21
Kusumya ako Holima
1 Mndewa yumwe Mkanaani wa Aladi nayawele yochikala ako Negebu, navyoyahuliche mbuli ayi kota Waisilaeli nawali wokuya kwa nzila ya Atalimu, nakaluta kuwatowa, nakawahola wamwe wa hewo. 2 Aho Waisilaeli nawamlahila Mkulu Nguluwi wolonga, “Wone kowawika wanhu wano kuli moko ga hetwe, lelo tojidumya ng'hatu miji ja hewo.” 3 Mkulu Nguluwi nakahulika kulanda kwa hewo, nakawadita wawasumye Wakanaani. Waisilaeli nawawadumya ng'hatu Wakanaani hamwe na miji ja hewo. Ahyo honhu aho nahachemigwa Holima*Holima Kwa Chiebulaniya yanguzeleka kota kubagamiza..
Izoka lya shaba
4 Waisilaeli nawaluka majendo kulawa chidunda cha Holi, nawakola nzila ilingulutila Bahali ya Shamu leka waizungulute isi ya Edomu. Ila lowawele mnzila, wanhu nawagozola. 5 Lelo nawaluka kuwang'ung'utila Nguluwi na Musa, wolonga, “Lekachoni namtulavya kula Misili leka tubagame aku kuchiwala? Aku kwa haduhu mazi ne chilyo, natwe natutoka kwa mana ayi chakachaka.”
6 Aho Mkulu Nguluwi nakegala mizoka jiwele na dunga hali wanhu, najiwaluma wanhu wenji mbaka Waisilaeli wenji kahi nawabagama. 7 Lelo wanhu nawamlutila Musa, nawamlonjela, “Natudita gehile kwa kuwang'ung'utila hegwe na Mkulu Nguluwi. Mlande Mkulu Nguluwi yatusile mizoka aji.” Ahyo, Musa nakawalandila wanhu. 8 Ahyo, na heye Mkulu Nguluwi nakamlonjela Musa, “Gongomanya izoka lya shaba, lininize mchanya mwa igodi. Munhu yoneche yolumigwa na izoka, yolilola izoka alyo lya shaba, kowa mkomu.” 9 Lelo Musa nakagongomanya izoka lya shaba, nakalininiza kuli izengo. Chila munhu yoyalumigwe na izoka loyalilolile izoka alyo lya shaba, nakawa mkomu.
Majendo kuza ibindi lya Wamoabu
10 Waisilaeli nawalutilila na majendo ga hewo, nawawika kambi ako Oboti. 11 Kulawa ako Oboti, nawali mmajendo mbaka nawafika Iye-Abalimu, kuli kuchiwala ubanzi wa kolilawilaga isanya mwa Moabu. 12 Kulawa ako nawaluta na kuwika kambi ya hewo kuli ibindi lya Seledi. 13 Kulawa ako nawaluta mbaka kasikazini mwa lwanda lwa Alinoni, nawawika kambi ya hewo, kuwele mazi nagabubujikaga kulawa isi ya Waamoli na kukola kuli kuchiwala. Lwanda lwa Alinoni nalwali ndo mbaka hali Wamoabu na Waamoli. 14 Kwa chiwalo acho, nayandichigwa kuli chitabu cha ngondo ya Mkulu Nguluwi.
“Muji wa Wahebu kuli isi ya Sufa,
na mibindi ja Alinoni
15 na kuli viduliko vya mibindi
ulingifika mbaka kuli muji wa Ali,
na kulutila kuli mbaka mwa Moabu.”
16 Kulawa ako, Waisilaeli nawali mmajendo mbaka Beeli, mina ndo izimbo liwele Mkulu Nguluwi nakamlonjela Musa, “Wakungajize wanhu hamwe na heni ndowapa mazi.” 17 Aho Waisilaeli nawemba lwimbo alu.
“Bogome mazi gwa izimbo! Muyimbile!
18 Izimbo lyolibawigwe na wakulu,
libawigwe ng'hatu na vilongozi
kwa ng'hweku za hewo na mikongojo.”
Kulawa kuchiwala, nawali mmajendo mbaka ako Matana, 19 kulawa Matana nawaluta mbaka Nahalieli na kulawa Nahalieli nawaluta mbaka Bamoti, 20 na kulawa Bamoti nawaluta mbaka kuli ibindi lilingwinjila isi ya Moabu, kuli chinhembenhembe cha chidunda cha Pisiga, chilingulola kuli kuchiwala.
Waisilaeli wanguwasumya wandewa Sihoni na Ogu
(Kukumbuchila 2:26-3:1)
21 Waisilaeli nawamhilichila usenga mndewa wa Waamoli yalinguchemigwa Sihoni, usenga awu, 22 “Utukundize tukole kuli isi ya hegwe, hatuluta hebu kula kufungo na kwinjila kuli migunda ama kuli migunda ja mizabibu ne kunwa mazi ga mizimbo ja hemwe. Tokola kuli nzila ng'hulu hela ya mndewa mbaka hotuloka isi ya hegwe.” 23 Ila Sihoni hambe yawakundize wanhu wa Isilaeli wakole kuli isi ya heye. Nakawakungajiza wanhu wa heye, nakaluta Yahasi kuchiwala kuwatowa Waisilaeli. 24 Ila Waisilaeli nawamkopola, nawaihola isi ya heye kulawa lwanda lwa Alinoni mbaka Yaboki, mina mbaka wa isi ya Waamoni nawali ukwamililwa ng'hatu. 25 Waisilaeli nawajihola miji aji jeng'ha na hewo nawekala kuli miji ja Waamoli hamwe na muji wa Heshiboni na vijiji vyake vyeng'ha. 26 Heshiboni nawali muji wa Sihoni, yawele mndewa wa Waamoli, yetowile na mndewa wa Moabu iwele aho hamwande, Sihoni nakaihola isi ya heye yeng'ha mbaka kuli lwanda lwa Alinoni. 27 Ndo mina walingwimba wa hetwe wangwimba.
“Muye Heshiboni na kuzenga.
Muji wa Sihoni nauzenjigwe na kwimizwa nzinzili.
28 Mina chiluli nachilawa Heshiboni,
milapi ja chiluli najilawa kuli muji wa Sihoni,
nakuudumya muji wa Ali wa Moabu,
na kuvidumya vidunda vya lwanda lwa Alinoni.
29 Mochona wanhu wa Moabu!
Namdumigwa, hemwe wanhu wa mlungu Kemoshi!
Nakuwadita wana wa hegwe walume wawe wajenzi,
wahinza wa hegwe nakuwaleka waholigwe wapogozi wa ngondo
kwa Sihoni, mndewa wa Amoli.
30 Ila lelo walelwa wa hewo nawadumigwa,
kulawa Heshiboni mbaka Diboni,
kulawa Nashimu mbaka Nofa, behi na Medeba.”
31 Lelo Waisilaeli nawekala kuli isi ya Waamoli. 32 Hamba Musa nakalajiza wanhu kuupugajiza muji wa Yaseli, nawauhola hamwe na vijiji vyake vyeng'ha, nawawawinga Waamoli nawawele wochikala amo.
33 Waisilaeli nawahinduka na kuluta kuli nzila ya kuluta Bashani. Mndewa Ogu wa Bashani nakalawa na wanhu wa heye kuwatowa ako Edileyi. 34 Ila Mkulu Nguluwi nakamlonjela Musa, “Uleche kumdumba mina ndimuwika mmoko mwako hamwe na wanhu wa heye weng'ha na isi ya heye yeng'ha. Komditila kota vyoumditile Sihoni, mndewa wa Waamoli, yawele yochikala ako Heshiboni.” 35 Lelo Waisilaeli nawamkopola Ogu na wana wa heye weng'ha na wanhu wa heye weng'ha na kuwadumya, haponile ne munhu yoneche. Hamba nawaihola isi ya heye.