SURANA YAHYA
MOBHAA-BHAANA
POGAU BHAA-BHAANA
Surana Yahya Mobhaa-bhaana atoburi tee rua angu makusudu. Bhaa-bhaana, to apekaogeaka incana manga mia mobacea mamudhaakana manga incia adhadhi aposaangu tee Aulataʼala tee Anana siitumo Isa Al Masi. Juaaka, to audhaniaka manga incia mamudhaakana inda aose manga kaadhari mosala momembalina mopekadhakina posaanguana manga incia tee Aulataʼala tee Isa Al Masi. Manga kaadhari mosala sumai asandaraakea minaaka i kaparacaea opeapo uka mopokaina tee dunia akohasiliaka giu momadhaki; jadi o Isa Anana Aulataʼala inda amungki amembali maanusia. Manga guru moadhariakana manga kaadhari mosala sumai apogau, ande tatopasalaamati maʼanana talapa minaaka i manga urusana dhadhi i dunia sii; manga incia aadhariaka uka ande o kasalaamati inda tee pokaiana tee manga giuna pebula atawa o kaasi tee maanusia rangata.
Aposala tee manga kaadhari incia sumai, moburina sura incia sii atinda mpuu apogauakea ande o Isa Al Masi ampuu-mpuu amembalimo maanusia satotuuna. Incia uka mangaudhaniaka mpuu ande bhari-bharia mia moparacaeana tee Isa tee momaasiakana Aulataʼala tabeana apomaamaasiaka uka tee maanusia rangana.
Antona
Porikanaana pogau 1:1-4
Kainawa tee kalalanda 1:5--2:29
Manga anana Aulataʼala tee manga anana Ibilisi 3:1-24
Mobanarana tee mosalana 4:1-6
Awaajibu to tamaasi 4:7-21
Kaparacaea mangapamembalina takana 5:1-21
1
Kasakusiina Rasulu to Firimani Idhadhiaka
1:1-4
1 1:1 Yah. 1:1.Antona sura incia sii pokaiana tee Firimani modhawuna dhadhi, siitumo Firimani modhaangiana minaaka i piamo itu auwalina dunia sii indapo atopadhaangia. Ingkami padhamo tarangoa tee takamatea, opea mopadhana itontomami sumai padhamo takenia tee limamami. 2 1:2 Yah. 1:14. Satotuuna o dhadhi sumai padhamo atopatiumba*1:2 dhadhi sumai padhamo atopatiumba: Yahya aburi ande incia tee manga rasulu amembali sakusii to opea ipewauna Isa wakutuuna Incia adhadhi i dunia sii. tee ingkami padhamo takamatea. Rampaakanamo sumai sii-sii ingkami tadhawu kasakusii tee tapakoleleakakomiu pokaiana tee giu mopamembalina mia adhadhi abakaa. Dhadhi sii apobhawa tee Aulataʼala o Amata, tee kasiimpo atopatiumba to ingkita. 3 Jadi, opea mopadhana ikamatamami tee irangomami sumai, siitumo uka ipakoleleakamami to ingkomiu, mamudhaakana uposaangu tee ingkami, mboomo ingkami taposaangu tee Aulataʼala o Amata tee Isa Al Masi o Anana Aulataʼala. 4 Rampaakanamo sumai ingkami taburi sura incia sii to ingkomiu, mamudhaakana amondo kaunde-undeta.†1:4 amondo kaunde-undeta: Dhaangia uka manga kaburi mangenge motoburina "amondo kaunde-undemiu."
Aulataʼala Satotuuna o Kainawa
1:5-10
5 Siimo lele mopadhana irangomami minaaka i Isa Al Masi tee sii-sii ingkami tapakawaakea to ingkomiu: Aulataʼala sumai o kainawa tee i nuncana karona inda tee kalalanda sampeampearo. 6 Ande ingkita tapogau taposaangu tee Aulataʼala, garaaka ingkita dhaangiapo mboomo mia moosena dhala momalalanda, maʼanana ingkita tagau-gau tee inda tapewau kabanara. 7 Maka ande taose dhala momainawa mopokanana tee Aulataʼala momainawana, sumaimo ingkita sadhaadhaa taposaangu tee manga witinaita mosaʼiimani, tee o raana Isa o Anana Aulataʼala, mangapekangkilona minaaka i bhari-bharia dosata.
8 Ande ingkita tapogau inda takodosa, satotuuna ingkita tagau-gau karota, tee o kabanara sumai inda dhaangia i ingkita. 9 Maka ande ingkita taʼakui manga dosata, sumaimo o Aulataʼala momembalina motoparacaea tee mobanara sumai, bheaʼamponia manga dosata tee mangapekangkilo minaaka i bhari-bharia kadhaki. 10 Ande ingkita tapogau ande indapo mina tapewau dosa, sumaimo ingkita taabhi Aulataʼala agau-gau tee firimanina inda dhaangia i nuncana ngangarandata.