1 An kon an, em dikim nëre mae mo somola Pebe Baksa tame gun hubë ale gulzimꞌin: Zen Kengkreyak de jematnak de zi mo tahasa trï so gwizimnin. Zep emki desa dawemkam gul irin, 2 sap em mese apdenak deban mae Bian Yesus hun ëraha-en gwek. Emki zëno tahalhasa sul sonebin, sap zen hen mes Kristen zini beyakam mas gwibirida gwek. Asa hen ki mas gwe-gweblak.

3 Ano dawem gol sonen ola ansa ëre mo wal bose darena Priskila ne Akwila nikip ayang ulzimk. Zen aban mae apdekam Kristus mo nganak syal ta gwenan. *16:3 Priskila, zen we bose. Akwila, zen zi zem. (Kis 18:2-3; 18:18; 18:26) 4 Hen Kristus hup de jal hap kim sap asa daꞌak, zen zen hwëna asa de ërzaunnuk lïn hïp alp eisïk. Hen zen dekam asa en hom kirekam mas ëblak, hwëna tïngare Kristen zisi mas eibiridak. Sap asa de ngaya la srëm gwenanam, ki ahakon molya ëKristen gweꞌanam. Zen zep Yahudi srëm zini men zen abon onakon ëngaya gwen hap de ol dawemna nulin gwenan, zen hen zëbe nikip dawemsa nolzimꞌin. 5 Hen ano dawem gol sonezimdinni emki hen gubiridan– jematna men zen zëno nik mo golak tagal gwe-gwenanke, zëbe mae hap.

Hen ano dang tïnïnak de wal bosena Epenetus Baksa enblak, “Paulus dawem ensa ep gol soneblaka.” Sap Asia mo lang nakon, zen zen nonol Kristussu taïblïblaka. 6 Hen kirekam Maria Baksa enbik, “Zen dawem ensa ep gol sonebirki.” Zen ebe mae hap de dawem hap mes syala dohon-hon naka gol gwek. 7 Hen Andronikus ne Yunia neka enzimk, “Zen dawem ensa ebe nikip gol sonezimki.” Zen ano Yahudi bose, hen zen apdekam asa bwinak ërgwë gwek. Zen Kristus mo dam sosun we-zi dare, hen ahakore dam tasibin wenya man sam neisïk gwizimnin. Hen zen zen nonol abon onakon Kristussu laïblïblak. Ëe hwëna zëno nik mo lure nakonë taïblïblak. 8 Ano dang tïnïnak de wal bosena Ampliatussu hen enblak, “Paulus dawem ensa ep gol soneblaka.” Sap ëe deban mesë apdenak Bian han ëraha-en gwek. 9 Urbanuꞌu hen enblak, “Paulus dawem ensa ep gol soneblaka.” Sap ëe deban mae apdenak Kristus mo nganak syal ta gwenan. Ano dang tïnïnak de wal bosena Stakis Baksa hen kirekam enblak. 10 Hen kirekam Apeles Bak hap ano dawem ola ayang ulblik. Sap desa kim Kristus hup de jal hap karek dak, zen hom dekam Kristussu hli taka. Zen hëndep angkam nama tatem zauꞌura. Hen Aristobulus Swe hon de syal ta gwen zini enbiridak, “Paulus dawem ensa ebe mae hap gol sonezimki.” †16:10 “Aristobulus Swe hon de syal ta gwen zi” hip dena awe, Paulus man Yunani olkam anakan ale gulku, “Aristobulus hon de wenya.” Dekam man nwe-mase gweꞌan, Paulus Aristobulus zëre hap hom dawemna gol soneblaka. San ha zen dekam mes yap tïlkï– men kirekam hen orep tangan de Kristen zini ale nulblikke, hen san ha dekam Kristenkam de babu zem man yap tïnkïm hli yuludaka? Ahaksa, san ha zëno golak de lowehe gwen wenya kip gol sonezimki?– men zen en ëKristen gwekke. Ayat 11nak Narkisus Bak hap dena hen kirekam lwaꞌan. 11 Ano Yahudi bosena Herodion Baksa hen enblak, “Zen dawem ensa ebe hap gol soneblaka.” Hen Narkisus Swe hon de syal ta gwen Kristen aya-wal oso-walya enbiridak, “Zen dawem ensa ebe mae hap gol sonezimki.” 12 Hen ano dawem gol sonen ola we darena Tripena ne Triposa neka enzimk, men zen hen Kristus hup de syal dohon-honna ol gwenanke. Hen ano dang tïnïnak de somola Persis Baksa hen kirekam enbik, sap zen hen kirekam de syal dohon-honsa gol gwek. 13 Hen ano dawem gol sonenna Rufus neka an zeban enzimk. Kristus man tangan sam gweka– Zen kim desa zëre mo syalsa de gol gwen hap dam tasïkïye. Hen an zem insa, ëe ama tangan gweibik– san de ano ane tanganna kiye. 14 Hen ano dawem ol gol sonenna enbiridak– Asinkritus, Plegon, Hermes, Patrobas, hen Hermas Baksa, hen tïngare aya-wal oso-walya men zen deban mae lowehe gwenan. Desa kïtak enbiridak. 15 Hen ano dawem ol gol sonenna enbiridak– Pilologus Baksa, Yulia, Nereus, hen zëno somola, hen Olimpas Baksa, hen tïngare Kristen gwen wenya men zen deban mae lowehe gwenan. Desa hen kïtak anakan enbiridak, “Paulus ebe mae hap dawem ensa gol sonezimki.” 16 Men kirekam Kristen zini ëtagal gwennak ëgwë gwenan, ansa de baca gulsun hyanak emki kwasang naban enaka tahasa golëtowaran. Tïngare awe de aya-wal oso-walya zen dawem ensa ebe mae hap nol sonezimk.

17 Aya-wal oso-wal, ëe etan aumwa hap ol zïm-zïmsï ebe mae hap mas gulzimꞌin: Men zen ëhlïwen hap emsa tïtï da gwibirin, desa bahem salbirida gwen. Sap zëno mae mo tawa tabinni in hom apde nëꞌan– men kirekam nonol emsa tawa da gwibikye. Sap zëno mae mo yasik tabinni in, dekam zep zini Kristussu de taïblïblan nakon ëaltïl gwenan. Zep kirekam de zini langa lasïk gwibik. 18 Sap kirekam de zini, zen nëno mae mo Teipsïn Zini Kristus mo syalsa hom noꞌan. Zen hwëna zëre mae mo dwam-dwam enlalasa dikim sul sonen hap kirekam syal ta gwenan. Zen yasik tabin hip ol dërek-dërekkam ba tame gun srëm wenyaka nolëton gwenan, hëndep desan zep ang ta gwenan. 19 Hwëna emsa tïngare Kristen zini mes anakan tame dabik, “Romak de Kristen zini, zen eiwa tangankam Bian osan ang ta gweꞌan.” Zep kirekam de emsa sane ta gwibinkim, ëe ama tangan emsa isrip-sri gwibirida gwenan. Ëe in zebë emsa tïtï tabiꞌin: Enlala blala ban em dawem ensa gol tine gwen. Hwëna karek gol gwensa em hwalebin. 20 Alap men zen tahana nëbe mae hap deisu guzimꞌira, Zen sa nabakam dowal mo kïgïsa nëno mae mo tana ïltïkïnnïk drënera– nen dikim zë zaublu inen hapye. Dikire Bian Yesus onakore kwasang-kwasangna eno mae mo enhonak lwa gwek.

21 Kristus mo nganak de syal bosena Timotius hen dawemsa ebe mae hap gol sonezimki. Hen kirekam ano Yahudi bose walya Lukius, Yason, hen Sosipater Bak, zen hen dawem ensa ep nol sonezimk. 22 Ëe, Tertius, men zenë suratna ansa Paulus mo ol san ale guk, dawem ensaë hen ebe mae hap gol sonezimꞌin, sap ëe an hen eno mae mo Kristen bose. 23 Gayus Bak hen dawem ensa ebe mae hap gol sonezimꞌira. Ëe, Paulus, angkam zëno golakë gwëꞌan, hen awe de jematna zëno golak tagal gwe-gwenan. Ë yala awe de pemerinta mo te-ala aït gweblan zini Erastus Bak hen dawem ensa ebe mae hap gol sonezimki. Nëno mae mo Kristen bosena Kwartus Bak hen kirekam.

[ 24 Dikire Bian Kristus Yesus mo kwasang-kwasangna ebon mae onak lwa gwek. In eiwa.] 25 Men kirekamë Kristus hup de ol dawemna gol halada gwenan, nëno mae mo Alapna Zen sa emsa Yesussu de taïblïblannak dikim tatem ëzaun hup tatete ta gwibiri. Orep Alap mo kire hap de kalangna zi hip man aning gul gwizimki.*16:25 Ef. 1:9-10 26 Hwëna ëe zebë angkam zëno orep de ol aning gunnu insa Yahudi srëm zi sin dep golzim halada gweꞌan– men kirekam hëndep de gwë gwen Zini Alap Zëna abe hap syala wei yul soneblakake, hen men kirekam orep zëre mo olsa de ayang gul gwen zini hamal hap ëgu-guk gwekke. Hëndep em Yahudi srëm zi ausuna zebe angkam Kristussu laïblï gweblaꞌan hen ang ë gweblaꞌan. 27 Dikire Kristus Yesus onakon Alap mo bosena hëndep denaban teip nulsuk gweblak, sap Alap Zen Zen aha-en tangan– enlala blal Zi niye. Amin.