34
Mbaka ja isi ya Kanaani
1 Mkulu Nguluwi nakamlonjela Musa, 2 “Walonjele Waisilaeli ulonga kota homkwinjila Kanaani, isi iwele ndanguwapa iwe ya hemwe, mbaka ja honhu ha hemwe heng'ha jowa kota vyoili. 3 Ubanzi wa kusini mbaka wa hemwe wowa kulawila kuchiwala ako Sini kukolela ubanzi wa Edomu. Wokwaluchila kolizinjilaga isanya ubanzi wa kusini koidumile Bahali ya Mwino. 4 Hamba wokolela kusini kuluta kula Akilabimu na kukolela Sini mbaka Kadeshi-balineya, ubanzi wa kusini. Kulawila aho, mbaka wokola mbaka Hasali-adali na kuza mbaka Asimoni. 5 Kulawila Asimoni wokola kuza kuli kalwanda ka Misili kuwele na mbaka wa Misili na kumalila kuli bahali ya Mediteleniyani.
6 “Mbaka wa hemwe wa ubanzi wa kolizinjilaga isanya wowa bahali ya Mediteleniyani.
7 “Mbaka wa hemwe wa ubanzi wa kasikazini wowa kota ahi, kulawa bahali ya Mediteleniyani, wogoloka kulutilila mbaka kuli chidunda cha Holi. 8 Kulawila chidunda cha Holi, wogoloka kulutilila mbaka Hamati na kulutilila mbaka ako Sedadi 9 na kukola mbaka Sifuloni na kumalila Hasali-enani, awo ndo wowa mbaka wa hemwe, ubanzi wa kasikazini.
10 “Mbaka wa hemwe ubanzi wa kolilawilaga isanya mouwika kulawila Hasali-enani mbaka Shefamu. 11 Kulawila Shefamu wogoloka kulutilila kusini mbaka Libula, kolilawilaga isanya kwa Aini, hamba mbaka awo woluta hasi mbaka kidulika kwa kolilawilaga isanya kwa ilamba lya Galilaya, 12 hamba wowinza lwanda lwa Yolodani mbaka Bahali ya Mwino. Ayo ndo yowa isi ya hegwe kota mbaka vyouli.”
13 Lelo Musa nakawalajiza Waisilaeli, “Ayi ndo isi yomuihalila kwa kutowa simbi, isi iwele Mkulu Nguluwi nakalajiza zipegwe nhanzi tisa na nusu. 14 Nhanzi ya Lubeni na ya Gadi, na nusu ya nhanzi ya Manase zipegwa uhalizi wa hewo kwa kiwhana na winji wa ivyazi lya hewo. 15 Nhanzi azo mbili na nusu nazipegwa uhalizi wa hewo kumwambu mwa lwanda lwa Yolodani ubanzi ya kolilingulawila isanya, habehi na Yeliko.”
Vilongozi wawele wololela kigawila honhu ha isi
16 Mkulu Nguluwi nakamlonjela Musa, 17 “Mtambika Eleasali na Yoshua mwana wa Nuni ndo wowagawila wanhu isi, iwe ya hewo. 18 Kohola kahi chilongozi yumwe kulawila chila nhanzi kukutanza kuli kugawanula isi. 19 Aga ndo matagwa ga hewo.
“Kulawila nhanzi ya Yuda, nayali Kalebu mwana wa Yefune.
20 Kulawila nhanzi ya Simeoni, nayali Shemueli mwana wa Amihudi.
21 Kulawila nhanzi ya Benjamini, nayali Elidadi mwana wa Kisiloni.
22 Kulawila nhanzi ya Dani, nayali Buki mwana wa Yoguli.
23 Kulawila nhanzi ya Manase mwanage Yusufu, nayali Hanieli mwana wa Efodi.
24 Kulawila nhanzi ya Efulaimu, mwanage Yusufu, nayali Kemueli mwana wa Shifutani.
25 Kulawila nhanzi ya Sebuluni, nayali Elisafani mwana wa Palinaki.
26 Kulawila nhanzi ya Isakali, nayali Palitieli mwana wa Asani.
27 Kulawila nhanzi ya Asheli, nayali Ahihudi mwana wa Shelomi.
28 Kulawila nhanzi ya Nafutali, nayali Pedaheli mwana wa Amihudi.”
29 Awa ndo wanhu wawele Mkulu Nguluwi nakawahagula wawagawile Waisilaeli isi ya Kanaani iwe ya hewo.