5
Yohanis kim buku lak gun nuban Alap mo domba tane naban akekake:
1 Alap mo dam tahanak, ki zebë buku lak gulsunnu hlauk. Bukuna in alekam mes eihya-san eihya-sankam sowehek, hen hulen nik lwaꞌak. Dokot buknu tuju enkam. 2 Hwëna ki zebë hla tak– Alap mo dam taha nakore jana nabare zi sosonna, ol mamkam kim taken gweꞌanka,
“Nara en aïrïs?– zen de tujukam de dokot buknu ansa hïl tï sonebirzin hap, hen zen de bukuna ansa kwala-kla gun hupye.”
3 Hwëna aha-en mae hom tangan nadakastïk– zen de bukuna insa kwala-kla gun hup, hen zao de alena insa de baca gun hup– sap ngatan zi mo langnak de wenya, sap auhu-kamanak de wenya, hen juwen zi mo langnak de wenya. 4 Ëe dekam zebë yusyustïn nïban gona gwëꞌak– mae hap, “Hare zini aha-en mae homke!– zen de bukuna insa kwala-kla gun hup, hen zëwe de alesa baca gun hup denaye.” 5 Hwëna in zen teipsïn-teipsïn wenya 24 enkam lowe heꞌak, zen zep ahanik asa gubluka,
“Bahem gona gwën. Singana insa emki hla tan. Zen Yehuda mo auyan-aza nakorena, *5:5 “Yehuda,” zen Israel mo aha zi ausu. Raja Daud zen dekon saltïlkï, hëndep Yesus hen dekorena. teipsïn zini Daud Bak mo Auyan-tane. Zen mes zëre mo jal zini holenak zaubirida ineka. Zen Zen sa tujukam de dokot topna insa hïl tï sonebiri, hen bukuna insa Zen sa kwala-kla gulu.”
6 Hwëna Domba Tanesa zebë hla tak, Alap mo komal tum golek denak zauꞌunka. Dan-nër dan-nërkam de otweran makare zini in zë ngïrïn daꞌak, hen tïngare 24kam de teipsïn-teipsïn wenya in. Domba tanena in hla tankam san de Alap hap de zïp soblanna. Zen wei-wei naban zë zauꞌunka. Zëno nola kore hli-hlina tuju enkam. Nwena hen tuju enkam. Tujukam de nwena insa de dam tasibinni, Alap mo Enho mo tujukam de nwe-mase– mensa Alap tïngare okamasa de amjan gwibin hip dam tasibirkike. 7 Hëndep ki zep Domba Tanena in song gwe zaka, ki zep hëndep bukuna insa Alap zëre mo dam tahanak gul inki. 8 Domba tanena in kim gul inꞌinka, dekam zep dan-nër dan-nërkam de otweranna in, hen 24kam de teipsïn-teipsïn wenya in boklena kom da gweblaꞌanzak. Zen kïtak gitar makare naka deirensïꞌïk, hen emaskam de pancisa deirensïk. Emaskam de pancina in, zen men zao Alap hap irase dawem nabare te kïlï ang nulsuk gweblananke. Irase dawem nabare te kïlï in mo dam gulsunnu, Alap mo ïrïk gïnnïk de bïtï gwen wenyik mo ol gu sone gweblan. 9 Zen dekam zep tër ësena daꞌak:
“Em aïrïs– bukuna ansa de gon hap,
hen dokot topna insa de hïl tï sonebin hip.
Sap Emsa mes dak,
hen eno kalkam ema zini ngan tasibirki–
desa de Alap onak dep kap gulhan hap,
sap tïngare zi ausu nakore zi,
sap tïngare men-kore men-kore ol ton gwibin zi,
hen tïngare ïrïk gïn lang nakore zi,
hen kirekam-kirekam sop zi ausu.
10 Em mese desa tïngan Alap mo ïrïk gïnnïk dep golëbïtï gweka.
Hëndep zen sa loweher–
san de Alap mo golak de syal ta gwen zini kiye.
Zen hen sa tïngare okamana ïrïk nïl gwer.”
11 Ki zebë etan dekon kara gwek, hen Alap mo dam taha nakore zi beyam-bya mo olsaë sak. Zëno mae mo beyana banakan dep?– aïtbinni, hëndep ratusan jutanak man yap tamank. Zen man Alap mo komal tumna insa wale nososuk– hëndep dan-nër dan-nërkam de otweranna hen teipsïn-teipsïn wenya in han. 12 Zen tërya ol mamkam daꞌak:
“Domba Tanena men desa Alap hap zïp nosoblakke,
Zen aïrïs– tïngare langsa de bi gwibin hipye.
Dikire tïngare sosonna hen enlala blala Zëbon lwa gwek.
Dikire kïtak betek në gweblak hen boklena kom da gweblak.
Dikire kïtak zëno bosena teip nulsuk gweblak
hen boltere nul gweblak.”
13 Ki zebë etan salbiridak– tïngare zini hen tïngare otweranna–
sap nglïnak dena,
okamanak dena,
hi mwanak dena,
hen juwen zi mo langnak dena,
hëndep kïtak tangan.
Zen tërya anakan daꞌak:
“Teipsïn Tangan Zini Alap hen Domba Tane zem in han
dikire tïngan zëno nik mo bosena boltere noso gwizimk,
hen blikip neisïk gwizimk.
Dikire tïngan teip nososuk gwek,
hen dikire tïngare sosonna Zëbon nebon hëndep denaban lwa gwek!”
14 Dan-nër dan-nërkam de otweran nwe-mase makare zini in ki zep ding nulzimk, “In eiwa!” 24kam de teipsïn-teipsïn wenya in dekam zep boklena kom dak, hen Eirzi-Bia mo bosena teip nulsuzimꞌik.
*5:5 5:5 “Yehuda,” zen Israel mo aha zi ausu. Raja Daud zen dekon saltïlkï, hëndep Yesus hen dekorena.