13
1 Ëe de men-kore men-kore olsa owas hap tawa gwibiꞌinam, hen Alap mo dam taha nakore zi mo olsaë tawa gwibiꞌinam, hwëna ëe de zisi kwasang gwibirida gwen srëmkam, ki hwëna ano ol toranna in waba tangan hap– san de nglï glungna kiye, auku en naka de salblan.
2 Hen kirekam, ëyë tewesïꞌïnam, Alap mo Enhokam de hamal hap de olsa ayang gul gwizimdin hip denaka, hwëna ëe de zisi kwasang gwibirida gwen srëmkam, zen waba hap.
Hen ëyë tewesïꞌïnam, tïngare kirekam-kirekamsa de olk san denaka kïtak tame gunkum, hwëna ëe de zisi kwasang gwibirida gwen srëmkam, kirekam hwëna ano tame gunnu in waba hap.
Hen ëyë sërkam Alapsa taïblïblaꞌanam, hëndep ano gublunkam de kwatap hinak keing gweꞌanam, hwëna ëe de zisi kwasang gwibirida gwen srëmkam, zen hen waba hap.
3 Hen ëyë ëre mo bi gwibin kire-kiresa kïtak tahalha zi hip kap tazimꞌinam, hen ëre mo timsi Alap hap sosok gulblunkam Yesus hup de jal hap de ano timsi ang gulsun hup, kirekam hen waba hap– ëe de aha zisi kwasang gwibirda gwen srëmkamye.
4 Kwasang mo syala zen a kirekam moye:
Zen sam-samkam hen sae-saekam de zisi golëlowehe gwen.
Kwasang enlalakam, wal bosyansa de anakan hla tanna, “Zen dawemsa gul iri,” zep bëjen husus gweblan.
Kwasang enlalakam, zen bëjen zënaka boltere tan,
hen bëjen bola-bola gwen,
5 hen aha zisi bëjen blostablan.
Kwasang enlalakam, zen bëjen zëre en mo timsi ngalap gwibin,
hen bëjen nabakam jal gwen.
Kwasang enlalakam, zëbe hap de zi kareksa golblanna, zen hwëna eititi gwibinkim.
6 Kwasang enlalakam, karek-karek enlala zi mo klesnak bëjen sam gwesïn.
Hwëna eiwa de enlalakam de lowehen zi mo klesnak de gwënkam isrip-sri gwenkam.
7 Kwasang enlalakam, zen bëjen blalen gwen– aha zisi de mas gwibirida gwen naye,
hwëna zen Alapsa de taïblïblannak de tatem zaun,
hen enlalakam anakan zon dasïk gweblanan, “Alap sa hen lamkam asa kwasang gweblala.” *13:7 Paulus mensa awe ale gulku, dam gulsunnu dan. Insa gulk Alapsa de taïblïblan hap dena hen enlala zon tasïblïn hap dena li nul sonek, zëno aha dam gulsunnu, zi bose zemka de hen kirekam gweibirida gwen hap. Zep a kirekam maka li nul sonek: Kwasang enlalakam, dekam men zen zënaka kwasang neibirida gwenan, zënaka daïblïbirida gwenan, hen man zënaka enlalakam zon dasibirida gwenan.
Zep kwasang enlalana, zen tatete tanganna.
8 Kwasang enlalana in, zen hëndep denaban sa lwa gwer. Hwëna
hamal hap de olsa de ayang gulzimdin hip de sosonna,
hen owas olkam de toran hap dena,
hen owaskam de ba maesa tame gun hup dena,
zen kïtak sa zausul. 9 Alap sap man ki nëbe mae hap tame gun hup de sosonna gol gwizimnira, hwëna nëno mae mo tame gunnu hom tangan langa gwe haꞌan. Zen hen ngein sin dep denaka de hamal hap tame gun hup de sosonsa gol gwizimnira, hwëna tame gunkum home tangan su kul sone gwenan. 10 Hwëna sul sonen hap de Zini kim de hataꞌan zaka, zen dekam esa nen hen kïtak tame gunkum su kul soner. Angkam dep de sosonna dekam sa hen zausul.
11 Zen hen a kirekam moye: Ëe kimë nama betek nik gwëꞌak, ano enlalana hen ol toranna dekam walas betek enlalana. Hwëna kimë zise gwek, dekam zebë walas enlalana insa hli tak. 12 Zep nen okamanak de lowe hennak dawemkam de lalak gwen srëm honak de kara gun makane Alap hap dena kara ul gweꞌan. Hwëna Kristus kim de hataꞌan zaka, zen dekam esa lalak tangannak de kara gwen makan hla la gwer, hen nëno mae mo enlalana dekam sa liwe hera. Aena hen angkam homë tangan Alapsa dawemkam hlï-hlï tasïꞌïn. Hwëna zen dekam tangan asa tame tal– men kirekam hen Alap Zëna asa tame takaye.
13 Zep nëbe mae hap angkam dan-ahan bol-zaun gwizimꞌin– desan de ang ta gwen hapye:
Ahana, Alapsa nen taïblïblan.
Ahana, Alapsa nen anakan blol gweblan, “Zen sa lamkam nësa ngaya tabiri.”
Hen ahana, aha zisi nen kwasang gwibirida gwen.
Hwëna dan-ahanna in kon, bol-zaun tanganna, aha zisi nen kwasang gwibirida gwen.
*13:7 13:7 Paulus mensa awe ale gulku, dam gulsunnu dan. Insa gulk Alapsa de taïblïblan hap dena hen enlala zon tasïblïn hap dena li nul sonek, zëno aha dam gulsunnu, zi bose zemka de hen kirekam gweibirida gwen hap. Zep a kirekam maka li nul sonek: Kwasang enlalakam, dekam men zen zënaka kwasang neibirida gwenan, zënaka daïblïbirida gwenan, hen man zënaka enlalakam zon dasibirida gwenan.