Yohanis mo surat dan-ahanna
1
Ëre mo dang tïnïnak de walasna Gayus Bak hap,
zi bogola abon onakon:* 1:1 Yohanis awe hen zëre mo bosena man golzabeka– men kirekam zëre mo Ol Dawem ale gunnuk golzabe gwekake. (Yoh. 13:23; 19:26; 20:2) Yunani olkam Kristen zi mo nol-nolkam de wenya, “zi bogol”kam nenbirida gwek– men kirekam angkam “penetua”kam nenbirida gwenanke. Mae hap mes yap bose zemka golzabeka: Kristen zi mo jal zi de anakan dam gulsun srëm hap, “Suratna an zen ale gulku.”
Dawem! Ëe ama emsa kwasang gwe-gweblanan, sap nen apdekam Alap onakore eiwa de ol sane ang ë gwenda.
Ano dang tïnïnak de walas, ëe ama Biansa abe ta gwenan– em dikim dawemkam hen sang-sang srëmkam gwë gwen hap, men kirekam hen eno enhona dawemkam hen tatetekam lwa gweꞌarake. Ëe ama tangan sam gwesïk– nër hom kim nëre nik mo Kristen bose walya ebe hap dena asa anakan nenbla zakye, “Eno walasna Gayus Bak eiwa dawemkam tangan eiwa de olak tal gwesïꞌïra, hen desan en ang gwe-gweꞌara.” Ano isrip-sri gwibin tanganna zen in zen– ëre mo walaskam denaka de kirekam salbirida gwen naye, “Zen nama Alap onakore eiwa de ol san ang ta gweꞌan.” 1:4 “Walaskam dena” mensa Yohanis awe enlala gwibiridaka, zen tïngare zini men zen zëbon onakon Yesussu daïblïblakke.
Kristus mo nganak de syal ta gwen zisi de mas gwibirida gwen hap de ol:
Ano dang tïnïnak de walas, ëe ama eno syala sam gwesïk gwibirin. Zini men zen Kristus mo ngana ë-ë san namjanblanda gwenan, 1:5 Men zen Kristus mo nganak ë-ë san namjanbiridanda gwek, zen ahakon Yohanis mes yap lup gul sone gweka. eno ënak kim yaïng gwe-gwenanzal, em ema desa dawemkam mas gwibirida gwenda hen lup gulin gwenda– sap eno tame tabin srëm zi mae naye. Zep kim etan lwan dahal gwenanzal, zen man awe de aya-wal oso-walya tagal gwennak ebe hap dena anakan donbirida gwenanzal, “Gayus zen dawemkam nësa kwasang gwibirida gwenda.” Em esa sam gwesïlï– etan de sek gwezan wenya ansa de ora san dep mas gwibiridankamye. Sap dekam Alap mo bosesae teip gulsuk gweblaꞌara. Zini in Yesus hup de ol dawemsa de gol haladan hap sek gweꞌan. Zep zen anakare enlala naban sek gweꞌan, “Ëe homë Yesussu de tame tan srëm zisi blol eibiridaꞌan. Zen diki Yesussu de tame tan wenyik sa totoresa asa mas neibirida gwer.” Zep nëbe mae hap man tangan sam gwesïꞌïn– kire zisi de lup gulin gwen naye. Sap dekam nen ema zëno mae mo syal dawemna iwe mas taꞌan– Alap onakore eiwa de olsa de gol halada gwennakye.
Ëe kië sap suratna nonol tïngare langna iwe de Kristen zini ebe mae hap ale gul sonezimk– em de kirekam Kristus mo nganak de syal ta gwen zisi lup gulin gwen hap denaye. Hwëna Diotrefes Bak zë-en de mam gwen hap dwam gwe-gwenda. Zen ano mae mo ol san bëjen ang gwen. 10 Zep aen de hata zankam dekam asa emsa damnak tonbiridazal– zëno karekna mensa abe mae hap gol gwizimniraye, asa de totore olkam tonsubirida gwenkam. Hwëna asa en hom ki karek ta gwibirida. Hwëna Kristus mo nganak de syal ta gwen zini men zen zëno ënak yaïng gwe-gwenan, zen hom mae gol zem kon lup gulin gwenda. Hwëna men zen sap lup gul irin hip ëhohle gwe-gwenan, desa hwëna man anakan jalse gwibirida gwenda, “Eme lup ul inꞌik, ëe asa emsa jematna an kon golëalsa soner.”
11 Zep ano dang tïnïnak de walas, nen bap nen karek gol gwen zi mo lowehen san ang ë gwen. Diki dawemsa de gol gwen zi mo lowehen en san nen ang ë gwen. Men zen dawemna syal nei gwibirin, zen Alap mo bi gwibiridan wenya zen. Men zen karekna nol gwenan, zen hom Alapsa tame daꞌan. 12 Emki dawemkam Demitrius Baksa zer irin. Zen hen mes eiwa de olak tal gwesïkï, hen tïngare awe de Kristen bose wal om man tangan sam neisïk gweblanan. Ëe ëre mo wal bose walya ban zebë emsa en soneblaꞌan, “Zini an dawemna.” Hen ena tawana: Ano mae mo ola zen eiwa dena. § 1:12 Yohanis suratna an Demitrius Bak hon mes yap gol soneka.
13 Ano ola sap nama beyana– ebe hap de ale gul soneblan hap denaye. Hwëna ëe ama enlala gweꞌan, “Suratkam ba hap de.” 14 Sap nabakam asa emsa duweblazal. Zen dekam esa dawemkam lora.
15 Dawem! Em Alap mo taha terenake gwë gwenda. Awe de eno aya-wal oso-walya dawem ensa ep nol soneblaꞌan. Ano mae mo dawem gol sonenna ansa emki iwe de aya-wal oso-wal hap aha-en aha-enkam ayang gul gwizimdin.

*1:1 1:1 Yohanis awe hen zëre mo bosena man golzabeka– men kirekam zëre mo Ol Dawem ale gunnuk golzabe gwekake. (Yoh. 13:23; 19:26; 20:2) Yunani olkam Kristen zi mo nol-nolkam de wenya, “zi bogol”kam nenbirida gwek– men kirekam angkam “penetua”kam nenbirida gwenanke. Mae hap mes yap bose zemka golzabeka: Kristen zi mo jal zi de anakan dam gulsun srëm hap, “Suratna an zen ale gulku.”

1:4 1:4 “Walaskam dena” mensa Yohanis awe enlala gwibiridaka, zen tïngare zini men zen zëbon onakon Yesussu daïblïblakke.

1:5 1:5 Men zen Kristus mo nganak ë-ë san namjanbiridanda gwek, zen ahakon Yohanis mes yap lup gul sone gweka.

§1:12 1:12 Yohanis suratna an Demitrius Bak hon mes yap gol soneka.