ಯಾಕೋಬನು ಬರೆದ ಪತ್ರಿಕೆ
ಯಾಕೋಬನೆ ಲೀಖ್ಯೋತೆ ಚಿಟ್ಟಿ
ಮಾಲುಮ್ ಕರಾನು
ಯಾಕೋಬಕರಿ ಬೋಲಾನು ಆ ಚಿಟ್ಟಿ ಯಾಕೋಬಕರಿ ಬೋಲೈಲ್ಯಾವಾಳೊ ಖೆವಾಕಿ ಏಕ್‌ಜ಼ಣಾನ ಲೀಖೈರುಸ್. ಘಣೇಥಿ ಯೋ ಯೇಸುನ ಭೈ ಯಾಕೋಬ ಹುಯಿರೇಣು. ಯೊ ಸಬೇನೊ ಘಲ್ಡೊ ಹುಯಿರೋಥೊ ಅಜು಼ ಯೋ ಯೆರೂಸಲೇಮ್‌ನ ಸಬೆಮ ಭಾಗ್‌ಲೀರಾಖವಾಳೊ ಹುಯಿರೋಥೊ. ಅಪೊ 15:13 ಅಪೊಸ್ತಲ ಪೌಲಾಬಿ ಗಲಾತ್ಯವಾಳಾನಿ ಚಿಟ್ಟಿ 2:9 ಮ ಆ ಏಕ್‌ ಸಬೇನೊ ಖಮ್‌ಕರಿ ಬೊಲೈಲೇಸ್. ಲೀಖಾಪಟ್‍ವಾಳೊ ಯಾಕೋಬನೆ ಲೀಖ್ಯೋತೆ ಆ ಚಿಟ್ಟಿ ಕ್ರಿಸ್ತನಿ ಪೈದಾಖ್ಹ್‌ನ ವಾರ್ ಘಣೇಥಿ ಘಣು 50 ವರಖ್ಹ್‌ಮ ಲೀಖೈರುಸ್ಕರಿ ವಿಶ್ವಾಸ್‍ಕರಸ್. ಯಾಕೋಬ ಯೇರೂಸಲೇಮ್ಮ ಸಬೇನೊ ಏಕ್‌ ಘಲ್ಡೊಹುಯಿರೊಥೊ. ಯೋ ಹಿಜ್ಜಾ಼ ಜಿವ್ಣುಕರುಕರ ತದೆ ಆ ಚಿಟ್ಟಿನ ಲೀಖಿರಾಖ್ಯೊಉಷೆ. ಯಾಕೋಬನೆ ಆ ಚಿಟ್ಟಿನ ಅಲಕ್ ಅಲಕ್ ದೇಖ್ಹ್‌ಮ ಛಿದ್‍ರೈಗಯುತೆ ಭಾರ ಖೂಮ್‍ವಾಳನ ಖ್ಹಣೇದ್ ಕರಿನ್ ಲೀಖಿರಾಖ್ಯೊಸ್. 1:1 ಯಾಕೋಬನಿ ಚಿಟ್ಟೀಮ ಛಾ಼ತೆ ಅಖ್ಖು ಕವಿಖ್ಹಾರು ಅಖ್ಖಾ ಕ್ರೈಸ್ತನಿ ಬಾರೇಮಸ್ ಕತೋಬಿ 12 ಖೂಮ್‌ಕರಿ ಬೋಲಾನು ಉಪಯೋಗ್ ಯಾಕೋಬನೆ ಯೆಹೂದಿ ವಿಶ್ವಾಸಿಯೋನ ಲೀಖಿರಾಖ್ಯೊಸ್ ಕರಿ ವತಾಳಿದೇಸ್. ಶನಕತೊ ಆ ಪುಸ್ತಕ ಘಣೇಥಿ ಘಣು ಪಢಾವಾಳಾನ ಛಿಮಾವಾನಿಮತ್ ಹುಯಿರುಸ್. ಅನಾಮ ಕೈಏಕ್ ವಿಚಾರ್ ಛಾ಼. ಯಾಕೋಬನೆ ವಿಶ್ವಾಸ್ ಅಜು಼ ಕಾಮ್ನಿ ಬೀಚ್ನಿ ಸಂಬಂದ್‌ನಿ ಬಾರೇಮ ಘಣಿ ನಜ಼ರ್ ಕರಸ್. ಖ್ಹಾಚಿ ವಿಶ್ವಾಸ್ ಕಾಮ್‍ಥಿ ವತಾಳೈಲೇಸ್.2:17 ಯೋ ಶೌಕಾರಿ ಅದ್ಮಿಖ್ಹಾರು ಅಛ್ಛಿ ಗುಣ್ಣಾ ವತಾಳಿಲ್ಯಾವಾನಿ ಪರಕ್ಮ ಹೊಷಾರಿ ಕರಸ್. 2:1-4 ಅಜು಼ ಅಪ್ಣೆ ವಾತೆಬೋಲಿಲಿಯೆಸ್ತೆ ಇನ ಹೊಷಾರಿಥಿ ರ‍್ಹೇಣು ಕರಿ ಅಪ್ಣುನ ಬೋಲಿ ವತಾಳಸ್‍. 3:1-12
ಕಾಡಿದೇಖೊ
1. ಯಾಕೋಬ ಪಢವಾಳಾನ ಖ್ಹಲಾಮ್‍ಕರಸ್. 1:1
2. ಇನಕೇಡೆಥು ಯೋ ತಕಲೀಬ್ ಆಯೂತೆ ಖ್ಹಮಾಳಿಲ್ಯವಾನ ಕ್ರಿಸ್ತನ ವಿಶ್ವಾಸಿಯೋನ ಹುಮ್ಮಖ್ಹ್‌ಕರಸ್.1:2-27
3. ಇನ ಬಾದ್‌ಮ ಕಾಮ್‍ಥಿ ವಿಶ್ವಾಸ್ ವತಾಳನು ಕೆತ್ರು ಜ಼ರೂರತ್‌ಕರಿ ಬೋಲಸ್.2:1-26
4. ಇನಕೇಡೆಥು ವಾತೆಖ್ಹಾರಿ ಕೆತ್ರೆ ತಾಖತ್ನಿ ಹುಯಿರೀಸ್ ಕರಿ ವತಾಳಸ್‍. 3:1-12
5. ತದೆ ಯಾಕೋಬ ಜಗತ್‌ನು ಅಕ್ಕಲ್ ದೇವ್ನಿ ಗ್ಯಾನ್‌ಥಿ ಕೆತ್ರೆ ಪರಕ್‌ಪಡಸ್ ಕರಿ ಛೋ಼ಡಿ ವತಾಳಸ್‍. 3:13—4:10
6. ಇನಕೇಡೆಥು ಇನೆ ಬಡಯ್ ಮಾರಿಲ್ಯಾವಳಾನಿ ವಿರೋದ್ ಪಢವಾಳಾನ ಹೊಷಾರಿ ರ‍್ಹವಾನ ಬೋಲಸ್. 4:1—5:6
7. ಯಾಕೋಬನೆ 5:7-20 ವಚನ್‌ಮ ಥೋಡು ಮಾಮೂಲಿ ಸಮಾಚಾರ‍್ನ ಬೋಲ್ತೊಹುಯಿನ್ ಚಿಟ್ಟಿನ ಖ್ಹತಮ್‌ಕರಸ್.
1
1 ದೇವ್‍ನಾಬಿ ಪ್ರಭುಹುಯಿರೋತೆ ಯೇಸು ಕ್ರಿಸ್ತನಾಬಿ ದಾಸ ಹುಯಿರೋತೆ ಯಾಕೋಬ ಅಲಕ್ ದೇಖ್ಹ್‌ಮ ಛಿಡ್‍ಕೈರ‍್ಹುತೆ ಭಾರ ಖೂಮ್‍ವಾಳನ ಲಿಖಾನು ಶಾತ್‍ಕತೊ, ತುಮೂನ ಅಛ್ಛು಼ ಹುವಾದೆ.
ವಿಶ್ವಾಸ್ ಅಜು಼ ಗ್ಯಾನ್
2 ಮಾರ ಭೈಯೇ ಭೇನೆವೊ, ತುಮೆ ಥರಥರಾನು ವದೇಖ್ಹ್‌ ಝೇಲಾನಿ ವಖ್ಹ್‌ತೆ ಇನ ತುಮೆ ಹೈರುತೆ ಖಲಿ ಖ್ಹುಶಿಕರಿ ಬೋಲಿನ್ ಖ್ಹಮಾಳಿಲೇವೊ. 3 ಶನಖ್ಹಾಜೆಕತೊ ಯೊ ಖ್ಹತಾಪ್ಣಿ ತುಮಾರಿ ವಿಶ್ವಾಸ್‌ನ ತರೀಪ್‌ಶ ಕರಾನಖ್ಹಾಜೆ ಐರ‍್ಹೂಸ್. ಯೊ ತುಮುನ ಸಮಾಧಾನ್ ಮಳಾನಿತರ ಕರ್ಶೆ. 4 ಯೋ ಖ್ಹಮಾಳಾನು ತುಮಾರಮ ಭರ್‌ಪೂರ್‌ ಹುವಾದೆ. ತದೆತುಮೆ ಮೈಲಾ ಕಾಹೆತೇಬಿ, ಖ್ಹಾರಿ ಅಛ್ಛಿಗುಣ್‍ಮ ಪೂರಾಬಿ, ಅಜು಼ ಶನಾಮಬಿ ಕಮ್ ನಾರ‍್ಹವಾಳು ಹುಯಿರ‍್ಹಿಶು. 5 ಕತೋಬಿ ತುಮಾರಮ ಕಿನಾತೋಬಿ ಗ್ಯಾನ್‍ಕಮ್ ರ‍್ಹಯೂತೊ ಯೋ ದೇವ್ನ ಗಿಂಗೈಲ್ಯವಾದೆ, ದೇವ್ ಚಿಂಘಾವ್‍ಶೆಕೊಂತೆ ಖ್ಹಾರಸ್ನ ದಿಲ್‌ ಛೋ಼ಡಿನ್ ದಿಶೆ. 6 ಕತೋಬಿ ದೇವ್‌ಕನ ಬೋಲಿಲ್ಯಾವಾಳೊ ಜ಼ರಾಬಿ ಗುಮಾನಿ ನಾ ಕರ್ನುತೆ ವಿಶ್ವಾಸ್‍ಥಿ ಬೋಲಿಲ್ಯಾವಾದೆ. ಶನಕತೊ ಶಕ್ ಕರಾವಾಳು ವಹಿರಾಮ ಮಾರ್‌ಖೈಜಾಯಿತೆ ದರ‍್ಯಾವ್‍ನ ಝೋ಼ಕಾಳ್ಯಾನಿತರ ವನ್‍ವನ್‍ತೊಫಂಡ್‍ಶೆ. 7 ಎಥ್ರಾನವಾಳೊ ಯೋ ಪ್ರಭುಥಿ ಗಿಂಗೈಲಿದೋತೆ ಖ್ಹಾರುಸ್ ಲೀಲಿಶ್ಕರಿ ನಕೊಲಾಝಾ಼ದೆ. 8 ಶನಕತೊ ಯೋ ಬೇ ದಿಲ್‌ವಾಳೊ, ಇನ ಚಾ಼ಲ್‌ಮ ಚ಼ಲ್‍ಪ್ಲಾಟಿನೊ ಹುಯಿರ್ಹೊಸ್.
ಗರೀಬ್ ಅಜು಼ ದೌಲತಿ
9 ಕ್ರಿಸ್ತಮ ಖರಾಬ್ ಹಾಲತ್ಮರ‍್ಹವಾಳೊ ಭೈಯೇ,ಭೇನೆವೊ ಯೋ ಅಛ್ಛಿಹಾಲತ್‍ಮ ಆಯೋಕರಿ ಖುಷಿಕರಾದೆ. 10 ಕ್ರಿಸ್ತಮ ಶೌಕಾರ್ ಹುಯಿರೋತೆ ಭೈಯೇ,ಭೇನೆವೊ ಯೋ ಗರೀಬ್‍ಹಾಲತ್‍ಮ ಆಯೋಕರಿ ಖ್ಹುಶಿಕರಾದೆ. ಕತೋಬಿ ಶೌಕಾರ್ ಘಾಖ್ಹ್‌ನಿ ಫೂಲ್‍ನಿತರ ಮಟಿಜಾ಼ಶೆ. 11 ಶನಕತೊ ಚಾ಼ಂದ್ ನಿಕ್‍ಳ್ಯುತೆ ತದೆ ಇನ ಅಂಚ಼್‌ಥಿ ಘಾಖ್ಹ್‌ ಕರ್‌ಮರೈನ್ ಯೋ ಘಾಖ್ಹ್‌ನು ಫೂಲ್ ಲಡ್ಕಿಪಡೀನ್, ಇನು ಶನ್‌ಗಾರ್ ನಾಶ್ ಹುಯಿಜಾ಼ಸ್‍. ಇಮ್ಮಸ್ ಶೌಕಾರ್ ಇನಿ ಕೋಶಿಶ್‍ಥಿ ಹೇಟ್ ಪಡಿಜಾ಼ಸ್‌.
ತರೀಪ್ಷ ಅಜು಼ ವದೇಖ್ಹ್‌
12 ಕೋಣ್ ತರೀಪ್ಷನ ಖ್ಹಮಾಳಿಲೇಸ್ಕಿ ಯೋ ಧನ್ಯ. ಯೋ ಇನಿ ಶೋದನೆನ ಜುತಿಲಿದೊತೊ ಪ್ರಭು ಇನ ಪ್ಯಾರ್‌ಕರಾವಾಳನ ವಾಗ್ದಾನ್ ಕರ‍್ಯೊತೆ, ಜಾನ್ನು ಕಿರೀಟ್‍ನ ಲೀಲಿಶೆ. 13 ಕೋಣ್‌ತೋಬಿ ಶೋದನೆಮ ಪಡಾನಿ ಖ್ಹಯಾಲ್‍ಹುಯುತೊ ಆ ಖ್ಹಯಾಲ್ ಮನ ದೇವ್‍ಥಿ ಆಯುಕರಿ ನಾ ಬೋಲ್‌ನು. ಶನಕತೊ ದೇವ್ ಖರಾಬ್‍ಕರಾನ ಹುಮ್ಮಖ್ಹ್ ಕೊದೇಯ್ನಿ. ಯೋ ಕಿನಾಬಿ ಶೋದನೆ ಕರಾಬಿಕೊಯ್ನಿ. 14 ಕತೋಬಿ ಹರೇಕ್‍ಜ಼ಣುಬಿ ಇನಿ ಶೊಂತ್ ನಿಕ್‍ಳ್ಯಜಾನ್‍ಮ ಪಡೀನ್ ಶೋದನೆ ಲೀಲೆಸ್. 15 ಇನಪಾರ್ ನಿಕ್‍ಳ್ಯಜಾನ್ ಬೇಜೂನುಹುಯಿನ್ ಪಾಪ್ನ ಜ಼ಣಸ್. ಪಾಪ್ ಪೂರಹುಯಿನ್ ಭಡೀನ್ ಇನಪಾರ್ ಮರಣ್‍ಲ್ಯವಾಸ್.
16 ಮಾರ ಪ್ಯಾರ್‌ನ ಭೈಯೇ ಬೇನೆವೋ, ಆ ವಿಚಾರ‍್ನಿ ಬಾರೇಮ ಧೋಕ ನಕೊ ಖಾವೊ. 17 ಖ್ಹಾರೂಸ್ ಅಛ಼್ಛು ತೋಫಬಿ, ಪೂರಹುಯುತೆ ಖ್ಹಾರೂಸ್ ವರಾಬಿ ಉಪ್ಪರ್‌ಥು ಆಯು ಹುಯುಸ್, ಯೋಖ್ಹಾರು ಪರಲೋಕನೊ ಉಜಾ಼ಳನೊ ಬಾಥೀಸ್ ಉತ್ರಿಆವಸ್. ದೇವ್ ಛಾ಼ಳನಿತರ ಬದ್ಲಿಜಾವಾಳೊಬಿ ಕಾಹೆ, ಚ಼ಲ್‍ಪ್ಲಾಟಿನೊ ಖ್ಹಾಯಲ್‍ನೋಬಿ ಕಾಹೆ. 18 ದೇವ್ ಇನಿ ಅಛ್ಛಿ ಖ್ಹೂಜ಼್‌ನಿ ಪರಕ್ಮ ಖ್ಹಾಚಿವಚನ್‍ಥಿ ಅಪ್ಣುನ ಜಾನ್‍ದೀರಾಖ್ಯೊತೆ ಇನಖ್ಹಾಜೆ ಅಪ್ಣೆ ಇನಿ ಖ್ಹಾರಿಸ್ ಉಬ್‌ಜಾ಼ವ್ಣಿಮ ಫಹಿಲಫಲ್‍ ಹುಯಿರ‍್ಹಾಸ್.
ವಚನ್ನಿತರ ಖ್ಹಮ್‍ಜಾ಼ನು ಅಜು಼ ಕರಾನು
19 ಮಾರ ಪ್ಯಾರ್‌ನ ಭೈಯೇ ಭೇನೆವೊ ತುಮೆ ಅನ ಅಛ್ಛಿನಿತರ ಮಾಲುಮ್ ಕರ‍್ಲೆವೊ, ಹರೇಕ್‍ಜ಼ಣುಬಿ ಖ್ಹಮ್‍ಜಾ಼ಮ ಚಾ಼ತುರ್‌ರ‍್ಹೀನ್, ವಾತ್‍ಬೋಲಾಮ ಅಜು಼ ಇರಾದೊ ಕರಾಮ ಖ್ಹಮಾಳಿರ‍್ಹೆವೊ. 20 ಶನಕತೊ ಅದ್ಮಿನೊ ಇರಾದೊ ದೇವ್ ಆಖ್ಹ್‌ಕರಸ್ತೆ ನೀತಿನು ಕಾಮ್‌ಖ್ಹಾರು ಕರಾನ ಹೋಯಿಕೊಯ್ನಿ. 21 ಇನಾಖ್ಹಾಜೆ ಖ್ಹಾರೂಸ್ ಗಲೀಜ಼್ಕಾಮ್ನಾಬಿ ಅಖ್ಖು ಖರಾಬ್ ಫನೈನಾಬಿ ಕಾಡಿನಾಖಿನ್ ತುಮಾರಮ ಜ಼ಡ್‍ಗಾಠಿರಾಖ್ಯುತೆ ವಚನ್ನ ಮುಡ್‌ಕ್ಯು ಝು಼ಕೈನ್‌ ಸ್ವಿಕಾರ್‌ಕರೊ. ಯೋ ತುಮಾರ ಆತ್ಮನ ರಕ್ಷಣೆಕರಾನ ಶಕತ್‌ವಾಳು ಹುಯಿರ‍್ಹಿಶೆ. 22 ತುಮೆ ವಚನ್ನಿ ಪರಕ್‍ ಚಾ಼ಲಿಲ್ಯಾವಾಳ ಹುಯಿ‍ರ‍್ಹೆವೊ. ಇನ ಖಲಿ ಖ್ಹಮ್‍ಜಾ಼ವಾಳ ಹುಯಿರ‍್ಹಿನ್ ತುಮಾರು ತುಮೇಸ್ ಧೋಕ ಕರಿಲೇವೊನಕೊ. 23 ಶನಕತೊ ಕೋಣ್‌ತೋಬಿ ವಚನ್ ಖ್ಹಮ್‌ಜಾ಼ವಾಳು ಹುಯಿರ‍್ಹಿನ್ ಇನಿಪರಕ್ ಚಾ಼ಲ್ಯುನಾತೊ ಯೋ ಐನಾಮ ಇನು ಪೈದಾಖ್ಹ್‌ನು ಮ್ಹೋಡು ದೇಖಾವಾಳ ಅದ್ಮಿನಿತರ ಹುಯಿರ‍್ಹಿಶೆ. 24 ಶನಕತೊ ಆ, ಇನ ದೇಖಿಲಿನ್ ಜೈ಼ನ್ ಮೇ ಅಮ್ ಛೂ಼ಕರಿ ಬೋಲಾನು ಯೋಸ್‍ ಘಡೀಮ ಬೈಕಿಜಾ಼ಸ್. 25 ಕತೋಬಿ ಛುಟ್ಕಾರ್ ದ್ಯಾವಾಳು ಅಖ್ಖುಪೂರ ಹುಯಿರ‍್ಹುತೆ, ಧರ್ಮಶಾಸ್ತ್ರನ ದಿಮಾಕ್‍ಲಗಾಡಿ ಫಡೀನ್ ಬಿಜೂ಼ಬಿ ಖ್ಹಯಾಲ್ ಕರಿನ್ ಇನಿನಿತರ ಚಾ಼ಲವಾಳೊ ವಚನ್ನ ಖ್ಹಮ್‌ಜಿನ್‌ ಭೈಕಿ ನಾ ಜಾ಼ವ್ಣುತೆ ಯೋ ಪರಕ್ಮ ಇನ ಕಾಮ್‍ಥಿ ಧನ್ಯಹುಯಿರ‍್ಹಿಶೆ. 26 ತುಮಾರಮ ಮೆ ಅಛ್ಛೊ಼ಭಕ್ತಕರಿ ಬೋಲಿಲ್ಯಾವಾಳೊ ಕೋಣ್‌ತೋಬಿ ಇನಿ ಜೀಬ್‌ನ ಲಗಾಮ್‌ ನಾ ಘಾಲಿನ್ ಇನ ದಿಲ್ನ ಧೋಕ ಕರವಾಳೊರ‍್ಹಿಯೋತೊ ಇನಿ ಭಕ್ತಿ ಬಿಣ್‌ಫಾಯಿದಾನು ಹುಯಿರ್ಹೊಸ್. 27 ವದೇಖ್ಹ್‌ಮ ಪಡ್ಯುರ‍್ಹಿನ್ ದಿಕ್‍ಕೊಂತೆ ಇವ್ಣುನಾಬಿ ಮುಂಡಚ್ಚಿಯೇನಾಬಿ ಬಚಾ಼ಡಿನ್ ಇನ ಜಗತ್‌ನು ದೋಷ್‍ ನಾಲಗ್ನುತೆ ಇನುಯೋಸ್ ಬಚಾ಼ಡಿಲ್ಯಾವನುಸ್ ಬಾ ಹುಯಿರೋತೆ ದೇವ್‌ಕನ ಶುದ್ಧಬಿ ಪಾಕ್‍ಬಿ ಹುಯಿರ‍್ಹವಾನಿ ಭಕ್ತಿ.