Leta kua e vapolunganga kiri vuni Hibru
1
1.1-3 Na Tuni Vuvu e bele ki vala polea ni dolu
1 Varira matoto, a Vuvu e pole boto luba, na dala luba, kamani habu tubudolu na havana profet kamahi. 2 Palaka na taem meni kua, na taem kara las de kua, ia a Vuvu ti popole kamadolu na havani Tuna. A Vuvu ki katia ve na goloaloa laveve na mariaba kamana lagato ia mai na vulovulo kua ve, na limani Tuna. A Vuvu ki mapamapa ni Tuna kava, kete vala kana goloaloa laveve kua e kana, vona. 3 Na Tuni Vuvu kua, ia na balangana glori ke Vuvu e lala kete doko vona, na balangana glori kua ni babalanga dolu. Na Tuni Vuvu kua, ia na hanunuki Vuvu matoto. Na polea kana Tuni Vuvu za kua e paho taduria goloa laveve na lagato kamana vulovulo ki bada ki ngongoro. Muri na kana matea, ia e vazugu kakava na molumolungata moge zahazaha ni dolu. Kua ia ti vamianga ia heta kini valanga naba kapou matoto vona, kini mimia na maroroni limani Vuvu heta na lagato, kua e Paraha kana king laveve.
1.4-14 Na Tuni Vuvu ia e vinim na engel kamahi
4 A Tuni Vuvu, ia e dopa ki vinim matoto na engel kamahi. A Tamana a Vuvu, ki vala hiza katiu ni Tuna kua e dopa ki kapou livutia na hizana engel laveve. 5 Sng 2.7; 2 Sml 7.14; 1 Sto 17.13.Na vuna muga a Vuvu e tani barae ni Tuna,
“Ho na Tugu. Kua te kara Kamama.”
Ia ki tani barae ve,
“Hau da ta ma kara Tamana, da ia e ma ki kara Tugu.”
Polea kua beta a Vuvu ni varaga kara engel katiu kua na lagato. Beta matoto. 6 Lo 32.43.Ki vano ve, kilaka kua a Vuvu e pelea Tuna muganga ki ziho kara vulovulo, ia e tania polea kua,
“Na engel laveve ke Vuvu kua na lagato, da dia ta lotu vona.”
7 Sng 104.4.A Vuvu e lohoi na engel kamahi kubarae ki tani barae,
“Ia e lala kete kohania kana engel kamahi nuhuta vakilalanga kua dia ta lala dia kata halamiti balika kavili. Ki katidia dia ka kara kana voravora kua dia ta dudulu balika haroho.”
8 Sng 45.6-7.Palaka e tania polea kua kiri Tuna,
“Vuvu, ka kingdom mara beta ni hozo. Ho tu King ku hada na ka manumanu ka moge kiridia ia e mahoto matoto ku lala koto sikel kemikemihia matoto ku vavahotovia kadia mogemoge kamahi.
9 Ho e lala kete kuli kara moge kua e mahoto ki beta ni lala kete kuli kara moge zahazaha, kubarae a Vuvu, ka Vuvu ki valikiria wel kiriniho kete makiho koto hizanga. Kubarae ki katiho ku hilohilo matoto. Habu kurakura mara beta dia na hilohilo barae habuka ho.”
10 Sng 102.25-27.A Vuvu ki tani barae ve ni Tuna,
“Paraha, varira matoto ho tu katia garigari kua ia ki bada ki ngongoro. Na lima mule ho tu katia mariaba kamana goloaloa laveve kua heta na mariaba.
11 Palaka mariaba kamana goloaloa laveve vona, ia mai na vulovulo da hiro ta vano hiro ka balavutuka balika lavalava bura kua ti vano kini zaha.
12 Da tu didihiro vinaka kaka kua e didia dongi. Da tu kolihiro balika kaka kua e hulia lavalava bura ki zoho kolukolu. Palaka ho beta nu lala koto senis. Ka taem ve beta ni lala kete vano ni hohozo.”
13 Sng 110.1.Ngiza matoto a Vuvu ti tania na engel katiu kubarae,
“Mia na maroroni limagu, ki nap ka taruhia ha vagi laveve na tauri kabe.”
14 Na engel kamahi, dia na vule, dia ka lala dia kata kakatia za na galanga ke Vuvu. A Vuvu ki lala kete gegeridia dia kata vano dia na kokodonia manumanu kua a Vuvu e pele mulehidia.