SURANA PAUL RUA MPEARONA
TO JAMAʼA I
TESALONIKA
POGAU BHAA-BHAANA
Mia mobinguakana pokaiana tee umbaana Al Masi to rua mpearona dhaangiapo atorosu aumbaaka manga masaʼala i nuncana jamaʼa i Tesalonika. Surana Paul Rua Mpearona to Jamaʼa i Tesalonika atoburi to apaselesaiaka masaʼala incia sumai. I fikirina manga incia wakutuuna umbaana Al Masi to rua mpearona akawamo. Fikiri incia sumai asala koonina Paul. Roonamo wakutuuna Al Masi bheambuli i dunia, kasega tee kadhaki i dunia bheajulu mpuu tee akapalaia samia o mia imatau mokosaroakana "Maanusia Madhaki" bhemobhalina Al Masi.
Paul audhaniakea mpuu to manga mia mobacana kaadharina, ande manga incia afaraluu mpuu to apotaangi i nuncana kaparacaeana tee Al Masi moomini o dhadhina manga incia asukara tee anarakaa. Manga incia anaasehatia Paul mamudhaakana akarajaa to apeelo kinandena samia-samia, apokana mboomo Paul tee manga sabhangkana. Tee mamudhaakana uka manga incia araji apewau kalape.
Antona
Porikanaana pogau 1:1-2
Kapujia tee kadhawuna naasehati 1:3-12
Pajelasiana pokaiana tee umbaana Al Masi i dunia to rua mpearona 2:1-17
Naasehati to tuaapa tabeana o feʼelina mia moosena Al Masi 3:1-15
Kapadhaa 3:16-18
1
Salamu
1:1-2
1 1:1 Tul. 17:1. Minaaka i Paul, Silwanus,*1:1 Silwanus: Kagoraakana "Silas" i nuncana pogau Yunani; kananeana sabhangkana Paul sii atogoraaka Silas i nuncana Tulatulana Manga Rasulu iburina Lukas tee sura mosagaanana minaaka i Paul. tee Timotius.
To jamaʼana Tesalonika momembalina pewauana Aulataʼala o Amata tee Isa Al Masi Oputa Momalanga.
2 Rahumati tee dhadhi malape minaaka i Aulataʼala o Amata, tee Isa Al Masi Oputa Momalanga abarakatikomiu.
Kasukuru tee Doʼa
1:3-12
3 E manga witinaiku, ingkami sadia tawaajibu taemani sukuru i Aulataʼala rampaakanamo ingkomiu. Tee inciamo ingkami talaenga tapewau mboo sumai, roonamo ingkomiu ahandamo ajulu o iimanimiu tee Al Masi, tee ingkomiu uka uhandamo upomaamaasiaka podho-podho ingkomiu. 4 Rampaakanamo sumai, ingkami takaunde-unde wakutuuna taleongi manga jamaʼana Aulataʼala i tampa mosagaanana, tee tabangga tapetulatulaaka tuaapa ingkomiu usadhaadhaa utarai kanarakaa tee amatangka o iimanimiu moomini abhari unamisi kasikisaa tee kanarakaa minaaka i manga mia inda moparacaeana tee Isa.
5 Katangkana incamiu sumai satotuuna saangu bukutii ande o Aulataʼala sadia aʼadili ahaakimu maanusia, sabutuna o Aulataʼala bheaabhikomiu ulaenga to upesua i nuncana pamarintana tee rampaakanamo pamarintana sumai ingkomiu unarakaa. 6 Sainamo manga mia mosikisaakomiu, naile itu manga incia bheatarima kahukumu momatamo, roonamo Aulataʼala sumai aʼadili, 7 tee ingkomiu monamisina kanarakaa sii-sii bheahiburukomiu Aulataʼala, mboo sumai uka tee ingkami, i wakutuuna eona Isa Al Masi Oputa Momalanga sumai asapo minaaka i sorogaa tee apatiumba karona apoose tee bhari-bharia malaaʼekatina mobukeakana kuasa i nuncana waa mokarore-rore, 8 to abalasiaka manga mia inda momatauna Aulataʼala tee manga mia inda motaʼatina tee Lele Malapena Isa Oputa Momalanga. 9 Manga incia bheatarima kahukumu tee kabinasa mobakaa, tee apekaridhoa minaaka i aroana Kawasana Opu tee kuasana momulia. 10 Bhari-bharia sumai bheamembali i wakutuuna umbaana Isa naile itu, tee Incia bheamuliangia uumatina tee ahoromatia bhari-bharia mia moparacaeaia. Ingkomiu uka bheudhaangia i tanga-tangana uumati incia sumai, roonamo ingkomiu uparacaeamo tee kasakusii ipakawaakamami to ingkomiu.
11 Rampaakanamo sumai ingkami sadia tadoʼaakakomiu. Ingkami tadoʼa mamudhaakana o Aulataʼala apamembalikomiu ulaenga to udhadhi mboomo kapeeluana; siitumo Incia akembakomiu. Maasangia o Aulataʼala tee kuasana apabuke kapeeluamiu to upewau malape, tee Incia apamondoaka bhari-bharia ikarajaamiu roonamo uparacaea tee Al Masi. 12 Tee mboo sumai, sarona Isa Oputa Momalanga atomuliangi i nuncana karomiu, tee ingkomiu uka bheupotibhaaka kamuliangi minaaka i Incia, apokana tee rahumatina Aulataʼalata tee Isa Al Masi Oputa Momalanga.