1 Odzɛ dzɛma ngwi ani ka lɔ nya ema ikye abɔ oyaaya ngwi ema ya emi osaan nɛ ba. 2 Lubana ani ye ewo le gba ema gbaagba oyabɔ, ani dile tsaabɔ igɛgɛ yi emi iMasidonia mi ele, le nya ma gbɛɛ kyɛ onova nnyɛ nɛ jo ema emi Acaya wewo onuunu; ma okyɔɔkyɔ mgbi ema na nu ama kwuba kyɛɛ itukwu esho. 3 Nghaduu n le dɔ emi ongwuneyi eta ntonɛ esɔ ikye ni abɔ otsigɛgɛ mgbi eyi ikye ema mi odzɛ nɛ no ka yɛɛ atsika ba, nghaduu ni ema ki wewo, dafi ani gbɛɛ ni ema wo mani. 4 Lubana ni emi iMasidonia wafɔ yi ani wa di gbɛɛ ema wewo bayɔ, odzɛ eyi le gbɔ ikye ema duu li odzɛ ayayi, eyi ka gyayiwi mi abɔ otsigɛgɛ mgbi eyi ikye ema, kpaa ema ka nghao gyayiwi. 5 I yɛɛ nghanɛ ani di gbɛɛ li kyɛmɛ-kyɛmɛ onu emi ongwuneyi ntonɛ teyi ka kpadi ema di ngyɛlu ewo owoowo ikye umba ngwi ema zondu onu dzii nani. Ta umba mgbi ema ka dzɛ le fɛɛfɛ dika tso gbɛɛ ema nu ikyekyɛ i wo ema, a si ema siisi ba.

6 Wɛ na gbɛɛ: Inggisɛ nkya gwee ka shɛ gwee, inggisɛ nkya dzii dika shɛ dzii. 7 Ali inggisɛ no nu ungwɔ ngwi o tsɛwɛ mi itukwu mgban gbɛɛ ongwu ka nu mani, No ka nu mi ewewa naadi mi osiisi ba, lubana li kpa Imgbasho yi inggisɛ onu umba yi atsa. 8 Ta Imgbasho ka yagba nu mse mgban dzɛ yi ema dzii, ikye ni ema dzɛ yi alungwɔ duu, alonɔ duu di fwɛ nu inggisɛ angbeka mani. 9 Dafi Afɛ lɔ mani gbɛɛ: <<O kye umba mgban fwe nu emi adzɛ dzii; osaan mgban li gyegwu-gyegwu.>> 10 Ikyenghanɛ, Imgbasho nli kye etɔ nu inggisɛ ofwe etɔ bɛyi ungwogye na dika nu oba mgbi etɔ ungwogye mgbi ema mbwo dika nu umba oshɛ-shɛ mgbi osaan mgbi ema na yɛɛ dzii. 11 A ka nu ema yɛɛ aludu mi ali ofɛ duu ikye ni ema ghumba dzii alonɔ duu, man mi ikpewo eyi umba mgbi ema ogha dzii na ka yɛɛ angba ota-ta mbi Imgbasho.

12 Idɔ ngwi ema tole kyɔ nɛ, le nu oyabɔ mbi emidi Imgbasho yuoma ba, le tso ofɛ ota Imgbasho angba mi ofɛ idzidza-dzidza. 13 Ikye idɔ ngwi ema kyɔ kye ewema tso nɛ, inggisɛ ka tsɛ Imgbasho ikye obwɛndɛ mgbi Esɔ Osuse mgbi iKrestu nɛni, bɛyi umba ngwi ema gha ma yi inggisɛ angbeka dzii nani. 14 Ma mi ibɔ mgbi ama ikye ema yɔ, itukwu mgbi ama ka byidzɛ mbi ema, ikye elela okwulewo ngwi Imgbasho kye nu ema nani. 15 Nɛ i ta Imgbasho angba mi umba mgban okwulewo ngwi a ka gbɔn gbɛ ba nɛni!