ಪೌಲನು ತೀತನಿಗೆ ಬರೆದ ಪತ್ರಿಕೆ
ಪೌಲನೆ ತೀತನ ಲೀಖ್ಯೋತೆ ಚಿಟ್ಟಿ
ಮಾಲುಮ್ ಕರಾನು
ತೀತನ ಲೀಖ್ಯೋತೆ ಚಿಟ್ಟಿ ಪೌಲನೆ ಸಬೆನ ಮ್ಹೇಲಿನ್ ಏಕ್‌ ಜ಼ಣೊ ಅದ್ಮಿನ ಲೀಖ್ಯೋತೆ ಚಾರ್ ಚಿಟ್ಟೀಮ ಆ ಏಕ್‌ ಹುಯಿರ‍್ಹೂಸ್. ಉಭ್ರೀತೆ ತೀನ್ ಚಿಟ್ಟಿ ಖಿವುಕತೊ 1 ತಿಮೊಥೆ 2 ತಿಮೊಥೆ ಅಜು಼ ಫಿಲೆಮೋನ ಆ ಚಿಟ್ಟಿಖ್ಹಾರು ತೀತನ ಲಿಖೈರ‍್ಹುಸ್. ಕತೋಬಿ ಆ ಚಿಟ್ಟಿಖ್ಹಾರು ಅಖ್ಖಾಸ್ನ ಖ್ಹಾಮ್ಣೆ ಫಡಿವತಾಳ್ನು ಕರಿ ಲೀಖಸ್. ಶನಕತೊ ಪೌಲ ಅಪೊಸ್ತಲ್ ಹುವಾನಖ್ಹಾಜೆ ಯೋಗ್ಯಹುಯಿರ‍್ಹಾವನು ಬೋಲಿ ವತಾಳಸ್‍. ಯೊ ಪಹಿಲಿ ಚಿಟ್ಟಿ ತೀತನ ಮಾಲುಮ್. ಯೇಸು ಕ್ರಿಸ್ತನ ಪೈದಾಖ್ಹ್‌ಥು 63 ಅಜು಼ 65 ವರಖ್ಹ್ ಬೀಚ್ಮ ಪೌಲನೆ ಆ ಚಿಟ್ಟಿ ಲಿಖಿರಾಕ್ಣು. ಪೌಲನೆ ತೀತನ ಕ್ರೇಟ್ ಟಾಪಾಮ ಥೂತೆ ಸಬೆನ ಜಾ಼ಖ್ಹತ್ ಚ಼ಲಾವನಖ್ಹಾಜೆ ಖ್ಹೂಜ಼್ ದೀರಾಖ್ಯೊಸ್. ಪೌಲನೆ ಆ ಚಿಟ್ಟಿನ ಲೀಖಾನ ಕಾರಣ್ ಶಾತ್‌ಕತೊ ತೀತನೆ ಸಬೆನ ಘಲ್ಡಾವ್‌ನ ಚೂ಼ಣಾನು ಶಿಕಾಡಿ ವತಾಳಿರಾಖ್ಯೊಸ್. ಅಮ್ ತಿಮೊಥೆನ ಲೀಖ್ಯೋತೆ ಚಿಟ್ಟಿಮಾಬಿ ಖ್ಹೂಜ಼್ ದೀರಾಖ್ಯೊಸ್. ಅನ ಚಿಟ್ಟೀಮ ಸಬೇನು ಶಾಣು ಕಿಮ್ ಅಛ್ಛು಼ ಗುಣ್‌ಥಿ ರ‍್ಹೇವ್ಣುಕರಿ ಬೋಲಾಸ್. ಹಮ್ಕೇನು ಸಬೆ ಅಜು಼ ಸಬೇನು ಶಾಣುಖ್ಹಾರು, ಶಾಣಾವ್ನ ಹೋಣುತೆ ಗುಣ್‌ಖ್ಹಾರು ಖಿವು ಪರಕ್ನು ರ‍್ಹೇವ್ಣುಕರಿ ಹೊಷಾರ್‌ಥಿ ಖ್ಹಯಾಲ್ ದೇವ್ಣು.
ಕಾಡಿದೇಖೊ
1 ಪೌಲನೆ ತೀತನ ಆತ್ಮೀಕ್‌ನ ಶಾಣವ್ನ ಚೂ಼ಣಾನಖ್ಹಾಜೆ ಖ್ಹೂಜ಼್ ದೇಸ್. 1:1-16
2 ಇನಪಾರ್ ಅದ್ಮಿಖ್ಹಾರು ದೇವ್‌ಮ ಜಿವ್ಣು ಕರಾನು ಶಿಕಾಡ್ಣುಕರಿ ಖ್ಹೂಜ಼್ ದೀರಾಖ್ಯೊಸ್. 2:1—3:11
3 ಕಡೇಶಿಮ ಪೌಲನೆ ಖ್ಹರ್ತಿನ ದನ್ನಿ ಖ್ಹೂಜ಼್‌ನ ಬೋಲ್ತೊಹುಯಿನ್, ಅಜು಼ ಧನ್ಯವಾದ್‌ಥಿ ಖತಮ್‌ಕರಸ್. 3:12-15
1
ಪೌಲನೆ ತೀತನ ಲೀಖ್ಯೋತೆ ಚಿಟ್ಟಿ
1 ದೇವ್‌ನೊ ಸೇವಕ್‌ಬಿ ಅಜು಼ ಯೇಸು ಕ್ರಿಸ್ತನೊ ಅಪೊಸ್ತಲ ಹುಯಿರ‍್ಹೋತೆ ಪೌಲನೆ ಲೀಖ್ಯೋತೆ. ದೇವ್ನೆ ಚೂ಼ಣ್ಯೋತೆ ಅದ್ಮಿ ಖ್ಹಾರಾನಿ ಖ್ಹಾಚಾಮ ಚ಼ಲಾವನಟೇಕೆ ವಿಶ್ವಾಸ್‌ನ ಭಡಾವಾನಖ್ಹಾಜೆ ಅಜು಼ ಯೊ ಇವ್ಣುನ ಭಕ್ತಿನಿ ಜಿವ್ಣಮ ಚ಼ಲಾವಸ್. 2 ಆಹೈರುತೆ ಖ್ಹಾಚ ಜಿ಼ಂದ್‌ಗೀನ ಭರೋಖ್ಹಾಪರ್ ಆಧಾರ್ ಹುಯಿರ‍್ಹೂಸ್. ದೇವ್ ಕೆದೇಬಿ ಝೂ಼ಟಿ ಬೋಲಾಕೊಯ್ನಿ. ಯೋ ಜಿವ್ಣಾನಿ ಬಾರೇಮ ಅಪ್ಣುನ ದಿಶೆ ಕರಿ ಹಗಾಮ್ನ ಪಹಿಲೆಥೂಸ್ ವಾಗ್ದಾನ್‌ ಕರಿರಾಖ್ಯೋಸ್. 3 ಅಜು಼ ಬರಾಬರ್‌ನಿ ವಖ್ಹತ್‌ಮ, ದೇವ್ನೆ ಇನಿ ಉಪದೇಶ್‍ನ ಪ್ರಕಟ್‌ಕರ‍್ಯೊ. ಅಜು಼ ಯೊ ಮನ ದೆವೈರ‍್ಹೂಥು. ಅಜು಼ ರಕ್ಷಣೆ ದ್ಯವಾನಿ ದೇವ್ನಿ ಹುಕುಮ್‌ನಿಮತ್ ಮೇ ಬೋಲಿರಖ್ಯೋಸ್. 4 ವಿಶ್ವಾಸ್‌ಮ ಮಾರ ಖ್ಹಾಚ ಛಿಯ್ಯಾನಿಮತ್ ಛಾ಼ತೆ ತೀತನ ಮೇ ಆ ಲೀಖುಕರುಸ್ತೆ. ಅಪ್ಣೊ ಬಾ ಹುಯಿರ‍್ಹೋತೆ ದೇವ್‍ಥಿ ಅಜು಼ ಅಪ್ಣೊ ರಕ್ಷಕ್ ಹುಯಿರ‍್ಹೋತೆ ಕ್ರಿಸ್ತ ಯೇಸುಥಿ ತುನ ವಾರ್‌ಖ್ಹೊ ಅಜು಼ ಶಾಂತಿ ಮಳಾದೆ.
ಕ್ರೇಟ್‌ಮ ತೀತನು ಕಾಮ್
5 ತೂ ಕ್ರೇಟ್‌ಮ ಬಿಜೂ಼ಬಿ ಬರಾಬರ್‌ ಹುಯುಕೊಂತೆ ಕಾಮ್ನ ಖ್ಹಾರು ಬರಾಬರ್‌ ಕರಾನಖ್ಹಾಜೆಬಿ, ಅಜು಼ ಹರೇಕ್ ಖ್ಹಯೇರ್‌ಮ ಸಬೇನು ಶಾಣಾವ್ನ ನೇಮಕ್ ಕರ್ನುಕರಿ ಮೇ ತುನ ಹಿಜ಼್ಜಾಸ್ ಹುಕುಮ್ ದೀನ್ ಮ್ಹೆಂದಿನ್ ಆಯೊ. 6 ಸಬೇನೊ ಮೋಟೊ ರ‍್ಹವಾಳೊ ನಿರ್ದೋಷಿ ಹುಯಿರ‍್ಹೇಣು, ಇನ ಎಕ್ಕಸ್ ಬಾವಣ್‍ ರ‍್ಹೇವ್ಣು, ಇನ ಲಡ್ಕಾ ವಿಶ್ವಾಸಿ ಹುಯಿರ‍್ಹೇಣು,ಅಜು಼ ಇವ್ಣೆ ಖರಾಬ್ ರ‍್ಹವೊ, ಲಗಾತಿರ‍್ಹೇವೊ ನಾ ಹುಯಿರ‍್ಹೇಣು. 7 ಶನಕತೊ ಸಬೇನೊ ಗಲ್‌ಢೊ ದೇವ್ನಕಾಮ್‌ನು ಇಶಾಬ್‌ದ್ಯವಾಳೊ ಹುಯಿರ‍್ಹೋಸ್ತೆ ಇನಖ್ಹಾಜೆ, ಯೋ ಗಲ್ತಿಕೊಂತೆ ಅದ್ಮಿ ಹುಯಿರ‍್ಹೇಣು, ಛೇಡಾವವಾಳೋಬಿ, ವಗ್ಗಿಸ್‌ಮ ಖೀಜ಼್ ಕರವಾಳೊ ರ‍್ಹವೊ, ಪಿಯವಾಳೊರ‍್ಹವೊ, ಪೈಶಾನಿ ಲಾಲಚ್‌ರ‍್ಹವಾಳೊ, ಲಡಂತು ರ‍್ಹವೊ ನಾ ಹುಯಿರ‍್ಹೇಣು. 8 ಯೋ ಘರ್‌ಮ ವಿಶ್ವಾಸ್‌ವಾಳನ ಬುಲೈನ್ ಸ್ವಾಗತ್ ಕರವಾಳೊ ಹುಯಿರ‍್ಹೇಣು, ಅಛ್ಛಾ಼ನಪ್ಯಾರ್ ಕರವಾಳೊಬಿ, ಅಕ್ಲೀಬಿ, ನೀತಿಥಿರ‍್ಹವಾಳೊಬಿ, ಪರಿಶುದ್ ಹುಯಿರ‍್ಹೇಣು. 9 ಯೊ ಇನಿ ಭರೋಖ್ಹಾನಿ ಸಂದೇಶ್ನ ಘಟ್ ಧರಿಲ್ಯವಾಳೊ ಹುಯಿರ‍್ಹೇಣು, ಅನಿ ಬಾರೇಮ ಇನ ಬೋಲೈರ‍್ಹುಸ್. ಇನಖ್ಹಾಜೇಥಿ ಯೊ ಅದ್ಮಿ ಖ್ಹಾಚಿ ಬೋಲಿದೇತೊಹುಯಿನ್ ಭಾಲಿ ದ್ಯವಾಳೊ ಹುಯಿರ‍್ಹೇಣು. ಹಮೆ ಬೋಲೇತೆ ಖ್ಹಾಚಾ಼ನ ವಿಶ್ವಾಸ್‍ಥಿ ಪಾಲನ್‍ ಕರ‍್ನು. ಯೊ ಖ್ಹಾಚಾಥಿಬಿ ಲ್ಹಾಯೇಕ್‌ನಿ ಉಪದೇಶ್‌ಥಿ ಯೊ ಅದ್ಮಿನ ಮದತ್ ಕರಾವಾಳೊ ಹುಯಿರ‍್ಹೇಣು. 10 ಕೈಯೆಕ್ಕಿ ಜ಼ಣು ಖಾಲಿವಾತೆವಾಳು, ಠಗಾವವಾಳು ಅಜು಼ ಗಲಾಟ್ ನಾಖವಾಳು ಹುಯಿರ‍್ಹೂಸ್. ಅಮ್ ವಿಶ್ವಾಸ್‌ ಕರಾವಾಳಾಮ ಘಣು ಅದ್ಮಿ ಯೆಹೂದ್ಯರ್‌ವಾಳುಸ್ ಹುಯಿರ‍್ಹೂಸ್. 11 ಇವ್ಣ ಫಾಯಿದಾನಖ್ಹಾಜೆ ಬೋಲ್ನುನಾತೆ ವಚನ್ನ ಬೋಲಿದೀನ್‌, ಹಿಡಿ ಕುಟುಂಬ್‌ನಾಸ್ ನಾಶ್ ಕರುಕರಸ್. ಅನಖ್ಹಾಜೆಸ್ ಇವ್ಣು ಮ್ಹೋಡು ಮೂಚಿರ‍್ಹೇಣು. 12 ಅಜು಼ “ಕ್ರೇಟ್ ಟಾಪವಾಳಮನೊ ಏಕ್‌ ಪ್ರವಾದಿ ಹಮೇಶ ಝೂ಼ಟಿ ಬೋಲವಾಳೊ, ಜಾನ್ವರ್‌ನಿತರಾನೊ, ಅಜು಼ ಶೋಂಬೇರಿ ಹುಯಿರ‍್ಹೂಸ್” ಕರಿ ಕ್ರೇಟ್‌ವಾಳೊಸ್ ಏಕ್‌ ಪ್ರವಾದೀನೆ ಬೋಲಿರಾಖ್ಯೋಸ್‌ನಿ. 13 ಪ್ರವಾದಿನೆ ಬೋಲ್ಯೋತೆ ಸಾಕ್ಷಿ ಖ್ಹಾಚಿಸ್ ಹುಯಿರ‍್ಹೀಸ್. ತೂ ಇವ್ಣುನ ಬರಾಬರ್‌ಥಿ ಗುರ್‌ಕಾವ್ಣು, ಅನೇಥಿ ಇವ್ಣೆ ಅಛ್ಛಿ ವಿಶ್ವಾಸ್‌ಮ ರ‍್ಹಿಶೆ. 14 ಅಜು಼ ಯೆಹೂದ್ಯರ್‌ನ ಕೊಂತೆಖೇಣೀಥಿ, ಅಜು಼ ಖ್ಹಾಚಿನ ಮಾನಿಲೆಯಿಕೊಂತೆ ಅದ್ಮಿ ಖ್ಹಾರಾನಿ ಹುಕುಮ್ ಭಣಿ ಧ್ಯಾನ್ ನಕೊ ದೀಶ್. 15 ಶುದ್‍ ರ‍್ಹೇಸ್ತೆ ಅದ್ಮಿನ ಖ್ಹಾರೂಸ್ ಶುದ್ದಸ್ ಹುಯಿರ‍್ಹೂಸ್. ಕತೋಬಿ ಖರಾಬ್ ಅಜು಼ ವಿಶ್ವಾಸ್‌ಕೊಂತೆ ಅದ್ಮಿಯೇವ್ನ ಕೆಹೂಬಿ ಮೈಲುಕಾಹೆ. ಶನಕತೊ ಇವ್ಣಿ ಖ್ಹಯಾಲ್ ಅಜು಼ ಮನ್ನಿಸಾಕ್ಷಿ ಭೇಬಿ ಅಪವಿತ್ರ ಹುಯಿರ‍್ಹೂಸ್. 16 ಇವ್ಣೆ ದೇವ್ನಿ ಬಾರೇಮ ಪರ್ಖಿರಾಖ್ಯಸ್ ಕರಿ ಬೋಲಿಲೆಸ್. ಕತೋಬಿ ಇವ್ಣೆ ಹುಕುಮ್ನ ನಾಮಾನವಾಳು ಹುಯಿನ್ ಗಂಧು ಕಾಮ್ ಕರಾವಾಳು, ದೇವ್ನ ಅಜು಼ ಖಿವು ಅಛ಼್ಛುಕಾಮ್ ಕರಾನಬಿ ಲ್ಹಾಯಕ್ ಕೊಯ್ನಿ.