1 ಮೇಂಢಾನು ಚೆಲ್ಕು ಹುಯಿರಾವಳೊ ಯೋ ಖ್ಹಾತ್ ಮುದ್ರಾನ ಫೋಡಾನಿವಖ್ಹ್‌ತೆ ಮೇ ದೇಖ್ಯೊ ಅಜು಼ ಯೋ ಚಾರ್ ಜೀವಿಮ ಏಕ್‌ ಜೀವಿ ಘಲಾರನಿತರಾನೊ ಗಳೇಥಿ “ಆವ್”! ಕರಿ ಬೋಲಾನು ಖ್ಹಮ್‌ಜೊ. 2 ಮೇ ಹಿಜ್ಜಾ಼ ದೆಖಾನಿವಖ್ಹ್‌ತೆ ಏಕ್‌ ಧೋಳೊ ಘೋಡೊ ದೆಖಾಯೊ. ಇನಾಪರ್ ಬೆಠೊಹುಯೊ ಹಾತ್ಮ ಏಕ್‌ ಧೂಣ್ ಧರಾಖ್ಯೊಥೊ.ಇನ ಏಕ್‌ ಕಿರೀಟ್‌ಬಿ ದೆವೈರ‍್ಹೂಥು. ಯೋ ವಹೇರ‍್ಯಾನ ಹರಾವವಾಳೊ ಹುಯಿನ್ ಜೂತಾನಖ್ಹಾಜೆ ನಿಕ್‌ಳ್ಯೊ. 3 ಮೇಂಢಾನು ಚೆಲ್ಕು ಹುಯಿರ‍್ಹಾವಳನೆ ಬೇನು ಮುದ್ರಾನ ಫೋಡಾಖ್ಹತರ್ ಬೇನು ಜೀವಿ “ಆವ್”! ಕರಿ ಬೋಲಾನು ಖ್ಹಮ್‌ಜೊ. 4 ತದೆ ಲಾಲ್‌ರಂಗ್‌ನೊ ಬಿಜೇಕ್ ಘೋಡೊ ನಿಕ್ಳಿ ಆಯೊ. ಇನಾಪರ್ ಸವಾರಿ ಕರವಾಳನ ಜ಼ಮೀನ್‍ಪರ್ಥು ಸಮಾಧಾನ್ನ ಕಾಡಿನಾಖನ ಅದಿಕಾರ್ ದೆವಾಯು. ಅನೇಥಿ ಅದ್ಮಿ ಏಕ್‌ಥಿಏಕ್ ಖೂನಿಕರಾವಳು ಹುಯು. ಅಜು಼ ಯೋ ಸವಾರಿನ ಮೋಟಿಖ್ಹಿ ಏಕ್‌ ತಲ್ವಾರ್‌ಬಿ ದೆವಾಯು. 5 ಮೇಂಢಾನು ಚೆಲ್ಕು ಹುಯಿರ‍್ಹವವಾಳೊ ತೀನ್ನ ಮುದ್ರಾನ ಫೋಡಾಖ್ಹತರ್, ತೀನ್ನು ಜೀವಿ ಆವ್‌ಕರಿ ಬೋಲಾನು ಖ್ಹಮ್‌ಜೊ. ತದೆ ಮೇ ದೇಖಾಖ್ಹತರ್ ಹಿಜ್ಜಾ಼ ಮನ ಕಾಳೊ ಘೋಡೊ ದೆಖಾಯೊ. ಇನಾಪರ್ ಬೆಠೊರ‍್ಹವಾಳಾನ ಹಾತ್ಮ ತರಾಜ಼್ ಥು. 6 ಇನಪಾರ್ ಚಾರ್ ಜೀವಿನ ಇಚ್ಮಾ಼ಥು ಏಕ್‌ ಜ಼ಣಾನಿ ಅವಾಜ಼್ ನಿಕ್ಳಾನಿಘೋಣಿ ಖ್ಹಮ್‌ಜೊ. ಏಕ್‌ ಪೈಶಾನ ಏಕ್‌ ಶೇರ್ ಘವ್‌, ಅಜು಼ ಏಕ್‌ ದನ್ನಿ ಕೂಲಿ ತೀನ್ ಶೇರ್ ಬಾಜ಼್ರೊ, ಕತೋಬಿ ತೇಲ್ನ ಅಜು಼ ದ್ರಾಕ್ಷಿನ ರಖ್ಹ್‌ನ ಖರಾಬ್‌ನಕೋಕರ್” ಕರಿ ಬೋಲ್ಯು. 7 ಮೇಂಢಾನು ಚೆಲ್ಕುಹುಯಿರ‍್ಹವಾಳನೆ ಚಾರ‍್ನ ಮುದ್ರಾನ ಫೋಡಾನಿವಖ್ಹ್‌ತೆ; ಚಾರ‍್ನು ಜೀವಿ “ಆವ್”! ಕರಿ ಬೋಲಾನು ಖ್ಹಮ್‌ಜೊ. 8 ತದೆ ಮೇ ದೇಖಾನಿವಖ್ಹ್‌ತೆ ಹಿಜ್ಜಾ಼ ಬೂದ ರಂಗ್‌ನೊ ಘೋಡೊ ರ‍್ಹವಾನು ದೇಖ್ಯೊ. ಯೋ ಘೋಡಾಪರ್‌ ಬೆಠೊರ‍್ಹಾವಳೊ ಸವಾರಿನು ನಾಮ್ ಮರಣ್. ಇನ ಪೀಠೆ ಪಾತಾಳ್‌ಕರಿ ಬೋಲವಾಳೊ ಆಯೊ. ಇವ್ಣುನ ಜ಼ಮೀನ್ನು ಚಾರ‍್ನು ಏಕ್‌ ಭಾಗ್‌ಪರ್‌ ಅದಿಕಾರ್ ದೆವಾಯು. ಜಂಗ್‌ಥಿಬಿ, ಕಾಳ್ದುಕಾಳ್ ದನ್‌ಥಿಬಿ, ರೋಗ್‌ಥಿ ಅಜು಼ ಜಗತ್‌ಪರ್‌ ಛಾ಼ತೆ ಝಾ಼ಡಿನ ಜಾನ್ವರ್‌ಥೀಬಿ ಅದ್ಮಿವ್‌ನ ಮಾರಾನ ಅದಿಕಾರ್ ದೆವಾಯು. 9 ಇನೆ ಪಾಚ಼್‌ನ ಮುದ್ರಾನ ಫೋಡಾನಿವಖ್ಹ್‌ತೆ; ದೇವ್ನ ವಚನ್ನಖ್ಹಾಜೇಥಿಬಿ, ಇವ್ಣುನ ರ‍್ಹವಾನು ಬರೋಬರ್‌ನಿ ಸಾಕ್ಷಿನ ಖ್ಹಾಜೇಥಿಬಿ, ಮರಾವಳನು ಆತ್ಮಖ್ಹಾರು, ಬಲಿಪೀಠ್‌ನ ಹೇಟ್ ರ‍್ಹವಾನು ದೇಖ್ಯೊ. 10 ಇವ್ಣೆ ತೂಸ್ ಪ್ರಭು, ಪರಿಶುದ್‌ಬಿ ಖ್ಹಾಚೋ಼ಬಿ ಹುಯಿರ‍್ಹವಾಳೊ. ಹಮಾರ ಲ್ಹೋಯಿನ ರಂಚ್ಯೂತೆ ಧರ್ತಿನು ಅದ್ಮಿಖ್ಹಾರಾನ ಬಿಜು಼ ಕಬ್ಲಗು ನ್ಯಾವ್‌ಫೇಡಾವ ಕೊಯ್ನಿತೇಬಿ, ನ್ಯಾವ್‌ನು ತೀರ್ಪ್ ಕರಾಕೊಂತೇಬಿ ನಿಶತ್‌ ದೇಸ್ ಕೊಂತೆ ರ‍್ಹೇಸ್? ಕರಿ ಮೋಟಿ ಅವಾಜ಼್‌ಥಿ ಚಿಕ್‌ರ‍್ಯು. 11 ತದೆ ಇವ್ಣಾಮ ಅಖ್ಖಾಸ್ ಜ಼ಣಾನ ಏಕೇಕ್‌ ಧೋಳೊ ಝ಼ಗ್ಗೊ ದೆವಾಯು. ಅಜು಼ ಥೋಡಿ ವಖ್ಹತ್ ಟಿವೈರ‍್ಹೇಣುಕರಿ ಯೋ ಆತ್ಮವ್‌ನ ಖ್ಹಮ್‌ಜಾ಼ಡ್ಯು. ತುಮಾರಿನಿತರ ಖೂನಿ ಹೋಣುತೆ ಭೈಯೇಮ ಥೋಡುಜ಼ಣು ಅಜು಼ ಜೋ಼ಡ್ನ ಚಾ಼ಕ್ರಿ ಕರಾವಳನಿ ಗಣ್ತಿ ಪೂರ ಹುವಾಲಗು ಅರಾಮ್‌ಥಿ ರ‍್ಹೇವ್ಣುಕರಿ ಇವ್ಣುನ ಬೋಲಾಯು. 12 ಯೋ ಮೇಂಢಾನು ಚೆಲ್ಕು ಛೋ಼ನು ಮುದ್ರಾನ ಫೋಡಾನು ಮೇ ದೇಖ್ಯೊ. ತದೆ ಮೋಟು ಭೂಕಂಪ್ ಹುಯು. ಚಾ಼ಂದ್ ಕಾಳು ಘುಂಗ್‌ಡಿನಿಮತ್ ಕಾಳೊಹುಯಿಗೊ. ಅಜು಼ ಅಖ್ಖೊಯೇಕ್ ಚ಼ಂದರ್‌ಮೊ ಲ್ಹೋಯಿನಿತರ ಲಾಲ್ ಹುಯಿಗೊ. 13 ಅಂಜೀರ್‌ನ ಝಾ಼ಡಾನ ತುಫಾನ್ನೊ ವ್ಹಾಯಿರಾನು ಮಾರ್ ಪಡಿನ್ ಇನು ಪಕಾವಕೊಂತೆ ಪಂಡುಖ್ಹಾರು ಝ಼ಟ್‌ಕಾವನಿ ಘೋಣಿ ಆಬ್‍ಥು ಶುಕ್ಕರ್‌ಖ್ಹಾರು ಜ಼ಮೀನ್‌ಪರ್ ಝ಼ಟ್‌ಕೈನ್ ಪಡ್ಯು. 14 ಆಕಾಶ್ ಪುಂಗ್‌ಳಿನಿತರ ಲಪ್‌ಟೈನ್‌ ಡೋಳೇಥಿ ಲಪಿಗಯು. ಹರೇಕ್ ಪಹಾಡ್ ಅಜು಼ ಟಾಪುಖ್ಹಾರು, ಇನಿ ಇನಿ ಝ಼ಗೋಥು ಖ್ಹರ್ಕಿಗಯು. 15 ತದೆ ಜ಼ಮೀನ್ನು ರಾಜ಼ವ್‌ಖ್ಹಾರು, ಅಖ್ಖೂಸ್ ಅದಿಕಾರಿ, ಡಂಡ್‌ನೊ ಘಲ್ಡೊಖ್ಹಾರು, ಶೌಕಾರ್‌ಖ್ಹಾರು, ಘಣು ಶಕತ್‌ವಾಳುಖ್ಹಾರು, ಬಿಜು಼ಖ್ಹಾರು ಅದ್ಮಿ ಗುಲಾಮ್‌ಖ್ಹಾರು, ಛುಟ್ಕಾರ್‌ನು ಅದ್ಮಿಖ್ಹಾರು ಪಹಾಡ್ನಿ ಘವಿಮಾಬಿ, ಬಂಡಾನಿ ಚಿಪಾಟ್ನಿಖೀಂಡಿಮ ಲಪಿಗಯು. 16 ಇವ್ಣೆ ಅಮ್ ಬೋಲ್ಯುಕಿ, ಪಹಾಡ್ನಾಬಿ ಬಂಡಾನಿ ಚಿಪಾಟ್‌ಬಿ ಹಮಾರಪರ್ ಲಡ್ಕಿಜಾವೊ, ಸಿಂಹಾಸನ್ನ ಉಪ್ಪರ್ ಬೆಠೊರ‍್ಹವಾಳಾನ ಮೇಂಢಾನಚೆಲ್ಕನ ಖೀಜ಼್‌ಮಾಥು ಹಮುನ ಛು಼ಕಾವ್‌! 17 ಶನಕತೊ ಇನೊ ಭಯಂಕರ್ ಇರಾದೊ ಐಗು. ಇನಖ್ಹಾಮ್ಣೆ ಭಿರಾವನ ಕಿನ ಹಾತ್ ಉಷೆ? ಕರಿ ಬೋಲ್ಯು.