6
Aulataʼala Alamboko Nabii Musa
6:1-12
1 Aulataʼala afirimanimo i Musa, pogauna, "Iakumo KAWASANA OPU. 2 Iaku padhamo kupatiumbaaka karoku i Ibrahim, Ishak, tee Yakub mboomo Aulataʼala Mokokuasa, maka Iaku inda kupepematauaka karoku i manga incia tee o saroku KAWASANA OPU.'*6:2 KAWASANA OPU: Nabii Ibrahim, Nabii Ishak, tee Nabii Yakub amatau sarona KAWASANA OPU (oni Ibrani Yahweh; kamata Bhaa. 12:8; 22:14; 25:21; 27:20; 28:13). Maka manga incia alabhi amatau sarona Aulataʼala Mokokuasa (oni Ibrani El Syaddai; kamata Bhaa. 17:1; 35:11; 48:3). Maʼanana sarona KAWASANA OPU bhaa-bhaana apaumbaakea to Musa i nuncana Limb. 3:14-15. 3 Iaku uka kupadhaangia pojanjia tee manga incia. Iaku padhamo kujanji bhekudhawuakea Tana Kanaan to manga incia, tampana manga i piamo itu adhadhi mboomo mia dhaga. 4 Sii-sii Iaku padhamo kurangoa pekeena miana Israel rampaakanamo ipabhatuana miana Mesir, tee kuudhania pojanjiaku sumai.
5 Sabutuna, pakoleleakamea i manga miana Israel ande kupogau i manga incia, 'Iakumo KAWASANA OPU, tee Iaku bhekupabebasikomiu minaaka i karajaa rodi tee kurambasakakomiu minaaka i kapabhatuana miana Mesir. Iaku bhekususuakakomiu kuasaku momaogena to kutolosiaka ingkomiu tee kupekandawuakea kahukumu matamo i miana Mesir. 6 Iaku bhekupamembalikomiu uumatiku, tee kumembali Aulataʼalamiu. Sumaimo ingkomiu bheumataua ande Iaku sii KAWASANA OPU, Aulataʼalamiu, morambasakakomiu minaaka i miana Mesir mopabhatuakomiu. 7 Iaku bhekubhawakomiu i lipu ijanjiakaku tee sumpa i Ibrahim, Ishak tee Yakub. Iaku bhekudhawuakakomiu tana sumai to amembali pewauamiu; Iakumo KAWASANA OPU.
8 Kasiimpomo Musa apakawaaka bhari-bharia kasameana KAWASANA OPU sumai i miana Israel, maka manga incia inda aperangoi Musa, rampaakanamo amate akalana tee roonamo kapabhatua momakaa sumai.
9 Kasiimpomo KAWASANA OPU afirimani i Musa, 10 "Lingkamo poaro i Firaun, rajana Mesir, mamudhaakana aundaakea miana Israel abholi lipuna."
11 Maka Musa alawani i KAWASANA OPU, "Tuaapa amembali Firaun aperangoi mia inda momakidhana mopogau mboomo iaku, sainamo miana Israel uka amendeu aperangoiaku?"
12 Mboo sumaimo KAWASANA OPU atumpu tee alamboko Musa tee Harun i miana Israel tee i Firaun, rajana Mesir, to abhawa miana Israel alimba minaaka i Tana Mesir.
Opu Lantapi-lantapina Musa tee Harun
6:13-26
13 O siimo manga kapalana kaomuna siwuluna Israel:
Manga anana Ruben, anana tumpena Yakub, akoanaaka pata mia anana umane:
siitumo Henokh, Palu, Hezron, tee Karmi. Siitumo manga kaomuna Ruben.
14 Simeon akoanaaka nama mia ana umane:
siitumo Yemuel, Yamin, Ohad, Yakhin, Zohar tee Saul. Saul sii anana samia bhawine miana Kanaan. Siitumo manga kaomuna Simeon.
15 Lewi akoanaaka talu mia ana umane:
siitumo Gerson, Kehat, tee Merari. Siitumo sarona manga anana Lewi tee siwuluna sumbesumbere. Lewi akoʼumuru 137 tao.
16 Manga anana Gerson:
siitumo Libni tee Simei mboomo kaomuna manga.
17 Manga anana Kehat:
siitumo Amram, Yizhar, Hebron, tee Uziel. Kehat akoʼumuru 133 tao.
18 Manga anana Merari:
siitumo Mahli tee Musi. Siitumo manga kaomuna Lewi tee siwuluna sumbesumbere.
19 Amram akobhawineaka Yokhebed, witinaina amana, tee bhawinena sumai akoanaaka Harun tee Musa to incia. Amram akoʼumuru 137 tao.
20 Manga anana Yizhar:
siitumo Korah, Nefeg, tee Zikhri.
21 Manga anana Uziel:
siitumo Misael, Elsafan tee Sitri.
22 Harun akawi tee Eliseba, anana bhawine o Aminadab, Eliseba uka apowitinai tee Nahason. Eliseba apalaahiri Nadab, Abihu, Eleazar tee Itamar.
23 Manga anana Korah:
siitumo Asir, Elkana, tee Abiasaf. Siitumo manga kaomuna Korah.
24 Eleazar, anana umane o Harun, akawi tee sala samia anana Putiel, tee anana manga incia Pinehas.
Siitumo bhari-bharia kapalana kaomuna Lewi mboomo siwuluna.
25 Siitumo Harun tee Musa motarimana firimanina KAWASANA OPU mboo sii, "Bhawea manga miana Israel alimba minaaka i Mesir, sarombonga-sarombonga. 26 Manga incia arua mia apokawaaka rajana Mesir mamudhaakana incia apabebasi miana Israel.
Nabii Musa tee Harun Apoaro i Firaun
6:27-29; 7:1-13
27 Wakutuuna KAWASANA OPU apogau tee Musa i Tana Mesir, 28 firimanina KAWASANA OPU mboo sii, "Iakumo KAWASANA OPU. Pakawaakea i Firaun, rajana Mesir, bhari-bharia mopadhana ipogauakaku i ingkoo."
29 Maka, Musa alawani, "KAWASANA OPU, Ingkoo umataua ande iaku inda kumakidha kupogau. Tuaapa amembali o Firaun aunda aperangoiaku?"
*6:2 6:2 KAWASANA OPU: Nabii Ibrahim, Nabii Ishak, tee Nabii Yakub amatau sarona KAWASANA OPU (oni Ibrani Yahweh; kamata Bhaa. 12:8; 22:14; 25:21; 27:20; 28:13). Maka manga incia alabhi amatau sarona Aulataʼala Mokokuasa (oni Ibrani El Syaddai; kamata Bhaa. 17:1; 35:11; 48:3). Maʼanana sarona KAWASANA OPU bhaa-bhaana apaumbaakea to Musa i nuncana Limb. 3:14-15.