1 Mi onɔ na emi iYesu kyikyɛ nyɛ okwɔ ungwogyowe. Enbwa dɔ engwafɔɔn ta a sile wulɔ ekwu le ngwunu bukwu. 2 Ngwi emi iFarasi di ungwɔnɛ nɛ, a nyan gbɛɛ, <<Dii! Engwafɔ mgbi abu le kyungwɔ nli ola ba mi egbe otonyewo.>>

3 IYesu nu ma uka gbɛɛ, <<Ema gbɔ ungwɔ ngwi utɔ iDevedi kyɔ mi onɔ ngwi ongwu bɛyi ama nkyɛ yan ngwi enbwa dɔ ma na ye wa lo? 4 O ka kaka ozu Imgbasho, kyi kyelu ibredi ongwi a kye nu Imgbasho umba, nli ola gbɛɛ se li ama ofifɛ mgbi Imgbasho ta ka gye mani. Kye gye di kye nu ama nkyɛ yan ma duu. 5 Naadi ema gbɔ mi afɛ mgbi ola gbɛɛ mi egbe otonyewo ama ofifɛ mi ozu okwukwo osunu Imgbasho mi iJerosalin li kyidɔ kpaa ola li kye wuuta ba lo? 6 N nya ema ongwu nshewo ngha ozu okwukwo osunu Imgbasho mi iJerosalin na dzɛ mmɛnɛni. 7 Ni ema ki ye itɔ elodzɛ ngbɛɛ, <N mina elela odiidi, yama li ifɛ ofɛ-fɛ ba,> na yɔ, ema kika ngwɔ emi emyɛmyɛ ikwɔ ba. 8 Ikyena Ongwɛ Inggisɛ li Otsɛ mgbi egbe otonyewo.>>

9 IYesu dzita imbe na lu ka kaka ozu okwakye mgbi ama, 10 nɛ inggisɛ nwaawaa abɔ dzɛ imbe nani. Ngwi a le pita itɔdzɛ okye abɔ byi efu dulu ongwufabɔ mbi iYesu nɛ, a byun gbɛɛ, <<Li ola ongyɛlu inggisɛ ootse mi egbe otonyewoo?>>

11 IYesu nya ma gbɛɛ, <<Kini inggisɛ mgbi ema onyi dzɛ yi mmala, ma i gbɛsɛ wokɛ ishɛ mi egbe otonyewo ma, o ka dulun tɔ lo? 12 Nghanɛ inggisɛ nghao dzɛ yi oyabɔ ngha mmala! Li ola okyɔ osuse mi egbe otonyewo.>>

13 Ta o nya inggisɛ na gbɛɛ, <<Na abɔ mgbi abu.>> Nɛ o na abɔ man i yɛɛ saan dafi oka nani. 14 Kpaa emi iFarasi tasɛ le ka tsɛwɛ dafi ama ka ngwɔ iYesu mani.

15 Ngwi iYesu difwi ungwɔnɛ nɛ, o dzata imbe nani. Ibyi inggisɛ kyɛdɔn, o di ngyɛlu ama nto yi ootse duu ootse, 16 wo ma ola gbɛɛ nu ma ka gbɔdzɛ mgbi ongwu nya inggisɛ onyi ba. 17 Ungwɔnɛ li ombwumbwo odzɛ ntɔ ikpewo oyegbɔ Adzaya mani gbɛɛ,

22 Ta a kye inggisɛ ngwu esɛ dɔn ikye binɛ di li ikplima ba mbi iYesu, nɛ iYesu ngyɛlun ootse, man o gbɔdzɛ yɛ di. 23 I kwulu inggisɛ ntona duu ewo, a si gbɛɛ, <<Nɛnɛ ka li Ongwɛ iDevedi ma hoo?>>

24 Kpaa ngwi emi iFarasi fwo odzɛ nɛ mata, a si gbɛɛ, <<Li mi mfye mgbi iBɛdzɛbu utɔ emɛsɛ ta, ngwi inggisɛ nɛ lɔ onodzi emɛsɛ onya tɔ aali.>>

25 IYesu ye ewodzɛ mgbi ama, nɛ o gbɛɛ, <<Ali esutɔ n gha yi ewon ka bulu, ali ogalu hona etɔ ndi gha yi ewon ka yagba kwudzɛ ba. 26 Ni iSatan lɔ iSatan onya tɔ, o gha yi ewon. Nghanɛ ka kyɔnɛse esutɔ mgban ka kwudzɛ? 27 Nɛ ni ani lɔ onodzi emɛsɛ tɔ mi mfye mgbi iBɛdzɛbu ma, emidema ma, li lɔ mi ali mfye? Ngyɛse li ama ka fwo ema ikwɔ. 28 Kpaa ni ani lɔ onodzi emɛsɛ tɔ mi Onodzi mgbi Imgbasho yɔ, esutɔ mgbi Imgbasho ba mbi ema sewaani.

29 <<Naadi inggisɛ ka kyɔsinɛ ka kaka udɛ inggisɛ ɛnɛpɛ gbelun okye gbɛ, sede o ka bwa inggisɛ ɛnɛpɛ na adi baa? Duuse o ka gben okye.

30 <<Ongye ndzɛ yi ani bayɔ, kye afɔ twɛsɛ yi ani. Ongwu ndi gbe ngwikwo yi ani ba le bulu-bulu. 31 Nghanɛ n nya ema, alobube yi ito duu, a ka kye to inggisɛ mkpa, kpaa ito ofya Onodzi yɔ, a ka yama kye to inggisɛ mkpa ba. 32 Ali inggisɛ ngbɔdzɛ mi ikpewo Ongwɛ Inggisɛ duu, a ka dzanta yi obube. Kpaa ongwu ngbɔdzɛ mi ikpewo Onodzi Osaan yɔ, a ka yama dzanta yi obube ba, mi onɔ ongwi onɛnɛ yi onɔ ongwi iyayi kpaa.

33 <<Ekwɔ osuse li wa owawa osuse, ekwɔ obube di li wa owawa obube. A li difwi ekwɔ mi owawa mgban. 34 Ema emi ongwɛ ogidzi ntonɛ, ka kyɔsinɛ ngwi ema nli ibwubwe nɛ ka gbɔdzɛ osuse? Bana ewodzɛ ongwi itukwu li fwi tɔ mi ondu. 35 Inggisɛ osuse li tɔ yi ewodzɛ osuse mi itukwu mgban, inggisɛ obube di li tɔ yi ewodzɛ obube mi itukwu mgban. 36 Nghaduu n le nya ema gbɛɛ ali inggisɛ duu ka nu uka mi ali elodzɛ onbwaa ngwi a gbɔ ma mi egbe ikwɔ. 37 Bana mi elodzɛ mgbi abu o ka gye emyɛmyɛ, mi elodzɛ mgbi abu, a dika ngwɔ abu ikwɔ.>>

38 Nɛta emi iFarasi angbeka yi etsetse mgbi ola nyan gbɛɛ, <<Otsetse, eyi mina odi ambɛ okwulewo mbi abu.>>

39 O nu uka gbɛɛ, <<Etɔ imbali yi etɔ amah li byita ambɛ okwulewo! Kpaa a ka nun onyi ba sede li ambɛ mgbi oyegbɔ iJona ta. 40 Dafi iJona nose la ifu mmbweni okwukwo egbe eta na, li ngha ngwi Ongwɛ Inggisɛ ka la mi ikpɛsɛ egbe eta aali. 41 Emi iNinive ka kyato mi egbe ikwɔ yi etɔ nɛ di ngwɔ ma ikwɔ; ikyesinɛ a kyatitukwu mi esɔ ogbɔɔgbɔ mgbi iJona, ma onɛnɛ ongwu nshewo ngha iJona dzɛ mmɛnɛni. 42 Apodza ongwi agwudu ka kyato mi egbe ikwɔ yi etɔ nɛ di ngwɔ ma ikwɔ; ikyena o tɔkyɛ imbe ngwi ɛsɛ dondu owa fwo ozoyeye mgbi iSolomu, ma onɛnɛ ongwu nshewo ngha iSolomu dzɛ mmɛnɛni.

43 <<Onɔ ngwi onodzi obube tɔ mbi inggisɛ ma, o li le ga mi imbe ongwɔngwɔ le pita imbe ngwi o ka tonya, kpaa non ka tu bayɔ, 44 o si li gbɛɛ, <N ka yidɔ lu imbe mgbɛn ogbugbe.> Ni o yɛ wa to, di ozu na la ayayi, a fyan di kye mɛlu saan yɔ. 45 O ka yɛ lu ka gbe angbeka ntimbali ngha ongwu nghi egyafa, man a ka ba wa sɔkɛ ele. Nghanɛ odzɛɛdzɛ mgbi inggisɛ na li timbi nghaabɔ ogbugbe. Li ngha nka dzɛ yi etɔ imbali nɛ aali.>>

46 Ngwi iYesu kale gbɔdzɛ yi ibyi inggisɛ nɛ, onɔn yi engwunɔn kwudzɛ to esɛ, le mina ogbɔdzɛ yan. [ 47 Inggisɛ oka nyan gbɛɛ, <<Onabu yi engwunabu to esɛ, a mina ogbɔdzɛ yi abu.>>]*12:47 Ambulu nɛ dzɛ mi olɔɔlɔ angbeka ba.

48 IYesu byita gbɛɛ, <<Li emɛ li onani, di li ele li emi ongwunani?>> 49 O tso abɔ mbi engwafɔɔn si gbɛɛ, <<Li onani yi engwunani aani. 50 Bana ali inggisɛ nkyɔ mi oweka mgbi Otsani ongwi esho yɔ, o li ongwunani ongwu ongyulɔ yi ongyaa bɛyi onani.>>