13
ಮೋಟಿ ಮಂದಿರ್‌ನ ಫೋಡಿನಾಕ್‌ಶೆತೆ ಇನಿ ಬಾರೇಮ ಯೇಸುನೆ ಬೋಲ್ಯೋತೆ
(ಮತ್ತಾಯ 24:1-2; ಲೂಕ 21:5-6)
1 ಮಂದಿರ್‌ನ ಮ್ಹೆಂದಿನ್ ಜಾ಼ವಾನಿ ವಖ್ಹತ್‌ಮ, ಇನ ಶಿಷ್ಯರ್‌ಮ ಏಕ್‌ ಜ಼ಣಾನೆ ಇನ, “ಗುರು, ಹಂದೇಕ್‌ ಕಿಮ್ನ ಬಂಡಾ! ಆ ಮಂದಿರ್‌ನ ಕಿಮ್ ಬಣೈರಾಖ್ಯೂಸ್ತೆ!” ಕರಿ ಬೋಲ್ಯು.
2 ತದೆ ಯೇಸುನೆ, “ಆ ಕೆತ್ರೆ ಮೋಟುಘರ್ ಬಣೈರಾಖ್ಯೂಸ್‌ ಕರಿ ತೂ ದೇಖುಕರಾಸ್‌ ಕೊಯ್ನಿಕಿ ಶು? ಹಜ್ಜಾ಼ ಏಕ್‌ ಬಂಡಾಪರ್ ಬಿಜೇಕ್ ಬಂಡೊ ಭೀರಿಶೆ ಕೊಯ್ನಿ; ಅಖ್ಖಾಸ್ನ ರಡ್‌ಕೈನಾಖಿದಿಶೆ” ಕರಿ ಬೋಲ್ಯೊ.
ಖ್ಹತಾಪ್ಣಿ ಅಜು಼ ವದೇಖ್ಹ್
(ಮತ್ತಾಯ 24:3-14; ಲೂಕ 21:7-19)
3 ಬಾದ್‌ಮ ಯೇಸು ಆಲಿವ್ ಪಹಾಡ್‌ಪರ್*13:3 ಆಲಿವ್ ಕರಿ ಪಂಡಾ ಮ್ಹೇಲಾನು ಝಾ಼ಡ ಆ ಪಹಾಡ್‌ಪರ್ ಥು. ಆ ಆಲಿವ್‌ನ ಪಂಡಾನ ಪೀಂಜಿನ್ ತೇಲ್ ಕಾಡಸ್‌. ಆ ತೇಲ್ ಖಾಣು ಕರಾನ, ದೀವೊ ಲಗಾಡನ, ಓಖ್ಹಡ್‌ ಕರಾನ ಅಜು಼ ರಂಗ್-ರೂಪ್ ಭಡಾವಾನಟೇಕೆ ಉಪ್‌ಯೋಗ್‌ಕರಾಸ್ ದೇವ್ನಿ ಮೋಟಿ ಮಂದಿರ್‌ ಭಣಿ ಮ್ಹೋಡು ಕರೀನ್ ಬೆಠೋಥೊ. ತದೆ ಪೇತ್ರ, ಯಾಕೋಬ್, ಯೋಹಾನ ಅಜು಼ ಅಂದ್ರೆಯ ಯೇಸು ಎಕ್ಲೊ ರ‍್ಹವಾನಿ ವಖ್ಹತ್‌ಮ ಇನಾಕನ ಆಯ. 4 ತದೆ ಇವ್ಣೆ ಇನ, “ಆ ಖ್ಹಾರು ಕದೆ ಉಶೆ? ಆ ಖ್ಹಾರು ಹುವಾನ ವಖ್ಹತ್ ಐಗಿ ಕರಿ ಮಾಲುಮ್ ಪಡಾನಟೇಕೆ ಶಾತ್ ಚಾ಼ಲ್‌ಷೆ, ಕರಿ ಹಮೂನ ಬೋಲ್” ಕರಿ ಪುಛಾ಼ಯ.
5 ತದೆ ಯೇಸುನೆ ಇವ್ಣುನ, “ಹೊಷಾರ್‌ಥಿ ರ‍್ಹವೊ, ಅಜು಼ ತುಮೂನ ಕೋಣ್‌ಬಿ ಠಗಾವ್ಣುನಾತೆ ಇಮ್‌ ದೇಖಿಲೇವೊ. 6 ಕೈಯೆಕ್ಕಿ ಜ಼ಣು ಆಯಿನ್ ಮಾರು ನಾಮ್ ಬೋಲಿಲಿನ್, ‘ಮೇ ಕ್ರಿಸ್ತ, ಮೇ ಕ್ರಿಸ್ತ’ ಕರಿ ಘಣ ಅದ್ಮಿನ ಧೋಕ ಕರ್ಶೆ. 7 ಅತ್ರೇಸ್ ಕಾಹೆತೆ ತುಮೆ, ಖನ್ನೆ ಜಂಗ್ ಭೀಡುಕರಾತೆ ಅವಾಜ಼್ ಅಜು಼ ದೂರ್ ಜಂಗ್ ಭೀಡುಕರಾತೆ ಖಬರ್‌ನ ಖ್ಹಮ್‌ಜ್ಯಾತೊ ಘಬ್ರಾವೊ ನಕೊ. ಅಮ್ನು ಖ್ಹಾರು ಚಾ಼ಲ್ನುಸ್ ಚಾ಼ಲ್ನು. ಕತೋಬಿ ಅನಿ ಮತ್‌ಲಬ್ ಜಗತ್‌ ಖತಮ್ ಹುಯಿಜಾ಼ವಾನ ಆಯುಕರಿ ಕಾಹೆ. 8 ದೇಖ್ಹ್‌ಥಿ ದೇಖ್ಹ್‌ ಲಡೈ ಪಡ್‌ಶೆ; ಏಕ್‌ ರಾಜ್ಯಪರ್ ಬಿಜೇಕ್ ರಾಜ್ಯ ಲಡೈನ ಉಟ್‌ಶೆ. ಖ್ಹಾರಿ ತರಬ್‌ ಜ಼ಮೀನ್ ಹಲ್‌ಶೆ, ಅಜು಼ ಕಾಳ್ದುಕಾಳ್ ಉಶೆ. ಆ ಖ್ಹಾರು ಲಡ್ಕು ಪೈದಾ ಹುವಾನಿ ವಖ್ಹತ್‌ಮ ಆವಾತೆ ಪಹಿಲಿ ಅಜಾ಼ನಿಘೋಣಿ ಹುಯಿರ‍್ಹುಸ್‍.
9 ಕತೋಬಿ ತುಮೆ ತುಮಾರಿ ಬಾರೇಮ ಹೊಷಾರ್‌ಥಿ ದೇಖಿಲೆವ್ಣು. ತುಮೂನ ಧರೀನ್ ನ್ಯಾವ್ ಕರಾನಿ ಸಭೆಮ ಖೇಚಿಲಿಜಾ಼ಶೆ. ತುಮುನ ಸಬೆ ಭರಾವಾನು ಮಂದಿರ್‌ಮ ಮಾರ್‌ಶೆ; ಮಾರಖ್ಹಾಜೆ ತುಮೆ ರಾಜ಼್‌ಭಾರ್‌ ದೇಖಿಲೆವಾಳಾನ ಖ್ಹಾಮ್ಣೆಬಿ ಅಜು಼ ರಾಜಾ಼ನ ಖ್ಹಾಮ್ಣೆ ಸಾಕ್ಷಿಕರಿನ್ ಭೀರಾಕ್‌ಶೆ. 10 ಕತೋಬಿ ಜಗತ್‌ ಖತಮ್ ಹುವಾನ ಅಗಾಡಿ, ತಮಾಮ್‌ ಜ಼ಗ್‌ಜಾ಼ತ್‌ವಾಳನ ದೇವ್ನಿ ಅಛ್ಛಿ ಸಮಾಚಾರ್‌ನ ಬೋಲ್‌ನು. 11 ತುಮುನ ಧರೀನ್ ನ್ಯಾವ್ ಕರಾನಿ ಝ಼ಗೊ ಲೀಗಯೂತೊ, ಶಾತ್ ಬೋಲ್ನುಕರಿ ಪಹಿಲೇಸ್ ಧಡುಕೊ†13:11 ಹೇಬತ್, ನಕೊಘಾಲೊ. ಯೋ ವಖ್ಹತ್‌ಮ ಶಾತ್ ಬೋಲ್ನುಕರಿ ದೇವ್ ಯಾದ್ ದೇಸ್ಕಿ ಯೋಸ್‌ ಬೋಲೊ. ಶನಕತೊ ತುಮೆ ಬೋಲ್‌ಶುತೆ ವಾತೆ ತುಮಾರಿ ಕಾಹೆ; ಪವಿತ್ರಾತ್ಮಾಥಿ ಐತೆ ವಾತೆ ಹುಯಿರ‍್ಹಿಶೆ. 12 ಅತ್ರೇಸ್ ಕಾಹೆತೆ ಏಕ್‌ ಭೈ ಇನ ಶೊಂತ್ ಭೈನ ಮಾರಿನಾಖಾನ ದಿನಾಕ್‌ಶೆ, ಇಮ್ಮಸ್ ಬಾಬಿ ಇನ ಲಡ್ಕಾವ್ನ ಮರಾವ್‌ಶೆ. ಲಡ್ಕಾ ಉಠೀನ್ ಇವ್ಣ ಆಯ-ಬಾನ ಧೋಕೊದೀನ್ ಮರಾವ್‌ಶೆ. 13 ಅಜು಼ ಮಾರ ನಾಮ್ನಟೇಕೆ ಹರೇಕ್ ಅದ್ಮಿ ತುಮುನ ವಹೇರ್‌ ಕರ್ಶೆ. ಕತೋಬಿ ಆಖ್ರಿ ದಮ್‌ತೋಡಿ ಖ್ಹಮಾಳಿಲ್ಯವಾಳು‡13:13 ಆಖ್ರಿ ದಮ್‌ತೋಡಿ ನಂಬವಾಳಾನ ದೇವ್ನಿ ನ್ಯಾವ್‍ನಿ ತೀರ್ಪ್‌ಥಿ ರಕ್ಷಣೆಲೀನ್ ಪರ್‌ಲೋಕ್‌ಮ ಜಾ಼ವಾನ ಲ್ಹಾಯಕ್‌ ಉಶೆ§13:13 ರಕ್ಷಣೆ ಮಳ್‌ಶೆ.
ಮಹಾ ಖ್ಹತಾಪ್ಣಿನಿ ವಖ್ಹತ್
(ಮತ್ತಾಯ 24:15-28; ಲೂಕ 21:20-24)
14 ಅತ್ರೇಸ್ ಕಾಹೆತೆ ‘ಬರ್ಬಾತ್ ಕರಾವಾಳು ಖರಾಬ್ ರಾಛು಼’ ಯೋ ಭೀರೆವ್ಣುನಾತೆ ಝ಼ಗೋಪರ್*13:14 ಮತ್ತಾಯ 24.15 ಭೀರಾವನು ತುಮೆ ದೇಕ್‌ಶು. ಅನ ಪಢವಾಳು, ಅನಿ ಮತ್ಲಬ್‌ನ ಪರ್ಖಿಲ್ಯಾವದೆ. ತದೆ ಯೂದಾಯಮ ರ‍್ಹವಾಳು ಪಹಾಡೋಮ ಮಿಲೈಜಾ಼ಣು. 15 ಕೋಣ್‌ತೋಬಿ ಏಕ್‍ಜ಼ಣೊ ಇನ ಘರ್‌ನ ಛ಼ತ್‍ಪರ್‌ ರ‍್ಹಯೋತೊ, ಯೋ ಹೇಟ್ ಉತ್ರಿನ್ ಶಾತ್‌ತೋಬಿ ಪಾಡಿಲೇಣು ಕರಿ ಘರ್‌ನ ಮಹಿ ಜೈ಼ನ್, ವಖ್ಹತ್ ಬರ್ಬಾತ್ ನಾ ಕರ‍್ನು. 16 ಖೇತರ್‌ಮ ರ‍್ಹವಾಳು ಕೋಣ್‌ತೋಬಿ ಝ಼ಗ್ಗೊ ಪಾಡಿಲೇಣು ಕರಿ ಪಾಛು಼ಫರಿ ಘರೆ ನಾ ಜಾ಼ವ್ಣು. 17 ಕತೋಬಿ ಯೋ ದನೂಮ ಬೇಜೂನಿ ಅಜು಼ ದೂದ್ ಪಿಡಾವವಾಳಿ ತಯೇಡಾವ್ನ ಉಷೇತೆ ವದೇಖ್ಹ್‌ನ ಶಾತ್ ಬೋಲು! 18-19 ಯೋ ದನೂಮ ಘಣು ಲತಾಡ ರ‍್ಹಿಶೆ. ಇನಾಖ್ಹಾಜೆ ಆ ಖ್ಹಾರು ವರ್ಖ್ಹಾತ್ ಅಜು಼ ಠಣ್ಣಾ ದನೂಮ ನಾ ಹೋಣು ಕರಿ ಪ್ರಾರ್ಥನೆ ಕರೊ, ಶನಕತೊ ಇಮ್‌ನೊ ವದೇಖ್ಹೊ ದೇವ್ನೆ ಜಗತ್‌ ಉಬ್‌ಜಾ಼ಯೋತೆ ತಪ್‌ಥು ಧರೀನ್ ಹಮ್ಕೆಲಗು ಕೋ ಹುಯಿರ‍್ಹೂನಿ; ಖ್ಹಾಮ್ಣೇಬಿ ಅಮ್ ಕೋ ಉಶೇನಿ. 20 ಪ್ರಭು ಯೋ ಖ್ಹಾರ ದನ್ನ ಕಮ್ ನಾ ಕರ‍್ಯೋತೊ, ಏಕ್‌ ಅದ್ಮಿಬಿ ಬಚಿಕೊರ‍್ಹಿಷೇನಿ. ಕತೋಬಿ ಇನೆ ಚೂ಼ಣಿಲಿದೊತೆ ಖ್ಹಾರ ಅದ್ಮಿನಖ್ಹಾಜೆ ಯೋ ಖ್ಹಾರ ದನ್ನ ಕಮ್ ಕರಿರಾಖ್ಯೋಸ್.
21 ತದೆ ಕೋಣ್‌ತೋಬಿ ತುಮುನ, “ದೇಖೊ, ಕ್ರಿಸ್ತ ಹಜ್ಜಾ಼ ಛಾ಼! ನಾತೊ ‘ಹಂದೇಖೊ, ಯೋ ಹಿಜ್ಜಾ಼ ಛಾ಼!” ಕರಿ ಬೋಲ್ಯುತೊ ಇನ ನಕೊ ನಂಬ್‌ಶು. 22 ಶನಕತೊ ಝೂ಼ಟುಕ್ರೈಸ್ತರ್‌ ಖ್ಹಾರು ಅಜು಼ ಝೂ಼ಟು ಪ್ರವಾದಿಖ್ಹಾರು ದೆಖೈನ್, ಇವ್ಣೇಥಿ ಹುಯೂತೊ ದೇವ್‍ಥಿ ಚೂ಼ಣೈರ‍್ಹವಾಳನಾಬಿ ಠಗಾವಾನಖ್ಹಾಜೆ ಅದ್ಭುತ್‌ಕಾಮ್‌ ಅಜು಼ ಅಶ್ಚರ್ಯನು ಕಾಮ್‌ಖ್ಹಾರು ಕರಿ ವತಾಳ್‌ಶೆ. 23 ಇನಾಖ್ಹಾಜೆ ತುಮೆ ಹೊಷಾರ್‌ಥಿ ರ‍್ಹವೊ! ಯೋ ಖ್ಹಾರು ಹುವಾನ ಅಗಾಡಿಸ್ ಇನಿ ಬಾರೇಮ ಮೇ ತುಮುನ ಬೋಲಿರಾಖ್ಯೊಸ್.
ಅದ್ಮಿನೊ ಛಿಯ್ಯೊ ಆವಾನಿ ಬಾರೇಮ
(ಮತ್ತಾಯ 24:29-31; ಲೂಕ 21:25-28)
24 ಅತ್ರೇಸ್ ಕಾಹೆತೆ ಯೋ ದನೂಮ ಯೋ ವದೇಖ್ಹೊ ಖತಮ್ ಹುಯಿಜಾ಼ವಾನ ಬಾದ್‌ಮ ಚಾ಼ಂದ್ ಕಾಳೊಪಡಿಜಾ಼ಶೆ. ಚ಼ಂದರ್‌ಮೊ ಉಜಾ಼ಳು ಕೋ ದಿಶೇನಿ, 25 ಆಕಾಶ್‌ಪರ್‌ಥು ಶುಕ್ಕರ್‌ಖ್ಹಾರು ಖಂಕ್ರಾಲಗ್‌ಶೆ, ಆಕಾಶ್‌ಮ ಛಾ಼ತೆ ಶಕತ್ ಖ್ಹಾರಿ ಕಾಪಿನ್‌ ಹಟ್‌ಶೆ. 26 ತದೆ ಅದ್ಮಿನೊ ಛಿಯ್ಯೊ ಘಣಿ ಶಕತ್‌ಥೀಬಿ, ಉಜಾ಼ಖ್ಹ್‌ಥಿ ಘೈಗ್‌ತೊಹುಯಿನ್‌, ವಾದ್ಳಮಕರಿ ಆವಾನು ಅದ್ಮಿಖ್ಹಾರು ದೇಕ್‌ಶೆ. 27 ತದೆ ಯೋ ಇನ ದೂತರ್‌ನ ಜ಼ಮೀನ್ನಿ ಚಾರ‍್ಹೆ ಬಾಜೂ಼ಮ ಮೋಕ್ಲಿನ್‌ ಧರ್ತಿನ ಕಡೇಶಿಥು ಧರೀನ್ ಆಬ್‍ನಿ ಖ್ಹರ್ತಿಲಗು, ಇನೆ ಚೂ಼ಣಿಲಿದೊತೆ ಖ್ಹಾರ ಅದ್ಮಿನ ಜಗತ್‌ನು ಏಕ್‌ ಬಾಜು಼ಥು ಧರಿನ್ ಬಿಜೇಕ್ ಬಾಜೂ಼ಲಗು ಎಕ್ಟು ಕರ್ಶೆ.
ಅಂಜೀರ್‌ನ ಝಾ಼ಡೇಥಿ ಅಕ್ಕಲ್ ಶಿಕಾನು
(ಮತ್ತಾಯ 24:32-35; ಲೂಕ 21:29-33)
28 ಮೋಟ ಅಂಜೀರ್‌ನ ಝಾ಼ಡಾಥಿ ಮತ್ಲಬ್‌ನಿ ಅಕ್ಕಲ್ ಶಿಕೊ. ಇನಿ ಡಾಳಿಯೆ ಹರಿಗಾರ್ ಕವ್ಳಿ ಹುಯಿನ್, ಪಾಂದ್‌ಡ ಮ್ಹೇಲಾಲಗ್ಯುತೊ, ತಡ್ಕಾನ ಹಗಾಮ್‌ ಖನ್ನೆ ಐಗು ಕರಿ ಮಾಲುಮ್ ಕರಿಲೇವೊಸ್ನಿ. 29 ಇಮ್ಮಸ್ ತುಮೇಬಿ ಆ ಖ್ಹಾರು ಹುವಾನು ದೇಖ್ಯಾತೊ, ಬಾಕಲ್‌ನ ಖನ್ನೆಸ್‌ ಥೋಕರಿ ಮಾಲುಮ್ ಕರಿಲೆವೊ. 30 ಮೇ ತುಮೂನ ಖ್ಹಾಚಮಾಬಿ ಬೋಲುಸ್ಕಿ ಆ ಜ಼ಮಾನಾನು ಅದ್ಮಿಖ್ಹಾರು ಮರ್‌ವಾನ ಮಹಿಸ್ ಆ ಖ್ಹಾರು ಚಾ಼ಲ್‌ಶೇತೆ ಕರಿ ಯಾದ್‌ರಾಖೊ. 31 ಆಬ್-ಧರ್ತಿ†13:31 ಚಾ಼ಂದ್, ಚ಼ಂದರ್‌ಮೊ, ಶುಕ್ಕರ್ ಖ್ಹಾರೂಸ್ ಮಟಿಜಾ಼ಶೆ ಕರಿ. ಆಬ್-ಧರ್ತಿ ಖ್ಹಾರು ಮಟಿಜಾ಼ಶೆ, ಕತೋಬಿ ಮಾರಿ ವಾತೆಖ್ಹಾರಿ ಮಟ್‌ಶೆಸ್ ಕೊಯ್ನಿ.
ಯೋ ದನ್ ಕೊಯಿಂತೊ ಯೋ ವಖ್ಹತ್ ಕಿನಾಬಿ ಮಾಲುಮ್ ಕೊ ಉಷೇನಿ
(ಮತ್ತಾಯ 24:36-44)
32 ಎತ್ರೇಸ್ ಕಾಹೆತೆ ಯೋ ದನ್ನಿ ಬಾರೇಮ ರ‍್ಹವೊ ನಾತೊ ಯೋ ಘಡಿನಿ ಬಾರೇಮ ರ‍್ಹವೊ ಮಾರ ಬಾನ ಮಾಲುಮ್ ಪಣ್ಕಿ ಬಿಜು಼ ಕಿನಾಬಿ ಮಾಲುಮ್‌ಕೊಯ್ನಿ; ಪರ್‌ಲೋಕ್‌ಮ ಛಾ಼ತೆ ದೇವ್‌ನು ದೂತರ್‌ನಾಬಿ ಮಾಲುಮ್‌ಕೊಯ್ನಿ, ಛಿಯ್ಯಾನಾಬಿ ಮಾಲುಮ್‌ಕೊಯ್ನಿ. 33 ಯೋ ವಖ್ಹತ್ ಕದೆ ಆವ್‍ಶೆಕರಿ ತುಮುನ ಮಾಲುಮ್‌ಕೊಂತೆ ಇನಾಖ್ಹಾಜೆ ಹೊಷಾರ್‌ಥಿರ‍್ಹವೊ, ಕದೇಬಿ ಜ಼ತನ್‌ಥಿರ‍್ಹವೊ. 34 ಏಕ್‌ ಅದ್ಮಿ ಇನು ಘರ್‌ನ ಮ್ಹೇಲಿನ್ ದೇಖ್ಹ್‌ಪರ್ ಜಾ಼ವಾನಿ ವಖ್ಹತ್‌ಮ, ಇನ ಸೇವಕರ್‌ನ ಬುಲೈನ್ ಘರ್‌ನ ದೇಕ್-ಭಾಲ್‌ ಕರಾನು ಕಾಮ್ನಿ ಅದಿಕಾರ್‌ನ ದಿದೊ. ಏಕೇಕ್‌ ಜ಼ಣಾನ ಇವ್ಣು-ಇವ್ಣು ಕಾಮ್‌ದೀನ್‌, ಘರ್‌ನಿ ಕಾವ್ಲಿ ಕರಾವಾಳನ ಹೊಷಾರಿ ರ‍್ಹೇಣು ಕರಿ ಹುಕುಮ್‌ ದಿದೊ. ಇಮ್ಮಸ್ ಮೇ ತುಮುನ ಹುಕುಮ್‌ ದೆವ್‍ಸ್. 35 ಘರ್‌ನೊ ಯಜಮಾನ್ ಖ್ಹಾಂಜೇಕಿ, ಅಧಿರಾತ್ಮ, ಮುರ್‌ಗಾ ಬಾಂಗೆಕಿ, ದನ್ ನಿಕ್ಳಾದೀನ್‌ಕಿ, ಕದೆ ಆವ್‍ಶೆಕರಿ ತುಮುನ ಮಾಲುಮ್‌ಕೊಂತೆ ಇನಾಖ್ಹಾಜೆ ಹೊಷಾರ್‌ಥಿ ರ‍್ಹವೊ. 36 ಯೋ ಮಾಲುಮಸ್ ಪಡಾಕೊಂತೆ ಇಮ್‌ ಆಯೋತೊ, ತುಮೆ ಖ್ಹುತಾರ‍್ಹವಾನು ನಾ ದೇಕ್ಣು. 37 ಮೇ ತುಮುನ ಬೋಲೂಸ್ತೆ ಇನ ಅಖ್ಖಾನ ಬೋಲುಸ್, ಹೊಷಾರ್‌ಥಿ ರ‍್ಹವೊ” ಕರಿ ಬೋಲ್ಯೊ.
*13:3 13:3 ಆಲಿವ್ ಕರಿ ಪಂಡಾ ಮ್ಹೇಲಾನು ಝಾ಼ಡ ಆ ಪಹಾಡ್‌ಪರ್ ಥು. ಆ ಆಲಿವ್‌ನ ಪಂಡಾನ ಪೀಂಜಿನ್ ತೇಲ್ ಕಾಡಸ್‌. ಆ ತೇಲ್ ಖಾಣು ಕರಾನ, ದೀವೊ ಲಗಾಡನ, ಓಖ್ಹಡ್‌ ಕರಾನ ಅಜು಼ ರಂಗ್-ರೂಪ್ ಭಡಾವಾನಟೇಕೆ ಉಪ್‌ಯೋಗ್‌ಕರಾಸ್
†13:11 13:11 ಹೇಬತ್,
‡13:13 13:13 ಆಖ್ರಿ ದಮ್‌ತೋಡಿ ನಂಬವಾಳಾನ
§13:13 13:13 ರಕ್ಷಣೆ ಮಳ್‌ಶೆ
*13:14 13:14 ಮತ್ತಾಯ 24.15
†13:31 13:31 ಚಾ಼ಂದ್, ಚ಼ಂದರ್‌ಮೊ, ಶುಕ್ಕರ್ ಖ್ಹಾರೂಸ್ ಮಟಿಜಾ಼ಶೆ ಕರಿ. ಆಬ್-ಧರ್ತಿ