50
Iok, nga etue nenge Iosep esia temene nge mete, lau hite i pe tang ia i. Ol pe hele lange nena haleles ana hana mur ke te hamam ia ure inangana hehech ngana mur pe te un hite nga temene koluna ke inangana namnamo ero. Pe tepoia ke pomanga Iosep hele ngana. Ke aleles ana hana mur te popoia ume nem ke etue iri ananon kina nai (40) iange ume nem ana etue pomau nike. Pe hehei pe hana te tang hite Iakop ke etue iri ana non kina mol pe analoch (70).
Iok tanginga ana etue het pe Iosep hele lange Paraoh nena hana papalauna mur ke pomai, “Nenge teke letemo poreke ia iau, a la pe a heleia lek helenga lange ne Paraoh ke mai koi, ‘Nga etue nenge temek teke metmete lo, hele ke kerkereng toto at nge iau ke e poia helenga kerkereng ngana e lange i, ke e takisia koluna ke la e alohite nga polo e nge isipona selia nga ich nenge Kenan.’
“Ke pomalam o longele iau ke ela ke e alohite temek mukam, ke het pe e at mule. ”
Pe Paraoh hele, “O nanasia lem helenga kerkereng ngana nenge o poia lange temem. Ke o mene koluna ke la o alohite mukam, ke pomanga hele nganaia lange iong.”
Ke pomalam Iosep la ke alohite temene pe Paraoh nena hana papalaungana mur nge Ekipto tela luluch nge i. Pe iri lochloch ngana nenge te tu luluch nge Iosep pe Iosep titina mur lochloch pe iri lochloch ngana nenge tetu luluch nge temene te chola lochloch ke tela. Pe aina kinkino ngana pe sipsip mur pe meme mur pe pulumakau mur mana tetu nge Kosen ol. Pe hana nenge te songsong ia ure ana tangakis mur lochloch pe hana nenge te songsong ia oriong mur, iri lochloch ke te la pule. Ke pomalam iri nenge te haka la nga metenga neu iri hulua toto.
10 Iok te la ke te lohot nga kileng nenge Atat. Ana kileng tu nga chaia haka ngana nga ech nge Iortan. Pe Atat mur te poi hotote uit nganangana mur nga paena nga lamau. Pe Iosep pe hulua nemur te la ke te lohot nga ana kileng pe iri lochloch te tang ke soke toto. Pe Iosep are ia temene ana lete ke etue iri rahtele nai (7). 11 Pe Kenan mur nenge te tutu lamau te esia hehei pe hana nge te tang ke soke toto nga lamau pe te hele, “Ekipto mur te tangia non nenge mete nei ke mau kou.” Ke pomalam te hetue kileng unne neu ke ene, Apel-Misraim. Ana kileng tu rochroi lange Iortan.
12 Pe Iakop tutuna mur te nanasia temeria nena helenga nenge heleia lange iri: 13 Ke te takisia i la nga ich nenge Kenan ke te alohite i nga polo nga ich nenge Makpela. Kileng Makpela tu rochroi nga kileng nenge Mamre, pe Apraham ol hote ich neu lange Epron, pe Epron i none nga mata nenge Hitae mur. 14 Iok te alohite Iakop ke het pe Iosep pe titina mur pe hulua lochloch ngana nenge te koko ke te alohite temene neu, tela mule nge Ekipto.
Iosep Hemaluche Titina Mur
15 Iok, Iosep titina mur te naue ke temeria mete lo ol pe te hele, “Lape ta poi ke mere mai ol? Iosep lape letena inin taua ita pe lape tuacholia rera poinga poreke ngana nge ta poia lange i nge nike.” 16 Ke pomalam te hekule helenga lange Iosep ke te teke, “Temere mete ero kura pe tung sue helenga nei at nge imem: 17 Hele at nge imem ke teke mo hele lange iong ke mai koi, ‘E onteia iong ke letemia titim mur nga reria poinga poreke ngana nenge te poia lange iong.’ Pe heueu nei mo onteia iong ke letemia imem iange imem, NeHalang nenge temere heto hekeke, nena hekuleileinga ana hana mur koi imem.” Nga etue nenge reria helenga la ke sasa hot, Iosep longe pe tang.
18 Ke het pe titina mur te la ke te esia i pe te tualou sio nga matana pe te puosue palparia la nga ich pe te hele ke te teke, “Lem hekuleileinga ana hana mur koi imem ol.”
19 Pe Iosep hele lange iri ke teke, “A matau ero. Imo mam a teke iau NeHalang ma? 20 Pe i manmanna ke a mil toto ak ke a poia poinga poreke ngana nem at nge iau, iange NeHalang letena tuanin hote ke pomam nike. Pe hulia ke lohot ke urana nga nenge e halaua hehei pe hana ke te tu ke te maul. 21 Ke pomalam a matau ero. Iau lape e nauele imo pe tutumo mur nga ngaunga.” Iosep hele ke urana mana lange titina mur pe hekerkereng mule leteria ke ma ke nek mule.
Iosep Mete
22 Iok, Iosep pe titina mur pe reria hehei mur pe tuturia mur te tu nge Ekipto. Pe Iosep tu ke ana hesinga iri ana non kina lime pe analoch (110) pe mete. 23 Ke Iosep tu ke naue nena tete mur nenge te lohot nge Epraim pe nena tete nemur tuturia mur. Pe tu ke naue nena tete mur nenge te lohot nge Manase tuna nenge ene Makir pule. Pe Iosep teke tutuna mur laka Makir tutuna nemur iange te mene iri lange i pe rahite iri pe tal heke iri nga apena.
24 Ol pe Iosep hele lange titina mur ke teke, “Iau e metmete lokoi. Pe nge he NeHalang lape halaua imo ke mene hote imo nga kileng nei ke a la nga ich nenge hele talue lange Apraham pe Isak pe Iakop.” 25 Ke het pe Iosep hele, “A hele ke kerkereng toto ke a poi ke mai: Nga etue nenge NeHalang at ke halaua imo, a loloch heke kik mur pe a hile kileng nei pe ala.”
26 Ke Iosep tu ke ana hesinga iri ana non kina lime pe analoch (110) pe mete. Pe te un hite singina ana ure inangana heech ngana mur ke inangana ero pe te tal teua i nga metenga ana hohou nge Ekipto.