9
Paaipan atiꞌo
Tominkaru zaamatan pidan
Tominkaru zaamatan pidan
1 Õgaru, Christ idaꞌatiꞌo õzaamatinpan, õkowaadan mishiꞌo aonaa õmariidinan mani. Õnyukunuu, Kaimanaꞌo Doronaa kazowautapaniaz kainaabata kapam aonaa õmariidinan mani kaiwuruꞌu. 2 Tuukiaꞌo õnyukunuu kashaꞌoratinan, naꞌiki karikaonan õdopitan õnyukunuu ii, 3 õmin-Jewnnao dauꞌan, aonaꞌoraz ĩmishidan Christ. Õpishaa mani Tominkaru soꞌotan õgaru Christ diꞌiki, naꞌiki õkaboota-kao patakaꞌutin-kizai iti ĩwadaun nii, naꞌapaꞌo turuan an mani ukaminkaꞌutan ĩmishidan Christ. 4 Ĩnao Israelitenao,*Israelitenao: ĩnao dauꞌatiꞌo Jewnao kii-karu kapam. Tominkaru zaamatanii paudainao nii pidannao bii iki. Ĩnao atiꞌo utukapa-kidan pamanawunun. Ĩnao atiꞌo utaan paparadan mishiꞌo niꞌo ushaꞌapan.†utaan paparadan mishiꞌo niꞌo ushaꞌapan: uruu dakota-kao covenant. Putukapa kaarita tokon ii, Parada-karu Mashaꞌapannaada-kinao diꞌii. Ĩnao atiꞌo utaan pakakinaori kida. Ĩnao atiꞌo ukainaabatan naꞌapam mishiꞌo choochiapa-karu paꞌati. Ĩnao atiꞌo ukowaadan pashaꞌapatan nii kaiman kidaꞌo aimaakan. 5 Kotuaꞌo ĩdokozu-daunnao, umanawun kidainao.‡Kotuaꞌo ĩdokozu-daunnao uu, Abraham, Isaac, naꞌiki Jacob. Uruu Jacob, Israel kiaꞌoraz kapam uꞌuu. Ĩnao donozinaa diꞌikiꞌo Christ shakatauzonuz. Uruu Tominkaru, kazowautapaꞌoraz ipai aimaakan, marii karikaonan ukonaukii-kida-kao. Amen.
6 Aonaa uzauda-kidaꞌanaꞌa, aonaꞌo niꞌi naa Tominkaru mishian wuruꞌu ukowaadaniaz pashaꞌapatan nii papidanannao ati. Ushaꞌapanum kauꞌan, aonaa ipaiꞌo mani Israelitenao Tominkaru pidanannaoun. 7 Naꞌiki, aonaa ipaiꞌo mani Abraham takaan-daunnao Tominkaru pidanannaoun. Tominkaru kian Abraham ati: “Soo Isaac takaan-daunnao õdakotan niꞌoraz pudainao nii.”§Genesis 21:12 8 Ukauꞌan, aonaa ipaiꞌo mani Abraham takaan-daunnao, Tominkaru dakotan paudainao nii. Soo ukowaadaniinaouz pataan nii Abraham dani nii, uruu dainao paꞌan mishiꞌo Abraham dainao. 9 Kaikapaꞌo Tominkaru kian Abraham ati ukowaadan dono pashaꞌapataꞌazoonii: “Õkaawan nii powaa ati õaitanii amazada kawanaꞌati. Uruu dono kaudanipaꞌo niꞌi naa pudaiaro Sarah, daonaioraꞌo nii odani nii.”*Genesis 18:10, 14
10 Aizii wuruꞌu ĩdaniz, uruu wadokozu-daun Isaac. Umazidan Rebecca tuma, naꞌiki okaudanin shamaannao†shamaannao: ĩꞌuu Esau naꞌiki Jacob. idi. 11-12 Mazan ĩshakatan uaꞌii zii, naꞌiki ĩshaꞌapatan uaꞌii zii oiaꞌo, oo, kaimanaꞌo aimaakan, Tominkaru kian Rebecca ati: “Kiwiiniꞌo ushakatan, uruꞌo nii kaudin padawuꞌichan ati.”‡Genesis 25:23 Ukauꞌan Tominkaru zaamatan pidan padiꞌitapan kawanaꞌati pashaꞌapataꞌazoonii. Aonaa uzaamatan pidan ushaꞌapatan idi aimaakan. 13 Naꞌapa baꞌoran Tominkaru paradan kotuaꞌo saada-kao kian: “Õzaamatanii Jacob, mazan Esau, aonaa õnyukunuu-atin.”§Malachi 1:2-3
14 Ukauꞌan, turuu mooko wakian: “Aonaa Tominkaru shaꞌapatan sakitapa aimaakan,” kii? Aonaa turuu. 15 Tominkaru kian kotuaꞌa naa Moses ati:
“Õkamunan-kidan nii pidan, õkamunan-kidaꞌazoonii,
naꞌiki õkashaꞌora-kidan nii pidan, õkashaꞌora-kidaꞌazoonii.”*Exodus 33:19
16 Ukauꞌan Tominkaru zaamatan pidan, aonaa pidan aipan atiꞌo mani, oo ushaꞌapatan idiꞌo mani aimaakan, mazan Tominkaru kamunanun idiꞌo paꞌan. 17 Kotuaꞌo saada-kariwai Tominkaru paradan kowaadan Tominkaru kian Egypt iaꞌo naobanai ati: “Õgaru aipan atiꞌo punaobanai-tinan, õkaiwaa kizi pugaru, õtukapa-kida-kinaa nii õmaꞌozakan, naꞌiki õkainaabata-kinaa nii pidannao ati ipai amazada kawanaꞌati, õgaru paꞌan mishiꞌo manawun Tominkaru.”†Exodus 9:13-19 18 Ukauꞌan Tominkaru kamunan-kida pidan, pakamunan-kidaꞌazoonii. Naꞌiki udikintapada baꞌoran pidan, udikintapadaꞌazoonii.
Tominkaru shaꞌapata
pashaꞌapataꞌazoonii
pashaꞌapataꞌazoonii
19 Kainaꞌaꞌo nii panaadon pidan kian: “Mazan kandii nii mooko Tominkaru dakotan pidan shaꞌapatan oiaꞌo? Kanom mooko kaꞌiita aonaa pashaꞌapatan Tominkaru aiapanii ushaꞌapatan?”
20 Mazan õgaru kian, aonaa turuu pidan dakoꞌatin Tominkaru naꞌapa. Turuu mooko kubai idiꞌo aimaakan toma-kao kian tomaꞌo ati paugaru: “Kandii nii putoman õgaru kaikapaꞌa?” kii. 21 Pidan tomapauzo aimaakan kubai idi, turuu ukaiwaan kubai paaipan kawanaꞌati. Pakaiwaapanii kubai diꞌiki, panaadon dyaꞌutam utoman aimaakan. Baudaꞌapa utoman dowada sodi, kabaun konaunam-kinaa nii, baꞌoran utoman kaiwaa-karu nii ipai kamoo.
22 Naꞌapaꞌo Tominkaru, turuu ushaꞌapatan aimaakan paaipan kawanaꞌati, utukapa-kida-kinaa nii patoꞌoran, naꞌiki pamaꞌozakan manawun. Mazan upuꞌu aonaa upatakaꞌutan sariapa aka patoꞌora-kizinao, patakaꞌuta-karu niꞌoraz ĩaitinpan. 23 Naꞌiki uaitapa-kidaꞌazon idi kapam umanawunuꞌo paugaru pakamunan-kidaniinao ati, uminziiwa-kidaniinaouznaa kaꞌidiwainaꞌo nii diinaꞌitiꞌi pamanawunun idi. 24 Waunao wuruꞌu Tominkaru dapadaniinaouz, aonaa soo Jewnao bii ikiꞌo mani karikaonan, mazan Gentilenao bii ikiꞌo kapam. 25 Kaikapaꞌo Tominkaru kian, prophet Hosea saadanii idaꞌa:
“Pidannao aonaꞌoraz õpidanannao mani kiwiin zii,
õdakotan nii ĩdyaun õpidanannao nii.
Pidannao aonaꞌoraz õmarainpan kiwiin zii,
õdakotan nii ĩdyaun õmarainapaniinao nii.”‡Hosea 2:23
26 Naꞌiki ukian koshan:
“Wuru diꞌiaꞌa amazada Tominkaru parada-kiziz pidannao ati,
‘Aonaa õpidanannao mani unao,’ ukianuz,
naꞌiaꞌo nii ĩdakota-kao,
‘Tominkaru maꞌozakaꞌo manawun dainao nii.’ ”§Hosea 1:10
27 Mazan prophet Isaiah kian Israelitenao dauꞌan:
“Israel takaan-daunnao iriban puꞌu padamata iriba, iriba,
aonaa kanom kaꞌiitan paaitaan ĩdyaun,
mazan ĩwaꞌakun sodiꞌo nii karikaonan Tominkaru kazannaatan.
28 Ushaꞌapanum kauꞌan kadimanaꞌakaꞌo nii
naꞌiki baukapaꞌakaꞌo nii
wanaobanaa patakaꞌutan pidannao pakian kawanaꞌati.”*Isaiah 10:22-23
29 Naꞌapa Isaiah kian kiwiin zii:
“Aonaan dono mani maꞌozakaꞌo manawun Naobanai
kawaꞌakuntan masakaudaꞌu watakaan-daunnao,
kaimanaiman mani wamainaabata-kao
Sodom naꞌiki Gomorrah sannao†Sodom naꞌiki Gomorrah: Putukapa kaarita tokon ii Parada-karu Mashaꞌapannaada-kinao diꞌii. kawan.”‡Isaiah 1:9
Aonaa Israelitenao mishidan Kaimanaꞌo Kuwai
30 Ukauꞌan naꞌapam dii wakian aizii? Aonaan puꞌu Gentilenao dawatan Tominkaru dakota-kinaa nii paugaru kaimanaꞌo pidannao nii, upuꞌu Tominkaru dakotan ĩdyaun kaimanaꞌo pidannao nii, ĩmishidan idi Jesus. 31 Mazan Israelitenao, aonaa Tominkaru dakotan ĩdyaun kaimanaꞌo pidannao nii, ĩtiwaan puꞌu paizoꞌatin ipai kakinaorii, Tominkaru dakota-kinaa nii ĩdyaun kaimanaꞌo pidannao nii. 32 Mazan kandii nii? Ĩtiwaan idi pashaꞌapainpan kakinaorii kawanaꞌati, Tominkaru dakota-kinaa nii ĩdyaun kaimanaꞌo pidannao nii, aonaa mishida-karu idaꞌan mani. Uruu idiꞌo ĩkaboinan paponapoꞌaꞌo kuba diꞌiki. 33 Kaikapaꞌo prophet Isaiah saadan Tominkaru paradan, Christ dauaꞌo:
“Aushaa uabata: õmuudan nii kuba Zion§Zion, oo Jerusalem. ii,
kasharutapaꞌo nii pidannao nyukunuu,
naꞌiki uruu diꞌikiꞌo nii ĩtukurinpan naꞌiki ĩkaboinan.
Mazan pidan mishidaꞌoraz uruu,
aonaa naꞌapainim nii ubaꞌazootin-kida-kao umishidan dikin ii uruu.”*Isaiah 28:16
*9:4 Israelitenao: ĩnao dauꞌatiꞌo Jewnao kii-karu kapam.
†9:4 utaan paparadan mishiꞌo niꞌo ushaꞌapan: uruu dakota-kao covenant. Putukapa kaarita tokon ii, Parada-karu Mashaꞌapannaada-kinao diꞌii.
‡9:5 Kotuaꞌo ĩdokozu-daunnao uu, Abraham, Isaac, naꞌiki Jacob. Uruu Jacob, Israel kiaꞌoraz kapam uꞌuu.
§9:7 Genesis 21:12
*9:9 Genesis 18:10, 14
†9:10 shamaannao: ĩꞌuu Esau naꞌiki Jacob.
‡9:11-12 Genesis 25:23
§9:13 Malachi 1:2-3
*9:15 Exodus 33:19
†9:17 Exodus 9:13-19
‡9:25 Hosea 2:23
§9:26 Hosea 1:10
*9:28 Isaiah 10:22-23
†9:29 Sodom naꞌiki Gomorrah: Putukapa kaarita tokon ii Parada-karu Mashaꞌapannaada-kinao diꞌii.
‡9:29 Isaiah 1:9
§9:33 Zion, oo Jerusalem.
*9:33 Isaiah 28:16