ತಿಮೊಥೆಯನಿಗೆ ಬರೆದ ಮೊದಲನೆಯ ಪತ್ರಿಕೆ
ಪೌಲನೆ ತಿಮೊಥೆನ ಲೀಖ್ಯೋತೆ ಪಹಿಲಿ ಚಿಟ್ಟಿ
ಮಾಲುಮ್ ಕರಾನು
ಅಪೊಸ್ತಲ ಹುಯಿರೋತೆ ಪೌಲ ಇನೊ ಶಿಷ್ಯ ಹುಯಿರೋತೆ ತಿಮೊಥೆನ ಲೀಖ್ಯೋತೆ ಚಿಟ್ಟಿ ಹುಯಿರ‍್ಹಿಸ್. ಯೇಸು ಕ್ರಿಸ್ತ ಪೈದಹುಯೊ ತದೆ ಖ್ಹುಮಾರ್ ಬೇಉಪ್ಪರ್ ಖ್ಹಡ್‌ತೀನಿಖ್ಹ್ ಥೂ ಚಾರ್ ಉಪ್ಪರ್ ಖ್ಹಡ್‌ತೀನಿಖ್ಹ್ ವರಖ್ಹ್‌ನಿ ಬಾದ್ಮ ಆ ಚಿಟ್ಟಿ ಲೀಖೈರ‍್ಹು ಉಶೆ. ಅನ ಪೌಲನೆ ಜಿವ್ಣಾನ ಖ್ಹರ್ತಿನ ದನ್ಮ ಲೀಖಿರಾಖ್ಯೊಸ್. ಪೌಲ ಅಜು಼ ತಿಮೊಥೆಮ ಆಛ್ಛಿ ಸಂಬಂಧ ಥೀ. ಪೌಲ ತಿಮೊಥೆನ ಛಿಯ್ಯೊಕರಿ ಬೋಲ್‌ತೊಥೊ. ಫಿಲಿಪ್ಪಿ 2:22, 1 ತಿಮೊ 1:2—1:18.
ಹೈರುತೆ ಚಾರ್‌ಮ ಏಕ್‌ ಚಿಟ್ಟಿ ಹುಯಿರ‍್ಹಿಸ್. ಪೌಲನೆ ಸಬೆನ ಲೀಖ್ಯೊಕೊಂತೆ ಏಕ್‌ ಅದ್ಮಿನ ಲೀಖಿರಾಖ್ಯೊಸ್. ಅಲಕ್ ತೀನ್ ಚಿಟ್ಟಿಯೇ ಖಿವು ಕತೊ: 2 ತಿಮೊಥೆ, ತೀತ, ಅಜು಼ ಫಿಲೆಮೋನ, ಸಬೇನಿ ಅರಾದನೆನಿ ಬಾರೇಮ ಪಹಿಲಿ ತಿಮೊಥೆಮ ಕೈಏಕ್ ಖ್ಹೂಜ಼್ ಛಾ಼. 2:1-15ಸಬೇನು ಘಲ್ಡಾವ್‍ನಿ ಲ್ಹಾಯೇಕ್‌ಬಿ 3:1-13 ಅಜು಼ ಝೂ಼ಟಿ ಬೋಧಕರ‍್ನಿ ವಿರೋದ್ ಝೇತಾವ್ಣಿ1:3-11, 4:1-5, 6:2-5 ಆ ಅಖ್ಖಾನ ಪೌಲನೆ ಖಿವಿ ಪರಕ್ಮ ಸಬೆನ ಬೀಚ್ಮ ತಿಮೊಥೆಯನ ಏಕ್‌ ಯಜಮಾನ್ ಕರೀನ್ ಕಿಮ್ ಉಠಾಡ್ನು ಕರಿ ಶಿಕಾಡಸ್. ಪಹಿಲಿ ತಿಮೊಥೆನು ಚಿಟ್ಟೀಮ ಕೆತ್ರೇಕ್ಕಿ ನಿಯಮ್ ಛಾ಼. ಆ ವೇಳ್ಮ ಆಗೆ ಪೀಛೆನಿ ಸಬೆನ ಗಲ್‌ಢಾವ್ನ ಹಮ್ಕೆನ ಹಗಾಮ್ಮ ರ‍್ಹೇಸ್ತೆ ಸಬೇನಿ ಸೇವೆ ಕಿಮ್ ಕರೆಜಾ಼ಯ್ ಕರಿ ಖ್ಹಮ್‍ಜೆಜಾ಼ಯ್.
ಕಾಡಿದೇಖೊ
1. ಪೌಲ ತಿಮೊಥೆಯನ ಧನ್ಯವಾದ್ ಕರ್ತೊಹುಯಿನ್ ಶುರುಕರಿರಾಖ್ಯೊಸ್.1:1-2
2. ತಿಮೊಥೆಯನ ಝೂ಼ಟಿ ಬೋಧನೆ ಕರವಾಳನಿ ಬಾರೇಮ ಝೇತಾವ್ಣಿ. 1:3-11
3. ಪೌಲನೆ ಯೇಸುಕ್ರಿಸ್ತನ ಕಿಮ್ ಧನ್ಯವಾದ್ ಕರ್ತೊಥೊ ಕರಿ ಬೋಲ್ತೊಹುಯಿನ್ ಚಿಟ್ಟಿನ ಶುರುಕರಸ್.1:12-19
4. ಇನಕೇಡೆಥು ಆರಾದನೆ ಅಜು಼ ಸಬೆನ ಘಲ್ಡಾನಿ ಬಾರೇಮ ತಿಮೊಥೆಯನ ಖ್ಹೂಜ಼್ ದೇಸ್.2:1—3:16
5. ತಿಮೊಥೆಯನ ಪೌಲನೆ ಖ್ಹರ್ತಿನಿ ಖ್ಹೂಜ಼್ ದೇತೊಹುಯಿನ್ ಆ ಚಿಟ್ಟಿನ ಖ್ಹತಮ್ ಕರಿರಾಖ್ಯೋಸ್.4:1—6:21
1
1 ಕ್ರಿಸ್ತ ಯೇಸುನೊ ಅಪೊಸ್ತಲ ಹುಯಿರ‍್ಹೋತೆ ಪೌಲನೆ, ತಿಮೊಥೆನ ಲೀಖ್ಯೋತೆ, ಅಪ್ಣ ಬಚಾ಼ಡವಾಳೊ ದೇವ್‌ಬಿ ಅಪ್ಣಿ ಭರೋಖ್ಹಾನ ಆಧಾರ್ ಹುಯಿರ‍್ಹೋತೆ ಕ್ರಿಸ್ತ ಯೇಸುನಿ ಹುಕುಮ್ನಿಮತ್ ಮೇ ಅಪೊಸ್ತಲ ಹುಯೊ.
2 ವಿಶ್ವಾಸ್‌ಮ ಮಾರೊ ಖ್ಹಾಚೊ಼ ಛಿಯ್ಯಾನಿಘೋಣಿ ಹುಯಿರ‍್ಹೋತೆ ತಿಮೊಥೆನ, ಬಾ ದೇವ್‍ಥಿ ಅಜು಼ ಅಪ್ಣೊ ಪ್ರಭು ಹುಯಿರ‍್ಹೋತೆ ಕ್ರಿಸ್ತ ಯೇಸುಥಿ, ವಾರ್‌ಖ್ಹೊ ಗೋರ್‌ ಅಜು಼ ಶಾಂತಿಬಿ ಮಳಾದೆ.
ಝೂ಼ಟಿ ಬೋಧನೆನಿ ಬಾರೇಮ ಝೇತಾವ್ಣಿ
3 ಮೇ ಮೆಕೆದೋನ್ಯನ ಜಾ಼ವಾನಿ ವಖ್ಹತ್‌ಮ, ತೂ ಎಫೆಸಮಸ್ ರ‍್ಹೆಕರಿ ಗಿಂಗೈಲಿದೊ, ಹಿಜ಼್ಜಾ ಥೋಡು ಜ಼ಣು ಝೂ಼ಟಿ ಭೋತಿ ಬೋಲಿದೆವ್‌ಕರ್ತುಥೂತೆ ಇವ್ಣುನ ಹುಕುಮ್‌ ದೀನ್ ಭೀರಾಕ್‌ಣು ಕರೀಬಿ, 4 ಕೊಂತೆ ಖೇಣಿನಾಬಿ, ಅಜು಼ ಆಗೆಪೀಛೆಕೊಂತೆ ಖಾನ್‌ದಾನೇನಿ ಬಾರೇಮಬಿ ಬೋಲಾನು ಮ್ಹೆಲಿದೇವೊ. ಯೋ ಹುವಾನುಕೊಂತೆ ವಾದ ವಿವಾದ್ನ ಉಠಾಡುಕರಸ್‌ ಪಣ್ಕಿ ಅಪ್ಣೆ ದೇವ್ನಿ ಖ್ಹೂಜ಼್‌ನಿತರ ಕರುಕರ‍್ಯೆಕೊಯ್ನಿ. ಯೋ ವಿಶ್ವಾಸ್‍ಥಿ ಖಲಿ ಹುವಾನು ಹುಯಿರ‍್ಹುಸ್. 5 ಪಾಕ್‌ ದಿಲ್‌, ಅಛ್ಛಿ ಖ್ಹಯಾಲ್, ಶುದ್ಧಮನ್‌ಥೀಬಿ ವಿಶ್ವಾಸ್‍ಥಿ ಪೈದಹುಯುತೆ ಪ್ಯಾರ್ ದೇವ್ನಿ ಹುಕುಮ್‌ನಿ ಶುಶತ್ ಹುಯಿರ‍್ಹಿಸ್. 6 ಥೋಡು ಜ಼ಣು ಆ ಮಾರಗ್‌ನ ಮ್ಹೆಂದಿನ್ ಕಾಮ್ನಕೊಂತೆ ಬುದ್ದಿನ ವಿವಾದ್ಮ ಖ್ಹಪ್ಡಿ ಪಡಿರ‍್ಹುಸ್. 7 ಇವ್ಣೆ ದೇವ್ನಿ ನಿಯಮ್ಮ ಶಿಕಾಡವಾಳು ಹುಯಿರ‍್ಹೇಣು ಕರಿ ಆಖ್ಹ್ ಕರಾಸ್. ಕತೋಬಿ, ಇವ್ಣೆ ಇವ್ಣಿ ಶೊಂತ್ ವಾತೇನ ಪರ್ಖಿಲೇಯಿಕೊಯ್ನಿ. ನತರ್ ಖೆವಿ ಬಾರೇಮಾಬಿ ಇವ್ಣೆ ಆತ್ಮ ವಿಶ್ವಾಸ್‍ಥಿ ಬೋಲಸ್ಕಿ ಇನ ಇವ್ಣೆ ವಿಶ್ವಾಸ್ ಕರಾಕೊಯ್ನಿ.
8 ನಿಯಮ್ನ ಉಪಯೋಗ್ ಕರ್ನುತೆ ತರೀಖಾಮ ಚಾ಼ಲಿಲಿದೋತೊ, ಯೋ ಅಛ್ಛಾ಼ನ ಖ್ಹಾಜೆಸ್ ಕರ‍್ನು. 9 ಆ ಖ್ಹಯಾಲ್ಮ ರಾಕ್ಣು ಕದೆಕದೇಬಿ ನಿಯಮ್ ನೀತಿವಾಳನಖ್ಹಾಜೆ ಬಣಿರ‍್ಹುಕೊಯ್ನಿ. ಕತೋಬಿ ನಿಯಮ್ನ ಪಾಲನ್‌ಕರಕೊಂತೆ ರ‍್ಹವಾಳು, ಅಪರಾದಿ ಹುಯಿರ‍್ಹವಾಳು, ಭಕ್ತಿಕೊಂತೆ ಇವ್ಣೆ, ಪಾಪಿಖ್ಹಾರಾನ, ಅಜು಼ ಪರಿಶುದ್‌ಕೊಂತೆಬಿ, ಆತ್ಮೀಕಕೊಂತೆ ರ‍್ಹವಾಳನ, ಇವ್ಣ ಆಯ ಬಾನ ಮಾರಿನಾಖಸ್ತೆ ಇವ್ಣುನ, ಅಜು಼ ಖೂನಿನ, 10 ಅನೀತಿವಾಳು, ಸಲಿಂಗ್‍ ವ್ಯಬಿಚಾರ್ ಕರವಾಳು, ಚೋ಼ರ್‌ಚ಼ಖಾಟ್ ಕರಾವಾಳು, ಝೂ಼ಟಿಸಾಕ್ಷಿ ಬೋಲವಾಳು, ಕೋಣ್ ಅಛ್ಛಿ ಉಪದೇಶ್‍ನ ವಿರೋದ್ ಹುಯಿರ‍್ಹುಸ್ಕಿ ಇವ್ಣಖ್ಹಾಜೆ ಹುಯಿರುಸ್. 11 ಆ ಸುವಾರ್ತೆ ಯೋಗ್ಯಹುಯಿರೊತೆ ದೇವ್ನಿ ಮಹಿಮೆನ ದೆಖಾವನಿ ಸುವಾರ್ತೆನಿಮತ್ ಛಾ಼. ಆ ಸುವಾರ್ತೆನಿ ಸೇವೆ ಮನ ದೇವೈರ‍್ಹುಸ್.
ದೇವ್ನಿ ದಯಾನಖ್ಹಾಜೆ ಧನ್ಯವಾದ್
12 ಮೆ ಮಾರೊ ಪ್ರಭು ಕ್ರಿಸ್ತಯೇಸುನ ಧನ್ಯವಾದ್ ಕರುಸ್. ಯೋ ಮಾರ ಅಖ್ಖಾಸ್ ಕಾಮ್ನ ಶಕತ್ ದೀಮ್ಹೇಲ್ಯೊಸ್ ಇನ ಮೇ ಧನ್ಯವಾದ್ ಕರುಸ್. ಶನಖ್ಹಾಜೆ ಕತೊ ಯೊ ಮನ ವಿಶ್ವಾಸ್‌ವಾಳೊ ಕರಿ ಮಾಲುಮ್ ಕರಿಲಿನ್, ಇನ ಸೇವೆನಖ್ಹಾಜೆ ಚೂ಼ಣಿರಾಖ್ಯೊಸ್. 13 ಅಗಾಡಿ ಮೇ ಕ್ರಿಸ್ತನಿ ವಿರೋದ್ ವಾತೆ ಬೋಲಿನ್, ಇನ ಖ್ಹತೈರಾಖ್ಯೋಸ್ ಅಜು಼ ಇನಿ ಖ್ಹರಮ್‌ಬಿ ಕಾಡಿರಾಖ್ಯೊಸ್. ಶನಕತೊ, ಮೇ ತದೆ ಅವಿಶ್ವಾಸ್‌ಮ ಥೊ, ಇನಖ್ಹಾಜೆ ಮೇ ಶಾತ್‌ ಕರುಕರೂಸ್ ಕರಿ ಮನ ಮಾಲುಮ್ ಕೋ ಥೂನಿ. ತೋಬಿ ದೇವ್ನೆ ಮಾರಪರ್ ಗೋರ್‌ ಕರಿರಾಖ್ಯೋಸ್. 14 ಪ್ರಭುನೆ ಇನಿ ಕೃಪೆನ ಕೆತ್ರೇಕ್ಕಿ ಜಾ಼ಖ್ಹತ್ ಮಾರಪರ್ ರಂಚ್ಯೊ. ಇನಿ ವಿಶ್ವಾಸ್ ಅಜು಼ ಪ್ಯಾರ್‌ನ ದಿದೊ. ಯೋ ಅಪ್ಣೊ ಯೇಸುಕ್ರಿಸ್ತನ ಮಳಿರ‍್ಹವಾಮ ಛಾ಼. 15 ಕ್ರಿಸ್ತ ಯೇಸು ಪಾಪಿ ಖ್ಹಾರಾನ ಬಚಾ಼ಡನಖ್ಹಾಜೆ ಆ ಜಗತ್‌ಮ ಆಯೊ ಕರಿ ಬೋಲಾನಿ ವಾತೆ ಖ್ಹಾಚಿ ಹುಯಿರ‍್ಹಿಸ್, ಆ ವಿಶ್ವಾಸ್ ಕರಾಖ್ಹರ್ಕುಬಿ ಸ್ವಿಕಾರ್‌ಕರಾನ ಲ್ಹಾಯೇಕ್ನುಬಿ ಹುಯಿರ‍್ಹುಸ್. ಶನಕತೊ ಇಮ್ನ ಪಾಪಿಮ ಮೇಸ್ ಪಹಿಲೊ. 16 ಕತೋಬಿ ಅನ ಅಗ್ಗಳ್ ಹರ್‌ಹಮೇಶಾನಿ ಜಿ಼ಂದ್‌ಗಿನಖ್ಹಾಜೆ ಇನಪರ್ ವಿಶ್ವಾಸ್‌ಕರವಾಳನ ಮಾಲುಮ್‌ಪಡಾದೆಕರಿ ಕ್ರಿಸ್ತ ಯೇಸು ಪಾಪಿಮ ಮುಖ್ಯಥೋತೆ ಮನ ಗೋರ್‌ಕರಿನ್, ಇನಿ ಪೂರ ಸಮಾಧಾನ್‌ಥಿ ದೇಖಿಲಿದೊ. 17 ಅಖ್ಖ ಜ಼ಮಾನಾನೊ ರಾಜ಼ಬಿ, ಕದೇಬಿ ರ‍್ಹವಾಳೊಬಿ ದೆಖಾವಕೊಂತೆ ಹುಯಿರೋತೆ ಎಕ್ಕಸ್ ದೇವ್ನ ಇಜ಼್ಜತ್‌ಬಿ ಮಹಿಮೆಬಿ ಜ಼ಗ್‌ಜ಼ಮಾನಮಾಬಿ ರ‍್ಹವಾದೆ. ಆಮೆನ್.
18 ತಿಮೊಥೆ, ಮಾರ ಛಿಯ್ಯಾ, ಮೇ ತುನ ಹುಕುಮ್‌ ದೆವ್‍ಕರೂಸ್ ವಚನ್ನಿಘೋಣಿ ಪಹಿಲೇಥುಸ್ ತಾರಿ ಬಾರೇಮ ಪ್ರವಾದನೆ ಹುಯಿರುಸ್. ಯೋ ಅವಾಜ಼್‌ನ ತಾರಿ ಕಫ್ಫನ್ ಬಣೈಲೆ, ಅನೇಥಿ ತೂ ಮೋಟಿ ಜಂಗ್ ಭೀಡಾನಿತರ ಹುವಾದೆ. 19 ತಾರಿ ವಿಶ್ವಾಸ್‌ನಾಬಿ ಅಛ್ಛಿ ದಿಲ್ನಿ ಸಾಕ್ಷಿನಾಬಿ ಘಟ್‍ಥಿ ಧರಿರಾಕ್. ಥೋಡುಜ಼ಣು ಇವ್ಣಿ ಮನ್ನಿ ಅಛ್ಛಿಸಾಕ್ಷಿನಿ ವಿಶ್ವಾಸ್ ನಾಶ್‌ಕರಿನಾಖ್ಯು. 20 ಹುಮೆನಾಯಬಿ ಅಲೆಕ್ಸಾಂಡರ‍್ನೆ ಅಮ್ಮಸ್ ಕರ‍್ಯಾಥ. ಅವ್ಣೆ ದೇವ್ನ ವಿರೋದ್ ನಾ ಬೋಲ್ನುತೆ ಬರೋಬರ್‌ನಿ ಅಕ್ಕಲ್ ಶಿಕಾದೆಕರಿ ಮೇ ಇವ್ಣುನ ಶೈತಾನ್ನ ಹಾತ್‌ಮ ಒಪ್‌ಶೈದಿದೊ.