1 Hwëna em ahakon anakan esa asa enblal, “Alap man-am nëbe mae hap Kristus onakon kwasangna mam gulsuk gwizimnira, zep nen sap esa karekna ol tine gwer.” 2 Hwëna kirekam bëjen! Nen mese kareksa de gol gwen hap de soson nakon juwek, zep angkam bap nen etan zëwe lowehen. 3 Em san home ansa tame uꞌin? Nen kime baptis tabin sin ang ta gwek, dekam zebe nënaka Alap hap anakan olëtrë gweblak, “Ëe ama Bian Yesus hun de zeraha-en gwen hap dwam gweꞌan.” Zep Zen kim tïlkï, zen san de nëban mae de golëjuwenna kiye. 4 Zep nen kime baptis tabin sin ang ta gwek, zen dekam zebe ënwe-mase gwek– san de Kristus mae han de apdenak kama hulak kang gul nenna kiye. Hen kirekam, Alap kim zëre mo ngatan zi mo lang nakore sosonkam Kristussu tïn nïkon ngaya taka, zen dekam zebe anakan hen eisbiꞌin– san de juwen nakon de ëngaya gwenna kiye. Nëno mae mo lowe henna dekam zep lowehen ëse san dep liwehe gwenan.

5 Zep insa Yesus kirekam nësa golëjuweka, zen dekon zep dam gwesïnïn: Nen esa Deban etan ërngaya gwer. 6 Zep angkam tangan mes anakan dam gwesïl, “Nëno mae mo auhu-kama zi mo hole-hlena mes Kristus te-lidak sonnak goltïlkï.” Zep nen angkam mese kareksa de gol gwen hap de soson nakon wet so gwer– men zen sap nësa bi gwibiridakye, okamanak de timni an de tïn makan. 7 Sap nen kime juwe gwenan, zen dekame kareksa de gol gwen hap de soson nakon wet so gwe-gwenan. Zep hen kirekam– nësa kim Kristus golëjuwekaye.

8 Nësa eiwa mes Kristus golëjuweka. Zen in zebe angkam anakan laïblïblaꞌan, “Zen Zen sa asa golëlowehe gwera.” 9 Sap nen mese anakan tame uk, “Kristussu mes Alap tïn nïkon ngaya taka, zep Zen molya etan tïlkï.” Angkam tïn hïp de sosonna molya etan Desa dot soblak. 10 Zen kim aha-rokꞌnen tïlkï, dekam zep kareksa de gol gwen hap de sosonna men zen tïngare zini nësa bi gwibiridak, desa goltïlkï. Zep Zen molya etan kire hap Zënaka sosok taka, hwëna angkam Alap en mo bosesa de mam gulblun hap gwë gweꞌara.

11 Nen hen kirekam nen nënaka enlala gwibirida gwen, “Ëe mesë angkam kareksa de gol gwen nakon tïk, hen angkam Kristus hun de zeraha-en gwenkam Alap en mo bosesa de mam gulblun en habë gwëꞌan.”

12 Etan bap zen kareksa de gol gwen hap de sosonna nëno mae mo auhu-kama timni bi gwibin– dekam de zëno hole-hle san ang ta gwen hapye. 13 Nen bap nen nëre mae mo timnik de hli-hlina aha-en mae dowal mo kïgï mo syal san dikim ang gwen hap sosok gul gwen. Diki Alap en hap nen sosok gul gweblan. Sap nen menkam tok-tok makare nike lowehe gwek, hwëna angkam Zen mes nësa ngaya tabirki. Zep nëno mae mo timnik de hli-hlina diki Alap en mo dwam gwibin sin dikim ang ta gwen hap nen sosok gul gwen. 14 Zen in zep, kareksa de gol gwen hap de sosonna bap zen etan nësa bi gwibiridan. Sap nen home angkam Musa mo tïtï tabin ola anakare enlala naban blol eibiꞌin, “Ëe dekon asa Alap mo nwenak ëdakastïl.” Hwëna angkam Kristus hun de zeraha-en gwenkame zëre onakore kwasang-kwasang ensa blol eibiꞌin. Zep nen mese kareksa de gol gwen hap de soson nakon ëhïl gwe hanal.

15 Hwëna kirekam insa lwaꞌan, ahakon anakan esa ëgul, “Nen home angkam Musa mo tïtï tabin olsa de syal gwe-gwibinkim Alap mo nwenak de ëdakastïn hïp ëalp gwe-gwenan, sap nen mese Kristus mo kwasang-kwasang nakon ba maesa de syal gwibir-blin srëmkam ëdakastïk. Zep sap esa karekna ol gwer.” Hwëna kirekam bëjen. 16 Diki anakan emaka dam ulsuꞌun, “Ëyë ëre mo timsi aha zisi de ang gweblan hap sosok guꞌuk, dekam ëe san de zëbon de babu gwenna kiye.” Zep hen kirekam, eme ere mo timsi kareksa de gol gwen hap sosok uꞌik, dekam Alapsa ema syauk bla san dep hli laꞌan. Diki Alap habe sosok ulbliꞌak, dekam esa enho nakon ëliwehe gwer– zëre mo dwam gwibinsi dikim syal gwibin hipye. 17 Hwëna dawemsa nen Alap hap gol gweblan! Sap menkam nësa kareksa de gol gwen hap de soson bi gwibiridak. Hwëna angkam nen mese tïngare enho naban ang tal– ëngaya gwen hap de ol dawemna ansa Alap nëbe mae hap golzimkiye. 18 Zep nen angkam mese Kristus onakon kareksa de gol gwen hap de soson nakon ëhïl gwe hanal. Zep angkam men Zen nësa ïrïk gïꞌïra, Zen Alap. Zebe enho nakon zëre mo dwam gwibinsi dikim syal gwibin hip ëdwam gwe-gweꞌan.

19 Ëe anik dam-dam enkam srip gulsuzimk– dekam deka auhu-kama enlala zi ano ola ansa karekkam tame nul srëm gwek: Nen menkam nëre mae mo timni kirekam-kirekam jal-jal hen hole-hle san dikim ang ta gwen habe sosok ul tine gwek. Hwëna angkam nëre mae mo timni Alap mo dwam gwibin en san dikim lowehen hap nen sosok gul gwen– ekakim Alap mo nwenak ëtal gwesïk. 20 Nësa kim kareksa de gol gwen hap dena bi gwibiridak, Kristus dekam hom nëban mae enho nakon golëgwë gweka– dekam de nësa ora dawem san dep dam tasïk gwibin hipye. 21 Hwëna nen waba tangan habe zëwe ëbabu gwe-gwek! Zen in zebe angkam ësaher gwe-gweꞌan– nëre mae mo lowehen ëpbana insa de enlala gwe-gwibinkimye. Sap nen dekam juwen en hap de ora sane ang taꞌak. 22 Hwëna angkam nen mese kareksa de gol gwen hap de sosonna in kon ëhïl gwe hanal, dekam zebe hwëna Alap hon ëbabu gwe-gweꞌan. Hen zen waba hap hom. Zen zebe angkam Alap hon de ëtal gwesïnkïm ëliwehe gweꞌan, hen hëndep de gwën hap dena zen dekon esa ulin. 23 Sap kareksa de gol gwenkam, dekam hwëna tïn hïp de ora san esa ang tal. Hwëna Bian Kristus Yesus hun de zeraha-en gwenkam, dekam Alap hëndep de gwën hap dena totoresa nëbe mae hap gol gwizimnira.