ಅಪೊಸ್ತಲರ ಕೃತ್ಯಗಳು
ಅಪೊಸ್ತಲರ‍್ನು ಕಾಮ್‌ಖ್ಹಾರು
ಮಾಲುಮ್ ಕರಾನು
ಅಪೊಸ್ತಲರ‍್ನು ಕಾಮ್ನು ಪುಸ್ತಕ್, ಖಿವಿ ಪರಕ್ಮ ಶುರುಹುಯು ಅಜು಼ ಸಭೆ ಖಿವಿಪರಕ್ಮ ಯೆರೂಸಲೇಮ್‍ಥು ಯುದಾಯ, ಸಮಾರ್ಯ, ಅಜು಼ ಇನ ಅಖ್ಖಿ ಬಾಜು಼ಮ ಫೈಲಾಯು ಕರಿಬೋಲಾನು ಖ್ಹಾಚಿ ಘಟನೆ ಅನಾಮ ಲಿಖೈರ‍್ಹುಸ್. ಯೇಸು ಪರಲೋಕ್‌ನ ಜಾ಼ವಾನ ಅಗ್ಗಳ್ ಬೊಲ್ಯೋತೆ ಪರಕ್ಮ1:8. ಆ ಪುಸ್ತಕ್ನ ಲೂಕನೆ ಲೀಖಿರಾಖ್ಯೊಸ್ ಅಜು಼ ಯೋ ಏಕ್‌ ವೈದ್ಯ ಹುಯಿರ‍್ಹೋಥೊ, ಅಜು಼ ಯೋ ಘಣು ಹೊಷಾರ್‌ಥಿ ದಪ್ತರ್‌ನ ಮ್ಹೆಲಿರಾಖ್ಯೊಸ್. ಲೂಕನೆ ಆ ಬೇ ಪುಸ್ತಕಹುಯಿರ‍್ಹುತೆ ಅಪೊಸ್ತಲನು ಕಾಮ್‌ಖ್ಹಾರು ಅಜು಼ ಲೂಕನಿ ಸುವಾರ್ತೆನ ಗ್ರೀಕ್‍ವಾಳೊ ಹುಯಿರೋತೆ ಥಿಯೊಫಿಲನ ಬೋಲಾನಿತರ ಲೀಖಿರಾಖ್ಯೊಸ್. ಆ ಪುಸ್ತಕಖ್ಹಾರು ಬೋಲ್ನುಕತೊ ಕ್ರಿಸ್ತನ ಖೂಮ್‍ವಾಳನ ಅಜು಼ ಗ್ರೀಕ್‍ವಾಳನಾಬಿ, ಯೆಹೂದ್ಯರ್‌ನ ಖ್ಹಾಜೇಬಿ ಲಿಖೈರ‍್ಹುಸ್ 1:1. ಆ ಪುಸ್ತಕ್ ಯೇಸು ಕ್ರಿಸ್ತ ಪೈದಹುವಾನು 60-64 ವರಖ್ಹ್‌ನ ವಾರ್ ಲಿಖೈರ‍್ಹುಸ್. ಶನಕತೊ ಆ ಪುಸ್ತಕ್ ಪೌಲ ಜೇಲ್‍ಮಾಥೊ ಛುಟ್ಕಾರ್ ಹುಯೋತೆ ಇನ ಅಗಾಡಿಸ್ ಆ ಲೀಖೈನ್‌ ಖ್ಹರ್ತಿ ಹುಯಿರುಸ್. ಲೂಕಾಬಿ ಜಿನುಕು ಪೌಲನಿ ಜೋ಼ಡೆ ಚಾ಼ಲಿಗಯೋತೆ ತದೆ ಬೋಲ್ನುಕತೊ ಆ ಅಪೊಸ್ತಲರ‍್ನು ಕಾಮ್ನ ಆ ಪುಸ್ತಕನ ಅಂತಿಯೋಕ್ಯ ಖ್ಹಯೇರ್‌ಮ ಲೀಖಿರಾಖ್ಯೊಸ್. ಅಪೊಸ್ತಲರ‍್ನು ಪುಸ್ತಕ್ ಲೂಕಾನೆ ಲೀಖ್ಯೋತೆ ಸುವಾರ್ತೆನು ಪುಸ್ತಕಾನು ಶುರುವಾತ್ ಹುಯಿರ‍್ಹುಸ್. ಶನಕತೊ ಆ ಪುಸ್ತಕ್ ಯೇಸು ಪರಲೋಕ್‌ನ ಜಾ಼ವಾನು ವಾತೇಥಿ ಶುರುವಾತ್ ಹುಯಿರ‍್ಹುಸ್. ಲೂಕನೆ ಅನ ಲೀಖ್ಯೋತೆ ಸುವಾರ್ತೆನು ಪುಸ್ತಕ್‍ಬಿ ಲಿಖ್ಯೋತೆ ಉದ್ದೇಶ್ ಆ ಪುಸ್ತಕ್‌ಮ ಎಕ್ಕಸ್ ಹುಯಿರುಸ್, ಅಜು಼ ಥಿಯೋಫಿಲನಾಬಿ ಭಡುಕರಾತೆ ವಿಶ್ವಾಸಿಯೋನ ಶಿಕಾಡ್ಯೊತೆ ಬಾರೇಮ ಅಜು಼ ಕಿಮ್ ಜಿವ್ಣು ಕರ್ನುಕರಿ ಬೋಲಾನು, ಯೋ ಕ್ರಿಸ್ತನು ಸಿದ್ದಾಂತ ಕಿಮ್ ಫೈಲಾಯುಕರಿ ಬೋಲಾನು ಬೋಲಿವತಾಳಾನ ಖ್ಹಾಜೆ ಲೀಖಿರಾಖ್ಯೊಸ್. ಅಪೊಸ್ತಲನು ಕಾಮ್ನು ಪುಸ್ತಕ್ ಪಹಿಲಿ ಸಬೇನು ಉದಾಹರಣೆ ದೇಸ್. ಅಜು಼ ಖಿವಿ ಪರಕ್ಮ ಯೇಸುನ ಉಪ್ಪರ್ ಕಿಮ್ ವಿಶ್ವಾಸ್ ರಾಖವಾಳು ಕಿಮ್ ಜಿವ್ಣು ಕರ್ನುಕರಿ, ಅಜು಼ ಅಪೊಸ್ತಲರ‍್ನು ಉದಾಹರಣೆ ಅಪ್ಣುನ ಪವಿತ್ರಾತ್ಮನ ಶಕತ್ನ ಉಪ್ಪರ್ ಕಿಮ್ ರಾಖಿರಾಕ್ಣುಕರಿ ಅಜು಼ ಸುವಾರ್ತೆ ಬಿಜ಼ ಅದ್ಮಿವೋನ ಕಿಮ್ ಫೈಲಾವ್ಣು ಕರಿ ವತಾಳಸ್.
ಕಾಡಿದೇಖೊ
1 ಶುರುಮಾಸ್ ಪವಿತ್ರಾತ್ಮ ಶಿಷ್ಯರ್‌ನ ಉಪ್ಪರ್ ಆವಾತೆ ಅಜು಼ ಸಭೆ ಭಡಾನು ಹುಯಿರುಸ್.1:1—8:1
2 ಇನಕೇಡೆಥು ಸಭೆನ ಖ್ಹತಾಪ್ಣಿ ಹುಯುತೆ ಅಜು಼ ಯೇರೂಸಲೇಮ್‍ಥು ಅಶ್‌ಪಿಶ್‍ ಫೈಲಾವನು ಶುರುಹುಯುತೆ. 8:2—12:23
3 ಇನಕೇಡೆಥು ಪೌಲ ಪಹಿಲಿ ಸೇವೆನಿ ಚಾ಼ಲ್‌ನ ಜಾ಼ಸ್ತೆ. 12:24—14:28
4 ನವ ವಿಶ್ವಾಸಿಖ್ಹಾರನ ಶನಿ ಉದ್ದೇಶ್‌ಥಿ ಉಪಯೋಗ್ ಹುವಾನ ಯೆರೂಸಲೇಮ್ಮ ಮಳ್ಯುತೆ. 15:1-35
5 ಇನಕೇಡೆಥು ಪೌಲ ಭೇನೆಹಲ್ಲ ಸುವಾರ್ತೆನ ಗಯೋತೆ 15:36-18:22
6 ಇನಕೇಡೆಥು ಪೌಲನೆ ತೀನ್ನೆಹಲ್ಲ ಸುವಾರ್ತೆನು ಚಾ಼ಲ್ಯೊತೆ 18:23—20:38
7 ಇನಕೇಡೆಥು ಪೌಲ ಯೆರೂಸಲೇಮ್ಮ ಕೊಂಡಾಯೊತೆ 21—26
8 ಖ್ಹರ್ತಿಮ ಪೌಲನ ರೋಮ್‍ನ ಲೀಗಯೂತೆ 27—28
1
1 ಪ್ಯಾರ್‌ನೊ ಥಿಯೊಫಿಲ, ಯೇಸುನೆ ಕರ‍್ಯೊತೆ ಕಾಮ್ನಿ ಬಾರೇಮ ಅಜು಼ ವಚನ್ನಿ ಬಾರೇಮ ಹರೇಕ್‍ನಾಬಿ ಮೆ ಮಾರ ಪಹಿಲ ಪುಸ್ತಕ್‌ಮ ಲೀಖಿರಾಖ್ಯೊಸ್. 2 ಇನೆ ಪರಲೋಕ್‌ನ ಜಾ಼ವಾಲಗು ಇನು ಅಪೊಸ್ತಲರ‍್ನ ಚೂ಼ಣಾಯಹುಯ ಪವಿತ್ರಾತ್ಮನಿ ಶಕಥ್ಥಿ ಶಿಕಾಡ್ಯೊ.
3 ಆ ಹೈರುತೆ ಯೊ ಮರಾನಿ ಬಾದ್‌ಮ ಚಾ಼ಲ್ಯುತೆ, ಇನೆ ಬಚಿನ್ ಆಯೋತೆ ಇನಿ ಬಾರೇಮ ಅಪೊಸ್ತಲರ‍್ನ ವತಾಳಿಲಿದೊ ಇನೆ ಜಿವೀನ್ ಉಠ್ಯೊತೆ ಘಣಿ ವಖ್ಹತ್‌ಲಗೂಬಿ ಕೈಏಕ್ ಜ಼ಣಾನ ದೆಖಾವ್ತೊರ‍್ಹಯೊ ದೇವ್ನಿ ರಾಜ್ಯನಿ ಬಾರೇಮ ಇವ್ಣಮ ಬೋಲ್ತೊರ‍್ಹಿಯೊ. 4 ಅಮ್ ರ‍್ಹವಾನಿ ವಖ್ಹ್‌ತೆ ಏಕ್‌ಬಾರ್ ಶಿಷ್ಯರ್‌ನಿ ಜೋ಼ಡ್ಮ ಖಾಣು ಖಾವನಿವಖ್ಹ್‌ತೆ ಇನೆ ಇವ್ಣುನ “ಮಾರೊ ಬಾ ಏಕ್‌ ಜಿಭಾನ್‌ ದಿರಾಖ್ಯೊಸ್ ಕರಿ ಅನಿ ಬಾರೇಮ ಪಹಿಲೇಸ್ ತುಮೂನ ಮೇ ಬೋಲಿರಾಖ್ಯುತೆ ಇನ ಖ್ಹಮ್‌ಜಿರಾಖ್ಯಥಾತೆ ಇಮ್‌ ಆ ವಾಗ್ದಾನ್ನಿ ವರ್‌ದಾನ್ ಲ್ಯವಾನಖ್ಹಾಜೆ ತುಮೆ ಯೆರೂಸಲೇಮ್ಮ ಟಿವೈರ‍್ಹೇಣುಕರಿ ಬೋಲ್ಯೊ. 5 ಯೋಹಾನನೆ ಅದ್ಮಿವೋನ ಪಾಣಿಥಿ ಬ್ಯಾಪ್ತಿಸ್ಮ ಕರಾಯೊ ಕತೋಬಿ ಬಿಜ಼ ಥೋಡಸ್ ದನ್ಮ ತುಮೂನ ಪವಿತ್ರಾತ್ಮಥಿಬಿ ಬ್ಯಾಪ್ತಿಸ್ಮ ಉಷೆ” ಕರಿ ಬೋಲ್ಯೊ.
ಯೇಸು ಸೊರ್ಗನ ಪಡೈಗಯೋತೆ
(ಮಾರ್ಕ 16:19-20; ಲೂಕ 24:50-53)
6 ಮಳಿರ‍್ಹುಥೂತೆ ಅಪೊಸ್ತಲರ್ ಖ್ಹಾರು, ಇವ್ಣೆ “ಪ್ರಭು, ತೂ ಇಸ್ರಾಯೇಲ್‌ ಅದ್ಮಿವೋನ ಹಮೇಶ ಪಾಛೊ಼ ಇವ್ಣಿ ರಾಜ್ಯನ ಆಸ್ ದನ್ಮ ದ್ಯವಾನ ಆಯೋಕಿ ಶು? ಕರಿ ಬೋಲ್ಯು. 7 ಯೇಸು ಇವ್ಣುನ ಅಖ್ಖಿ ವಖ್ಹತ್‌ನ ರ‍್ಹವೊ ಹಗಾಮ್ನ ರ‍್ಹವೊ ಮಾಲುಮ್ ಕರಾನಿ ಅದಿಕಾರ್ ಬಾನ ಛಾ಼ ಪಣ್ಕಿ ಇನ ಮಾಲುಮ್ ಕರಾನು ಕಾಮ್ ತುಮಾರು ಕಾಹೆ. 8 ಕತೋಬಿ ಪವಿತ್ರಾತ್ಮ ತುಮಾರಪರ್ ಆಯಿಗೋತೊ, ತುಮೆ ಶಕತ್‍ಲೀನ್ ಯೆರೂಸಲೇಮ್ಮಾಬಿ ಯೂದಾಯಮಬಿ, ಸಮಾರ್ಯ ತಬರ್‌ಖಾಮಾಬಿ ಅಜು಼ ಜಗತ್ನ ಕಡೆಷಿ ಲಗೂಬಿ ಮನ ಸಾಕ್ಷಿಹುಯಿರಿಶು. 9 ಆ ವಾತೆ ಅಪೊಸ್ತಲರ‍್ನ ಬೋಲಿಹುಯಿಗು ತದೆ ಇವ್ಣೆ ದೇಖುಕರ್ತಥಾತೆ ತದೇಸ್‌ ಯೋ ಸೊರ್ಗಮ ಪಡೈಗಯೊ. ವಾದ್‌ಳು ಮೂಚಿನಾಖಿದಿದೂತೆ ಇನಖ್ಹಾಜೆ ಯೇಸುನ ಇವ್ಣೆ ದೆಖಾನ ಕೊಹುಯುನಿ. 10 ಯೇಸು ಜಾ಼ವಾನಿವಖ್ಹ್‌ತೆ ಇನ ಇವ್ಣೆ ಆಬ್‌ನಾಸ್ ಠರ್‌ಕೈನ್ ದೇಖುಕರ್ತುಥು. ತದೆ, ಧೋಳು ಲುಂಗ್ಡು ಫೇರಹುಯ ಬೇಜ಼ಣ ಇನ ಭೀಡೆ ಭೀರಿನ್, 11 ಗಲಿಲಾಯವಾಳ ಅದ್ಮಿವೊ, ತುಮೆ ಶನ ಆಸ್ಮಾನ್ನಾಸ್ ದೇಖುಕರಸ್? ತುಮಾರಕಂಥು ಯೇಸು ಕಿಮ್ ಪರ್‌ಲೋಕ್ನ ಛ಼ಡಿಗಯೊತೆ ತುಮೆ ದೇಖ್ಯಾಕಿ ಇಮ್ನಿ ಪರಕ್ಮಾಸ್ ಪಾಛು಼ ಆವ್‌ಶೆ.
ಯೂದನಿ ಝ಼ಗೋಮ ಉತ್ತರಾಧಿಕಾರಿ
(ಮತ್ತಾಯ 27:3,10)
12 ಇನಕೇಡೆಥು ಅಪೊಸ್ತಲರ್ ಖ್ಹಾರು ಆಲಿವ್‌ನ*1:12 ಆಲಿವ್ ಝಾ಼ಡ್‌ಥಿ ತೇಲ್ಬಿ ಕಾಡೆಜಾ಼ಯ್ ಟೇಕ್‍ಡಿ ಕಂಥು ಯೆರೂಸಲೇಮ್ನ ಪಾಛು಼ಗಯು. ಯೊ ಟೇಕ್‍ಡಿಥು ಯೋ ಖ್ಹಯೇರ್‌ಥು ಜಾ಼ಖ್ಹತ್ ಕತೊ ಆಧುಮೈಲ್ ದೂರ್ ಥು. 13 ತದೆ ಇವ್ಣೆ ಖ್ಹಯೇರ್‌ಮ ಗಯ ಇವ್ಣೆಥೂತೆ ಘರ್‌ನ ಉಪ್ಲಿಬಾಜುಮ ಗಯ; ಇವ್ಣೆ ಕೋಣ್ ಕೋಣ್‌ಕತೊ, ಪೇತ್ರ, ಯೋಹಾನ. ಯಾಕೋಬ, ಅಂದ್ರೆಯ, ಫಿಲಿಪ್ಪ, ಅಜು಼ ತೋಮ, ಬಾರ್ತೊಲೊಮಾಯ, ಮತ್ತಾಯ, ಅಜು಼ ಅಲ್ಫಾಯನೊ ಛಿಯ್ಯೊ ಯಾಕೋಬ, ಜಾ಼ತ್ನೊಅಭಿಮಾನಿ ಕರಿ ಬೋಲೈಲಿದೋತೆ ಸೀಮೋನ ಅಜು಼ ಯಾಕೋಬನೊ ಛಿಯ್ಯೊ ಯೂದ ಇವ್ಣೆ ಖ್ಹಾರು ಹಿಜ್ಜಾ಼ ಥು. 14 ಇವ್ಣೆ ಅಖ್ಖುಜ಼ಣು ಏಕ್‍ಮನ್‍ಥಿ ಎಕ್ಟುಹುಯಿನ್ ದೇವ್ನಿ ಪ್ರಾರ್ಥನೆಮ ಥು. ಹಿಜ್ಜಾ಼ ಥೋಡಿಜ಼ಣಿ ತಯೇಡಾಬಿ, ಯೇಸುನಿ ಆಯಾ ಮರಿಯಾಬಿ ಇನ ಭೈಯೇಬಿ ಅಪೊಸ್ತಲರ‍್ನಿ ಜೋ಼ಡ್ಮ ಥೂ. 15 ಥೋಡದನ್ ಬಾದ್‌ಮ, ವಿಶ್ವಾಸಿಮ ಖ್ಹುಮಾರ್ ಏಕ್‌ಖ್ಹೊ ವೀಖ್ಹ್‌ ಜ಼ಣು ಸಭೆಮ ಮಳೀನ್‍ ಅಯಿರ‍್ಹವಾಮ, ಪೇತ್ರನೆ ಬೀಚ್ಮ ಉಠಿ ಭೀರಿನ್: 16 1:16 ಕೀರ್ತನೆ 41:9 “ಭೈಯೇಭೇನೆವೊ, ಯೇಸುನ ಧರಿದ್ಯವಾಳನ ವಾಟ್‌ ವತಾಳ್ಯೊತೆ ಯೂದನಿ ಬಾರೇಮ ಪವಿತ್ರಾತ್ಮನೆ ದಾವೀದ್‍ಥಿ ಪವಿತ್ರ ಪುಸ್ತಕ್‌ಮ ಬೋಲೈರ‍್ಹುತೆ ವಾತೆ ಪೂರಹೋಣುಸ್‌ಪಡ್ಯುಥು, 17 ಯೂದ ಅಪ್ಣುನ ಮಾಲುಮ್‌ರ‍್ಹಾವಳೊ ಹುಯಿರ‍್ಹೋಥೊ ಅಜು಼ ಸೇವೇನ ಚೂ಼ಣೈರ‍್ಹೋ ತೋಬಿ ಯೇಸುನ ಧರಿದ್ಯವಾಳನ ಯೂದನೆ ಮದತ್ ಕರ್ನುಥೂತೆ ಇನ ಪವಿತ್ರಾತ್ಮನೆ ಪಹಿಲೇಸ್ ದಾವಿದ್ನ ಮ್ಹೋಡೇಥಿ ಬೋಲಿರಾಖ್ಯೊಥೊ.” 18 ಯೂದನೆ, “ಇನಿ ನೀಚ್‌ಕಾಮ್‍ಥಿ ಲಿದೋತೆ ಪೈಶಾಮ ಏಕ್‌ ಖೇತರ್‌ನ ಲೀಲಿದೊ ಥೊ. ಇನಮಾಸ್ ಇನ ಜಾನ್ನ ಕಳ್ಳಿದೊ. ಉಪ್ಪರ್ ಥು ಮುಡ್‌ಕ್ಯು ಹೇಟ್ ಹುಯಿನ್ ಪಡೀನ್, ಪೇಟ್ ಫುಟೀನ್, ಅತಲ್ಡಿ ಭಾರ್‌ ಅಯಿಗು. 19 ಅನಿ ಬಾರೇಮ ಯೆರೂಸಲೇಮ್ನ ಖ್ಹಾರ ಅದ್ಮಿನ ಮಾಲುಮ್ ಪಡ್ಯು. ಯೊ ಜ಼ಮೀನ್ನ ಇವ್ಣಿ ಬೋಲಿಮ ‘ಅಕೆಲ್ದಾಮಾ’ ಕರಿ ನಾಮ್‌ಮ್ಹೇಲಾಯು. ‘ಅಕೆಲ್ದಾಮಾ, ಕತೊ ‘ಲ್ಹೋಯಿನು ಖೇತರ್‌’ ಕರಿ ನಾಮ್ ಆಯು. 20 ಯೂದನಿ ಬಾರೇಮ ‘ಇನು ಘರ್‌ ಬರ್ಬಾತ್‌ ಹುವಾದೆ, ಯೋ ಅದ್ಮಿಕೊಂತೆ ಉಜ್ಜಾ಼ಡ್ ಹುವಾದೆ’ ಇನಿ ಅದಿಕಾರ್ ಬಿಜೇಕ್‍ಜ಼ಣಾನ ಜಾ಼ವಾದೆಕರೀಬಿ ಕೀರ್ತನೆ ಪುಸ್ತಕ್‌ಮ ಲೀಖೈರುಸ್.1:20ಕೀರ್ತನೆ 69:25—109:8 21 “ಇನಖ್ಹಾಜೆ ಅಲಕ್ ಏಕ್ಜ಼ಣೊ ಅಪ್ಣಿಜೋ಼ಡ್ಮ ಮಳಿನ್ ಪ್ರಭು ಯೇಸು ಮರೀನ್ ಜಿವ್‍ಯೊತೆ ಇನ ಸಾಕ್ಷಿಹುಯಿರೇಣು. ಎಥ್ರಾನವಾಳೊ ಯೇಸು ಫರೀನ್ ಸೇವೆಕರಾನಿ ಅಖ್ಖಿವಖ್ಹ್‌ತೆ ಅಪ್ಣ ಟೋಳ್‍ವಾಳಾಮ ರ‍್ಹವವಾಳೊ ಹುಯಿರೇಣು. 22 ಇನಖ್ಹಾಜೆ ಬ್ಯಾಪ್ತಿಸ್ಮ ದ್ಯವಾಳೊ ಯೋಹಾನ ಬೋಧನೆ ಕರ‍್ಯೊತೆ ದನ್‌ಥು ಕತೊ ಯೋಹಾನ ಬ್ಯಾಪ್ತಿಸ್ಮ ಕರ‍್ಯೊತೆ ಹಿಜ್ಜಾ಼ಥು ಧರೀನ್ ಯೇಸು ಸೊರ್ಗಮ ಗಯೋತೆ ದನ್‍ಲಗೂಬಿ ಅಪ್ಣ ಜೋ಼ಡ್ಮ ರ‍್ಹವವಾಳೊ ಹುಯಿರೇಣು.” ಶನಕತೊ ಆ ವೇಳ್ಮ ರ‍್ಹವವಾಳೊ ಏಕ್ಜ಼ಣೊ ಯೇಸು ಪಾಛು಼ಜಿವ್ತೊಹುಯಿನ್ ಉಠ್ಯೊತೆ ಇನ ಸಾಕ್ಷಿಹುಯಿರೇಣು. 23 ತದೆ ಬಾರ್ಸಬ ಕರಿ ನಾಮ್‍ವಾಳೊ ಯೋಸೇಫ್‌ನ ಯೂಸ್ತ ಕರೀಬಿ ಬೋಲ್ತುಥು. ಅಜು಼ ಬಿಜೇಕ್ ಜ಼ಣೊ ಮತ್ತೀಯ. ಆ ಬೇ ಜ಼ಣಾನ ಅಪೊಸ್ತಲರ‍್ನ ಸಭೆನ ಖ್ಹಾಮ್ಣೆ ಭೀರಾಖ್ಯು. 24 ತದೆ ಇವ್ಣೆಅಮ್‍ ಪ್ರಾರ್ಥನೆ ಕರ‍್ಯುಕೀ, “ಪ್ರಭು, ತೂ ಅಖ್ಖಾನ ದಿಲ್‌ನೊಮಾಯಿನೊ ಮಾಲುಮ್ ಕರಿರಾಖ್ಯೊಸ್. ಆ ಬೇಜ಼ಣಾಮ ತೂ ಕಿನ ಚೂ಼ಣಿರಾಖ್ಯೊಸ್, 25 ಯೂದನಿ ಝ಼ಗೋಮ ಅಪೊಸ್ತಲಹುಯಿನ್ ಸೇವೆಕರಾನ ಯೋ ಝ಼ಗೋನ ಮ್ಹೇಲಿನ್ ಕಿಜ್ಜಾ಼ ಇನಿ ಝ಼ಗೋಕಿ ಹಿಜ್ಜಾ಼ ಚ಼ಲೆಗಯೊ 26 ತದೆ ಇವ್ಣಖ್ಹಾಜೆ ಚಿಟ್ಟಿನಾಖ್ಯು, ಇನಾಮ ಮತ್ತೀಯನು ನಾಮ್ ಪಡಾಯು.ತದೆ ಘ್ಯಾರಜ಼ಣ ಅಪೊಸ್ತಲರ‍್ನಿ ಜೋ಼ಡ್ಮಯೊ ಮಳಿಗೊ.