2
A Hetalaulau Lange NeHalang Ke Halaua Hulua Lochloch
1 Ke pomalam, e hele ke kerkereng lange imo ke apoi ke mai tala. E teke a hetalaulau hulua aria pe a onteia NeHalang ke tunge ure mur nenge muteria taua lange iri. Pe e teke a hetalaulau iri hel pule aria pe a hetalaulau hehei pe hana lochloch aria pe a hele urana lange NeHalang nga nena ume nenge poia lange hulua lochloch. 2 Pe pule e teke a hetalaulau lange NeHalang ke halaua naungaala ana hana mur pe hana papalauna mur ke ita lochloch tatu ke tanek pe ta nanasia poinga urana ngana nenge NeHalang mutena taua. 3 Urana nge a hetalaulau hehei pe hana aria iange ara Hemasinga NeHalang iech toto nga poinga nenge pomalam. 4 I lemene ke teke hehei pe hana lochloch te rahite hengetoro manmanna ngana nenge Kristus pe te mene maulinga ke koko.
5 Iange ita ta eteia ke:
“NeHalang elle mana.
Pe pule non elle mana nge poia ita ke ta pengpeng nga NeHalang matana.
Ngana laka Iesus Kristus.
Iange I muka ia polong lele ngana nenge lange NeHalang.
6 ✡Rom 3:29-30; Kal 1:4Nga NeHalang lemene ngana
Iesus tunge i sipona ke mete.
Ke nga Iesus ana metenga nem,
NeHalang mene mule hehei pe hana lochloch.”
Helenga palaungana nei, NeHalang hemallaha hote nga etue nenge i sipona hele talue lo. 7 ✡Ume 9:15; Kal 2:7-8; 2Ti 1:11Ke ngana koi nenge NeHalang henonou hote iau ke iau hekulkulonga pe e haliu hotote Helenga Urana Toto Ngana. (Pe e hele ke manmanna pe e pallaklaka ero.) Isipona henonou hote iau ke e hetore hana lomonmona ngana mur ke leteria manmanna nga helenga manmanna toto ngana.
8 Ke e teke, nga etue nenge hana nga kileng lochloch te eukirau ke te heto heke NeHalang, te hetalaulau pe tetul heke peria nga leteria urana ngana pe te hile hote leteria inin ngana mur pe reria hunelinga mur.
Hehei Reria Ume Urana Ngana Hemalmalia Iri
9 ✡1Pi 3:3-5Pe pule e teke imo hehei a heronia hengeron nemur nenge ururia sio pe nakuna urana nga hulua tenau ngaria. Pe a lule palpalumo ina ero pe a hemalmalia imo nga um nenge chalemlem pe koikoi ke manga lauta pe nga relem utona ero. 10 ✡1Ti 5:10Iange hehei nenge te teke te nanasia NeHalang te hemalmalia iri ke nakuria urana nga reria poinga urana ngana mur, nenge te halaulaua hehei pe hana.
11-12 ✡1Ko 14:34Pe e longele heie ke hetore hana mur pe nauele iri ero. Iau e teke hehei tereng kun pe te longo manmana nga etue nenge hana te haliu hotote NeHalang nena helenga. 13 ✡Gen 2:7, 21-22; 1Ko 11:8-9Iange NeHalang pip hot tele Antam ke het pe Eua. 14 ✡2Ko 11:3; Kal 3:1-6Pe pule Satan channangaia Antam ero. Satan channangaia Eua ke poia poinga poreke ngana. 15 Pe NeHalang lape hemas mule hehei mur nga te hoho ngaria. Lape hemas mule iri nenge te rahite leteria manmanna ngana nge Kristus ke kerkereng pe muteria taua iri hel pule pe te nanasia poinga nge pengpeng.