1 Yáh pɩ Liyel wɛ̃́npìlɛ nónó tyɩ́-á nɔ ǹ tyɩ́ sɛ̃́, képah ye yé ǹmɔlɛ n yah n pɩ. 2 Yé yɛ yé tyɩ́ nɔ wɛ̃ tyɩ́, sɔ̃́-á á pól tyɩ́ nɔ Krista tyɩ́, tɛ́ à mɛ ǹ gblɔ̌ynɛ Liyel kɔ̃ ápi yĩnnɛ à pɩ sárkálɛ, nɛ̂-á mɛ n põ sírr tɛ́ ké tyɩ́ mɛ nɔ Liyel tyɩ́. 3 Yé pɩ Liyel nolɛ, képah ye fɔ̀fɩ́kɩ̀, ànɛ̂ prɔ̀prɔ̀ pɩ́nɔ́ duke pól, à tahlɩ yĩ́sesúkú tyɩ́, sépi sɔkɔ yɔ́ ńtɛ̃ pɩ́nɔ́ tyɩ́ náh yɩ̃nɛ kè nɛ n nohnɩ yé wrɔ́ sɔkɔ. 4 Sen pɩ̃́-ńkɛ̃̂ wɛlɔ, ànɛ̂ wɛ̀ntùkùnì, ànɛ̂ nɛ́wã̂n wɛlɔ tɔ náh yɩ̃nɛ sè nɛ n wil yé vyɛ̃y sɔkɔ. Ǹtɛ pèpɔrɩ pɩ̃́nɔ́ wɛy ye yé yɩ̃nɛ yè Liyellɛ n kɔ̃. 5 Yé yɩ̃nɛ yè kè pɩ̃ yĩ́ĩ́ nɛ prɔ̀npɩbɩ, ànɛ̂ nónó-á mɛ sìlkìnɔ́lɛ Liyel yah, ànɛ̂ yĩ́sesúkú névyelɛ, pé sɔkɔ yɔ́ ńtɛ̃ náh n de n pi Krista tɔ̃́rɩ́ ànɛ̂ Liyel tɔ̃́rɩ́ sɔkɔ. Yĩ́sesúkú pɩ́nɔ́lɛ, sãh fálnɔ́ dùkù yɔ́ ye kélɛ. 6 Yé káh yɛ ǹnɩ̂ yɔ́ ńtɛ̃ kɔ̃ à pɔ yé pilki ǹ sõnɔ prɛ̌nɩ̀nɛ. Sépi dùkù pɩ́nɔ́ ye ńkɛ̃́nɛ n pɔ Liyel kɔ̃ ǎ fṍhnɔ́ sah ǹ tyɩ́ yáhlepu yõ. 7 Képah ye, yé káh nɛ pɩ n soh pélɛ póllɛ. 8 Yé lésõ mɛ fɛ̃́ntũ̂ sɔkɔ ǹgbòlɛ. Ǹtɛ núkúnúkú yé mɛ kyòo sɔkɔ yé wrɔ́ kwrɔ́nmɔnɔ gbõ̀ yõ Tɛ̃̀ ǹgbɛ̃nɛ. Kyòo sɔkɔ névye-á n pɩ sɔ̃́, yé tɔ nɛ n pɩ sɛ̃́. 9 Yé náh wɛ di, kyòo sɔkɔ kɔ́lɔ́ ye n pɔ n pɔ pèpɔrɩ pɩ́nɔ́lɛ, ànɛ̂ gbɩ wɛ̃̀kɩ̀ kɔ́lɔ́lɛ, ànɛ̂ gbɩ yónɔ́lɛ. 10 Nɛ̂ tyɩ́-á nɔ Tɛ̃̀ ǹgbɛ̃ tyɩ́, yé gbah tɛ̃ kélɛ n pnɛ. 11 Yé káh fɛ̃́ntũ̂ sɔkɔ tyilɛ n pɩ. Yõre náh mɛ sé tyɩ́. Ǹtɛ yé sé gbɩ̃nɛ n wɔ. 12 Tyi nónó-á kénɛ névye mɛ n wɔ̃bɩ n pɩ, sé tyɩ́ yã́hnɔ́ ńtɛ̃ mɛ sennɛ. 13 Ǹtɛ tyi nónó gbɩ̃-à wɔ, sépi n nɛ n mɛ kyòo. 14 Yé náh wɛ di, tyi nónó gbɩ̃-à wɔ, sé dùkù n nɛ n pnɛ. Képah ye, kè mɛ yónɔ́lɛ nɛ:

15 Yé yé pɩ dùkùlɛ n kyɔmɩ pallɛ. Yé káh nɛ n pɩ yɩ̃ pɩ̃́-ńkɛ̃̂ névye tyɩ́ kɔ̃lɛ, yé nɛ n pɩ yɩ̃ pɩ̃́pú tyɩ́ kɔ̃lɛ, 16 nónó-á tir nɛ̂ pɩ́nɔ́ yõ̀bènɔrɩ-à fyɔ̀ wɛ pé tyɩ́, pě kè pɩ. Yé náh wɛ di, gbĩ nɛ̂ sɔkɔ-á álɛ, kè náh mɛ pallɛ. 17 Képah ye, yé káh pɩ lékã́m kɛ̃́ névyelɛ, ǹtɛ Tɛ̃̀ ǹgbɛ̃ dyɔ yĩ́ĩ́ tɛ̃̀-á nɛ̂nɛ, yé gbah n tɛ̃ képahlɛ n pnɛ. 18 Yé káh tɔ̃ wɔ kè yé tɛ̃, képah névi tyɩ́lɛ n yɩkɩ. Yé yɛ Liyel Mirki yé tɔkɔ. 19 Yé sṍrélɛ n mɔ wɛ̃ sɔkɔ yɩ̀gbɩ̀nɩ̀ sɔkɔ yè Tɛ̃̀ ǹgbɛ̃ n gbilki, yè mó yɩ̀lɛ n gbɩ ǹ tyɩ́ ǹ Mirki-á nónó dahbɩ yé sɔkɔ. Yé yɩ̀lɛ n gbɩ yè Tɛ̃̀ ǹgbɛ̃nɛ n gbilki yé nnɔ póllɛ. 20 Gbĩ́mɛgbĩ́ ànɛ̂ tyi tyi pól sɔkɔ, yé nɛ n wɛkɩ Sú Liyel tyɩ́ á Tɛ̃̀ ǹgbɛ̃ Yesu Krista yĩn yõ.

21 Yépi nónó-á pɩ Krista yah tíkí pɩ́púlɛ, yé nɛ n sah wɛ̃ tyɩ́ yõ sɔkɔ. 22 Syɔ́, yé nɛ n sah yé pɛbɩ tyɩ́ yõ, sɔ̃́-á yé n sah Tɛ̃̀ ǹgbɛ̃ tyɩ́ yõ. 23 Yé náh wɛ di, dĩ́ ye sê yõ̀tɛ̃̀nɛ sɔ̃́-á Kristalɛ ǹ yõ sɛ̃́pú tĩ̀nkì yõ̀tɛ̃̀nɛ, pépi nónó-á ǹ wil gbɛ̃́nsêlɛ tɛ́ à mɛ pɩ pé pwáhnmɔ-òlɛ. 24 Syɔ́ yɩ̃nɛ pè nɛ n sah pé pɛbɩ tyɩ́ yõ tyi tyi pól sɔkɔ, sɔ̃́-á Krista yõ sɛ̃́pú tĩ̀nkì n sah ǹ tyɩ́ yõ. 25 Pɛbɩ, yé yɛ yé syɔ́ tyɩ́ nɔ yé tyɩ́, Krista yõ sɛ̃́pú tĩ̀nkì tyɩ́-á nɔ sɔ̃́ ǹ tyɩ́, fɔ́ɔ́ à ǹ min kɔ̃ pé yĩnnɛ. 26 Sɛ̃́ ye sõ̀ à mɛ ké tyɩ́ nɛ pé pé yõ sɛ̃́pú tĩ̀nkì pɩ yályál Liyel yah, ni sɔkɔ wèlnwìlkìnɔ́ sɔkɔ ànɛ̂ Liyel wɛy gbõ̀ yõ. 27 À sõ̀ mɛ ké tyɩ́ nɛ pè pɔ pé yah sɔkɔ yályál syíi kɛ̃́nɛ, ànɛ̂ tìkìlì-ǹsah kɛ̃́nɛ, ànɛ̂ yɩ́kɩ́-ńsah kɛ̃́nɛ, ànɛ̂ wɛ́nyo-ńsah kɛ̃́nɛ pé tyɩ́. 28 Sɛ̃́ ye pɛbɩ tɔ yɩ̃nɛ pé syɔ́ tyɩ́ nɔ pé tyɩ́ pé gblɔ̌y wil gbɛ̃́nsê tyɩ́-á nɔ sɔ̃́ pé tyɩ́. Névi nɛ̂ kyɩ tyɩ́-à nɔ ǹ tyɩ́, ǹ gblɔ̌y tyɩ́ ye nɔ ǹ tyɩ́. 29 Yé náh wɛ di, ǹnɩ̂ yɔ́ ńtɛ̃ wil gbɛ̃́nsê kṍ náh ǹnɛ n tɛ̃ dò, tɛ̃̀ n pyě kélɛ n pu ńkɛ̃́; ǹ tɛ́ kè tɔ̃ n sah n tɛ̃ sɔ̃́-á Krista tɔ̃ sah tɛ̃ ǹ yõ sɛ̃́pú tĩ̀nkìlɛ, 30 képah nɛ̂-á ápilɛ. 31 Képah ye, dĩ́ kɩ yal ǹ sú ànɛ̂ ǹ yṹ tnɔ̂, tɛ́ kɩ kwrɔ mɔ ǹ kyɩlɛ, pé nímí kɩ pɩ wil gbɛ̃́nsê núkúlɛ.*5.31 Yah n tɛ Yenɛsɩ 2.24. 32 Sètĩ̀n sõ̀ tir ǹgbɛ̃ ye kélɛ. Tɛ́ ńmɔ kélɛ n yo nɛ kǎh mɛ ké yah mɔ Krista ànɛ̂ ǹ yõ sɛ̃́pú tĩ̀nkì tyɩ́. 33 Ǹtɛ kè mɛ ké yah mɔ yépi tɔ tyɩ́. Yé nɛ́núkù núkú pól syɔ́ tyɩ́ yɩ̃nɛ kè nɔ yé tyɩ́ yé gblɔ̌y sɔ̃́, syɔ́ nɛ́núkù núkú pól mó yõ̀yénnɛ n sah pé pɛbɩ yõ.