Kiwiiniꞌo John Kaaritan
Diꞌoraz kaarita dauaꞌo
Apostle John saadanii diꞌoraꞌa kaarita pamin-mishidannao atiꞌo. Uruu naꞌiki baꞌoran apostlenao chiꞌikapaꞌo Jesus tuma umashaapankan dono imiꞌi baaraꞌa. Ukauꞌan ĩtukapanii uruu naꞌiki ĩabatanii uparadan. Diꞌoraꞌa pakaaritan idaꞌa, aonaa utominapa-kidan manawun mani mishidainao paꞌinaꞌo aimaakan dauꞌu. Mazan uaipan paꞌan ĩzaudinpan pidannao ai mariidapainaouz mishidainao. (1 John 2:26) Naꞌiki uaipan ĩaitapan mishiꞌo ĩzaamatan karikaonanuꞌo kakupa-karu. (1 John 5:13) Uruu idiꞌo umaꞌozakadan ĩnyukunuu karikaonan kizi ĩmashaapan Tominkaru ati.
John nyukunuu-kida pidannao ati naꞌapaꞌoram Tominkaru: uruu kanadaꞌo, aonaa naꞌitim oiaꞌo diza-kao uꞌai; uruu kamarainpanuꞌo, udyuuda paudani mawakan waunao dikin ii; uruu mishiꞌo, aonaa naꞌapainim umariidinan.
John kowaadan kaimanaiman naꞌapam pidan aitapan kainaꞌa paꞌidaꞌa Tominkaru diꞌikiꞌoraz karikaonanuꞌo kakupa-karu.
Kaarita buutinpan kida
Kaarita sakadin-kizi 1:1-4
Kandaꞌo-karuaꞌo naꞌiki marutaꞌo-karuaꞌo 1:5—2:29
Tominkaru dainao naꞌiki Satan dainao 3:1-24
Mishiꞌo naꞌiki aonaꞌo umishiin 4:1-6
Marainpaaka-karu 4:7-21
Oiaꞌo wazoota-kao mishida-karu idaꞌan 5:1-21
1
John aitapanii manawun
kakupa-kinai
kakupa-kinai
1 Diꞌoraz kaarita, Parada-karu kakupa-kinai dauaꞌo, uruu naꞌaꞌoraz naa amazada toma-kao uaꞌii. Waunao apostlenao abatanii uparadan naꞌiki watukapanii uruu paꞌidiꞌiti; wapishatanii uruu wakaꞌu idi. 2 Watukapanii wuruꞌu Kakupa-kinaiz ukaawankan dono pidan nii. Uruu idiꞌo wakakuwaapan udauꞌu unao ati. Wakowaadan uꞌati, uruu karikaonanuꞌo kakupa-kinai, uruu karikaonanuꞌo unaꞌauzon Tominkaru tuma, naꞌiki uruu aidinaꞌoraz pidannao ati. 3 Wakowaadan uꞌati watukapanii dauaꞌo, naꞌiki waabatanii dauaꞌo uruu dako iki, waaipan idi unyukunuu naꞌapa kidaakan kapam waunao tuma. Waunao, naꞌapa kidaakaꞌo wanyukunuu waDaru Tominkaru naꞌiki uDani Jesus Christ tuma. 4 Õsaadan diꞌoraꞌa kaarita õaipan idiꞌo wakonaukian baokopa unao tuma.
Mashaapa-karu dauaꞌo
kanadaꞌo-karuꞌu
kanadaꞌo-karuꞌu
5 Aizii kaikapaꞌo wuruꞌu kuwai waabataniaz Christ diꞌiki, naꞌiki uruu wuruꞌu wakowaadaniaz uꞌati: Tominkaru, uruu kanadaꞌo, aonaa marutaꞌo nii uꞌidaꞌa. 6 Ukauꞌan, wakian an, “Õgaru, naꞌapaꞌo õnyukunuu Tominkaru tuma,” mazan wamashaapan an pakawan zii marutaꞌo-karuꞌu, wamariidinan karikaonan wuruꞌu. Aonaa wamashaapan mishiꞌo kuwai kawanaꞌati. 7 Mazan wamashaapan an kanadaꞌo-karuꞌu, naꞌapa Tominkaru mashaapan kawan kanadaꞌo-karuꞌu, uruu mishiꞌo paꞌan wanyukunuu naꞌapa kidaakan wamin-mishidannao tuma. Naꞌiki uDani Jesus izain chikaa ipai daunuudaꞌu waꞌoian.
8 Aizii wakian an, “Aonaa oiaꞌo mani õgaru,” wamariidapan karikaonan wanyukunuu wuruꞌu, naꞌiki aonaa wataapan mishiꞌo kuwai. 9 Mazan wakowaadan an waꞌoian Tominkaru ati, umainaabatan nii waꞌoian kida, naꞌiki usoꞌotan nii waꞌai ipai washaꞌapatanii kida oiaꞌo. Ushaꞌapatan nii aimaakan sakitapa naꞌapa pakian kawanaꞌati. 10 Ukauꞌan wakian an, “Aonaa õshaꞌapatan oiaꞌo,” wadakotan Tominkaru mariidinauzonii wuruꞌu, naꞌiki aonaa uparadan nii wanyukunuu ii.