Kiwiiniꞌo Paul Kaaritan
Thessalonica Sannao Atiꞌo
Diꞌoraz kaarita dauaꞌo
Paul kakuwaatinankauzon dono Thessalonica ii, iriba pidannao mishidan Kaimanaꞌo Kuwai Jesus dauꞌu. Uruu idi iriba pidannao zaamatan Jesus panaobanaa nii. Gentilenao, wuruꞌu panaꞌainaouz Jewnao ai, ĩnao manawun iriba ĩmishidan. Sariapa Jewnao mamishida-kainaouz kuwai Jesus dauꞌu toꞌoran atii ĩwaatan Paul pawiizi iki. (Putukapa Acts 17:1-9 idaꞌa.) Mazan karikaonan daꞌi Paul diꞌitinpan naꞌiki tuukii unyukunuu kashaꞌoran pawaꞌakaniinaouz pidannao dauꞌan, paꞌinainao kidaz zii manawun ĩmishidan. Uruu idi udyuudan paminaudaꞌu Timothy, utukapanaka kizi naꞌapam mishidainao naꞌii. Uruu idiꞌo Timothy makonkauzon naꞌii.
Aizii ukaawan ĩnao diꞌiki, ukaawa-kida kaimanaꞌo kuwai ĩnao mishidainao dauꞌu. Uruu idi Paul saadan kaarita ĩꞌati, ĩtominapa-kinaa nii naꞌiki ĩmaꞌozakadin-kinaa nii. Naꞌiki pakaaritan idaꞌa ukowaada ĩꞌati naꞌapam pakonaukii-kidan Tominkaru tuukii manawun, ĩmishidapan idi naꞌiki ĩmarainpaakan idi pakawan. Naꞌiki unyukunuu-kida kapam ĩꞌati pakaduz dauꞌu naꞌapam umashaapauzon ĩtuma, umakonkauzon dono naꞌii. Naꞌiki ukowaada kapam ĩꞌati naꞌapam nii mishidainao mashaapan.
Naꞌiki pakaaritan idaꞌa udakoꞌatin mishidainao pishaanii kidaz Jesus waꞌatin dauꞌan. Naꞌiki ukakinaowan ĩdyaun pakaaritan idaꞌa, marii kizi pakawan ĩmashaapan kaiman, Tominkaru aipan kawanaꞌati. Ĩzaudinapa kiziꞌi naa Jesus Christ waꞌatin uaꞌii.
Kaarita buutinpan kida
Kaarita sakadinan 1:1
Konaukii-karu 1:2—3:13
Mashaapa-karu kaiman Tominkaru aipan kawanaꞌati 4:1-12
Zaudinapa-karu Naobanai Christ kaawan uaꞌii 4:13—5:11
Kakinaorii taa-kao 5:12-22
Kaarita katokonota-kao 5:23-28
1
1 Diꞌoraz kaarita õgaru Paul, Silas naꞌiki Timothy diꞌikiꞌo, ipai mishidainao atiꞌo, Thessalonica iainaouz, zaamatinpainaouz waDaru Tominkaru diꞌiti naꞌiki Naobanai Jesus Christ diꞌiti. Watoriinpan marii kizi Tominkaru kamunanun unao ati, naꞌiki utaa kizi unyukunuu kaiman-kinaa nii.
Mishidainao Thessalonica sannao
dauaꞌo
dauaꞌo
2-3 Karikaonan daꞌi, “Kaiman pugaru” wakian Tominkaru ati unao dauꞌan, naꞌiki karikaonan kapam watoriinpan waDaru Tominkaru ati unao dauꞌan. Aizii watoriinpan an, karikaonan wanyukunuitapan ipai wuruꞌu ushaꞌapatanii kidaz. Umishidan idi Tominkaru, minziiwa ukaudinan uꞌati. Naꞌiki dadara mishi ukaudinan ukaminkaꞌuaakan ukamarainapanun idi manawun. Naꞌiki maꞌozaka mishi utaapan unyukunuu, ubaiatan puꞌu kashaꞌoraꞌo naꞌiki dadara kidaꞌo aimaakan, ushaꞌapanum kauꞌan uaitapan idi naꞌiki umishidan idi kainiꞌikiꞌo nii waNaobanaa Jesus Christ waꞌatin.
4 Wairibannao, waaitapa tuukii Tominkaru marainpan unao, naꞌiki mishiꞌo uzaamatan unao paꞌidiwau nii. 5 Ushaꞌapanum kauꞌan tawuru donoꞌo, uruꞌoraz zii wanaꞌakauzon Kaimanaꞌo Kuwai unao diꞌiti, tuukii umishidanuzu. Ushaꞌapanum kauꞌan Tominkaru maꞌozakadapan idiꞌo waparadan Kaimanaꞌo Doronaa idaꞌan, naꞌiki waaitapa mishiꞌo wuruꞌu wakowaadapaniaz kuwai, aonaa waparadan mani karikaonan. Watukapa-kida naꞌapam wamashaapauzon kaduz wanaꞌiankan dono utuma, waaipan idi kapam umashaapan kaiman.
6 Aizii naꞌapaꞌa naa mishi udaꞌanan wakaduz utukapan kawanaꞌati wamashaapan, naꞌiki ipai kapam udaꞌanan waNaobanaa kaduz. Umishidan idi wakuwaa, ubaiatan udikauda kidaꞌo naꞌiki dadara kidaꞌo aimaakan, mazan upuꞌu konaukii uzaamatan wakuwaa Kaimanaꞌo Doronaa taan idi konaukii-kinai unyukunuu iti.
7 Umashaapan idaꞌan kaiman, utukapa-kidan kaimanaꞌo ukaduz ipai mishidainao ati, Macedonia naꞌiki Achaia Baara ii aka kidainaouz. 8 Mazan aonaa baudaꞌapa mani kaimanaꞌo kuwai Tominkaru dauꞌu abata-kao unao diꞌiki Macedonia naꞌiki Achaia Baara ii aka. Mazan abata-kao kapam ipai amazada kawanaꞌati mishi umishidan Tominkaru manawun. Uruu idi aonaꞌa naa wakuwaa nii unao dauꞌu powaꞌa, ushaꞌapanum kauꞌan ipaiꞌi naa manawun pidannao aitapan kaiman kidaꞌo ukaduz.
9 Naꞌiki ipai kapam ĩkowaadan naꞌapam utaapan waunao kaiman, naꞌiki tuukii ukonaukii-kidan waunao wamakonkan dono naꞌii. Naꞌiki ipai ĩkowaadan kapam naꞌapam utanawatinan wuru aiaꞌa toma-kariwaiz karikaonan tominkarunao nii. Naꞌiki ĩkowaadan aizii uzaamataꞌa naa unaobanaa nii Tominkaru, wuruꞌu mishiꞌoraz manawun, karikaonanuꞌoraz paꞌan ukakupan. 10 Naꞌiki ĩkowaada kapam naꞌapam uzaudapan naa uDani Jesus kaawan aokazi iki, uruu Tominkaru kadishita-kidauzoniaz pabaaranaa iki, naꞌiki uruu kazannaataꞌo niꞌoraz waunao wapatakaꞌuta-kao ai, diinaꞌitiꞌi.