1
Mae hap de ol: Alap mes zëre mo Tanena zer sone zaka– nësa de dam tangankam tonbiridazan hap.
1 Orep nëno mae mo auyan-aza hap, Alap etan-etankam zëre mo ol ayang gul gwen zi hip ola gol gwizimki– dekam de tïtï ta gwibin hip hen jalse gwibirida gwen hap. 2 Hwëna angkam okamana an mo aumwa hap de yaklanak an zen ki lwa zaheꞌan, Alap mes zëre mo Tanena zer sone zaka– nësa de dam tangankam tonbiridazan hap. Alap nglï naban okama naban kïtak Tane zem in mo taha san yang sosuku, hen Bi zem in mes ki anakan gu-gubluka, “Ëe asa kïtak ebe hap golblal.” 3 Nen Alap mo ngatan zi mo lang nakore ngatanna tïngan Zëbon onakone dam ulsuk gwenan. Tane zem in hen Alap– men kirekam hen Bi zem Alap. Tane zem in mo ola soson tanganna, zep zëre mo ol-gun enkam tïngare zëre mo syal gwibinni insa ïrïk gïl gwenda. Zen de ïrïk gïn srëmkam maka sekwak gwe-gwenan. Zen kim nëno mae mo kareksa de ngan gulsuzimdin hip tïlkï, dekam zep ngatan zi mo lang san dep sewe seka– Teipsïn Tangan Zini Alap mo dam taha nakon dikim nikirin hip. Zen dekon zep kïtak angkam ïrïk gïꞌïra.
Mae hap de ol: Alap mo Tanena in, Zen kïtak de Alap mo dam taha nakore zi nikon teipsïn tanganna.
4 Tane zemka in zao drë neka, zëre mo dam taha nakore zini dekon otde tangannak lowe heꞌan. Hen bose teipsïnnï mensa zëbe hap golblaka, dekon zep Alap mo dam taha nakore zini in kïtak blikip neisïk gweblanan. Sap zëno mae mo bosem-sena hom kire teipsïn nïye. 5 Sap men kirekam Yesussu gubluka, “Em in ano Tane,” zëre mo dam taha nakore zini desa hom kirekam gubiridaka. Sap Alap man Yesussu gubluka,
“Em in ano Tane,
Ëe mesë namen damnak Ënaka anakan kira tanan, ‘Ëe an eno Bian.’ ”
Dekam zep etan Alap gubiridaka,
“Zen in eiwa ano Tane.
Tïngare zini zep sa blikip neisïk gweblal.”
* 6 Hen Alap kim Tane Tangan zem insa auhu-kama zi hip zertreizimki, Zen dekam zep zëre mo dam taha nakore zini gubiridaka,
“Em kïtak boklesa kom la gweblak.”
* 7 Hwëna Alap kim zëre mo dam taha nakore zi hip dena srip gulsuku, Zen anakan gubiridaka,
“Ëe ëre mo dam taha nakore zini asese habë li yul sonenda gwenan–
dekam de aha lang san ano syalsa nabakam golada gwen hap.
Hen syauk hïtïn hïbë li yul sonenda gwenan–
dekam de zisi halen ta gwibin hip ahaksa karek ta gwibin hip.”
* Zep Alap zëre mo dam taha nakore zini in man Yesus onakon ëlwala heꞌan.
8 Hwëna Tane Tangan zemka Alap man hwëna gu-gubluka,
“Em in hen Alap. Em hëndep denaban esa ïrïk gïlï.
Eno ïrïk gïnnï sa soson gwer, sap Em zisi dam-dam enkame klis gul gwenda.
9 Em dam-damkam de gwën zi mo syala desa ema sam gwesïk gwibirida.
Karekkam de gwën zi mo syala desa ema husus gwe-gwibirida.
Zen in zebë ere mo Alapna Ëe eno bosena teip gulsubluk– tïngare ere mo wal bose wal onakonye.
Zep sa tïngare zini eno bosena isrip-sri nei gwibir.”
* 10 Zep Yesus eiwa teipsïn tanganna– Alap mo dam taha nakore zi nikonye. Zep Desa en Alap anakan gubluka,
“Em in hen Bian. Nonol lonesen nakon zebe ere mo tahakam okamana ansa moko gulku,
hen nglïna ere mo tahakame yang tasïkï.
11 Nglï naban okama naban sa jek-jak nër.
Hwëna Ena hëndep denaban esa gwë gwera.
Nglï naban okama naban pakean mo kim sa kwang nër
12 hen ohlong nër.
Zen dekam esa hiri son hap lak sola.
Hwëna Ena molye wet gwesïk gweka,
hëndep bogol gwen srëmkam esa hëndep denaban gwë gwera.”
* 13 Hen Alap hom zëre mo dam taha nakore zini aha-en mae gubluka– men kirekam zëre mo Tane Tanganna Yesussu gublukaye,
“Em ano dam taha nakon nikirin–
dekon de hen teipsïnkïm ïrïk gïn hïp.
Ki asa hwëna ebe hap de jal zini ere mo tana ïltïkïnnïk sisik gulin.”
* 14 Hwëna Alap zëre mo dam taha nakore zini insa kirekam bëjen dam taha nakon de teinikirin hip gubiridan. Zen hwëna zëre mo syal ensa de gol gwen hap, hen desa man nësa de mas gwibirida gwen hap gubirida gwenda– nen men zene dekam de ëngaya gwen hap dena ulin gwenanke.