SURANA PAUL
TO JAMAʼA I
GALATIA
POGAU BHAA-BHAANA
Wakutuuna o Lele Malapena Isa apepuumo atopakoleleaka tee atarimaia manga mia inda motolentuna miana Yahudi, dhaangiamo o mia mopekaabha-abhana, buaka to tamembali samia Karasiteni motaʼati tabeana taose hukumuna agamana Yahudi? Maka o Paul apogauakea ande o giu incia sumai inda afaraluu, roonamo satotuuna saangu-anguna o kaadhari momalape to dhadhina miana Karasiteni siitumo aparacaea tee Isa Al Masi. Teemo kaparacaea incia sumai o pokaiana Aulataʼala tee maanusia amembali apomalape pendua. Maka manga mia mobhalina Paul aumbatimo manga jamaʼa i Galatia, siitumo saangu poropinsi i Asia Maidhiidhi.*1:0 Asia Maidhiidhi: I zamani sii-sii o tana incia sii atosarongiaka Turki. Manga incia apogau ande tapeelu tapomalape pendua tee Aulataʼala, tabeana porikana taose hukumuna agamana Yahudi.
Surana Paul to Jamaʼa i Galatia atoburi to atulungiaka manga mia mopadhana ipasaladhalana manga kaadhari mosala sumai, mamudhaakana manga incia ambuli ataʼati i kaadhari mobanara. Bhaa-bhaana ibhoasakana Paul i nuncana sura sumai siitumo incia apogauaka ande incia akohaku atosarongi rasuluna Isa Al Masi. Tee mpuu-mpuuna incana o Paul apogau ande o kakembana to amembali rasulu sumai minaaka i Aulataʼala, mencuana aminaaka i maanusia. Tee o tugasina sumai apatujuakea mpuu to mia inda motolentuna miana Yahudi (1-2). Sapadhana Paul apogauaka kayaakinina ande o pokaiana maanusia tee Aulataʼala amembali apomalape pendua tangkanamo alaloi kaparacaeata tee Aulataʼala (3-4). I pasala kapadhaana boku incia sii (5-6), Paul apogauakea, ande o kaasi modhaangiana i nuncana karona miana Karasiteni rampaakanamo kaparacaeana tee Al Masi, dhaanamo kaasi sumai apamembali manga mia bheapewau manga kaadharina agama Karasiteni.
Antona
Porikanaana Pogau 1:1-10
Hakuna Paul amembali rasulu 1:11--2:21
Lele Malape mopogauakana rahumatina Aulataʼala 3:1--4:31
Kabebasi tee opea iwaajibuakana miana Karasiteni 5:1--6:10
Kapadhaana Pogau 6:11-18
1
Salamu
1:1-5
1-2 To manga jamaʼa i Galatia, minaaka i Paul, samia rasulu, tee minaaka i bhari-bharia witinai mopobhawana tee iaku. Kauncuramakaku kumembali rasulu sii inda kupotibhaakea minaaka i maanusia, tee inda aangkaaku maanusia, maka aangkaaku Isa Al Masi tee Aulataʼala o Ama, mopadhana mopadhadhina Isa pendua minaaka i mate. 3 Maasangia Aulataʼala o Amata tee Isa Al Masi Oputa Momalanga adhawukomiu rahumati tee udhadhi pomalape. 4 Isa padhamo apasaraakaaka karona to manga dosata mamudhaakana tatopasalaamati minaaka i zamani momadhaki sii mboomo peeluana Aulataʼala o Amata. 5 Atomuliangimo Aulataʼala saʼumurua! Aamin.
Tangkanamo Saangu Lele Malape
1:6-10
6 Iaku kumente, ingkomiu amasimba mpuu ubholi Aulataʼala, mopadhana mokembakomiu alaloi rahumatina modhaangiana i nuncana Al Masi, tee uose lele malape mosagaanana tee inda uose Lele Malape mobanara. 7 Satotuuna inda dhaangia o Lele Malape mosagaanana, tangkanamo dhaangia manga mia mopakacaukomiu tee mohaejatina to abhalii Lele Malapena Al Masi. 8 Maka moomini o karomami atawa o malaaʼekati mosapona minaaka i sorogaa uka, taroakamo mia incia sumai atotunda ande apakawaaka Lele Malape moposalana tee Lele Malape mopadhana ipakawaakamami to ingkomiu. 9 Mboomo mopadhana ibhoasakamami i piamo itu, sii-sii kubhoasakamea pendua: Taroakamo Aulataʼala atunda mia mopakoleleakana Lele Malape moposalana tee Lele Malape mopadhana itarimamiu minaaka i ingkami!
10 Buaka rampaakanamo giu incia sumai iaku kabilanga kuharapu mamudhaakana aʼakuiaku maanusia? Atantumo inda! Iaku tangkanamo kuharapuaka kaʼakuina o Aulataʼala. Buaka iaku tangasaana kuala inca mamudhaakana amaasiakaaku maanusia? Ande iaku kupewau mboo sumai, sumaimo iaku mencuana bhatuana Al Masi.
Tuaapa Carana Paul Amembali Rasulu
1:11-24
11 E manga witinaiku, ingkomiu tabeana umataua ande o Lele Malape ipakawaakaku sumai mencuana aminaaka i maanusia. 12 Iaku inda kutarima Lele Malape sumai minaaka i maanusia, tee mencuana maanusia moadhariakaaku, maka kutarimaia alaloi wahiyuu minaaka i Isa Al Masi.
13 1:13 Tul. 8:3; 22:4-5; 26:9-11. Ingkomiu dhaanamo urangoa opea mopadhana ipewauku i piamo itu wakutuuna dhaangiapo kuose agamana miana Yahudi, ingkomiu umataua tuaapa o kasegaku wakutuuna kusikisaa jamaʼana Aulataʼala, tee uka kuʼusaha to kupabinasea manga incia. 14 1:14 Tul. 22:3. I nuncana giuna ibaadati i Aulataʼala tee cara ipewauna miana Yahudi, iaku alabhi o ilimuuku minaaka i miana Yahudi mopokanana umuru tee iaku. I piamo itu, iaku kuraji mpuu kuose bhari-bharia adati iadhariakana opu-opuaku. 15 1:15-16 Tul. 9:3-6; 22:6-10; 26:13-18.Maka rampaakanamo kalapena incana Aulataʼala, Incia apiliaku apepuu minaaka i nuncana kadhumana inaku tee akembaaku alaloi rahumatina mamudhaakana kulaiania. 16 Aulataʼala apatiumbaaka Anana i nuncana karoku mamudhaakana kupakoleleakea i tanga-tangana manga mia inda motolentuna miana Yahudi. I wakutuu incia sumai, iaku inda sampeampearo kulingka kupomufakatiakea tee incemapo uka. 17 Iaku uka inda kupene i Yerusalem to kupokawaaka manga mia moporikanana momembalina rasulu, siitumo manga murina Isa. Maka lausaka kulingka i Tana Arabu, kasiimpo kumbuli pendua i Damsyik.
18 1:18 Tul. 9:26-30. Talu tao sapadhana sumai, iaku kupene i Yerusalem mamudhaakana kupomatau tee Petrus,†1:18 Petrus: Kaburi moʼasiliina apake sarona "Kefas." I nuncana pogau Aram, Kefas akomaʼana 'bhatu', apokana tee "Petrus" i nuncana pogau Yunani. Pogau Aram apakea raʼeatina Israel i zamanina Isa tee manga murina. tee kumboore tee incia kangengena sapulu lima eo. 19 Maka inda dhaangia o rasulu mosagaanana ikamataku, iwe sumai ikamataku tangkanamo Yakub witinaina Isa Oputa Momalanga. 20 (Opea iburiku sii atotuu, Aulataʼala amataua ande iaku inda kugau-gau.)
21 Sapadhana kupokawaaka Petrus tee Yakub, iaku kulingkamo i poropinsi Siria tee i poropinsi Kilikia. 22 Maka manga jamaʼa moparacaeana tee Al Masi i Yudea indapo amatauaku mpuu. 23 Manga incia tangkanamo arango mia mopogauna, "Mia mangasikisaana i piamo itu, sii-sii apakoleleakamo Lele Malape, sainamo i piamo itu incia gauna apabinasa manga mia moparacaeana tee Al Masi." 24 Siitumo manga incia amuliangi Aulataʼala rampaakanamo iaku.
*^ 1:0 Asia Maidhiidhi: I zamani sii-sii o tana incia sii atosarongiaka Turki.
1:13 1:13 Tul. 8:3; 22:4-5; 26:9-11.
1:14 1:14 Tul. 22:3.
1:15 1:15-16 Tul. 9:3-6; 22:6-10; 26:13-18.
1:18 1:18 Tul. 9:26-30.
†1:18 1:18 Petrus: Kaburi moʼasiliina apake sarona "Kefas." I nuncana pogau Aram, Kefas akomaʼana 'bhatu', apokana tee "Petrus" i nuncana pogau Yunani. Pogau Aram apakea raʼeatina Israel i zamanina Isa tee manga murina.