Ŋaiꞌe ŋaiꞌe luku ki tas taꞌe ŋaiye somohon profet Aisaia ŋanange. Ki ŋanange taꞌe leꞌe,
Lahmborenge ŋaiye kin bongol sekete ŋaiye ka ende yumbune poi,
kom ki nasme bamtihei poi syeꞌ yarp.
Ŋaiye pakai pe, poi ya miꞌe supule
tuꞌe ŋaiye somohon lenge miyeꞌ tuweinge moi embere Sodom
topoꞌe Gomora ŋaiye tinge miꞌe.
Lenge Israel, ŋoihmbwaip tinge yukur teŋeime Krais
30 Ya plihe mininge wusyep mune topoꞌe? Ya mininge tuꞌe leꞌe: Lenge haiten miyeꞌ tuweinge ŋaiye ŋoihmbwaip tinge teŋeime Got bongole pe, tinge si yarp bwore bwarme yal ŋembep tikin Got. Tinge yukur yende wah nihe ŋaiye yahaiꞌe kin. 31 O lenge miyeꞌ tuweinge Israel yende wah nihe ŋaiye jande wusyep erŋeme tikin Got ŋaiye naŋaꞌe Moses no, ka yurp bwore bwarme topoꞌe Got, kom tinge yukur yarp bwore bwarme. 32 Detale, tinge yukur jande yaŋah ŋaiye yaŋaꞌe ŋoihmbwaip tinge yalme Got, pakai. Tinge ŋoiheryembe nange ka yende wah nihe pe, ka yurp bwore bwarme. Ŋeser ende kin gere ŋihip tinge pe, tinge tambe. 33 Ais 28.16Wusyep tikin Got ŋaiye sai nato tup ŋanange taꞌe leꞌe,
Ŋam si malaŋatme ŋeser ende ŋaiye ka gere ŋihip lenge miyeꞌ tuweinge
ŋaiye ka tumbe.
Pe ma member kin ka orp hwate Saion.
Lenge mitiŋ ŋaiye ŋoihmbwaip tinge teŋeime kin pe, yukur ka hiꞌe.*Aisaia 28.16 Ŋeser uku kin ŋanange me Jisas.