1 Ola mgbi iMose dzɛ dafi li onodzi mgbi ungwɔ osuse nkyɛ iyayi ka ba mani. Yama li ungwɔ otsitsi ma yɛyɛ ba. Nghanɛ ifɛ ofɛɛfɛ ali onova ka yagba nu ama ogbleba kwɛkwɛ sunu Imgbasho yɛɛ saan gbɛ ba. 2 Ni i kika yagbayɔ, a ki nya yi ifɛ na ofɛɛfɛ wa. Lubana akponyi mata, ama osunu ntona duu kika nu ma yɛɛ saan, itukwu mgbi ama kika nu ma obube mi ali ibwubwe mgbi ama wuba. 3 Nghaduu ifɛ ofɛɛfɛ ntonɛ yɛɛ ungwɔ okyɔ ali iyɛ ikye owɛ ma gbɛɛ a ka dzɛ yi alobube ma, 4 ikyekyɛ eyi mnda yi mndɔ ka yagba kyi kyelu ali ibwubwe ba.

5 Li ikyengha onɔ ngwi iYesu ba ɛsɛ nɛ ma, o gbɔ yi Imgbasho gbɛɛ, <<Li ifɛ ofɛɛfɛ yi umba ngwi abu mina ba, kpaa abu kye ewo nu ani ikyegbɛɛ ni ani kyɔ abu idɔ;

6 Ifɛ otoola bɛyi ifɛ mgbi alobube li nu abu itukwu oshɛta ba.

7 Ta ani gbɛɛ, <N dzɛ na, Afɛ lɔ kwu iyi ani gbɛɛ, N ba owa kyɔ itukwu abu, Imgbasho.> >> 8 Ababɔ o gbɛɛ, <<Ifɛ ofɛɛfɛ yi umba onuunu, umba otoola yi umba mgbi alobube mina abu ba, a di li nu abu itukwu obɛsɛ kpaa ba>> (ola yɔ gbɛɛ ni a kyɔ ma). 9 Nɛ o gbɛɛ, <<N dzɛ na, ani ba owa kyɔ itukwu abu.>> O kye ofɛ ofiifɛ ongwi ababɔ na gekɛ esɛ di ba yi ofɛ ofufɛ ngwi li ongwu fan. 10 Ma mi oweka mgbi Imgbasho na, a nu eyi yɛɛ saan mi ikpewo ifɛ ngwi iYesu iKrestu kye ewon fɛ akponyi nani.

11 Alegbe-alegbe, ama ofifɛ duu li kwudzɛ le kyidɔ ifɛ ofɛɛfɛ mgbi ama; alonɔ-alonɔ a li fɛ itɔ ifɛ ngwi ka kyi salu ali ibwubwe gbɛ ba mani. 12 Nghaduu ngwi iKrestu kye ewon fifɛ akponyi nɛman, o lu ka sɔkɛ abugye mgbi Imgbasho. 13 Kyɛ onɔ na jo o le fɛ ni a kyata engyikyili mgban nu ma yɛɛ itse mgban ogbe afɔ to ele, 14 ikyekyɛ mi ifɛ mgban ofɛɛfɛ akponyi na o kyi salu ma gyegwu nu ma yɛɛ saan.

15 Onodzi Osaan kpaa kyɔ obwɛndɛ mgbi ungwɔnɛ nya eyi. Ababɔ o gbɛɛ, 16 <<Otsɛ gbɔgbɛɛ, mi onɔ na, li ondu odzɛɛdzɛ ngwi ani ka dzɛ yi ama aani. N ka kye ola mgbɛn wo ma kɛ eka dika lɔ ma mi itukwu mgbi ama.>> 17 O di mbwumbwo gbɛɛ, <<N ka wɛ ali ibwubwe yi adɔ okyeekye mgbi ama wuba.>> 18 Kini a to ma mkpa mi ali ibwubwe yi adɔ okyeekye mgbi ama yɔ, ifɛ ofɛɛfɛ ikye alobube dzɛma wuba.

19 Nghawanɛ, emi ongwunani, dafi eyi dzɛ yi imio ewo ba okaka Imbe Nnghao le Saan mi eyi mgbi iYesu, 20 mi ofɛ ofufɛ ngwi nyɛ kaka oshishe nɛ! Ofɛ nɛ kyɛ ikpewo ayangwuto nli iKrestu abɔn nɛni. 21 Ngwi eyi dzɛ yi angbodzi inggisɛ ofifɛ nle di mi ozu Imgbasho nɛ, 22 ni i ba kwɛkwɛ yi Imgbasho itukwu onyi mi oyɛyɛ onuunu mgbi otsitsi, bɛyi itukwu ngwi a kye salu mi itukwu mgbi eyi ogye obube di kyi salu eweyi mi eni oglododo. 23 Ni i ka suusu mi ɛwɛ mgbi eyi ogbe byiibyi ngwi eyi le gbɔn mi ododa nɛ ba, lubana ongwu nzondu ma li nyinɛ ba. 24 Ni eyi di di ofɛ ngwi eyi ka kwu eweyi ɛwɛ wo ikye otso okpitukwu di kyungwɔ osuse mani. 25 Ni i ka ndɛ okwakye yi eka dafi angbeka le kyɔ na ba, kpaa i kwu eweyi ɛwɛ wo onghaangha duu yɔ ngwi onɔ le mba nɛni.

26 Kini eyi kiyayi okyɔ alobube mi oshu onɔ ngwi eyi sulu odifwi-difwi mgbi otsitsi nɛ yɔ, ifɛ ofɛɛfɛ ikye alobube onyonyi kpaa dzɛma wuba, 27 kpaa li imio mgbi ikwɔ ogbɔɔgbɔ yi amoola itingga nkyɛ iyayi kawa gye engyikyili mgbi Imgbasho nani. 28 Ni inggisɛ efa hona eta kyɔ obwɛndɛ mi ikye inggisɛ gbɛɛ o foola mgbi iMose yɔ, a li ngwɔn yi elela odiidi ba. 29 Tsɛwɛ di dafi adɔ okwookwo mgbi ama nkye afɔ si Ongwɛ Imgbasho di kyɔ yi eyi mgbi ondu odzɛɛdzɛ wɔɔ dafi li ungwɔ nle saan ba ka dzɛ mani. Itɔ inggisɛ ntona fya Onodzi Osaan nkye elela mgbi Imgbasho ba mbi emidan na ito. 30 Lubana eyi ye ongwu ngbɛɛ, <<Li idɔ mgbi ani okpa mkpa; N ka kwo ma adɔ,>> <<Otsɛ dika fwo emidan ikwɔ.>> 31 Li ungwɔ okwulewo ni inggisɛ gbɛsɛ wo Imgbasho oshishe abɔ.

32 Wɛ dafi ema gyadzɛ kpakpa mi owita-wita ngwi osa mgbi Imgbasho ba mbi ema mani. 33 Onoka a li fya ema ito mi ododa di nu ema isɔ; onɔ angbeka yɔ li dzɛ ema gbɛɛ ema ki ya ama a le nu ma isɔ na abɔ. 34 Ema li tobyi ama nwoto obawi, ni a kyi gbelu ungwɔ ngwi ema dzɛ yan duu kpaa ema li dzɛ yi atsa, ikyekyɛ ema abuema ye gbɛɛ ema dzɛ yi ungwɔ ama ntatase di li gyegwu.

35 Nghanɛ ka gbɛwɛngwuta yi abɔ otsigɛgɛ mgbi ema ba na; ema kawa tu umba mi ele shewo. 36 I wogyɔ ema ka shitukwu ikye ni ema kyɔ itukwu Imgbasho, ema ka tu ungwɔ ngwi O zondu mani. 37 Lubana mi ongwonɔ gwee ta, <<Ongwu nka ba ma ka ba yi onɔ ombeembe wuba. 38 Emidani ama osaan ka dzɛ oshishe mi oyɛyɛ onuunu.>> Kpaa ongwu n yɛyikpa yɔ, ka kpɛn yan ba.