8
Okwukwo inggisɛ ofifɛ mgbi ondu
odzɛɛdzɛ ofufɛ
odzɛɛdzɛ ofufɛ
1 Odzɛ ngwi eyi le gbɔ ma li ongwu aani: Eyi sulu itɔ okwukwo inggisɛ ofifɛ nɛni, o sɔdzɛ abugye angbodzi itsuutɔ mgbi Ugabaidu mi esho, 2 o li kyidɔ mi imbe osaan mgbi Imgbasho, mi iTabenako otsitsi ngwi li inggisɛ kye tsɛ ba, kpaa li Otsɛ abuon nani. 3 Ali okwukwo inggisɛ ofifɛ duu a li kyon dzɛ ikye onu umba di fifɛ, nghanɛ ongwunɛ kpaa i gbuo no sulu ungwɔ okye nu. 4 O ki dzɛ ɛsɛ nɛ yɔ o kika li inggisɛ ofifɛ ba, ikyekyɛ ola teyi gbe inggisɛ ama ofifɛ tokɛ wa. 5 Imbe osaan ngwi a li kyidɔ mi ele ma li ambɛ yi onodzi mgbi ungwɔ ndzɛ esho mani. Li ikyengha ngwi a kwo iMose adɔ mi onɔ ngwi o le wewo ombɛ iTabenako ma gbɛɛ: <<Gbinɛbyi saan ni o kyɔ alungwɔ yɛyɛ dafi a tso abu mi unggwɔ nani.>> 6 Nghaduu idɔ ngwi a kye wo iYesu abɔ na datu ngha mgbi ama dafi ondu odzɛɛdzɛ ngwi o li inggisɛ oyile inggisɛ gyiide yi Imgbasho na shewo ngha ogbugbe nani, ikyekyɛ a wo itan mi ondu odzɛɛdzɛ ntatase.
7 Ni ondu odzɛɛdzɛ ongwi ababɔ ki sulu okakewo bayɔ, itɔdzɛ opita ondu odzɛɛdzɛ oka ki dzɛma wuba. 8 Kpaa Imgbasho di ungwɔ sisi lon yi inggisɛ man o gbɛɛ,
<<Otsɛ noola gbɛɛ, onɔ kyɛma,
ngwi ani ka dzɛ mi ondu odzɛɛdzɛ
ofufɛ yi emi iSrai bɛyi emi iJuda.
9 Otsɛ gbɛɛ, ka yama dzɛ dafi ondu
odzɛɛdzɛ ngwi Ani dzɛ yi otsikyɔma
onɔ ngwi Ani byi ma abɔ kye ma tasɛ
mi iGyibiti na ba,
ikyesinɛ a kwulɛsɛ dzɛ mi otsitsi
mi ondu ngwi Ani dzɛ yi ama ma ba,
man N kyata iyikpa tsɛ ma.
10 Otsɛ gbɛɛ, <<Ni egbe ntona wa nyɛ yɔ,
li ondu ngwi Ani ka dzɛ yi emi iSrai aani.
N ka gbe ola mgbɛn wo ma kɛ itukwu di lɔ ola
Mgbɛn mi eka mgbi ama.
N ka li Imgbasho mgbi ama a dika li emidani.
11 Mi onɔ na, inggisɛ ka nya inggisɛ
nwatse dɔn hona ongwunɔn gbɛɛ,
<Ye Otsɛ wuba,> ikyekyɛ ama duu ka ye ani,
wita mbi ɛngbɛ mgbi ama nghataa
lu mbi engyukwo.
12 Lubana N ka dzamata yi imbaali
mgbi ama dika wɛ ali
ibwubwe mgbi ama wuba.>>
13 Dafi o kwu ondu odzɛɛdzɛ nɛ gbɛɛ <<ofufɛ nɛ,>> o nu ongwi ababɔ na sila; ma ungwɔ nla sila di kyɛ yɔ, ka byulu mbe onɔ ba.