Yohanis mo surat
1
Mae hap de ol: Alap mo Tanena Zen eiwa zi tangankam hata zaka.
1 In kim Alap okamana ansa yang gulsuku,
Zini in mes Alap han ë gweka.*1:1 Yoh. 1:1
Zëno bosena “Alap onakore ëngaya gwen hap de Ol.”
Hwëna okamanak kim hata zaka,
ëe ama Desa sane la gwek,
hen ëre mae mo nwekam kara la gwek.
Ëe ama ëre mae mo tahakam hen olk la gwek.
Zebë hëndep dawemkam tangan tame lak.
2 Nësa de hëndep denaban ngaya tabin hip de Zini in kim hata zaka,
ëe ama Desa ëre mae mo nwekam hla la gwek.
In zebë angkam ebe mae hap eiwa ulzimꞌin,
“In eiwa Zen tangan–
nësa de ngaya tabin hip de Zi niye,
Bian zëre han men Zen ë gwekake.
Bian Desa nër hom abe mae hap damnak zertreizimki.
3 Zëno bose tanganna Kristus Yesus.”
Sap ëe insa ësane gwe-gwek hen hla kul gwek,
in kim asa golëlowehe gweka,
in zebë desa ebe mae hap eiwa ulzimꞌin–
Eirzi-Bia dekakim nësa aha-ere enlalakam
isrip-sri naban olëlowehe gweka.
4 Zen in zebë ebe mae hap ale gulzimꞌin–
aha-ere enlalakam de lowehe gwenkam dikim nëno mae mo isrip-sri taman kïnï gwen hap.
Ngatannak de lowehe gwen zi mo kim de lowehe gwen hap de ol:
5 Ëe ama emsa tawa labiꞌin– aena mensaë Kristus hon ësane gwe-gwekke: Alap Zen lalak enna. Zëno enhonak kawesïnnï hom tangan. 6 Zep men zen anakan ëgu gweꞌan, “Ëe an Alap hanë aha-ere enlalakam zergwë gweꞌan,” hwëna zen de nama kawesïnnïk de lowehe gwen zi mo kim gwënna, ki zen boton tamna hen sap de ora san gwë haꞌara. 7 Hwëna nen de ngatannak de lowehen zi mo kim enho nakon ëlalak gwe zahe gwenkam, men kirekam ngatan zini Alap Zëna enho lalak en nik gwë gwenda, nen hen esa tangan aha-ere enlalakam isrip-sri naban lowehe gwer. Dekam hwëna nen de banakare karek maenak zarankam, Alap man nëno mae mo karekna insa Tane Zem Yesus mo kalkam nëp ngan gulsuk gwizimnira.
8 Zi de anakan zabenna, “Ano karekna hom,” zen hwëna zënaka anakan boton ta gweꞌara, “Ëe an zini dawemna.” Kirekam men zen ëgu gwenan, zëbon mae onak eiwa de enlalana hom tangan. 9 Hwëna nen de Alap hon anakan ëkira gwe-gwenkam, “Ëe mesë kirekam karek gwek,” dekam sa Alap nëno mae mo karekna insa nëp tap gulsuk gwizimdi, hen nëno mae mo kareksa de gon hap de enlala dowe hananna insa sa nëp hom ta gwizimdi. Alap zëre mo gu-gubiridanna Zen man tangan sul sone gwizimnira. Zep nen de nëre mae mo karek-kareksa zëre hon ëkira-kla gwe-gwenna, Zen bëjen nëp tap gulsuzim srëm gwen.*1:9 Mzm. 32:5; Ams. 28:13; Yes. 1:18 10 Alap mo olak anakan lwak,
“Tïngare zini kareksa nol gwenan.”*1:10 Rom. 3:9-20
Zep zi de anakan zabenna, “Ano karekna hom,” dekam hwëna man nwe-mase gwenan– san de Alapsa de anakan gublunna, “Alap Zen boton tamna.” Kire zinik Alap mo ola man jawe guk hana gwenan.