1 “Iyyoobaa, ha77i taani yootiyoogaa siya; ta giyoobaa ubbaakka ezgga. 2 Taani haasayanau giigaas; ta qaalatikka ta inxxarssaa xeeran de7oosona. 3 Ta haasayiyo qaalati ta wozanaa suuretettaa qonccissoosona; taani eriyoogaa ta inxxarssai tumatettan haasayees. 4 Tana Xoossaa Ayyaanai medhdhiis; Ubbaa Danddayiya Xoossaa shemppoi taayyo de7uwaa immiis. 5 Neeni danddayiyaabaa gidikko, taayyo zaaruwaa imma; nena giigissada, tanaara gaitta.

6 “Be7a, taani Xoossaa sinttan ne mala; qassi taanikka urqqaappe merettaas. 7 Neeni taassi yayyiyo gaasoi baawa; taani nena naaqqikke.

8 “Ne haasayaa ubbaa taani ezggaidda takkaas; neeni hagaadan yaagishin siyaas; 9 ‘Taani geeshshanne boree bainna asa; taani xillonne nagara oottabeenna asa. 10 SHin Xoossai tana qaxxayanau gaasuwaa koyees; i tana ba morkkedan qoodees. 11 Ta tohuwaa toho biratan qachchees; taani tanggiyo tanggo ubbaakka i wochchees’ yaagadasa.

12 “Iyyoobaa, neeni ha haasayan likke gidakka! Ane taani neeyyo yootais; Xoossai asappe aadhdhees. 13 Neeni, ‘Xoossai taani haasayido haasayau zaaruwaa immenna’ gaada, aissi aara palamettai? 14 Asi akeekennappe attin, Xoossai ha ogiyaarakka he ogiyaarakka haasayees.

15 “Asai qammi hiixan zin77idi, xiskkuwaa kairido wode, Xoossai aimuwaaninne ajjuutan haasayees. 16 He wode asai siyanaadan haittaa dooyees; ba seerankka i eta daganttees. 17 Yaatidi asi nagaraa oottennaadan teqqees; otoruwaakka asaappe diggees. 18 Xoossai asaa bashshaappe ashshees; haiquwaappekka naagees.

19 “Xoossai sakkiya harggiyan asaa oittidikka, asi ba balaappe simmanaadan seerees. 20 Hegaadan hanidi, harggida uri kattaa ixxees; daro mal77o qumaikka a sheneyees. 21 A ashoikka gilqqidi wurees; a bollaikka melin, meqettai qoodettees. 22 I haiqqanaunne moogettanau hanees.

23 “Asau suure ogiyaa bessiya, sha7an qoodettiya kiitanchchatuppe issoi ayyo gaannatanau yiyaakko, 24 yiidikka ayyo qarettidi, ‘I duufuwaa gelennaadan a ashsha. Taani ayyo woziyoobaa demmaas’ yaagiyaakko, 25 a bollai yelagana; a yelagatettaa wolqqaikka ayyo simmana. 26 He bitanee Xoossaa woossana; woossin Xoossai a woosaa siyana. Xoossai ayyo a xillotettaa zaariyo gishshau, i ufaissan Xoossaassi goinnana. 27 He wode asaa sinttan i hagaadan yaagidi yexxana; ‘Taani nagaraa oottaas; suurebaakka geellayaas; shin Xoossai ta mooruwaadan taayyo qanxxibeenna. 28 Taani duufuwan gelennaadan tana ashshiis; hekko, ha77i paxa de7ada, poo7uwaa be7ais’ yaagana.

29 “Be7ite, Xoossai asaassi hagaa ubbaa zaari zaaridi oottees; 30 hegaadan oottidi, asaa duufuwan geliyoogaappe ashshees; de7uwan i ufaittanaadan oottees.

31 “Simmi Iyyoobaa, taani yootiyoogaa ezggada siya. Ane neeni co77u gin, taani haasayais. 32 Neeni haasayanau koyiyoobi de7ikko, taayyo haasaya. Taani neeni xillo gidiyoogaa bessanau koyais. 33 Hegee xayikko, co77u gaada, taani haasayiyoogaa siya. Nena taani aadhdhida eratettaa tamaarissana” yaagiis.