16
Salai na Hagali
1 Lelo Salai, mdala wa Abulamu, nayang'hali kumpondela mwana wa heye. Ila nayali na chitumagwa mdala nayali yochemigwa Hagali, kulawa Misili. 2 Lelo Salai nakamlonjela Abulamu, “Kuvizela kota Mkulu Nguluwi hamhele lulelo lwa kuponda wana. Umhole Hagali chitumagwa wa heni mdala, hanji ndopata wana kwa kukolela heye.” Abulamu nakakunda ulonzi wa Salai.
3 Hamba, Salai nakampa Abulamu Hagali, chitumagwa wa heye mdala yalawile Misili yawe mchewake. Aga nagalawila Abulamu nayekalile Kanaani kwa mhela wa miyaka kumi. 4 Abulamu nakamhola Hagali, na heye Hagali nakawa na himila. Ila baho du loyawene kahola himila, Hagali nakaluka kumbeza mkulu wake Salai. 5 Salai nakamlonjela Abulamu, “Hegwe yokuwala kwa wihe wondilinguditigwa! Heni nandikupa chitumagwa wa heni mdala, ila loyaholile himila du, heni ndiwa siwele munhu hameho hake. Mkulu Nguluwi nayataguse mbuli ya hegwe na heni!” 6 Ila Abulamu nakamlonjela Salai, “Chitumagwa wa hegwe mdala ka hasi ha ludali lwako, mditile kota louvigana.” Lelo Salai nakamgaza Hagali mbaka nakanyeleduka.
Ishimaeli kangupondigwa
7 Mhilisi wa Mkulu Nguluwi nakamfika Hagali hawele na nzasa ya mazi kuchiwala, nzasa iwele mnzila kulutila Shuli. 8 Mhilisi nakamuuza, “Hagali, chitumagwa mdala wa Salai, kwangulawa kohi na kwanguza kohi?” Hagali nakamwidichila, “Ndangumbilima Salai mkulu wa heni.” 9 Yula mhilisi wa Mkulu Nguluwi nakamlonjela Hagali, “Hiluche kwa mkulu wa hegwe Salai na umhulichize heye.” 10 Kwa ago geng'ha, mhilisi wa Mkulu Nguluwi nakamlonjela Hagali, “Ndokonjezela lulelo lwako mbaka walemwele kuwazigwa kwa winji wa hewo.” 11 Hamba ayo mhilisi wa Mkulu Nguluwi nakamlonjela,
“Hegwe kuna himila na koponda mwana mlume,
komchema itagwa lyake Ishimaeli*Ishimaeli Kwa Chiebulaniya ndo kota Nguluwi kanguhulika.,
mina Mkulu Nguluwi nakalola kugaya kwa hegwe.
12 Ishimaeli kochikala kota idogowi lya kisolo,
kowa mng'honyo wa chila munhu,
na chila munhu kowa yamwihilwe.
Kochikala yawele mwihe wa ivyazi lyake.”
13 Lelo Hagali nakampa itagwa Mkulu Nguluwi loyasimile na heye ako, “Hegwe ndo Nguluwi yalingumbona heni” Kwa vila nakejesa, “Ndangukomya aha ndimona heye yalingumbona heni.” 14 Ndo mina lila izimbo lyanguchemigwa Beeli-lahai-loi†Beeli-lahai-loi Mina ndo izimbo lya yula yawele mkomu na yalingumbona heni.. Izimbo ali lya hagati ha Kadeshi na Beledi.
15 Hagali nakampondela Abulamu mwana mlume. Abulamu nakamchema mwana ayo Ishimaeli. 16 Abulamu nayali na miyaka makumi nane na sita, mhela Hagali naloyampondile Ishimaeli.