SURANA PAUL MOBHAA-BHAANA
TO
TIMOTIUS
POGAU BHAA-BHAANA
Timotius sii samia Karasiteni tee o umuruna dhaangiapo amangura tee amboore i poropinsi Likaonia i Asia Maidhiidhi (i zamani sii-sii adhaangia i Turki), i sawetana poropinsi Kilikia, siitumo lipu minaana Paul. Paul apokawa tee Timotius wakutuuna lingkaana to rua mpearona i wakutuuna apakoleleaka Lele Malape i kota Listra tee Derbe (kamata Tul. 16:1-2.) Incia amembali sabhangka tee mohambana Paul i nuncana karajaana. Amana Timotius o miana Yunani, tee inana o miana Yahudi. I nuncana Surana Paul Mobhaa-bhaana To Timotius, apogauaka talu hali tee dhaangia o pokaiana saangu tee mosagaanana.
Mobhaa-bhaana siitumo, kaudhaniaka to Timotius to soʼalina manga kaadhari mosala modhaangiana i tanga-tangana jamaʼa. Manga kaadhari incia sumai satotuuna o kaadhari mominaakana i agamana miana Yahudi tee mominaakana i agama i sambalina kaadharina miana Yahudi moparacaeana ande o alamu sii amadhakimo, tee o giuna kasalaamati tangkanamo amembali atopotibhaaka ande o mia akoʼilimuu tee dhaangia o rahasia imatauna, tee tabeana ataʼati manga tutura, siitumo, tuturana inda imembaliakata takawi, tuturana manga giu ikande inda momembalina ikande, tee uka o giu mosagaanana.
Sapadhana incia sumai, Paul aadhariakea uka tuaapa o carana aʼurusu jamaʼa tee aʼurusu ibaadati. Incia uka apaumbaaka to Timotius tuaapa o pemingkuina mia momembalina mojaganina tee mohambana jamaʼa. Sabutuna o Timotius aadhariakea uka tuaapa o carana to amembaliaka bhatuana Isa Al Masi momalape tee aadhariakea tuaapa atanggojawapuaka bhari-bharia mia mopesuana momembalina jamaʼa.
Antona
Porikanaana pogau 1:1-2
Kaadharina jamaʼa tee manga mia moʼurusuna jamaʼa 1:3--3:16
Kaadhari to Timotius tee opea ikarajaana 4:1--6:21
1
Salamu
1:1-2
1 Minaaka i Paul, rasuluna Isa Al Masi, moosena parintana Aulataʼala mangapasalaamatina, tee minaaka i Isa Al Masi iharaputa.
2 1:2 Tul. 16:1.To Timotius, iabhiku mboomo anaku karoku i nuncana iimani. Rahumati, kaasi, tee dhadhi malape minaaka i Amata o Aulataʼala, tee minaaka i Isa Al Masi Oputa Momalanga apoose tee ingkoo.
Pokaiana tee Kaadhari Mosaladhala
1:3-11
3 Wakutuuna bhekulingka i poropinsi Makedonia, iaku padhamo kupaumbako mamudhaakana usadhaadhaa umboore i Efesus, to uadhariaka manga mia iwe sumai, mamudhaakana manga incia inda aadhariaka kaadhari inda mobanara, 4 tee bholi aperangoi manga tulatula momangenge minaaka i opu-opuata tee bholi aparakisaa daftarana siwulu momarambe minaaka i opu-opuata, roonamo manga giu incia sumai soo aumbaaka pogera-gera tee inda atulungi incemapo uka mamudhaakana amembali aose haejatina Aulataʼala modhaangiana i nuncana iimanita. 5 Tujuana naasehati incia sii siitumo kaasi motiumbana minaaka i inca momangkilo tee minaaka i ngangaranda momangkilo tee minaaka i iimani moʼihilasi. 6 Maka kaasi, dhaangia pia mia o mia inda modhadhina mboo sumai. Manga incia soo abhanabhanaka wakutuuna to pogau inda mokoguna. 7 Manga incia gauna amembali guruna Hukumuna Taurati, maka manga incia inda amaʼanaia opea ipogauakana atawa manga hali ibhoasakana tee mpuu-mpuuna incana. 8 Ingkita tamataua ande o Hukumuna Taurati sumai amalape ande atopake tee cara mobanara, 9 tee tabeana tasadaria ande o Hukumuna Taurati sumai atopadhaangia mencuana to mia mobanara, maka to mia modorohaka tee mia momentagali, to mia madhaki tee mia mokodosa, to mia inda mokoʼagama tee mia mofikiriakana dunia, to mia mopekamatena amana tee inana, tee bhari-bharia pande pekamatena mia. 10 Tee uka to manga pande pebula, mopopeeluna podho-podho umane, mia momanakona mia to apabhatuaia, pande pekagau, sakusii gau-gau, tee bhari-bharia giu inda mopokanana tee kaadhari mobanara, 11 mboomo modhaangiana i nuncana Lele Malape momulia mominaakana i Aulataʼala Motopuji. Lele Malapemo sumai iparacaeaakana to iaku.
Kasukuru roonamo Rahumatina Aulataʼala
1:12-17
12 Iaku kusukuru tee Isa Al Masi Oputa Momalanga. Incia adhawuaku kakaa mamudhaakana amembali kulaiania, tee Incia aabhiaku mia momembalina motoparacaea sabutuna Incia apiliaku to kupotibhaaka tugasi incia sii. 13 1:13 Tul. 8:3; 9:4-5.Garaaka i piamo itu kuhinaia, kusikisaa manga mia moosena Isa, tee kumasega tee manga incia. Maka o Aulataʼala amaasiakaaku, roonamo i piamo itu indapo kuparacaeaia tee indapo kumataua opea ipewauku. 14 Ataralabhi-labhi mpuu o rahumatina Kawasana Oputa to iaku. Incia aranganiakaaku tee adhawuakaaku iimani mamudhaakana kuparacaeaia tee kumaasiaka maanusia rangaku; bhari-bharia sumai atolentu iimani tee kaasi mominaakana i Isa Al Masi. 15 Kaadhari incia sii abanara tee alaenga mpuu atotarima, "Isa Al Masi aumba i nuncana dunia to apasalaamatiaka mia mokodosa," tee minaaka i kabharina mia mokodosa sumai iakumo mokodosana mpuu. 16 Maka rampaakanamo giu incia sumai o Aulataʼala amaasiakaaku, tee i nuncana karoku, mia molabhina dosana minaaka i mia mosagaanana sii, Isa Al Masi asusuakaaku bhari-bharia kasabarana inda momentela, tee mboo sumai iaku kumembali sandarana karo to bhari-bharia mia bhemoparacaeaia naile itu tee bhemopotibhaakana dhadhi mobakaa. 17 Aulataʼala o Raja saʼumurua zamani, Incia alaenga atohoromati tee atopuji torosu, Incia abakaa, inda atokamata tee Incia sakaro-karona o Aulataʼala! Aamin.
Tugasina Timotius
1:18-20
18 E anaku Timotius, siimo parinta idhawuakaku to ingkoo, pokaiana tee pogauna manga nabii tee opea bhemomembalina tee karomu, mamudhaakana apokana tee opea mopadhana ipekilalaaka sumai, ingkoo upotimbe i nuncana potimbea momalape, 19 tee utorosu uparacaea tee Al Masi, tee umpuu-mpuu umembali upaposala mobanarana tee mosalana. Dhaangia manga mia inda mofaduliakana manga giu incia sii, sabutuna o iimanina manga incia ahancuru. 20 I tanga-tangana manga mia mopewauna mboo sumai dhaangiamo Himeneus tee Aleksander, tee manga incia padhamo kupasaraakaakea i Ibilisi mamudhaakana apengkaadhari aunto ahina Aulataʼala.