Kiwiiniꞌo Paul Kaaritan
Corinth Sannao Atiꞌo
Diꞌoraz kaarita dauaꞌo
Diꞌoraz kaarita apostle Paul wuruꞌu saadaꞌoraz. Usaadan diꞌoraꞌa kiwiitapaꞌo pakaaritan Corinth sannao ati, unaꞌian donoꞌo donoi Ephesus ii.
Diꞌoraz kaarita saada-kao mishidainao atiꞌo, mashaapainaouz Corinth ii. Wuruꞌu Corinth kii-kizaiz, udaruꞌo donoi. Naꞌii kainaꞌa pabiꞌinaaka pidannao mashaapan, naꞌiki pabiꞌinaakaꞌo ĩkaduz kida kapam. Pidannao mashaapainao naꞌii pabiꞌinaaka ĩshaꞌapatan aimaakan pamashaapa-kinaa nii naꞌiki ĩikoda-kinaa nii papuraatan.
Wuruꞌu pidannao, mashaapainaouz donoi Corinth ii iribaꞌo ĩtominkarunnao. Naꞌiki pabiꞌinaaka oii kidaꞌo aimaakan shaꞌapaapa-kao naꞌii kapam. Aonaa ĩmashaapan Tominkaru aipan kawanaꞌati.
Aizii Paul saadanuz pakaaritan mishidainao ati, mashaapainaouz naꞌii, uabatan idi naꞌapam mishidainao aonaa ĩmashaapan kaiman. Uabata naꞌapam ĩbuutaakapan, naꞌapam ĩkaakapaakan naꞌiki ĩnaꞌakan pamin-mishidannao kootoopauzonao diꞌiti. Kainaꞌa mishidainao taapan pidan kaminshuꞌuinpaꞌo pabiꞌi, aonaa ĩkakinaotan wuruꞌu pidanuz. Uruu idi Paul kakinaotan naꞌiki utominapa-kidan ĩdyaun naꞌapam mishidainao aiapa-kao ĩmashaapan. Naꞌiki ukian ĩꞌati marii kizi ĩkonaukii-kidan Tominkaru ipai aimaakan ĩshaꞌapatanii idaꞌan. Naꞌiki ĩshaꞌapata kizi ipai aimaakan kamarainpan-karu idaꞌan, ĩmaꞌozakada-kinaa nii pamin-mishidannao. Utukapa-kidan kapam ĩꞌati aimaakan umanawunuꞌo. Ukian, “Aizii diꞌi kainaꞌa idikinaudaꞌu aimaakan karikaonanuꞌo nii unaꞌan: uruu wuruꞌu mishida-karu, naꞌiki wataapanuz wanyukunuu maꞌozaka Tominkaru shaꞌapatan niꞌo dauꞌan waꞌati, naꞌiki kamarainpan-karu. Mazan wuruꞌu aimaakan umanawunuꞌoraz wunao idikinaudaꞌuinao bii ikiꞌoraz, uruu wuruꞌu kamarainpan-karuz paꞌan.” (1 Corinthians 13:13)
Paul kakinaotan ĩdyaun kapam naꞌapam kizi ĩnaꞌakinan ĩbaokopatinan dono choochi ii. Ĩshaꞌapata kizi ipai aimaakan kaiman naꞌiki sakitapa. Marii kizi mishidainao taapan umanawunuꞌo nii wuruꞌu panikanuz bread naꞌiki ĩtuzanuz wine panyukunuitapa-kinaaz Naobanai Jesus mawakan. Naꞌiki powaꞌa zii Paul kowaadan ĩꞌati Kaimanaꞌo Doronaa taanii kida dauꞌu, pidan kaꞌiita-kinaa pashaꞌapatan kaudin-kizai Tominkaru ati. Naꞌiki ukakuwaapan kadishita-karu dauꞌu diinaꞌitiꞌi. Ukowaadan ĩꞌati Christ mishiꞌo ukadishita-kida-kao mawaka-karu diꞌiki, ukauꞌan mishidainao mawakainaouznaa kadishita-kida-kao nii kapam diinaꞌitiꞌi. Naꞌiki ukowaadan naꞌapam nii wananaa wakadishitan dono diinaꞌitiꞌi.
Paul kowaada-kidan kapam mishidainao ati, Corinth sannaouz, pamorowautaꞌazon dauꞌan ĩꞌidiꞌiti.
Paul wuruꞌu kiwiitapaꞌoraz ukakuwaapan Kaimanaꞌo Kuwai dauꞌu naꞌii sannao ati. Ĩabatan idaꞌanaꞌo ukuwaa Christ Jesus dauaꞌo, wuruꞌu ĩmishidanuz.
Kaarita buutinpan kida
Kaarita Dauaꞌo 1:1-9
Mishidainao buutaakapan dauaꞌo 1:10—4:21
Kaminshuꞌuinapa-karu naꞌiki mazida-karu dauaꞌo 5:1—7:40
Toma-kariwai tominkarunao 8:1—11:1
Mishidainao baokopatinan dono 11:2—11:34
Tominkaru taan mishidainao kaudin-kinaa nii 12:1—14:40
Mishidainao kadishita-kida-kao dauaꞌo 15:1-58
Puraata zaamata-kao dauaꞌo patakaꞌutinainao ati 16:1-4
Paul katokontan pakaaritan 16:5-24
1
Diꞌoraz kaarita õgaru Paul diꞌikiꞌo, zaamata-kariwaiz Tominkaru aipan kawanaꞌati apostle nii Christ Jesus ati, naꞌiki waꞌinawuzu Sosthenes diꞌikiꞌo kapam. Mishidainao Tominkaru atiꞌo Corinth iainaouz, Tominkaru buutaniinaouz papidanannao nii, naꞌiki usaabaaniinaouz kaiman paꞌati, papidanannao nii Christ Jesus idaꞌan. Naꞌapa uzaamatan kawan ipai pidannao ipai amazada kawanaꞌati, dopiaꞌoraz waNaobanaa Jesus Christ ati, uruu ĩnao Naobanaa kapam.
Õtoriinpan Tominkaru waDaru naꞌiki Naobanai Jesus Christ ati, marii kizi ukamunanun unao ati naꞌiki utaan unyukunuu kaiman-kinaa nii.
Paul konaukii-kidan Tominkaru
Karikaonan õkowaadauzon õTominkarun ati naꞌapam õkonaukian unao dauꞌan, ushaꞌapanum kauꞌan ushaꞌapatan idi kaiman kidaꞌo aimaakan unao ati Christ Jesus idaꞌan. Ubaudaꞌapatinpan idaꞌan Christ tuma, Tominkaru taa unao ati ukaꞌiita-kinaa nii kida ushaꞌapatan iriba aimaakan paꞌati: unao aitapa-kinaa nii kaimanaiman wuruꞌu kuwaiz udauaꞌo naꞌiki ukowaada kiziz baokoinao ati. Uruu idaꞌanaꞌo wuruꞌu Tominkaru aida-kidan unao ati mishiꞌo wuruꞌu kuwaiz Christ dauaꞌoraz, wakowaadaniaz unao ati. Unaꞌapan kauꞌan, Tominkaru Doronaa taa unao kaꞌiita-kinaa nii ushaꞌapatan ipai kaudin-kizai, uzaudapan puꞌu kapam waNaobanaa Jesus Christ aidinan, uwaꞌatin dono powaꞌa ati imiꞌi baara ati. Tominkaru taapan nii kapam unao mishidanuzu maꞌozaka atii utokon iti, uruu idi unao, aonaꞌo nii oiaꞌo ikoda-kao uꞌidaꞌa wuru kamoo donoꞌo, waNaobanaa Jesus Christ kaawanuz powaꞌa ati. Tominkaru, mishiꞌo nii ushaꞌapatan aimaakan naꞌapa pakian kawanaꞌati, uruu wuruꞌu zaamataꞌoraz unao ubaokopatinapa-kizi uDani Jesus Christ tuma, waNaobanaaz.
Mishidainao Corinth iaꞌoraz buutaakapan dauaꞌo
10 Õiribannao, waNaobanaa Jesus Christ dyuudan õparadan uꞌati, naꞌiki tuukii õaipan uabatan õparadan. Patumaaka utaapa unyukunuu umin-mishidannao tuma, uruu aonaa kizi buutaaka-karu unao bii an. Kaimanaiman ubaudaꞌapatin, naꞌapa kida udiꞌitinapa aimaakan dauꞌu, naꞌiki ushaꞌapataꞌazoonii aimaakan kida dauꞌan. 11 Õiribannao, pabiꞌi pidannao Chloe dapu ikiinaouz kowaadan õꞌati kainaꞌa pidannao kashadaakapan unao bii an. 12 Kaikapaꞌo atiꞌo kaiwuruꞌu õkianuz: pabiꞌi kida unao, panaꞌa kida udiꞌitinpan umin-mishidannao ai. Baudaꞌapaꞌo kian, “Õgaru Paul pidanan,” baꞌoran kian, “Õgaru Apollos pidanan;” baꞌoran kian, “Õgaru Peter pidanan;” naꞌiki baꞌoran kian, “Õgaru Christ pidanan.”
13 Ubuutaakapan idaꞌan kaikapaꞌa, ubuutan kawanuꞌo Christ wuruꞌu. Paul mooko mawakaꞌoraz cross idaꞌa unao ati? Paul uu idaꞌanaꞌo mooko wuruꞌu unao chikaawunuu-kaoaz? 14 Kaiman manawun õꞌati, aonaan idi õchikaawunuuan pidannao unao bii iki, soo Crispus naꞌiki Gaius õchikaawunuunii. 15 Ukauꞌan aonaa turuu naꞌiaꞌoram pidan kian õgaru uu idaꞌanaꞌo uchikaawunuinan. 16 (Oo õaitapa, õchikaawunuunii mishi kapam Stephanas naꞌiki uiribannao, mashaapainaouz udapuꞌu; mazan aonaa õꞌitiiman õchikaawunuuan kainaꞌa baꞌoran pidan.) 17 Christ aonaa udyuudan õgaru chikaawunuupaꞌo nii, mazan kowaadapaꞌo nii paꞌan Kaimanaꞌoraz Kuwai, Christ mawakan dauaꞌoraz. Naꞌiki õkowaada kiziz mashaꞌapannaꞌo parada-karu idaꞌan. Õkaiwaan an mani parada-karu kida pidan aitapaaban kawanaꞌatiꞌo, konaunam mani õkuwaa ĩꞌati, mazan aonaꞌa naa mani kuwai Christ mawakan dauaꞌoraz cross idaꞌa kaiwainan maꞌozakaꞌo idaꞌan.
Tominkaru aitapaaban naꞌiki pidan aitapaaban dauaꞌo
18 Kuwai Christ mawakan dauaꞌoraz Cross paawaꞌa, madiwautapa-kaꞌo wunao pidannao tukapanuz, waziwadinpainaouz Tominkaru ai. Mazan waunao ati kazannaatapa-kariwainaouz, uruu paꞌan waaitapa-kinaa Tominkaru maꞌozakan. 19 Kotuaꞌoraz Tominkaru Paradan Saada-kariwaiz kian,
“Õtukapa-kidan nii naꞌapam aitapaabaꞌo pidannao
kakinaori kida madiwautapa-kaꞌo.
Naꞌiki õtukapa-kidan nii aonaa mishiꞌo manawun mani ĩaitapan
naꞌapam padiꞌitinpan aimaakan kida dauꞌan.”* Isaiah 29:4
20 Ukauꞌan, naꞌapam wakian pidannao aitapaabainao dauꞌan? Naꞌapam wakian kaaritapauzonao dauꞌan Jewnao kakinaori dauꞌu? Naꞌiki naꞌapam wakian wuruꞌu imiꞌi baara ainao pidannao dauꞌan, aitapainaouz panaꞌapatan pidannao nyukunuu paparadan idaꞌan? Tominkaru aida-kida naꞌapam pidannao aitapaabanuz, madiwautapa-kaꞌo karikaonan. 21 Tominkaru aitapaabaꞌo manawun, uruu idi aonaa utaapadan pidannao aitapan paugaru, wuru idaꞌanaꞌa ĩaitapaabanuz. Mazan kiiꞌan, paaipan ati paꞌan ukazannaatan pidannao mishidaꞌoraz Christ, wakowaadaniaz kuwai idaꞌan. Uruu kuwai pidannao aitapaabainao dakotaniaz madiwautapa-kaꞌo nii. 22 Jewnao, ĩaiapa Tominkaru shaꞌapatan naꞌiki uaida-kidan aimaakan umanawunuꞌo paꞌati, pamishida-kinaa nii wuruꞌu kuwaiz; naꞌiki Greeknao, ĩabataꞌazon kakuwaapa-karu aitapaaba-karu idaꞌan. 23 Aizii waunao, wakowaada Christ mawakanuz Cross idaꞌa; uruu kuwai aonaꞌo manawun Jewnao naudapan paabatan, naꞌiki Gentilenao Gentilenao: pidannao panaꞌaꞌo Jewnao ai. Putukapa kaarita tokon ii, Parada-karu Mashaꞌapannaada-kinao diꞌii. abatan uruu kuwai madiwautapa-kaꞌo karikaonan. 24 Mazan paꞌan wunao atiꞌi pidannao, Tominkaru zaamataniinaouz papidanannao nii, Jewnao naꞌiki Gentilenao, ipai ĩnao ati diꞌoraz kuwai Christ dauaꞌoraz, aida-kidaꞌo paꞌan naꞌapam Tominkaru maꞌozakan manawun, naꞌiki uaitapaaban manawun. 25 Pidannao kian wuruꞌu kuwai Tominkaru diꞌikiꞌoraz madiwautapa-kaꞌo, mazan uruu kuwai aida-kida Tominkaru powaꞌaꞌo zii uaitapaaban ĩnao aitapaaban ai. Naꞌiki ĩkian puꞌu wuruꞌu Tominkaru shaꞌapataniaz kapatiꞌo, mazan kiiꞌan wuruꞌu Tominkaru shaꞌapatanii kidaz, powaꞌaꞌo zii umaꞌozakan ĩnao maꞌozakan ai.
26 Aizii unyukunuitapa kanom daꞌi unao, õmin-mishidannao, Tominkaru zaamatan donoꞌoraz unao: aonaa iriba mani unao aitapaabaꞌo, pidan aitapaaban kaduz kawanaꞌati; aonaa iriba mani unao umanawunuꞌo; aonaa iriba mani unao dokozunnao umanawunuꞌo naobanainao. 27 Mazan Tominkaru zaamata paꞌan “maaitapin-kainao” pidannao kii-kiziz. Ĩnao idaꞌan uaida-kidan aonaa pidan zaamata-kao paaitapaaban dikin ii mani. Naꞌiki Tominkaru zaamatan pidannao aonaꞌoraz ĩmanawunun, aida-kidaꞌo nii aonaa pidan zaamata-kao umanawunun dikin ii mani. 28 Tominkaru zaamatan kashada-kariwai naꞌiki dakota-kariwainaouz aonaꞌo ĩmanawunun, soo aida-kidaꞌo nii paꞌan wunaouꞌu dakota-kariwainaouz umanawuniinao nii, aonaa mishiꞌo manawun mani ĩnao umanawunun. 29 Uruu idi aonaa turuu pidan atadinpan Tominkaru awun zaꞌa. 30 Mazan Tominkaru idaꞌanaꞌo karikaonan unao baudaꞌapatinapanuz Christ Jesus tuma; naꞌiki Tominkaru aitapaaban idaꞌan Christ kazannaatan waunao. Uruu Christ idaꞌanaꞌo Tominkaru dakotan waunao kaimanaꞌo nii, usaabaan waunao kaiman Tominkaru pidanannao nii, naꞌiki ukazannaatan waunao waꞌoian ai. 31 Ukauꞌan marii washaꞌapatinan Tominkaru Paradan Saadinpaꞌoraz kian kawanaꞌati, “Kanom atadinpaꞌazon an, marii uꞌatadinpan Naobanai shaꞌapaapanii dauꞌan.”

*1:19 Isaiah 29:4

1:23 Gentilenao: pidannao panaꞌaꞌo Jewnao ai. Putukapa kaarita tokon ii, Parada-karu Mashaꞌapannaada-kinao diꞌii.