ಪೌಲನು ಥೆಸಲೋನಿಕದವರಿಗೆ ಬರೆದ ಎರಡನೆಯ ಪತ್ರಿಕೆ
ಪೌಲನೆ ಥೆಸಲೋನಿಕವಾಳಾನ ಲೀಖ್ಯೋತೆ ಬೇನಿ ಚಿಟ್ಟಿ
ಮಾಲುಮ್ ಕರಾನು
ಥೆಸಲೋನಿಕವಾಳನ ಪೌಲ ಲೀಖುಕರಸ್ತೆ ಬೇನು ಕಾಗತ್ 1:1. ಥೆಸಲೋನಿಕವಾಳನ ಪಹಿಲು ಚಿಟ್ಟಿ ಲೀಖಿಹುಯ್ಗುತದೆ, ತುರಂತ್ ಯೋ ಆ ಚಿಟ್ಟಿನ ಲೀಖ್ಯೊ. ಯೇಸು ಪೈದಹುಯೊತೆ ಇನವಾರ್ ಖ್ಹುಮಾರ್ ಏಕ್‍ಉಪ್ಪರ್ ಐಡೈಖ್ಹ್‌ನ ವರಖ್ಹ್‌ನ ಪಾರ್ ಆ ಚಿಟ್ಟಿ ಲೀಖಾಯುತೆ. ಥೆಸಲೋನಿಕ ಸಬೆನ ಲೀಖಾನಿ ವಖ್ಹ್‌ತೆಬಿ ಯೋ ಕೊರಿಂಥಮಾಸ್ ಆ ಸಬೇವ್‌ನ ಇನ ಬೇನು ಶುಭಸಂದೇಶ್‍ನ ಬೋಲಾನಿ ಜಾ಼ವಾನಿವಖ್ಹತ್‍ಮ ಭಾಂದ್ಯೊ ಅಪೊ 17:1-10. ಥೋಡು ಯೆಹೂದ್ಯ ಅದ್ಮಿ ಅಜು಼ ಖ್ಹುಮಾರ್ ಗ್ರೀಕ್‌ನು ಅದ್ಮಿ ಮಳಿನ್ ಆ ಸಬೆ ಭಂದೈರ‍್ಹುಥು ಕರಿ ಅಪೊಸ್ತಲರ‍್ನಿ ಪುಸ್ತಕ್‌ಮ ಬೋಲಸ್. ಥೆಸಲೋನಿಕಮಾನು ದೇವ್ನ ಅದ್ಮೆವ್‍ನ ಖ್ಹರ್ತಿನ ದನ್ನಿ ಬಾರೇಮ ಅಜು಼ ಕ್ರಿಸ್ತನು ಬೇನು ಆವಾನಿ ಬಾರೇಮ ಘಣು ಧ್ಯಾನ್ ಲೇವ್ಣು. ಶನಕತೊ ಪೌಲನೆ ಇನ ಲೀಖ್ಯೋತೆ ಬೇನಿ ಚಿಟ್ಟೀಮ ಅನಿ ಬಾರೇಮ ಘಣೇಥಿ ಲೀಖಿರಾಖ್ಯೊಸ್. ಆ ಬೇನು ಥೆಸಲೋನಿಕನು ಚಿಟ್ಟೀಮ ಖ್ಹುಮಾರ್ ಆಧುಭಾಗ್ ಖ್ಹತಮ್ ಹುವಾನ ವೇಳ್ಮ ಲೀಖಾಯು. ಪೌಲನೆ ಮೂರತ್‍ನಿ ಪೂಜಾ಼ನಿ ಬಾರೇಮಾಬಿ ಝೇತಾವಸ್. ಹರೇಕ್‍ಜ಼ಣು ಇನ ಖಾಣನಖ್ಹಾಜೆ ಕಾಮ್‌ಕರ‍್ನುಕರಿ ಬೋಲಸ್. 3:6-10
ಕಾಡಿದೇಖೊ
1. ಪೌಲನೆ ಚಿಟ್ಟೀಮ ಇನು ಅಜು಼ ಇನ ಜೋ಼ಡೆ ರ‍್ಹವಾಳಾನ ವತಾಳ್‍ತೊ ಹುಯಿನ್ ಶುರುಕರಸ್. 1:1-2
2. ಇನಕೇಡೆಥು ಯೊ ಥೆಸಲೋನಿಕನು ದೇವ್ನ ಅದ್ಮಿವೋನ ಝೂ಼ಂಡ್‌‍ನಖ್ಹಾಜೆ ದೇವ್ನ ಧನ್ಯವಾದ್ ಕರಸ್. ಅಜು಼ ಪ್ರಾರ್ಥನೆ ಕರಸ್. 1:3-12
3. ಪೌಲನೆ ಖ್ಹರ್ತಿನ ದನ್ನ ವಖ್ಹತ್‌ನಿ ಬಾರೇಮ ವಾತೆ ಬೋಲಸ್. 2:1-17
4. ಇನಕೇಡೆಥು ಯೋ ವಳ್‍ಶಿನಿ ಬಾರೇಮ ವಾತೆ ಬೋಲಸ್. ಅಜು಼ ಕಾಮ್ ಕರ್ನುಸ್ ಕರ‍್ನು ಕರಿ ಬಾರೇಮ ವಾತೆ ಬೋಲಸ್. 3:1-15
5. ಪೌಲನೆ ಬಿಜೇಕ್ ಹಲ್ಲ ದೇವ್ನ ಅದ್ಮಿವ್‍ನ ಟೋಳ್ನ ಖ್ಹಲಾಮ್ ಕರ್ತೊಹುಯಿನ್ ಚಿಟ್ಟಿನ ಖ್ಹತಮ್ ಕರಸ್. 3:16-18
1
1 ಅಪ್ಣೊ ಬಾ ಹುಯಿರ‍್ಹೋತೆ ದೇವ್‌ಮ ಅಜು಼ ಪ್ರಭು ಹುಯಿರ‍್ಹೋತೆ ಯೇಸು ಕ್ರಿಸ್ತಮ ಛಾ಼ತೆ ಥೆಸಲೋನಿಕ ಸಬೆನ, ಪೌಲ, ಸಿಲ್ವಾನ ಅಜು಼ ತಿಮೊಥೆ ಕರಿ ಹಮೆ ಲೀಖುಕರೇಸ್ತೆ ಶಾತ್‌ಕತೊ, 2 ಅಪ್ಣೊ ಬಾ ದೇವ್‍ಥಿಬಿ ಅಜು಼ ಪ್ರಭು ಯೇಸು ಕ್ರಿಸ್ತಥಿ ತುಮೂನ ವಾರ್‌ಖ್ಹೊ ಅಜು಼ ಶಾಂತಿ ಮಳಾದೆ.
ಕ್ರಿಸ್ತ ಆವಾನಿವಖ್ಹ್‌ತೆ ತೀರ್ಪ್
3 ಹಮಾರ ಭೈಯೆ ಭೇನೊ, ತುಮಾರಿ ಬಾರೇಮ ಹಮೆ ಹಮೇಶ ದೇವ್ನ ಧನ್ಯವಾದ್ ಕರಿಯೇಸ್. ಅಮ್ ಕರಾನು ಹಮೂನ ಬರೊಬರಸ್‌ ದೆಖಾಯು, ಶನಕತೊ ತುಮಾರಿ ವಿಶ್ವಾಸ್ ಘಣು ಭಡುಕರಾಸ್ ಅಜು಼ ಏಕ್‌ಥಿಏಕ್‌ ತುಮಾರಿ ಪ್ಯಾರ್ ದನ್‌ಪರ್-ದನ್ ಭಡ್ತು ಜಾ಼ವಾದೆ. 4 ಶನಕತೊ ತುಮೆ ಖ್ಹಮಾಳಮಾಬಿ ಖ್ಹತಾಪ್ಣಿಮಾಬಿ ತುಮಾರಮ ದೆಖಾಯುತೆ ವಿಶ್ವಾಸ್ನಖ್ಹಾಜೆಥಿ ದೇವ್ನಿ ಅದ್ಮಿನಿ ಸಬೇಮ ಕಮ್‌ಠೋಕಿ ವಾತೆ ಬೋಲಿಯೇಸ್.
5 ದೇವ್ನಿ ನೀತಿನಿ ತೀರ್ಪ್‌ನ ಖ್ಹಾಚು಼ ಖಿವುಕತೊ, ತುಮೆ ಲತಾಡಪಡುಕರಾತೆ ದೇವ್ನಿ ರಾಜ್ಯನ ತುಮೆ ಲ್ಹಾಯಕ್ ಹುಯಿರ‍್ಹವಾನು. 6 ನ್ಯಾವ್ನು ಕೋಣ್ ಕರಸ್ಕಿ ಇವ್ಣುನ ದೇವ್ ಅಛ್ಛು಼ಸ್ ಕರಸ್. ತುಮೂನ ಕೋಣ್ ಖ್ಹತಾವಸ್ಕಿ ಇವ್ಣುನ ದೇವ್ ಖ್ಹತಾವಸ್, 7 ಅಜು಼ ವಾಖ್ಯೊ ಛಾ಼ತೆ ತುಮುನಾಬಿ ಹಮೂನ ಪರಿಹಾರ್ ಕರ್ಶೆ. ಪ್ರಭು ಹುಯಿರ‍್ಹೋತೆ ಯೇಸು ಮಹಾ ಶಕತ್‌ವಾಳೊ ದೇವ್‌ದೂತರ್‌ನ ಜೋ಼ಡೆ ಸೊರ್ಗಥೊ ದೆಖಾವಾನಿ ವಖ್ಹತ್‌ಮ, ಇನ ಸಮಾಧಾನ್ ದಿಶೆ. 8 ಯೊ ಆಗ್‍ನಿ ಝ಼ಲ್‌ಪಟ್‌ ಜೋ಼ಡ್ಮ ಕೋಣ್ ದೇವ್ನ ಠೊಕ್ರಾವಸ್ಕಿ ಅಜು಼ ಯೇಸು ಪ್ರಭುನಿ ಬಾರೇನಿ ಸುವಾರ್ತೆನ ಮಾನ್ಯುಕೊಯ್ನಿಕಿ ಇವ್ಣುನ ನಿಶತ್‌ ದ್ಯವಾನ ಆವ್‌ಶೆ. 9 ಪ್ರಭು ಇವ್ಣುನ ಇನಿ ಮಹಿಮೆನಿ ಶಕತ್ನ ಖ್ಹಾಮ್ಣೇಥು ಹಟೈನಾಖಿದಿನ್ ಇವ್ಣುನ ಹರ್‌ಹಮೇಶಾನು ನಿಶತ್‌ ದಿಶೆ. 10 ಇನೆ ಯೋ ದನ್ಮ ಇನ ಪರಿಶುದ್ ಅದ್ಮಿವ್‌ಥಿ ಮಹಿಮೆಬಿ ಅಜು಼ ವಿಶ್ವಾಸ್‌ಮ ರ‍್ಹೇಯ್ತೆ ಇವ್ಣೇಥಿ ಮರ‍್ಯಾದಿಲೀನ್ ಆವಾಸ್ಕಿ ಯೊ ಅದ್ಮಿನಿ ಬೀಚ್ಮ ತುಮೇಬಿ ರ‍್ಹಿಶು. ಶನಕತೊ ಹಮೆ ತುಮುನ ಬೋಲ್ಯಾತೆ ಸಾಕ್ಷಿನ ತುಮೆ ನಂಬಿರಾಖ್ಯಾಸ್. 11 ಅನಖ್ಹಾಜೆಸ್ ಹಮೆ ಕದೇಬಿ ತುಮಾರಖ್ಹಾಜೆ ಪ್ರಾರ್ಥನೆ ಕರಿಯೇಸ್. ಅಪ್ಣೊ ದೇವ್ ತುಮೂನ ಬುಲಾಯೋತೆ ಇನಖ್ಹಾಜೆ ಯೋಸ್ ತುಮುನ ಲ್ಹಾಯೇಕ್‌ನಿ ಗಣ್ತಿ ಕರಿರಾಖ್ಯೊಸ್. ತುಮಾರಿ ಶಕತ್ ವಿಶ್ವಾಸ್‍ಥೀಬಿ ತುಮಾರಿ ಆಖ್ಹ್‌ನ ಅಜು಼ ಅಛ್ಛಾ಼ನ ಪೂರ ಕರಾದೆಕರಿ ಬಿಂತಿ ಕರ್ಯೆಸ್. 12 ಅಮ್ಮಸ್ ಅಪ್ಣೊ ಪ್ರಭು ಹುಯಿರ‍್ಹೋತೆ ಯೇಸು ಕ್ರಿಸ್ತನು ನಾಮ್ ತುಮಾರೇಥಿ ಮಹಿಮೆ ಉಶೆ, ಅಜು಼ ಇಮ್ಮಸ್ ತುಮೇಬಿ ಇನಾಮ ಮಹಿಮೆ ಲಿಶು. ಯೋ ಮಹಿಮೆ ಅಪ್ಣೊ ದೇವ್ ಅಜು಼ ಪ್ರಭು ಹುಯಿರ‍್ಹವಾಳ ಯೇಸು ಕ್ರಿಸ್ತನಿ ವಾರ್‌ಖ್ಹೇಥಿ ಚಾ಼ಲಾದೆ.