పౌలు హెబ్రీయులకు వ్రాసిన పత్రిక
పౌల్ హెబ్రీయుల్నా లిఖ్యొతె పుస్తక్
అగ్లివాతె
హెబ్రీయుల్నా పుస్తక్ ఉసీకరను లేఖ, ఆ యేసు కెత్రుకి జూను నిబంధనా ప్రవచనాల్నా కిమ్ కర్యోకి వతాలస్. ఆ వాత్ ఇంమ్మస్ లిఖ్కాయ్‍రూస్. హెబ్రీయుల్మా జును నిబంధనా గురించి తీనిహ్‍ః ఫర్ ప్రవచనాల్ ఛా. ఆ యేసు కిమ్ హుయు అజు యూదుల్ను ప్రధాన యాజకుల్ను విధుల్నా దేఖ్కాడ్యొ. ఆ కారణంతి యూదుల్ క్త్రెస్తవుల్నా ఉసీకరనటేకె ఆ పుస్తక్ను లీఖ్యు, యేసు ధర్మషాస్త్రన్నా కిమ్ హాఃతమ్ కర్యోకి, ఇనేతి యాజకుల్ అజు బలుల్ అర్పించును అవసరమ్ కోయినికరి హెబ్రీయుల్ పుస్తక్మా దేఖ్కాడస్. యేసు హాఃరు పాప్నా, అజు హాఃరు కాలంన్నా ఏక్తారస్ బలి అర్పించో. అప్ను కాలమ్మా క్త్రెస్తవుల్‍బి దేవ్ పార్ నమ్మకమ్ ర్హాకను అజు ఇనపార్ నమ్మంనా సాధ్యమ్ కర్ను అద్మితార యేసుక్రీస్తునా అనుసరించాన హెబ్రీయుల్నా లిఖ్యుతే లేఖమా ఉసీ పొందజాయ్ 12:21
హెబ్రీయుల్నా లీఖ్యుతే పత్రిక కోణ్ లిఖ్యుకి కీనా మాలం కోయిని, పన్కి పండితుల్ అపోస్తలుహుయుతే పౌల్, లూకా నాహితో బర్నబా లీఖ్యువుసే కరి బోలస్. అజు లీఖ్యుతే తేదిబి మాలంకోయిని పన్కి క్రీస్తు ఫైదాహువను 70 వరహ్‍ః అగాఢి ఆ లీఖ్యుహుసేకరి ఘాణు ఆద్మియే నమ్మాస్. సానకతో క్రీ. ష. 70 మా జెరూసలేమ్ నాషనంహుయ, పన్కి ఆ లేఖ లేఖ్యుతే ఇవ్నే యెరూషలేమ్ను గురించి అజు నాష్ హుయుకోయిని. హీబ్రూ పుస్తక్ రోమ నంగర్మా లీఖ్యు 13:24 అజు ఆ కెత్రకి సంఘాల్మా బోలుకురాస్.
విషయమ్ బోలను
1. దేవ్ను ప్రవక్తల్ అజు దేవదూతల్ కనా యేసు గొప్పవాలోకరి రచయిత దేఖ్కాడొ 1:1–4:13
2. తెదె యో యెరూషలేమ్ దేవ్ను మందిర్‍మా సేవకరీన్ యాజకుల్నా యేసు గొప్పవాలొకరి దెఖ్కాడొ 4:14–7:28
3. దేవ్ మోషేనా దిదోతే ధర్మషాస్త్రమ్‍తిబి దేవ్ ఇనా అద్మియేతి జూను నిబంధనతీబి యేసు పరిచర్య గొప్పది 8:1–10:31
4. యేసు హాఃరు విధంతీబి గొప్పవాలొకరి బోలిన్ బాద్మా, రచయిత కెత్రూకి పట్టించాను హాఃనద్ దిసే10:32–13:17
5. ఆఖరిమా రచయిత థోడు ఉసీను వాతెతి అజు హఃలామ్తిబి లేఖనంమా హాఃతమ్ కర్యా13:18-25
1
ఇను ఛియ్యోతి దేవ్ను వాతె బోలను
1 జమనామ హర్యేక్‍ వహఃత్‍మాబి హర్యేక్‍ విధంమాహో, ప్రవక్తనా బరేమా అప్నా పితరుల్తీ వాతేబొల్యొతె దేవ్, 2 ఆ ధన్మనూ అంతంమా ఛియ్యనా బారేతి అప్నేతీ వాతేబోలాస్‍, యో ఛియ్యనా సమస్తనా వారసుడ్‍ని తరా నియ్యమించొ. ఇనా బారేమా ప్రపంచంనా నియ్యమించాస్‍. 3 యో దేవ్ను మాహిమను తేజస్సునా, ఇను సభ్వంను, తత్వమునా దైవత్వంనా, ఇను పోలికామ, తాహాఃత్నువాత్‍తీ సమస్తంనా బాణవ్తుహుయిన్‍. అద్మీయేను పాప్నా మాపి కర్తోహుయిన్‍ యోస్‍ సుద్దికరన్‍ కరీన్‍, స్వర్గంమా మోటొదేవ్‍హుయోతె దేవ్ను ఖావహాత్‍నిబాజు బేసిన్‍ ఛా 4 దేవ్, ఛీయానా దేవదూతల్తిబి గోప్ప ష్రేష్ఠహుయుతే నామ్. యో నామ్ హాఃరతీబి ఉన్నతం హుయురుస్‍.
ఛియ్యో దూతల్‍తీబి గొప్పవాలొ
5 కిమ్కతొ తూ మారొ ఛియ్యో,
మే ఆజ్ తున ఫైయిదాకర్యొకరి, ఆస్‍ కాహెతిమ్‍,
మే ఇనా భా హుయిన్‍ ర్హాస్‍,
యో మనా ఛియ్యో హుయిన్‍ ర్హాసెకరి,
దేవ్ ఇను దూతల్తిబి కెదేబి బోల్యోకొయిని?
6 బుజు దేవ్ ఇను ఫైలు ఛియ్యానా
ములక్మా బోలిమోక్‍ల్యొతెదె,
దేవదూతల్ హాఃరు ఇనా హాఃలంకరును కరి బోలుకరస్‍.
7 హుయితో ఇను దూతల్నా ఆత్మతర,
ఇను సేవకుల్నా ఆగ్ను జ్వాలనితరకరి లెవ్వాలొకరి,
ఇను దూతల్నాలీన్‍ బోలుకరస్‍.
8 పన్కి ఇనా ఛియ్యానా గూర్చి హుయుతో,
తారు రాజ్యం నిరంతరం ఉభర్సే తారు రాజదండమ్‍
ఆ ప్రజాల్నా న్యాయం హుయ్రూస్‍కరి బోలుకరస్‍.
9 తూ నీతినా ఫ్యార్‍ కర్యొ, దుర్నీతినా ద్వేషించొ,
ఇనాహాఃజే దేవ్ తారు హాఃమేవాలుతిబి,
తునా భడ్ఢావాతిం ఖుషిను తైలాంతీ ఎంచిలిసే.
10 బుజు, ప్రభువు తూ అగాడిమా జామిన్నా పునాది నాఖ్యో,
ఆకాష్‍నాబి తారు హాత్నుస్‍ కామ్.
11 యో నసించాస్‍ పన్కి తూ ఉబ్రీన్‍ ర్రాయిస్‍,
యో హాఃరు లుంగ్డాని తర జును హుయిజాసే.
12 కుడ్డుతుతార ఇనా మోక్లిదిస్‍ యో లుంగ్డానితర బద్లిజాసే పన్కి
తూ ఏకరీతితార ఛా తారు వారఖ్‍ కోబాద్లానీకరి బోలుకారస్‍.
13 అజు మే తార దుష్మాన్‍నా తార గోడవ్‍నా
పాదపీఠనితరా కరతోడి, మరా హాఃవహాత్‍ మ్హాడి బేహ్ఃకరి
ఇను దూతల్‍తి కెదేబి బోల్యో కొయిని?
14 బుజు దేవ్ దూతల్‍ కొన్కాతో దేవ్వాను కామ్ కరతే ఆత్మలనితరబి రక్చణాబి స్వాస్థ్యం పోందావలనా దేవ్‍బోల్యుమోక్లు పరిచారం కరనాటెకే ఆయూ.