2
Yaubada bonana yana kibababala faꞋina kanavenogalena.
1 Yaubada yana nuwanuwa Natuna awane gihawavemogatalena faꞋina, Yaubada bonana kanogalina-ma nuwadeya kanasena be kanakidonena. Hidede amine kanakidonena be bolimana waka maꞋinuwana maꞋinuwana giꞋaluꞋalugena amine, Bana bonana keke nuwada maꞋinuwana maꞋinuwana ginauluꞋulu. 2 Boi tuwai-moꞋena Yaubada yana vehimeya lobama ana tovenuwaꞋata awadiya kaliva lakahina ana egana Mosese givelena. TovenuwaꞋata awadiya gilakayemu ada au gahe velemoꞋena ma kahalamanena, ada hai kaliva mena vehimeyai-nadi giyawelina o kaꞋi gikilowena, medema yana dewa fatana higa matahiwadi ginuhagana. 3 Atu tova adamoya keke lobama ana tovenuwaꞋata au Kaiwabu Yesu kibababala ana eda givehawaleda. Mena kibababala ma gaitoma lakahina. KaꞋi Kaiwabu yana gahe kibababala faꞋina kanaluhegehegena digo, keke adafaiweya yada dewa ana laufata kanaꞋoseni, keke-moꞋa. Bana Kaiwabu Yesu kibababala ana eda faꞋina gimidivehawala, ada muliya badi yana vehawala hinogalina-ma yana gahe hiꞋalakakilina. 4 Ada keke badi tomadunogalagaga hidaꞋalakakila, au kadu Yaubada Tauna mena gahe kibababala faꞋina au velemoꞋena giseyemaunena. FaꞋina BanaꞋe nimana ana iyaꞋiyaya giseyemaunedi, ada abaveyaulowoga kadu aituha fifiwalana tulina tulina gifaisewadi. Meda anafaiweya Tauna yana nuwanuwa amine AluꞋaluwa Mahalina yana abavetala, higa faiwala tulina tulina tovetumagana agaideya gifolakena be kanahalamanena yana kibababala au velemoꞋena. Hi 12:25 Mk 16:20
Kaliva ana egana Yesu yana kaiwabu faꞋina.
5 Keke gavana faꞋina tu kaliva yada miyami aimo aituha mulina ginalakayemu againe faꞋina galulukahihi. Yada miyami mena aituheya faꞋina Yaubada keke lobama ana tovenuwaꞋata agaidiya gidagahe gidagayo, “Kaliva yadi miyami aimo aituha mulina ginalakayemu againe omi wanavehimeyena.” 6 Lobama ana tovenuwaꞋata badi keke gidasedi tovehimeya aimo aituha mulina faꞋina, tu Veyao Tuwaina ana bukiya gahe saꞋeyana gidadauda higa vaita kaliva saꞋeyana Yaubada againe gidagahe gidagayo,
Ime tomiyababi au kabisomeyao.
Kabisomeyao tu gavadi-yo unuwa-nunauyema?
Ime kaliva ama egana keke lakahina
tu tova moyaꞋaina uhinehinekalikaliyema.
7-8 Ime kabisomeyao nonogana ukivekaiwabuma.
Lobama ana tovenuwaꞋata kikaiwabudiyao
amine ime kaliva kadu kikaiwabumeyao.
Atu badi yadi kaiwabu wai ginagona,
ime yama kaiwabu maꞋita wai gimulina.
E, ime kaliva ama egana lakahina usena,
kadu yama kaiwabu lakahina uvelema.
Ada ime agaimeya ugahe ugayo,
Gaitoma moyaꞋaidi wanavehimeyedi.
Au hidedemi Veyao Tuwaina ana buki gigahe. Ada keke vaita gidagahe ide kaliva gaitoma tufona kadavehimeyeni. Au gigahe vaita gaitoma moyaꞋaina kanavehimeyena. Atu tova adamoya keke gaitoma moyaꞋaina agevavadeya kadaꞋitani. 9 Keke gaitoma moyaꞋaina agevavadeya kadaꞋitani, tu kaliva saꞋeyana higa Yesu kaꞋitaꞋitana. Yesu kaliva kikaiwabu-moꞋena, lobama ana tovenuwaꞋata gikaiwabuhegedi tu Yaubada yana vehimeya againe gihobuꞋela be yana kaiwabu maꞋita giyewa, ada tova kaliꞋuhona lobama ana tovenuwaꞋata maꞋita hikaiwabuhegena. Yesu yana kaiwabu au hidede amine giyewa be higa Yaubada yana nuwadoga againe ide kaliva moyaꞋaida faꞋideya ginaꞋalika. Ada alika ana aulolo golagolana ginuhagana faꞋina, Yaubada kikaiwabu lakahina givelena kadu ana egana gikilakahi-moꞋena. Ada au tova adamoya ide Yesu yana wakaiwabu lakahina kaꞋitaꞋitana. Sam 8:4-6 1Ko 15:24-26 Fl 2:8-9
Yesu ada nuya giꞋosena be givekaliva faꞋina, ada
vita moyaꞋaina agaidiya giveluvelugada.
10 Tu gaitoma moyaꞋaina inubana Bana Yaubada ada Tauna faꞋine gibubudi. BanaꞋe nuwanuwana ide kaliva yana abageya ginavegaꞋauleda be higa natuneyao moyaꞋaida yana mahalina veꞋakinamanamalina kananuhagana. Ide tokoyona faꞋina keke adafata Yaubada yana abageya kanaluku. Tu Yesu mena ada kibababala ana eda ana toꞋihagihagi. Yesu kibababala ana faisewa ginahalamane-hagihagiyena faꞋina, Yaubada givehimeya be Yesu aulolo tagiya ginanuhagana. Yana aulolo yana tagiya againe yana halamana kaliva ada kibababala faꞋina ginatubuga-moꞋa be anafaiweya ginakibababaleda. Ada mena Yaubada yana vehimeya aulolo tagiya faꞋina ana ita ma gilubodana. 11 Yesu aseꞋaseda gikola-yo gisevehaileda. Bana tosevehaila kadu ide gisevehaileda amanadi Tamada au saꞋeyana. BanaꞋe ma Yaubada Natuna kikaiwabu-moꞋena nonogana ide gihawavetobohiyaneda, faꞋina Yaubada yana yoꞋogaga agaidiya kaluku-yo Tamada au saꞋeyana. 12 E, yana gahe Veyao Tuwaina ana bukiya gidadauda gigayo,
A egana kaikweyao agaidiya
ganahawavemogatalena be O hinahalamane.
Tovetumagana adi yoꞋo hinafadiya
O ganakweli-davadava.
13 Kadu gahe saꞋeyana ma gigayo,
Iya tauku Yaubada againe ganavetumagana.
Kadu gahe saꞋeyana gigayo,
WeꞋa Yaubada natuneyao giveleku-ma
iya badi buye amimiyami.
Yesu ide buye kavetobohiyana ma ana gahegahe Veyao Tuwaina ana buki againe au hidede amine.
14 Atu mena Yaubada natuneyao giyakahina-ma, ide kaliva vevine. Ada ide tomiyababi wawowoda wadayagida faꞋina, kadu Yesu ada nuya giꞋosena be givekaliva wawowona wadayagina. E, givekaliva be higa yana alika againe Setani alika giveꞋinubena-ma ginaluyawelina be ginamididi-havagi yo Setani yana faiwala ginahavaina. 15 Kaliva vevine moyaꞋaidi alika faꞋina himatamatauta, higa vaita alika ana matauta gidayogodi. Yesu giꞋalika be Setani yana faiwala ginayawelina, ada gaveyao moyaꞋaidi alika faꞋina tova moyaꞋaina himatamatauta, medema ginakiyaudi be yadi matauta ginahavaina. 16 Yesu keke lobama ana tovenuwaꞋata adi nuya gidaꞋoseni be ginavelugadi faꞋina, keke. Ide kaliva Abelahamo bwaneneneyao ada nuya giꞋosena be ginavelugada faꞋina. 17 Ide taineyao ginavelugada faꞋina, gilubodana be kaliva ada nuya gidaꞋosena ada ide babiya kamimiyami amine Bana gidamiyami be higa vaita abaveyao ana tofaisewa kikaiwabuna ide faꞋideya ginafaisewa. Ide ada ayauna moyaꞋaina giꞋayaunena faꞋina, faisewai-nadi Bana anafaiweya ginaꞋabi-hagihagiyena, kadu yana faisewa againe ginahinekalikaliyeda. Tova moyaꞋaina Yaubada matane veyao ana eda againe ginagonagoyeda be higa Bana Yaubada buye kanaveyao faꞋina. E, Bana ide taineyao amine givekaliva faꞋina, anafaiweya yada koyona ana laufata giyawelini-yo Yaubada yana ilaꞋa agaideya gihavaina. 18 Setani Yesu giꞋaladibidibiyena againe aladibidibi ana faiwala kadu ana aulolo giꞋayaunena. Mena aladibidibi ana vita moyaꞋaina giꞋayaunena tu gifaiwalahegehegena faꞋina, aladibidibi ide agaideya ginalakayemu ana toveya, Bana anafaiweya ginavelugada. Hi 5:8-9 Mk 3:35 Sam 22:22 Ais 8:17-18 1Yn 3:8 Hi 4:15, Md 4:1-11