9
Mae hap de ol: Yahudi zini, zen sap Alap mo hlïl irin zi, hwëna zen hom kïtak Yesussu daïblïblaꞌan.
1 Ëe an Kristus zëre mo nwenakë eiwa tangan naka emsa gubiridaꞌan, hen Alap mo Enho naban ëre mo enho naban man asa anakan trï la seꞌara, “Ëe eiwa homë emsa boton tabiꞌin.” 2 Ëe ama sërkam enho nakon dowe hana gwenan, 3 sap ëre mo ausu nakore zini, Yahudi, zen hom beyakam Kristussu daïblïblaꞌan. Zep Kristus dikire asa hla tak, ëe de emsa boton tabinkimye: Ëe eiwa amaka syauk blanak ënaka drëne seꞌan– hëndep denaban dikim Kristus onakon langa gwen hapye, ëre mo ausu nakore zini insa dikim ngaya tabin hipye. 4 Zen sap Alap mo hlïl irin zi– Israel Bak mo auyan-tane wal, mensa sap nonol Alap zëre mo hanan tabin walaskam gubirida gwekake. Sap Alap nonol zëre mo ngatan zi mo lang nakore ngatanna zëbe mae hap goltrei gwizimki.*9:4 Kel. 16:10; 33:22; 40:34; 1Raj. 8:10-11 Hen Alap mo nonol zi niban de ol ziaha-en gunnu, zen dokwak nul gwek.*9:4 Alap zini an han olsa ziaha-en gul gweka: Nuh (Kej. 9:9), Abraham (Kej. 17:2), Musa (Kel. 24:8), hen Daud (2Sam. 23:5). Hëndep zao kim lwa seꞌak, Musa Bak dekam zep hen tïtï tabin ola insa ayang gulzimki. Sap Alap nonol zëbe mae en hap anakan goltreizimki, “Syala an desa em gol gwen– Asa dikim blikip gwesïk gweblan hapye.” Hen nonol tangan zëbe mae hap zëre mo gu-gubiridan ola gol gwizimki.†9:4 Israelsa de ngaya tabin hip de Zi hip dena kim nonol damkam gu-gubiridaka, zen Ul. 18:14-20nak lwaꞌan. 5 Zëno mae mo auyan-azana Abraham, Isak, hen Yakob mae man tangan sap Alap mo nwenak ëdakastïk, hëndep Israelsa de ngaya tabin hip de Zini, auhu-kama zi mo enlala gweblankam, zëno mae mo ausu nakon saltïlkï. Zep zen ba hap daïblïbla srëm gweꞌan?
Sap eiwa dena, Kristus Zen hen Alap. Hen Zen kïtak teipsibiridaꞌara– hëndep denaban. In eiwa tangan!
Mae hap de ol: Alap mo hanan tabin walasnak de bïtï gwen hap dena, zen kïtak Alap mo dam tasibin nikon.
6 Hwëna anakan bahem ëenlala gwe-gwen, “Alap mensa Israelk de zini gu-gubirida gweka, zëre mo hanan tabin walas mo kim de lamkam golëlowehe gwen hap dena, Zen molya desa zëbe mae hap golzimki, sap zen mes Kristussu de taïblïblan hap baes tak.” Kirekam bëjen. Hwëna ansa emki enlala gwibin: Kïtak mensa auhu-kama zi mo wei-wik gun nukon Yahudikam nenbirida gwenan, hwëna Alap mo nwenak zen kïtak Yahudi tangansa hom. 7 Hen kirekam, auhu-kama zi mo aïtbinkim, Abraham mo auyan-tane walkam de gubiridanna, zen hom kïtak Alap mo aïtbinkim Abraham mo auyan-tane walyak bïtï gweꞌan. Sap Alap anakan Abrahamsa gubluka,
“Eno auyan-tanena, zen Isak onakon sa naïtbir song gwer.”*9:7 Kej. 21:12
8 Zep zëno dam gulsunnu, Abraham mo tïngare auyan-tane walya, zen hom Alap mo nwenak Abraham mo auyan-tane walkam ënwe-mase gweꞌan. Hwëna ëe Yahudi zini ama ëkïl gïl gwenan, “Ëe an tïngan Abraham mo auyan-tane wal, zep ëe kïtak Alap mo hanan tabin walas.” Hwëna diki Alap mensa zëre mo hanan tabin walasnak de bïtï gwen hap gubiridaꞌara, zen zen en bïtï gweꞌan– men kirekam hen Abraham mo tanena Isaksa dam tasïkïke. 9 Sap Alap anakan Abrahamsa gu-gubluka,
“Ngein sin de tahunkam Ëe asa lwa halzal, dekam walas naban asa Sara Baksa hlaulzul.”*9:9 Kej. 18:10,14
10 Walasna insa gu-gubluka, zen ano mae mo auyanna Isak Baksa. Zëna zini Ismael, zen hom Alap mo gu-gublunnak tïꞌïra. Zep Yahudi zini angkam, zen sap kïtak Isak Bak mo auyan-aza nakorena, hwëna ahakore en nik Alap mo dam tasibin nik bïtï gweꞌan. Ahakon hwëna Ismael Bak mo kim ëgwei kïnïꞌan.
Hwëna Isak Bak kim Ripka Baksa golka, zen zep zi walasna dan-dan wë sok. 11-12 Hwëna walas ën srëmnak, Alap mes Ripka Baksa hamal hap anakan gu-gubirki, “Em desa zi walas darena wë soꞌanka, oso zik mo auyan-tane walya, zen zen sa ëteipsïl. Hwëna aya zik mo dena, zen zëno mae mo tana ïltïkïnnïk sa lowehe gwer.” Zep Alap man nen dikim anakan dam gulsun hup dwam gweka, “Zen zëre mo kalang gwen san dawemna zi hip gol gwizimnira, hen sap karekna. Zi mo dawem nakon hom gol gwizimnira.” Sap Ripka in kim Alap mo ola insa sane gwek, ungalanak de walas darena in hom banakare karek maena syal eibirki. 13 Zep Alap mo olak zëno walas darena in hap dena anakan lwak,
“Ëe asa Yakobsa kwasang gwe-gweblal. Esausa asa husus gwe-gweblal.”*9:13 Mal. 1:2-3
14 Zep angkam dam gulsunnu banakan? San ha Alap man karek gweka?– kirekam zep ba maesa de syal eibin srëmnak kles sokaye. Sap diki Alap bëjen karek gwen! 15 Hwëna Zen insa kirekam hamal hap gu-guzimki, zen man hen dakastïꞌïn– men kirekam hen Musa Baksa gublukaye,
“Aen asa ëre mo dwam gwibin sin dam tasïk gwibir– men desaë kwasang gwibiridaꞌakye. Hen dawemsa de gol gwizimdin hip de wenya, zen hen Aen asa dam tasïk gwibir.”*9:15 Kel. 33:19
16 Zep Alap mo hlïl irinnik de bïtï gwen hap dena, zen zi nëre mae mo dwam gwibin sin hom, hen zen zi nëre mae mo syal gwibinkim bëjen. Zen diki Alap zëre mo kwasang-kwasang en nakon– men desa en Zëna dam tasibirkike. 17 Zen in zep hen Mesir mo teipsïn zi hip dena Alap mo olak anakan lwak,
“Ëe mae en habë emsa Mesirsi de ïrïk gïn hïp dam tasïk: Dekam de tïngare okamanak de zi ano sosonsa tame gun hup. Ëe kimë emsa de karek tan hap de owasna syal gwe-gwibiꞌik, zen dekam sa tïngare okamanak de zini Asa tawa nëblandal.”*9:17 Kel. 9:16; 11:9-10
18 Zep man dam gwesïnïn: Men desa Alap dam tasïk gwibirida, Zen desa en kwasang gwibirida gwenda. Hen men desa Mesir mo teipsïn zini in mo kim dam tasïk gwibirida, zëbe mae hap ënol drak-drak gwen hap denaka gol gwizimnira.
19 Zep em ahakon anakan esa asa lakensïblïl, “Ki Alap ba hap de zini ënol drak-drak gwen hap karek tabin hip?– sap Zen Zën am kirekam de ënol drak-drak gwen hap gubiridaka! Hen zini nen bëjen jalse gweblan!” 20 Hwëna bahem kirekam Alapsa gublun! Sap em in zëno yang tabin nikake! Zep em ba hap de zëno kareksa hlaulblun hap? San ha yuna maka?– men zen ik guk, desa gubiꞌin, “Em bap asa yu hap ik gulku? Diki blome hap emaka.” ‡9:20 Yes. 29:16; 45:9 Blome hen yu hap dena, Paulus kama ngatdarak nakore syal gwibin kire-kire hap ale gulku, hwëna enlalana apdenak– men kirekam Orya ol zini yu-blomena syal nei gwibirinke. 21 Men zen ik guk, san ha zënoka hom?– anakan de kles son hap, “An yu hap asa ik gul– mwin-mwankam de wei yul gwen hap. Ahana an blome tol hap asa ik gul.”
22 Zep zen Alap zëre mokake– kirekam de nësa klis gun hup denaye, dekam de zi lamkam zëre mo sërkam de soson naban jala ban tame son hapye. Hwëna Zen na-en hom desa zitreizimꞌira. Hwëna nonol, men desa kareknak de kang gun hup hamal gulku, Zen desa nwe enkam de holokam kara ta gwibin hip dwam gwibiridaꞌara. Hyanak sa hwëna sërkam karek tabiri. 23 Hen kirekam, kwasang gwibiridan hap dena mensa nësa hamal gulku, nësa sap sa hen holokam kara ta gwibiri– dekam de lamkam zëre mo ngatansa mam tangankam gol gwizimdin hip, 24 men desa kiresa de golzimdin hip kalang gwibiridaka hëndep kwang guludaka, sap Yahudi zi, sap Yahudi srëm zi. 25 Sap Yahudi srëm zi hip dena, Hosea Bak man Alap mo ola anakan ayang gulzimki,
“Men zen ano hlïl irin zinik bïtï gwe srëm gwek,
hwëna angkam Ëe asa desa hen gubiridal, ‘Em in hen ano hlïl irin wenya.’
Men desaë menkam kwasang gwibirda srëm gwek,
hwëna Ëe asa angkam kwasang gwibirdal.
26 Ë-ënak de zini men desaë gubiridak, ‘Zen in ano hlïl irin zisi hom,’
hwëna desa Ëe asa gubiridal, ‘Em in Ngaya Zini Alap ëre mo walas tangan.’ ”*9:26 Hos. 1:10; 2:22-23
27 Hwëna Yahudi zi hip dena, Yesaya Bak anakan Alap mo ola tenggwaran naban ayang gulku,
“Sap eiwa, Israel Bak mo ausu nakore zini zëno beyana san de hinak de hisglimni kiye,
hwëna da-en tangan sa ëngaya gwer.
28 Sap Bian Alap nabakam sa okamana ansa olo gulu.”*9:28 Yes. 10:22-23
29 Etan Yahudi zi hip Yesaya Bak man ale gulku,
“Soson Zini Bian Alap de nësa anakan gubiridan srëmkam, ‘Dikire da-en ëngaya gwek,’ ki emaka kïtak tangan ëna Sodom hen Gomorak de zi mo kim juwek.”*9:29 Yes. 1:9
Mae hap de ol: Yahudi zini hom Alap zëre onak dikim ëdakastïn hïp de ora ësena dam dasïꞌïn.
30 Zep nen banakarekam esa Alap mo ola insa srip ulsul? A kirekam esa: Yahudi srëm zini, zen sap hom Alapsa dë gweblak. Zen hwëna Alapsa de taïblïblan nakon ki zëre mo nwenak ëdakastïꞌïn– Kristus hup de ol dawemna insa kim daïblï gwibiꞌinke. 31 Hwëna Yahudi zini, zen sërkam sap zëre mae mo sosonkam Musa mo tïtï tabin ol san de ang tankam alp nei gwibirin– dekam de Alap mo nwenak ëdakastïn hïpye. Hwëna waba tolkam! 32 Ba hap waba hap? Zen sap zëre mae mo sosonkam ëalp gwe-gwenan– hwëna Alapsa de taïblïblan srëmkam. Zen in zep gol tenya iwe de tanasa tang ta zankam altïl gwenan– 33 men kirekam Alap mo olak lwakke,
“Ëe ama gol te dawemna Yerusalemk ngïrïnnïk ïk gïꞌïn,
zi deka zëwe tana bol tang ta gwe zankam ëaltïl gwek.
Zen zep sa gol tenya insa husus nei gwibir.
Hwëna men zen de gol tenya insa daïblï gwibiꞌik,
zen molya anakan ëenlala gwe-gwek, ‘Ëe an waba habë taïblïbik.’ ”§9:33 Paulus man Yerusalem mo aha bosena “Sion”kam ale gulku. Paulus man Yesaya 28:16na awe ale gulku, hen zen man Yes. 8:14 naban siri gulku. Yesaya Bak “kaso moko”kam ale gulku, sap Yahudi zini kasokam gola dauk gweblak. Hwëna Orya ol zi hip, ngïrïn gol tenya ban enlalana man anakan apde nëk, “Bol-zaun tangan wenya.” Zep “gol te”kam li nul sonek. Ngïrïn gol tenya insa de dam gulsunnu, Zen Kristus.
*9:4 9:4 Kel. 16:10; 33:22; 40:34; 1Raj. 8:10-11
*9:4 9:4 Alap zini an han olsa ziaha-en gul gweka: Nuh (Kej. 9:9), Abraham (Kej. 17:2), Musa (Kel. 24:8), hen Daud (2Sam. 23:5).
†9:4 9:4 Israelsa de ngaya tabin hip de Zi hip dena kim nonol damkam gu-gubiridaka, zen Ul. 18:14-20nak lwaꞌan.
*9:7 9:7 Kej. 21:12
*9:9 9:9 Kej. 18:10,14
*9:13 9:13 Mal. 1:2-3
*9:15 9:15 Kel. 33:19
*9:17 9:17 Kel. 9:16; 11:9-10
‡9:20 9:20 Yes. 29:16; 45:9 Blome hen yu hap dena, Paulus kama ngatdarak nakore syal gwibin kire-kire hap ale gulku, hwëna enlalana apdenak– men kirekam Orya ol zini yu-blomena syal nei gwibirinke.
*9:26 9:26 Hos. 1:10; 2:22-23
*9:28 9:28 Yes. 10:22-23
*9:29 9:29 Yes. 1:9
§9:33 9:33 Paulus man Yerusalem mo aha bosena “Sion”kam ale gulku. Paulus man Yesaya 28:16na awe ale gulku, hen zen man Yes. 8:14 naban siri gulku. Yesaya Bak “kaso moko”kam ale gulku, sap Yahudi zini kasokam gola dauk gweblak. Hwëna Orya ol zi hip, ngïrïn gol tenya ban enlalana man anakan apde nëk, “Bol-zaun tangan wenya.” Zep “gol te”kam li nul sonek. Ngïrïn gol tenya insa de dam gulsunnu, Zen Kristus.