1 ಯೆಹೂದ್ಯರ್‌ಕಾಹೆತೆ ವಿಶ್ವಾಸಿಖ್ಹಾರು ದೇವ್ನಿ ವಚನ್ನ ಸ್ವೀಕಾರ್‌ಕರ‍್ಯು ಕರಿ ಅಪೊಸ್ತಲರ್‌ವಾಳನಾಬಿ ಯೂದಾಯಮ ಥೂತೆ ವಿಶ್ವಾಸಿನ ಮಾಲುಮ್‍ಹುಯು. 2 ಪೇತ್ರ ಯೆರೂಸಲೇಮ್ಮ ಆಯೊತೆ ತದೆ ವಿಶ್ವಾಸಿಖ್ಹಾರನ ಜೋ಼ಡ್ಮ ಖ್ಹತ್ನಾನಿ ಬಾರೇಮ ವಾದ ಕರ್ತುಹುಯಿನ್; 3 ತೂ, “ಯೆಹೂದ್ಯರ್ ಕಾಹೆತೆ ಇವ್ಣಕನಾಬಿ ಅಜು಼ ಖ್ಹತ್ನ ಕರಾಯುಕೊಂತೆ ಇವ್ಣ ಘರೇಬಿ ತುನೆ ಇವ್ಣಿಜೋ಼ಡ್ಮ ಜೈ಼ನ್ ಖಾಣುಬಿ ಖಾದೊ ಕರಿ ಬೋಲ್ಯು. 4 ಇನಖ್ಹಾಜೆ ಪೇತ್ರನೆ ಹಿಜ್ಜಾ಼ ಶಾತ್ ಚಾ಼ಲ್ಯುಕಿ ಯೊ ಅಖ್ಖು ಬೋಲ್ತೊಹುಯಿನ್; 5 ಪೇತ್ರನೆ ಇವ್ಣುನ, ಮೆ ಯೊಪ್ಪ ಖ್ಹಯೇರ್‌ಮ ಪ್ರಾರ್ಥನೆ ಕರಾನಿ ವಖ್ಹ್‌ತೆ “ಮನ ಏಕ್‌ ದರ್ಶನ್ ದೆಖಾಯು. ಯೋ ಶಾತ್‌ಕತೊ ಆಕಾಶ್‍ಥು ಚಾರ್ ಕೋಣಾನ ಶಿಂದ್ರೂ ಭಂದೈನ್ ಉತ್ರಿ ವಳ್ಯಾವ್ತು ಥೂತೆ ಝೋ಼ಳಿನಿತರಾನು ಏಕ್‌ ಜಿನಖ್ಹ್‌, ಮಾರಕನಾಸ್ ಉತ್ರಿ ಆಯು. 6 ಮೆ ಇನಾಮಹಿ ದೇಖ್ಯೊ ಇನಾಮ ಧರ್ತಿನು ಜಾನ್ವರ್‌ ಅಜು಼ ಅಖ್ಖು ಛಂಡಾಳಿ ಜಾನ್ವರ್‌, ಖ್ಹವಳ್ತು ಚಾ಼ಲಾನು ಕೀಡ್‌ಕಮ್ಟು ಅಖ್ಖು ಆಬ್‌ಪರ್ ಉಡಂತು ಜಿನಾವರ್ ಖ್ಹಾರು ಹಿಜ಼್ಜಥೂ. 7 ತದೆ ‘ಪೇತ್ರ, ಉಠಿನ್, ವ್ಹಾಡಿ ಖಾ’ ಕರಿ ಬೋಲಾನೊ ಏಕ್‌ ಆವಾಜ಼್ ಮನ ಠವ್‌ಕೊ ಖ್ಹಮ್‍ಜ್ಯೊ. 8 ತದೆ ಮೆ, ‘ಮೆ ಇಮ್‌ಕರಾನ ಕೊಹುವಾನಿ ಪ್ರಭು’ ಕಚಿಂಡ್‌ ರಾಛು಼ ರ‍್ಹವೊ ಅಜು಼ ಅಶುದ್ದ ಹುಯುತೆ ಚೀಜ಼್‌ನ ಮೆ ಕದೇಬಿ ಖಾದೊಕೊಯ್ನಿ” ಕರಿ ಬೋಲ್ಯೊ. 9 ಇನಖ್ಹಾಜೆ, ಆ ಅಖ್ಖಾನ ದೇವ್ನೆ ಪಾಕ್‌ ಕರಿರಾಖ್ಯೊತೆ ಅನಅಖ್ಖು ಮೈಲುಕರಿ ನಾಬೋಲ್ನು ಕರಿ ಬೇನೆಹಲ್ಲಬಿ ಆಬ್‌ಮಾಥು ಠವ್‌ಕೊ ಬೋಲಾಯು. 10 ಅಮ್ಮಸ್ ತೀನ್‌ಹಲ್ಲ ಹುಯು. ಇನಪಾರ್ ಯೊ ಅಖ್ಖು ಜಿನಖ್ಹ್‌ ಸೊರ್ಗಾಮ ಪಡೈಲೆವೈಗು. 11 ಯೋಸ್ ವೇಳ್ಮ ಮೇ ಥೋತೆ ಘರ್‌ನ ಖ್ಹಾಮ್ಣೆ ತೀನ್‍ಜ಼ಣ ಆಯಾ ಯೊ ತೀನ್‍ಜ಼ಣಾನ ಕೈಸರೈ ಖ್ಹಯೇರ್‌ಥು ಮಾರಕನ ಮೋಕ್‍ಲೈರ‍್ಹಾಥ. 12 ಪವಿತ್ರಾತ್ಮನೆ ಮನ ಬೋಲ್ಯೊ ಗುಮಾನಿ ನಾಕರ‍್ನುತೆ ಇವ್ಣಿ ಜೋ಼ಡ್ಮ ಜಾ಼ ಕರಿ ಬೋಲ್ಯೊ. ಆ ಛೋ಼ ಜ಼ಣ ಭೈಯೇ ಮಾರಿಜೋ಼ಡ್ಮ ಆಯಾ ಹಮೆ ಕೊರ್ನೆಲ್ಯನ ಘರೆಗಯ. 13 ತದೆ ಇನೆ ದೇವ್‌ನೊ ದೂತ ಮಾರ ಘರ್‌ಮ ಭಿಯೊಥೋತೆ ಇನ ಬಾರೇಮ ಮನ ಬೋಲ್ಯೊ. ಯೊ ದೇವ್‌ನೊ ದೂತನೆ ಕೊರ್ನೆಲ್ಯನ, ತೂ ಥೋಡ ಜ಼ಣಾನ ಯೊಪ್ಪನ ಮೋಕ್ಲಿನ್ ಪೇತ್ರಕರಿ ಬೋಲೈಲ್ಯವಾಳೊ ಸೀಮೋನನ ಬುಲೈಲೆ. 14 ಯೊ ತುಮಾರಿ ಜೋ಼ಡ್ಮ ಉಪದೇಶ್ ಬೋಲ್‌ಶೆ ಯೊ ಬೋಲ್‍ಶೇತೆ ಬೋಧನೆಥಿ ತುನಾಬಿ ತಾರ ಪರಿವಾರ್ನಾಬಿ ರಕ್ಷಣೆಮಳ್‌ಶೆ ಕರಿ ಬೋಲ್ಯೊ. 15 ‘ಮೇ ಮಾರಿ ಉಪದೇಶ್‍ನ ಶುರುಕರ‍್ಯೊ ತದೆ, ಶುರೂಮ ಪವಿತ್ರಾತ್ಮ ಉತ್ರಿನ್‌ ಆಯು. ಇಮ್ಮಸ್ ಇವ್ಣ ಉಪ್ಪರ್‌ಬಿ ಆಯೊ. 16 ತದೆ ಮೆ ಪ್ರಭುನಿ ವಾತೆನ ಖ್ಹಯಾಲ್‍ಕರಿಲಿದೊ; ಇನೆ ‘ಯೋಹಾನನೆ ಅದ್ಮಿವ್‌ನ ಪಾಣಿಥಿ ಬ್ಯಾಪ್ತಿಸ್ಮ ಕರಾಯೊ ಕತೋಬಿ ತುಮೆ ಪವಿತ್ರಾತ್ಮಥಿಬಿ ಬ್ಯಾಪ್ತಿಸ್ಮ ಕರೈಲಿಶು’ ಕರಿ ಬೋಲಿರಾಖ್ಯೊಥೊ. 17 ಪ್ರಭು ಯೇಸುಕ್ರಿಸ್ತಮ ವಿಶ್ವಾಸ್‌ರಾಖ್ಯಾತೆ ಆಪ್ಣುನ ದಿದೋತೆ ವರನಾಸ್ ದೇವ್ನೆ ಆ ಅದ್ಮಿವೋನಾಬಿ ದಿದೊ. ಅಮ್‍ರ‍್ಹವಾನಾಪರ್ ಮೆ ದೇವ್ನ ಕಾಮ್ನ ಭೀರಾಖಾನ ಮೇ ಕೋಣ್? ಕರಿ ಬೋಲ್ಯೊ. 18 ಆ ವಾತೆನ ಇವ್ಣೆ ಖ್ಹಮ್‌ಜಿನ್‌ ಝಿಟ್ಕಾರ್‌ ಕರಾನು ಮ್ಹೆಂದಿನ್; ಇಮ್‍ಕತೊ ದೇವ್ ಯೆಹೂದ್ಯರ್‌ಕಾಹೆತೆ ಇವ್ಣುನಾಬಿ ಜಾನ್‍ದೇವ್ಣುಕರಿ ಇವ್ಣ ದಿಲ್ನ ಇನಾಭಣಿ ಫರಾಯೊ ಕರಿ ದೇವ್ನ ಖ್ಹರಾಯು.

19 ಸ್ತೆಫನನ ಮರ್‌ನಾಖ್ಯುತೆ ತದೆ ಹಿಜ್ಜಾ಼ ಹುಯಿತೆ ಖ್ಹತಾಪ್ಣಿಥಿ ಥೋಡುಜ಼ಣು ವಿಶ್ವಾಸಿಖ್ಹಾರು ಛಿದ್ರಯ್‍ಗಯು, ಇವ್ಣೆ ಘಣಾದೂರ್‌ನಿ ಝ಼ಗೊಹುಯಿರಿಥೀತೆ ಫೊಯಿನಿಕೆ, ಸೈಪ್ರಸ್ ಅಜು಼ ಅಂತಿಯೋಕ್ಯನ ಗಯು. ವಿಶ್ವಾಸಿಖ್ಹಾರು ಆ ಝ಼ಗೋಮ ಖಲಿ ಯೆಹೂದ್ಯರ್‌ನ ಸುವಾರ್ತೆನ ಬೋಲ್ಯು. 20 ಆ ವಿಶ್ವಾಸಿಮ ಥೋಡಜ಼ಣು ಸೈಪ್ರಸ್ ಅಜು಼ ಸಿರೇನ್ ಝ಼ಗೊವಾಳ ಹುಯಿರಾಥ. ಆ ಅದ್ಮಿಖ್ಹಾರು ಅಂತಿಯೋಕ್ಯನ ಆಯುತೆ ತದೆ ಇವ್ಣೆ ಪ್ರಭು ಹುಯಿರೋತೆ ಯೇಸುನಿ ಬಾರೇಮ ಸುವಾರ್ತೆನ ಹಿಜ್ಜಾ಼ ಥೋಡ ಗ್ರೀಕ್ ಅದ್ಮಿವೋನ ಬೋಲ್ಯು. 21 ಪ್ರಭುನೊ ಹಾತ್ ಇವ್ಣಪರ್ ಥು,ಅಜು಼ ಅದ್ಮಿಖ್ಹಾರು ಕೈಏಕ್ ಜ಼ಣು ಪ್ರಭುಮ ಭರೋಖ್ಹೊ ಕರ‍್ಯು. 22 ಆ ವಾತೆ ಯೆರೂಸಲೇಮ್ಮಥೂತೆ ಸಬೆನ ಪೋಚ್ಯು. ಇನಖ್ಹಾಜೆ ಬಾರ್ನಬನ ಅಂತಿಯೋಕ್ಯನ ಬೋಲಿ ಮೋಕ್‍ಲ್ಯು. 23 ಬಾರ್ನಬ ಅಂತಿಯೋಕ್ಯನ ಪೋಚಾ಼ನಿವಖ್ಹತೆ ದೇವ್ನ ಅದ್ಮಿವೋನ ವಿಶ್ವಾಸ್ ಭಡಾವ್ತೊ ಹುಯಿನ್ ಪ್ರಭುಮ ಹುಮ್ಮಖ್ಹ್‌ ಕರಾಯೊ. 24 ಬಾರ್ನಬ ಯೋ ಏಕ್‌ ಅಛ್ಛೊ಼ಅದ್ಮಿ ಹುಯಿರೋಥೊ. ಯೊ ಪವಿತ್ರಾತ್ಮಥಿ ಭರಾಯೊಹುಯೊ ಪೂರ ವಿಶ್ವಾಸ್ಮ ಥೊ ಅಜು಼ ಘಣ ಅದ್ಮಿನ ಪ್ರಭುಭಣಿ ಬುಲೈಲಾಯೊ. 25 ಇನಕೇಡೆಥು ಬಾರ್ನಬನೆ ಸೌಲಾನ ಢೂಂಡ್ತೊಹುಯಿನ್ ತಾರ್ಸಸ್‍ ಖ್ಹಯೇರ‍್ನ ಗಯೊ. 26 ಬಾರ್ನಬನೆ ಸೌಲಾನ ಹಿಜ್ಜಾ಼ ದೇಖಿನ್ ಇನ ಅಂತಿಯೋಕ್ಯನ ಬುಲೈಲಿನ್ ಆಯೊ. ಸೌಲಾಬಿ ಅಜು಼ ಬಾರ್ನಬನೆ ಅಂತಿಯೋಕ್ಯಮ ಏಕ್‌ ವರಖ್ಹ್‌ಅಖ್ಖು ಸಬೆನ ಜೋ಼ಡ್ಮಾಸ್ ರ‍್ಹೀನ್ ಕೈಏಕ್ ಜ಼ಣಾನ ಶಿಕಾಡ್ಯ. ಆ ವಿಶ್ವಾಸಿನ ಪಹಿಲಿಬಾರ್ “ಕ್ರೈಸ್ತರ್” ಕರಿ ನಾಮ್ ಆಯುತೆ ಅಂತಿಯೋಕ್ಯಮಾಸ್. 27 ಯೋ ಹಗಾಮ್ಮ ಥೋಡುಜ಼ಣು ಪ್ರವಾದಿಖ್ಹಾರು ಯೆರೂಸಲೇಮ್‍ಥು ಅಂತಿಯೋಕ್ಯನ ಗಯು. 28 ಆ ಪ್ರವಾದಿಖ್ಹಾರಾಮ “ಅಗಬ” ಕರಿ ಏಕ್‍ಜ಼ಣೊ ಥೊ. ಅಗಬನೆ ಅಂತಿಯೋಕ್ಯಮ ಪವಿತ್ರಾತ್ಮನಿ ಖ್ಹಯಾಲ್‌ಥಿ, “ಹಿಡಿ ಜಗತ್‍ನಾಸ್ ಕಾಳ್ದುಕಾಳ್ ಆವ್‌ಶೆ” ಕರಿ ಬೋಲ್ಯೊ. ಯೋ ಕಾಳ್ದುಕಾಳ್‍ನ ಹಗಾಮ್ ಕ್ಲೌದಿಯ ರಾಜ಼ನು ಹಗಾಮ್ಮ ಆಯು. 29 ಯೂದಾಯಮ ರ‍್ಹವಾಳು ಭೈಯೇ ಭೇನೆವೊನ ಮದತ್‌ಕರಾನ ಶಿಷ್ಯರ್‌ನೆ ನಿರ್ಧಾರ್ ಕರ‍್ಯು. ವಿಶ್ವಾಸಿಮ ಹರೇಕ್ ಜ಼ಣುಬಿ ಇವ್ಣೇಥಿ ಕೆತ್ರುಹುಯೂಕಿ ಇವ್ಣುನ ಬೋಲಿ ಮೋಕ್ಲಿನ್ ಖ್ಹಯಾಲ್ ಕರ‍್ಯು. 30 ಇವ್ಣೆ ಪೈಶಾನ ಜ಼ಮಕರೀನ್ ಇನ ಬಾರ್ನಬ ಅಜು಼ ಸೌಲನ ಹಾಥ್ಥಿ ಯುದಾಯಮ ಥೂತೆ ಸಭೆನ ಗಲ್‌ಢಾವ್ನ ಲಯಿನ್ ದಿದಾ.